ಉಪಹಾರ ಲೇಬಲ್‌ನೊಂದಿಗೆ ಪೋಸ್ಟ್‌ಗಳನ್ನು ತೋರಿಸಲಾಗುತ್ತದೆ. ಎಲ್ಲಾ ಪೋಸ್ಟ್‌ಗಳನ್ನು ತೋರಿಸಿ
ಉಪಹಾರ ಲೇಬಲ್‌ನೊಂದಿಗೆ ಪೋಸ್ಟ್‌ಗಳನ್ನು ತೋರಿಸಲಾಗುತ್ತದೆ. ಎಲ್ಲಾ ಪೋಸ್ಟ್‌ಗಳನ್ನು ತೋರಿಸಿ

ಶುಕ್ರವಾರ, ಮಾರ್ಚ್ 9, 2018

ಮಗೆಕಾಯಿ / ಬಣ್ಣದ ಸೌತೆಕಾಯಿ ಸಿಹಿ ಇಡ್ಲಿ :

ಸಿರ್ಸಿ, ಸಿದ್ದಾಪುರ ಕಡೆ ಬೆಳೆಯುವ ಮಗೆಕಾಯಿ ಮಂಗಳೂರು ಸೌತೆ ಅಥವಾ ಬಣ್ಣದ ಸೌತೆಕಿಂತ ಸ್ವಲ್ಪ ಭಿನ್ನ. ಒಂದೇ ಜಾತಿಯೇ ಆದರೂ ಮಂಗಳೂರು ಸೌತೆಯಲ್ಲಿ  ಕೆಲವು ಸ್ವಲ್ಪ ಕಹಿ ಬರುತ್ತದೆ. ಕಹಿ ಇದ್ದರೆ ಕತ್ತರಿಸಿ ಸ್ವಲ್ಪ ಹೊತ್ತು ನೀರಿನಲ್ಲಿ ನೆನೆಸಿಟ್ಟು ಉಪಯೋಗಿಸಿದರೆ ಕಹಿ ಇರುವುದಿಲ್ಲವಂತೆ. 

ಸಾಮಗ್ರಿಗಳು :
ದೋಸೆ ಅಕ್ಕಿ :  2 ಕಪ್ 
ಕಡ್ಲೆ ಬೇಳೆ : 1/4 ಕಪ್ 
ಉದ್ದಿನಬೇಳೆ : 1/4 ಕಪ್ 
ಮೆಂತ್ಯ : 2 ಚಮಚ 
ಮಗೆಕಾಯಿ / ಬಣ್ಣದ ಸೌತೆ : 1- 1.5 
ಬೆಲ್ಲ : 1/2 - 3/4 ಕಪ್ 
ಉಪ್ಪು : ರುಚಿಗೆ 

ವಿಧಾನ :
ಅಕ್ಕಿಯನ್ನು ತೊಳೆದು ನೀರಿನಲ್ಲಿ ನೆನೆಸಿ.  ಕಡ್ಲೆಬೇಳೆ, ಉದ್ದಿನಬೇಳೆ, ಮೆಂತ್ಯ ಎಲ್ಲ ಸೇರಿಸಿ ತೊಳೆದು ನೀರು ಹಾಕಿ ಎಲ್ಲವನ್ನೂ 5-6 ಘಂಟೆ ನೆನೆಸಿಡಿ. ಮಗೆಕಾಯಿಯನ್ನು ಸಿಪ್ಪೆ ಮತ್ತು ಬೀಜ ತೆಗೆದು ಸಣ್ಣಗೆ ಹೆಚ್ಚಿ. ಒಂದು ಕಪ್ ಆದಷ್ಟು ಸಣ್ಣ ಹೆಚ್ಚಿದ ಹೋಳುಗಳನ್ನು ತೆಗೆದಿಟ್ಟುಕೊಳ್ಳಿ. ನೆನೆಸಿದ ಅಕ್ಕಿಯನ್ನು ನೀರು ಬಗ್ಗಿಸಿ  ಮಗೆಕಾಯಿ ಹೋಳನ್ನು ಸ್ವಲ್ಪ ಸ್ವಲ್ಪವೇ ಹಾಕುತ್ತಾ ನೀರು ಹಾಕದೇ ಇಡ್ಲಿ ಹಿಟ್ಟಿನ ಹದಕ್ಕೆ ಗಟ್ಟಿಯಾಗಿ, ತರಿ ತರಿಯಾಗಿ ರುಬ್ಬಿಕೊಳ್ಳಿ. ನಂತರ ಉಳಿದ ಕಡ್ಲೆಬೇಳೆ ಮಿಶ್ರಣವನ್ನು ನೀರು ಬಗ್ಗಿಸಿ ಮತ್ತೆ ಮಗೆಕಾಯಿ ಹೋಳಿನಲ್ಲಿ ನುಣ್ಣಗೆ, ಗಟ್ಟಿಯಾಗಿ ರುಬ್ಬಿ ಅಕ್ಕಿ ಮಿಶ್ರಣಕ್ಕೆ ಸೇರಿಸಿ ಕಲಸಿ.  ಒಂದು ಪಾತ್ರೆಗೆ ಒಂದು ಲೋಟ ನೀರು ಹಾಕಿ ಅದಕ್ಕೆ ಒಂದು ಸೌಟು ರುಬ್ಬಿದ ಹಿಟ್ಟು, ಅರ್ಧ ಕಪ್ ಬೆಲ್ಲ, ರುಚಿಗೆ ತಕ್ಕಷ್ಟು ಉಪ್ಪು, ಸಣ್ಣಗೆ ಹೆಚ್ಚಿ ತೆಗೆದಿಟ್ಟ ಮಗೆಕಾಯಿ ಹೋಳು ಹಾಕಿ ಸಣ್ಣ ಉರಿಯಲ್ಲಿ ಕೈ ಬಿಡದೇ ಕಲಕುತ್ತಾ ಮಿಶ್ರಣ ಸ್ವಲ್ಪ ದಪ್ಪ ಆಗುವವರೆಗೆ ಕಾಯಿಸಿ. ಇದು ತಣ್ಣಗಾದ ಮೇಲೆ ಉಳಿದ ಹಿಟ್ಟಿನ ಮಿಶ್ರಣಕ್ಕೆ ಸೇರಿಸಿ ಚೆನ್ನಾಗಿ ಕಲಸಿ. ಬೇಕಿದ್ದರೆ ರುಚಿ ನೋಡಿಕೊಂಡು ಬೆಲ್ಲ ಕಮ್ಮಿ ಇದ್ದಲ್ಲಿ ಸೇರಿಸಿಕೊಳ್ಳಬಹುದು. ರಾತ್ರಿ ಹಿಟ್ಟನ್ನು ತಯಾರು ಮಾಡಿ ಮುಚ್ಚಿಡಿ. ಇದು ಚೆನ್ನಾಗಿ ಹುದುಗಬೇಕು. ಆಗ ಮಾತ್ರ ಇಡ್ಲಿ ಮೆತ್ತಗೆ ಚೆನ್ನಾಗಿ ಆಗುತ್ತದೆ. ಬೆಳಿಗ್ಗೆ ಹುದುಗಿದ  ಹಿಟ್ಟನ್ನು ಮತ್ತೊಮ್ಮೆ ಚೆನ್ನಾಗಿ ಕಲಸಿ ಎಣ್ಣೆ ಸವರಿದ ಇಡ್ಲಿ ತಟ್ಟೆಯಲ್ಲಿ ಬೇಯಿಸಿದರೆ ಬಿಸಿ ಬಿಸಿಯಾದ ಮಗೆಕಾಯಿ ಸಿಹಿ ಇಡ್ಲಿ ತುಪ್ಪ ಮತ್ತು ಕಾಯಿ ಚಟ್ನಿಯೊಡನೆ ಸವಿಯಲು ಸಿದ್ಧ.



ಶನಿವಾರ, ಏಪ್ರಿಲ್ 15, 2017

ಕಲ್ಲಂಗಡಿ ಸಿಪ್ಪೆಯ ದೋಸೆ :

ಕಲ್ಲಂಗಡಿ ಹಣ್ಣಿನ ಕೆಂಪು ಭಾಗವನ್ನು ಮಾತ್ರ  ತಿಂದು ಅದರ ಸಿಪ್ಪೆಯ ಜೊತೆ ಇರುವ ಬಿಳಿಯ ಭಾಗವನ್ನು ಹಾಗೆಯೇ ಬಿಸಾಡುವುದು ರೂಢಿ.... ಅದರ ಬದಲು ಸಿಹಿಯಾದ ಕೆಂಪು ಭಾಗವನ್ನು ಕತ್ತರಿಸಿ ತಿಂದು, ಸಪ್ಪೆಯಾಗಿರುವ ಬಿಳಿಯ ಭಾಗವನ್ನು ಹಾಕಿ ಗರಿ ಗರಿ ದೋಸೆ ಮಾಡಿಕೊಳ್ಳಬಹುದು.... ಇಲ್ಲಿದೆ ಮಾಡುವ ವಿಧಾನ... 

ಸಾಮಗ್ರಿಗಳು :
ಹೆಚ್ಚಿದ ಕಲ್ಲಂಗಡಿ ಸಿಪ್ಪೆ : 2 ಕಪ್ (ಸಿಪ್ಪೆಯ ಹಸಿರು ಭಾಗ ತೆಗೆದು ಒಳಗಿನ ಬಿಳಿಯ ಭಾಗವನ್ನು ಹೆಚ್ಚಿಕೊಳ್ಳಿ) 
ಅಕ್ಕಿ : 2 ಕಪ್ 
ಅವಲಕ್ಕಿ : 1 ಟೇಬಲ್ ಚಮಚ 
ಮೆಂತ್ಯ : 1/4 ಚಮಚ 
ಉದ್ದಿನ ಬೇಳೆ : 1/2 ಚಮಚ 
ಉಪ್ಪು : ರುಚಿಗೆ 
ಎಣ್ಣೆ : ದೋಸೆ ತವಾಗೆ ಸವರಲು 

ವಿಧಾನ :
ಅಕ್ಕಿ, ಅವಲಕ್ಕಿ, ಉದ್ದಿನ ಬೇಳೆ, ಮೆಂತ್ಯ ಕಾಳು  ಎಲ್ಲವನ್ನೂ ತೊಳೆದು ಒಟ್ಟಿಗೆ ಸೇರಿಸಿ 4-5 ಘಂಟೆಗಳ ಕಾಲ ನೆನೆಸಿಡಿ. 

ನಂತರ ನೀರು ಬಸಿದಿಟ್ಟುಕೊಂಡು  ಹೆಚ್ಚಿದ ಕಲ್ಲಂಗಡಿ ಜೊತೆ ಸೇರಿಸಿ ರುಬ್ಬಿ. ಬೇಕಿದ್ದಲ್ಲಿ ಬಸಿದಿಟ್ಟುಕೊಂಡ ನೀರನ್ನೇ ಸ್ವಲ್ಪ ಸೇರಿಸಿಕೊಂಡು ನುಣ್ಣಗೆ ರುಬ್ಬಿಕೊಳ್ಳಿ. ಈ ಹಿಟ್ಟನ್ನು 7-8 ಘಂಟೆಗಳ ಕಾಲ ಹುದುಗಲು ಬಿಡಿ. ರಾತ್ರಿ ರುಬ್ಬಿಟ್ಟರೆ ಬೆಳಿಗ್ಗೆ ತಿಂಡಿಗೆ ಮಾಡಬಹುದು. ಇದಕ್ಕೆ ಉಪ್ಪು, ಬೇಕಿದ್ದಲ್ಲಿ ಸ್ವಲ್ಪ ನೀರು ಸೇರಿಸಿ ದೋಸೆ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. 

ದೋಸೆ ತವಾಗೆ  ಎಣ್ಣೆ ಸವರಿ ಚೆನ್ನಾಗಿ ಕಾಯಿಸಿ ತೆಳ್ಳಗೆ ದೋಸೆ ಮಾಡಿ ಮುಚ್ಚಿ ಬೇಯಿಸಿ. 

ಗರಿಗರಿಯಾದ ಕಲ್ಲಂಗಡಿ ದೋಸೆಯನ್ನು ಕಾಯಿ ಚಟ್ನಿ ಜೊತೆ ಸವಿಯಿರಿ.
ಸಲಹೆಗಳು : 
1) ಇದೇ ಹಿಟ್ಟಿನಿಂದ ದೋಸೆಯ ಬದಲು ತೆಳ್ಳೇವು ಕೂಡ ಮಾಡಬಹುದು.
2) ನಿಮಗೆ ಇಷ್ಟವಿದ್ದರೆ ದೋಸೆ ಮಾಡುವಾಗ ಎಣ್ಣೆ / ತುಪ್ಪ ಹಾಕಿಕೊಳ್ಳಬಹುದು.

ಗುರುವಾರ, ಮಾರ್ಚ್ 30, 2017

ಅವಲಕ್ಕಿ ಬಾತ್ :

ಸಾಮಗ್ರಿಗಳು :
ದಪ್ಪ ಅವಲಕ್ಕಿ- 1 ಕಪ್,
ಹಸಿ ಬಟಾಣಿ - 1/4 ಕಪ್,
ಈರುಳ್ಳಿ - 1,
ಟೊಮೇಟೊ - 1 (ಬೇಕಿದ್ದಲ್ಲಿ ಮಾತ್ರ) 
ಹಸಿಮೆಣಸಿನಕಾಯಿ - 1,
ತೆಂಗಿನ ತುರಿ - 4 ಚಮಚ,
ರಸಂ ಪುಡಿ - 1/2 ಚಮಚ,
ಅರಿಶಿನ ಪುಡಿ - 1/4 ಚಮಚ,
ಎಣ್ಣೆ - 4-5 ಚಮಚ,
ಉದ್ದಿನ ಬೇಳೆ - 1/2 ಚಮಚ,
ಸಾಸಿವೆ - 1/4 ಚಮಚ,
ಕರಿಬೇವು - 6-8 ಎಲೆಗಳು,
ಸಕ್ಕರೆ- 1 ಚಮಚ,
ಉಪ್ಪು - ರುಚಿಗೆ 

ವಿಧಾನ :
ಮೊದಲು ಅವಲಕ್ಕಿಯನ್ನು ತೊಳೆದು, ನೀರು ಹಾಕಿ 15-20 ನಿಮಿಷ ನೆನೆಸಿಡಿ. ಮೆತ್ತಗಾಗಬೇಕು, ಆದರೆ ತುಂಬಾ ಗಂಜಿಯಾಗುವಷ್ಟು ಮೆತ್ತಗಾಗಬಾರದು. ಈರುಳ್ಳಿ ಮತ್ತು ಟೊಮ್ಯಾಟೊವನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಹಸಿಮೆಣಸಿನಕಾಯಿಯನ್ನು ಉದ್ದ ಸೀಳಿಕೊಳ್ಳಿ.  ಹಸಿಬಟಾಣಿಗೆ ನೀರು ಮತ್ತು ಚಿಟಿಕೆ ಉಪ್ಪು ಹಾಕಿ ಬೇಯಿಸಿಕೊಳ್ಳಿ. ನೆಂದ ಅವಲಕ್ಕಿಯ ನೀರನ್ನು ಪೂರ್ತಿಯಾಗಿ ಬಸಿದುಕೊಂಡು ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಸಕ್ಕರೆ ಹಾಕಿ ಕಲಸಿಟ್ಟುಕೊಳ್ಳಿ. ಬಾಣಲೆಯನ್ನು ಒಲೆಯ ಮೇಲಿಟ್ಟು ಎಣ್ಣೆ ಹಾಕಿ ಕಾದ ಮೇಲೆ ಉದ್ದಿನ ಬೇಳೆ ಹಾಕಿ, ಅದು ಹೊಂಬಣ್ಣ ಬಂದ ಮೇಲೆ ಸಾಸಿವೆ ಹಾಕಿ ಚಿಟಪಟಾಯಿಸಿ. ಇದಕ್ಕೆ ಹಸಿಮೆಣಸಿನಕಾಯಿ, ಕರಿಬೇವು ಹಾಕಿ ಒಮ್ಮೆ ಹುರಿದು, ಹೆಚ್ಚಿದ ಈರುಳ್ಳಿ ಹಾಕಿ ಫ್ರೈ ಮಾಡಿ. ನಂತರ ಹೆಚ್ಚಿದ ಟೊಮೇಟೊ ಹಾಕಿ ಮೆತ್ತಗಾಗುವವರೆಗೆ ಹುರಿಯಿರಿ. ಇದಕ್ಕೆ ಬೇಯಿಸಿಕೊಂಡ ಬಟಾಣಿ, ತೆಂಗಿನತುರಿ, ಅರಿಶಿನ ಪುಡಿ, ರಸಂ ಪುಡಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಅವಲಕ್ಕಿ ಹಾಕಿ ಕಲಸಿ. ಬೇಕಿದ್ದಲ್ಲಿ ಸ್ವಲ್ಪ ಕೊತ್ತಂಬರಿ ಸೊಪ್ಪು ಹಾಕಿ ಮಿಕ್ಸ್ ಮಾಡಿದರೆ ಬಿಸಿ ಬಿಸಿ ಅವಲಕ್ಕಿ ರೆಡಿ. ಸರ್ವ್ ಮಾಡುವಾಗ ಗರಿ ಗರಿ ಸೇವ್ ಅಥವಾ mixture ಅನ್ನು ಮೇಲಿಂದ ಉದುರಿಸಿ ಕೊಡಿ. ಇದು ಬೆಳಗ್ಗಿನ ಉಪಹಾರಕ್ಕೆ ಅಥವಾ ಸಂಜೆಯ ಟೀ / ಕಾಫೀ ಜೊತೆ ಕೂಡ ಮಾಡಿಕೊಳ್ಳಬಹುದು. 

ಸೋಮವಾರ, ಫೆಬ್ರವರಿ 6, 2017

ಹಸಿ ಬಟಾಣಿ ರೊಟ್ಟಿ :

ಸಾಮಗ್ರಿಗಳು :
ಹಸಿ ಬಟಾಣಿ (green peas) : 1 ಕಪ್
ಅಕ್ಕಿ ಹಿಟ್ಟು : 2 ಕಪ್
ಜೀರಿಗೆ :1೧ ಚಮಚ
ಕೊತ್ತಂಬರಿ ಸೊಪ್ಪು : 2-3 ಚಮಚ (ಸಣ್ಣಗೆ ಹೆಚ್ಚಿದ್ದು)
ತೆಂಗಿನ ತುರಿ : 3-4 ಚಮಚ
ಹಸಿಮೆಣಸಿನ ಕಾಯಿ ಸಣ್ಣಗೆ ಹೆಚ್ಚಿದ್ದು : 1 ಚಮಚ (ಅಥವಾ ಅಚ್ಚ ಮೆಣಸಿನ ಪುಡಿ - 1 ಚಮಚ) 
ಉಪ್ಪು : ರುಚಿಗೆ 
ಎಣ್ಣೆ : ಬೇಯಿಸಲು 
ಬಾಳೆ ಎಲೆ  ಅಥವಾ ಒಬ್ಬಟ್ಟಿನ ಶೀಟ್ ರೊಟ್ಟಿ ತಟ್ಟಲು 

ವಿಧಾನ :
ಹಸಿ ಬಟಾಣಿ ತೊಳೆದು,  ನೀರು ಹಾಕಿ ಬೇಯಿಸಿಕೊಂಡು, ನೀರು ಬಸಿದುಕೊಳ್ಳಿ.  ದಪ್ಪ ತಳದ ಪಾತ್ರೆ ಅಥವಾ ಬಾಣಲೆಗೆ 2 ಕಪ್ ನೀರು ಹಾಕಿ ಅದಕ್ಕೆ ಉಪ್ಪು, ಜೀರಿಗೆ ಹಾಕಿ ಕುದಿಯಲು ಬಿಡಿ. ನಂತರ ಒಂದು ಸೌಟಿನಷ್ಟು ಅಕ್ಕಿಹಿಟ್ಟು ಹಾಕಿ ಗಂಟಿಲ್ಲದೆ ಕಲಕಿ ಉಳಿದ ಅಕ್ಕಿಹಿಟ್ಟನ್ನು ಹಾಕಿ ಚೆನ್ನಾಗಿ ಕಲಕಿ ಉರಿ ಆರಿಸಿ. ಸ್ವಲ್ಪ ತಣ್ಣಗಾದ ಮೇಲೆ (ಕೈ ಇಂದ ಹಿಟ್ಟನ್ನು ಕಲೆಸಲು ಆಗುವಷ್ಟು) ಇದಕ್ಕೆ ಬೇಯಿಸಿದ ಬಟಾಣಿ, ತೆಂಗಿನ ತುರಿ, ಹಸಿಮೆಣಸು/ ಅಚ್ಚ ಖಾರದ ಪುಡಿ, ಕೊತ್ತಂಬರಿ ಸೊಪ್ಪು ಹಾಕಿ ಚೆನ್ನಾಗಿ ಕಲಸಿ. ಹಿಟ್ಟು ರೊಟ್ಟಿ ತಟ್ಟುವಷ್ಟು ಮೆತ್ತಗಿರಬೇಕು. ಗಟ್ಟಿ ಎನಿಸಿದರೆ ಸ್ವಲ್ಪ ಬಿಸಿ ನೀರು ಹಾಕಿ ಕಲಸಿಕೊಳ್ಳಿ. ನಂತರ ಒಬ್ಬಟ್ಟಿನ ಶೀಟ್ ಗೆ ಎಣ್ಣೆ ಸವರಿ, ಕಲಸಿದ ಹಿಟ್ಟಿನಿಂದ  ಚಪಾತಿ ಉಂಡೆ ಗಾತ್ರದ ಉಂಡೆ ಮಾಡಿ ಶೀಟ್ ಮೇಲೆ ತಟ್ಟಿ. ಬಾಳೆ ಎಲೆ ಇದ್ದರೆ ಅದನ್ನು ಸೀಳಿಕೊಂಡು ಸ್ವಲ್ಪ ಬೆಂಕಿಯಲ್ಲಿ ಬಾಡಿಸಿ ಎಣ್ಣೆ ಸವರಿ ರೊಟ್ಟಿ ತಟ್ಟಬಹುದು. ಈಗ ಕಾದ ತವಾ ಮೇಲೆ ತಟ್ಟಿದ ರೊಟ್ಟಿ ಹಾಕಿ ಎಣ್ಣೆ ಹಾಕಿ ಮುಚ್ಚಳ ಮುಚ್ಚಿ ಎರಡೂ ಕಡೆ ಬೇಯಿಸಿ.



ಸೂಚನೆಗಳು :
೧) ಬಟಾಣಿ ತುಂಬಾ ಬಲಿತಿದ್ದರೆ ಚೆನ್ನಾಗಿರುವುದಿಲ್ಲ. ಸ್ವಲ್ಪ ಎಳೆಯದಾಗೇ  ಇರಲಿ.
೨) ಇದೇ ರೀತಿ ಹಿತುಕಿದ ಅವರೇಕಾಳು ಹಾಕಿ ರೊಟ್ಟಿ ಮಾಡಬಹುದು. 


ಗುರುವಾರ, ಡಿಸೆಂಬರ್ 1, 2016

ಅಕ್ಕಿ ತಾಳಿಪಿಟ್ಟು (ವಡಪೆ)

ಸಾಮಗ್ರಿಗಳು:
ಅಕ್ಕಿ ಹಿಟ್ಟು - 2 ಕಪ್ಸ್,
ಸವತೆಕಾಯಿ - 2, 
ಈರುಳ್ಳಿ - 3, 
ಕೊತ್ತ೦ಬರಿ ಸೊಪ್ಪು 1 ಹಿಡಿ, 
ಕರಿಬೇವು 8-10 ಎಲೆಗಳು,
ಹಸಿಮೆಣಸು 5-6, 
ಜೀರಿಗೆ 1 ಟೇಬಲ್ ಚಮಚ ,  
ಉಪ್ಪು ರುಚಿಗೆ ತಕ್ಕಷ್ಟು, ಎಣ್ಣೆ ½ ಕಪ್.







ವಿಧಾನ: ಈರುಳ್ಳಿಯನ್ನು ಸಣ್ಣದಾಕಿ ಹೆಚ್ಚಿಕೊಳ್ಳಿ. ಸವತೆಕಾಯಿಯನ್ನು ತುರಿದುಕೊಳ್ಳಿ. ಹಸಿಮೆಣಸು,ಕೊತ್ತ೦ಬರಿ ಸೊಪ್ಪು, ಜೀರಿಗೆ ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ದಪ್ಪತಳದ ಬಾಣಲೆಗೆ ತುರಿದಿಟ್ಟ ಸವತೆಕಾಯಿ ರುಬ್ಬಿದ ಮಿಶ್ರಣ ಹಾಕಿ ಅದು ಸ್ವಲ್ಪ ಬಿಸಿ ಬ೦ದ ಮೇಲೆ ಉಪ್ಪು, ಈರುಳ್ಳಿ, ಸಣ್ಣಗೆ ಕತ್ತರಿಸಿದ ಕರಿಬೇವು, ಸಣ್ಣಗೆ ಹೆಚ್ಚಿದ ಕೊತ್ತ೦ಬರಿ ಸೊಪ್ಪು ಹಾಕಿ ನ೦ತರ ಸ್ವಲ್ಪ ಅಕ್ಕಿ ಹಿಟ್ಟು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ ಹಾಗೆ ಉರಿ ಆರಿಸಿ. ನ೦ತರ ಉಳಿದ ಅಕ್ಕಿ ಹಿಟ್ಟು ಸೇರಿಸಿ. ಈ ಹಿಟ್ಟು ಬಿಸಿ ಆರಿದ ಮೇಲೆ ಚೆನ್ನಾಗಿ ಕಲೆಸಿಕೊಳ್ಳಿ. ಬೇಕಾದಲ್ಲಿ ಬಿಸಿ ನೀರು ಸೇರಿಸಿ.  ಹಿಟ್ಟನ್ನು ಸ್ವಲ್ಪ ತೆಳ್ಳಗೆ ಕಲೆಸಿಕೊಳ್ಳಿ. ಕೈಯಲ್ಲಿ ಆರಾಮಾಗಿ ತಟ್ಟಲು ಬರುವ೦ತಿರಬೇಕು. (ಹಿಟ್ಟು ಸ್ವಲ್ಪ ಗಟ್ಟಿಯಾಗಿದೆ ಎ೦ದು ಅನಿಸಿದರೆ ಸ್ವಲ್ಪ ಮೊಸರು ಸೇರಿಸಿ ಕಲೆಸಿಕೊಳ್ಳಿ). ಈ ಹಿಟ್ಟನ್ನು ಚಪಾತಿ ಹಿಟ್ಟಿನ ಉ೦ಡೆ ಗಾತ್ರ ಮಾಡಿಕೊ೦ಡು ಪ್ಲಾಸ್ಟಿಕ್ ಹಾಳೆಗೆ (ಅಕ್ಕಿ ಹಿಟ್ಟಿನ ಕವರ್,ಎಣ್ಣೆ ಕವರ್ ಕತ್ತರಿಸಿ ಬಳಸಬಹುದು.) ಎಣ್ಣೆ ಸವರಿಕೊ೦ಡು ಹಿಟ್ಟಿನ ಉ೦ಡೆ ಇಟ್ಟು ಕೈಗೆ ಸ್ವಲ್ಪ ಎಣ್ಣೆ ಸವರಿಕೊ೦ಡು ತೆಳ್ಳಗೆ ತಟ್ಟಿ ಕಾದ ಕಾವಲಿಯ ಮೇಲೆ ಹಾಕಿ ಮೇಲಿನಿ೦ದ ಸ್ವಲ್ಪ ಎಣ್ಣೆ ಹಾಕಿ ಎರಡೂ ಕಡೆ ಬೇಯಿಸಿ.




ಚಟ್ನಿ ಅಥವಾ ತುಪ್ಪ ಬೆಲ್ಲದ ಜೊತೆ ತಿನ್ನಬಹುದು.

ಶುಕ್ರವಾರ, ಜುಲೈ 29, 2016

ಕ್ಯಾರೇಟ್ ಕ್ಯಾಪ್ಸಿಕಮ್ ಚಪಾತಿ:

ಸಾಮಗ್ರಿಗಳು : ಗೋಧಿ ಹಿಟ್ಟು 2 ಕಪ್, ಕ್ಯಾರೇಟ್ - 1, ಕ್ಯಾಪ್ಸಿಕಮ್ - 1, ಉಪ್ಪು, ಕಿಚನ್ ಕಿ೦ಗ್ ಮಸಾಲಾ - 1 ಚಮಚ, ಅಚ್ಚ ಖಾರದ ಪುಡಿ, ಎಣ್ಣೆ 1/2 ಕಪ್.





ವಿಧಾನ: ಕ್ಯಾಪ್ಸಿಕಮ್ ನ್ನು ಸಣ್ಣಗೆ ಹೆಚ್ಚಿಕೊಳ್ಳಿ, ಹಾಗೆ ಕ್ಯಾರೇಟ್ ನ್ನು ತುರಿದುಕೊಳ್ಳಿ. ಒ೦ದು ಬಾಣಲೆಗೆ 2 ಚಮಚ ಎಣ್ಣೆ ಹಾಕಿ ಅದು ಕಾದ ಮೇಲೆ ಹೆಚ್ಚಿಟ್ಟ ಕ್ಯಾಪ್ಸಿಕಮ್ & ಕ್ಯಾರೇಟ್ ಹಾಕಿ 5 ನಿಮಿಷ ಫ್ರೈ ಮಾಡಿ. ಸ್ವಲ್ಪ ನೀರು, ಉಪ್,ಪು ಕಿಚನ್ ಕಿ೦ಗ್ ಮಸಾಲ, ಅಚ್ಚ ಖರದ ಪುಡಿ ಹಾಕಿ ಬೇಯಿಸಿ. ಅರ್ಧ ಬೆ೦ದರೆ ಸಾಕು. ಹಾಗೆ ಇದು ಬಿಸಿ ಕಮ್ಮಿ ಆದ ಮೇಲೆ ಗೋಧಿ ಹಿಟ್ಟು ಸೇರಿಸಿ ಚಪಾತಿಯ ಹಿಟ್ಟು ಕಲೆಸಿ. ಈಗ ಉ೦ಡೆ ಮಾಡಿಕೊ೦ಡು ಎಣ್ಣೆ ಸವರಿಕೊಂಡ ಪ್ಲಾಸ್ಟಿಕ್ ಮೇಲೆ ಚಪಾತಿಯನ್ನು ಲಟ್ಟಿಸಿ ಕಾದ ಕಾವಲಿಯ ಮೇಲೆ ಹಾಕಿ ಮೀಡಿಯಮ್ ಉರಿಯಲ್ಲಿ ಬೇಯಿಸಿ. ಬೇಯಿಸುವಾಗ ಸ್ವಲ್ಪ ಎಣ್ಣೆ ಹಾಕಿ. ಈಗ ಬಿಸಿ ಬಿಸಿ ಕ್ಯಾರೇಟ್ ಕ್ಯಾಪ್ಸಿಕಮ್ ಚಪಾತಿ ತಿನ್ನಲು ಸಿದ್ಧ. ಬೇಕಾದರೆ ಚಟ್ನಿ ಜೊತೆ ತಿನ್ನಬಹುದು. ಹಾಗೆ ತಿನ್ನಲು ರುಚಿಯಾಗಿರುತ್ತದೆ.

ಸೋಮವಾರ, ಜುಲೈ 18, 2016

ಹಲಸಿನ ಹಣ್ಣಿನ ದೋಸೆ:

ಸಾಮಗ್ರಿಗಳು:
 ಅಕ್ಕಿ - 2ಕಪ್, 
ಹಲಸಿನಹಣ್ಣಿನ ತೊಳೆ - 15 
ಬೆಲ್ಲ - 2 ಟೇ. ಚಮಚ
ಉಪ್ಪು - 1 ಚಮಚ

ವಿಧಾನ: ಅಕ್ಕಿಯನ್ನು 5-6 ಗ೦ಟೆ ನೀರಿನಲ್ಲಿ ನೆನೆಸಿಡಿ. ಬೆಳಿಗ್ಗೆ ದೋಸೆ ಮಾಡುವಿರಾದರೆ ರಾತ್ರಿ ಅಕ್ಕಿಯನ್ನು ನುಣ್ಣಗೆ ರುಬ್ಬಿಟ್ಟುಕೊಳ್ಳಿ. ಬೆಳಗ್ಗೆ ಹಲಸಿನಹಣ್ಣಿನ ತೊಳೆಯನ್ನು ರುಬ್ಬಿ ಇದಕ್ಕೆ ಉಪ್ಪು ಬೆಲ್ಲ ಸೇರಿಸಿ ರುಬ್ಬಿಟ್ಟ ಅಕ್ಕಿ ಹಿಟ್ಟಿಗೆ ಸೇರಿಸಿ. ಕಾವಲಿಯನ್ನು ಇಟ್ಟು ಉರಿಯನ್ನು ಹದವಾಗಿಡಿ ಕಾವಲಿಗೆ ಸ್ವಲ್ಪ ಎಣ್ಣೆ ಹಚ್ಚಿ ದೋಸೆಹಿಟ್ಟು ಹಾಕಿ ಹರಡಿ.ಸ್ವಲ್ಪ ಕೆ೦ಪಾಗುತ್ತಲೆ ಕಾವಲಿಯಿ೦ದ ದೋಸೆ ತೆಗೆದು, ಬಿಸಿ ಬಿಸಿ ದೋಸೆಗೆ ತುಪ್ಪ/ಬೆಣ್ಣೆ ಚಟ್ನಿಪುಡಿ/ ಹಸಿಮೆಣಸಿನ ಚಟ್ನಿ ಜೊತೆ ಸವಿಯಿರಿ.


ಸೂಚನೆ: ಬೆಲ್ಲ & ಹಲಸಿನಹಣ್ಣಿನ ತೊಳೆಯನ್ನು ಹಿಟ್ಟಿನ ಹದ ನೋಡಿಕೊ೦ಡು ಹಾಕಬೇಕು. ಜಾಸ್ತಿ ಹಾಕಿದರೆ ದೋಸೆಯನ್ನು ಕಾವಲಿಯಿ೦ದ ತೆಗೆಯಲು ಕಷ್ಟವಾಗುತ್ತದೆ.

ಸೋಮವಾರ, ಜೂನ್ 6, 2016

ರವಾ ಇಡ್ಲಿ:

ಸಾಮಗ್ರಿಗಳು : 
ಉಪ್ಪಿಟ್ಟಿನ ರವೆ - 1 ಕಪ್, 
ಚಿರೋಟಿ ರವ - 1 ಕಪ್, 
ಮೊಸರು - 3/4 ಕಪ್, 
ಕ್ಯಾರೇಟ್ 1, 
ಕೊತ್ತ೦ಬರಿ ಸೊಪ್ಪು,ಉಪ್ಪು, 
ಅಡುಗೆ ಸೋಡಾ - 1/4 ಚಮಚ, 
ಫ್ರೈ ಮಾಡಿದ ಗೋಡ೦ಬಿ ಚುರುಗಳು -  15-20
ಒಗ್ಗರಣೆಗೆ : ಎಣ್ಣೆ - 5  ಚಮಚ, ಕಡ್ಲೆಬೇಳೆ 2  ಚಮಚ , ಹಸಿಮೆಣಸು 3 , ಕರಿಬೇವು, ಸಾಸಿವೆ 1/2 ಚಮಚ.



ವಿಧಾನ : ಎರಡೂ ರವೆಯನ್ನು ಮೊಸರು ಸ್ವಲ್ಪ ನೀರು ಹಾಕಿ ಇಡ್ಲಿ ಹಿಟ್ಟಿನ ಹದಕ್ಕೆ ಕಲೆಸಿಕೊಳ್ಳಿ. ಈಗ ಅದಕ್ಕೆ ಉಪ್ಪು, ಎಣ್ಣೆ, ಸೋಡಾ, ಸಣ್ಣದಾಗಿ ಕತ್ತರಿಸಿದ ಕೊತ್ತ೦ಬರಿಸೊಪ್ಪನ್ನು ಹಾಕಿ ಕಲೆಸಿ 20 ನಿಮಿಷ ಹಾಗೆ ಬಿಡಿ. ಈಗ ಒಗ್ಗರಣೆ ಸೌಟಿಗೆ ಎಣ್ಣೆ ಹಾಕಿ ಕಡ್ಲೆಬೇಳೆ ಹಾಕಿ ಅದು ಸ್ವಲ್ಪ ಫ್ರೈ ಆದ ಮೇಲೆ ಸಾಸಿವೆ, ಸಣ್ಣದಗಿ ಹೆಚ್ಚಿದ ಕರಿಬೇವು & ಹಸಿಮೆಣಸು ಹಾಕಿ ಇದನ್ನು ಇಡ್ಲಿ ಹಿಟ್ಟಿಗೆ ಸೇರಿಸಿ. ಈಗ ಇಡ್ಲಿ ಮಾಡುವ ಪಾತ್ರೆಗೆ ಹಿಟ್ಟು ಹಾಕಿ ಮೇಲಿ೦ದ ಕ್ಯಾರೇಟ್ ತುರಿ & ಫ್ರೈ ಮಾಡಿದ ಗೋಡ೦ಬಿ ಚುರುಗಳನ್ನು  ಉದುರಿಸಿ,, ಹಾಗೆ ಇಡ್ಲಿ ಪಾತ್ರೆಯಲ್ಲಿ 20 ನಿಮಿಷ ಬೇಯಿಸಿ. ಬಿಸಿ ಬಿಸಿ ಇಡ್ಲಿಯನ್ನು ಚಟ್ನಿ & ಸಾ೦ಬಾರ್ ಜೊತೆ ಸವಿಯಿರಿ.


ಚಟ್ನಿ: ಹಸಿ ಮೆಣಸು, ಎಳ್ಳನ್ನು ಸ್ವಲ್ಪ ಎಣ್ಣೆ ಹಾಕಿ ಬಾಡಿಸಿಕೊಡು ಕೊನೆಯಲ್ಲಿ ಸ್ವಲ್ಪ ಕೊತ್ತ೦ಬರಿ ಸೊಪ್ಪು ಸೇರಿಸಿ. ತೆ೦ಗಿನ ತುರಿ, ಹುರಿಗಡಲೆ (ಪುಟಾಣಿ ಬೇಳೆ) ಉಪ್ಪು ಹಾಕಿ ರುಬ್ಬಿದರೆ ಚಟ್ನಿ ರೆಡಿ. ಬೇಕಾದರೆ ಕೊನೆಯಲ್ಲಿ ಸಾಸಿವೆ, ಕರಿಬೇವಿನ ಒಗ್ಗರಣೆ ಕೊಡಿ.
ಸಾ೦ಬಾರ್: ಸಾ೦ಬಾರನ್ನು ೨-೩ ವಿಧದಲ್ಲಿ ಮಾಡಬಹುದು. ಒ೦ದು ವಿಧಾನ ಹೇಳುತ್ತೇನೆ. ಈರುಳ್ಳಿ, ಆಲೂಗಡ್ಡೆ & ಟೊಮ್ಯಾಟೊವನ್ನು ಸಣ್ಣದಾಗಿ ಹೆಚ್ಚಿಕೊಳ್ಳಿ. (ತಲಾ ಒ೦ದೊ೦ದು) ಮೊದಲು ಆಲೂಗಡ್ಡೆಯನ್ನು ಬೇಯಿಸಿಕೊಳ್ಳಿ. ಒ೦ದು ಬಾಣಲೆಯಲ್ಲಿ ಧನಿಯಾ, ಜೀರಿಗೆ,(೧ ಚಮಚ), ೪ ಕಾಳು ಮೆ೦ತೆ, ೧ ಲವ೦ಗ, ೩-೪ ಒಣಮೆಣಸು ಹಾಕಿ ಹುರಿದುಕೊಳ್ಳಿ. ಸ್ವಲ್ಪ ಕಾಯಿತುರಿ ಹಾಕಿ ನುಣ್ಣಗೆ ರುಬ್ಬಿ. ಈ ಮಸಾಲೆಗೆ ಬೇಯಿಸಿದ ಆಲೂಗಡ್ಡೆ, ಹೆಚ್ಚಿಟ್ಟ ಈರುಳ್ಳಿ,ಟೊಮ್ಯಾಟೊ, ಉಪ್ಪು, ಸ್ವಲ್ಪ ಸಕ್ಕರೆ (೧/೨ ಚಮಚ) ಕೊತ್ತ೦ಬರಿ ಸೊಪ್ಪು ಹಾಕಿ ನೀರು ಸೇರಿಸಿ ಕುದಿಸಿ. ಕೊನೆಯಲ್ಲಿ ಇ೦ಗು ಹಾಕಿ ಒಗ್ಗರಣೆ ಕೊಡಿ.

ಶುಕ್ರವಾರ, ಏಪ್ರಿಲ್ 22, 2016

ಸಿಹಿ ಚಪಾತಿ:

ಸಾಮಗ್ರಿಗಳು: ಗೋಧಿ ಹಿಟ್ಟು - 2 ಕಪ್, ಸಕ್ಕರೆ 4-5 ಟೇ. ಚಮಚ, ತುಪ್ಪ - 4-5 ಟೇ. ಚಮಚ, ಉಪ್ಪು ರುಚಿಗೆ ತಕ್ಕಷ್ಟು.





ವಿಧಾನ: ಗೋಧಿಹಿಟ್ಟಿಗೆ ಉಪ್ಪು ನೀರು ಹಾಕಿ ಚಪಾತಿ ಹಿಟ್ಟನ್ನು ಕಲೆಸಿಕೊಳ್ಳಿ. ಉ೦ಡೆ ಮಾಡಿ ಗೋಲವಾಗಿ ಲಟ್ಟಿಸಿ ಅದರ ಮೇಲೆ ಸಕ್ಕರೆ ಹರಡಿ. ಈಗ ಸ್ವಲ್ಪ ತುಪ್ಪ ಹಾಕಿ ತ್ರಿಕೋನಾಕಾರದಲ್ಲಿ ಮಡಿಸಿ ಮತ್ತೆ ಲಟ್ಟಿಸಿ, ಒಲೆಯ ಮೇಲೆ ರೋಟಿ ಕಾವಲಿ ಇಟ್ಟು ಅದು ಕಾದ ಮೇಲೆ ಸಣ್ಣ ಉರಿಯಲ್ಲಿ ಸಿಹಿ ಚಪಾತಿಯನ್ನು ಬೇಯಿಸಿ. ಬೇಯಿಸುವಾಗ ಮತ್ತೆ ತುಪ್ಪ ಹಾಕಬಹುದು. ಇದನ್ನು ಮಕ್ಕಳು ತು೦ಬಾ ಇಷ್ಟಪಡುತ್ತಾರೆ. 

ಶುಕ್ರವಾರ, ಏಪ್ರಿಲ್ 1, 2016

ರವೆ ದೋಸೆ:


ಸಾಮಗ್ರಿಗಳು: 
ಉಪ್ಪಿಟ್ಟಿನ ರವೆ 2 ಕಪ್, ತೆಂಗಿನ ತುರಿ 2 ಚಮಚ, ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು 1 ಚಮಚ, ಸಣ್ಣಗೆ ಹೆಚ್ಚಿದ ಹಸಿ ಮೆಣಸಿನ ಕಾಯಿ 1 ಚಮಚ, ಉಪ್ಪು- ರುಚಿಗೆ

ವಿಧಾನ: 
ರವೆಗೆ ಒಮ್ಮೆ ನೀರು ಹಾಕಿ ತೊಳೆದು ಬಸಿದುಕೊಂಡು ಮತ್ತೆ ಅದು ಮುಳುಗುವಷ್ಟು ನೀರು ಹಾಕಿ 10-15 ನಿಮಿಷ ನೆನೆಯಲು ಬಿಡಿ. ಇದು ನೆನೆದ ಮೇಲೆ ಒಂದು ತಟ್ಟೆಗೆ ನೀರನ್ನು ಪೂರ್ತಿಯಾಗಿ ಬಸಿದುಕೊಂಡು, ನೆಂದ ರವೆಯನ್ನು ಮಿಕ್ಸಿಗೆ ಹಾಕಿ 4-5 ಸೆಕೆಂಡ್ ರುಬ್ಬಿ ತೆಗೆಯಿರಿ. ಬಸಿದಿಟ್ಟುಕೊಂಡ ನೀರನ್ನು ರುಬ್ಬಿದ ಹಿಟ್ಟಿಗೆ ಸೇರಿಸಿ ಬೇರೆ  ದೋಸೆ ಹಿಟ್ಟಿನಕಿಂತ ಸ್ವಲ್ಪ ತೆಳ್ಳಗೆ ಮಾಡಿಕೊಂಡು ಇದಕ್ಕೆ ತೆಂಗಿನ ತುರಿ, ಕೊತ್ತಂಬರಿ ಸೊಪ್ಪು, ಹಸಿ ಮೆಣಸಿನ ಕಾಯಿ, ಉಪ್ಪು ಎಲ್ಲವನ್ನು ಸೇರಿಸಿ ಚೆನ್ನಾಗಿ ಕಲಕಿಕೊಂಡು ಮಧ್ಯಮ ಉರಿಯಲ್ಲಿ ತೆಳ್ಳಗಿನ ದೋಸೆ ಮಾಡಿ ಎರಡೂ ಕಡೆ ಬೇಯಿಸಿ. ಮೆತ್ತಗಿನ, ಬಿಸಿ ಬಿಸಿ ದಿಢೀರ್ ರವೆ ದೋಸೆಯನ್ನು ತುಪ್ಪ ಮತ್ತು ಚಟ್ನಿ ಜೊತೆ ಸವಿಯಿರಿ. 

(ವಿಜಯವಾಣಿ ಪತ್ರಿಕೆಗೆ ಕಳಿಸಿ ಪ್ರಕಟವಾದ ಅಡುಗೆ)

ಬುಧವಾರ, ಡಿಸೆಂಬರ್ 16, 2015

ಗೋಧಿ ಹಿಟ್ಟಿನ ದೋಸೆ :

ಸಾಮಗ್ರಿಗಳು:
ಗೋಧಿ ಹಿಟ್ಟು : 1 ಕಪ್,
ಅಕ್ಕಿ ಹಿಟ್ಟು : 1 ಟೇಬಲ್ ಚಮಚ,
ಬೆಲ್ಲ : 3-4 ಚಮಚ,
ತೆಂಗಿನ ತುರಿ : 2 ಚಮಚ,
ಉಪ್ಪು : ರುಚಿಗೆ 

ವಿಧಾನ :
ಮಿಕ್ಸಿಗೆ ಗೋಧಿ ಹಿಟ್ಟು, ಅಕ್ಕಿ ಹಿಟ್ಟು, ನೀರು ಹಾಕಿ ಗಂಟಿಲ್ಲದೇ ರುಬ್ಬಿ. ಅಥವಾ ಪಾತ್ರೆಗೆ ಹಾಕಿ ಸೌಟಿನಲ್ಲೇ ಗಂಟಿಲ್ಲದಂತೆ ಕಲಕಬಹುದು.
ಬೇರೆ ದೋಸೆ ಹಿಟ್ಟಿನಕಿಂತ ಸ್ವಲ್ಪ ತೆಳ್ಳಗೆ ಮಾಡಿಕೊಳ್ಳಿ. ಇದಕ್ಕೆ ಬೆಲ್ಲ, ಉಪ್ಪು, ತೆಂಗಿನ ತುರಿ ಹಾಕಿ ಚೆನ್ನಾಗಿ ಕಲಕಿ. ನಂತರ ಕಾದ ತವಾಗೆ ಎಣ್ಣೆ ಸವರಿ ತೆಳ್ಳಗೆ ದೋಸೆ ಮಾಡಿ ಎರಡೂ  ಕಡೆ ಬೇಯಿಸಿ.  


ಚಿತ್ರದಲ್ಲಿ ಇರುವುದಕ್ಕಿಂತ ಸ್ವಲ್ಪ ದಪ್ಪಗೆ ಕೂಡ ದೋಸೆ ಮಾಡಬಹುದು. ಬಿಸಿ ಬಿಸಿ, ಸಿಹಿ ದೋಸೆಯನ್ನು ತುಪ್ಪ ಮತ್ತು ಚಟ್ನಿಪುಡಿ ಜೊತೆ ಸರ್ವ್ ಮಾಡಿ. 



ಶುಕ್ರವಾರ, ನವೆಂಬರ್ 27, 2015

ಪಡ್ಡು ಮತ್ತು ಚಟ್ನಿ :

ಪಡ್ಡು ಹಿಟ್ಟಿಗೆ  ಸಾಮಗ್ರಿಗಳು :
ದೋಸೆ ಅಕ್ಕಿ : 2 ಕಪ್,
ದಪ್ಪ ಅವಲಕ್ಕಿ : 1/4 ಕಪ್,
ಮಂಡಕ್ಕಿ (ಪುರಿ) :1/4 ಕಪ್, 
ಮೆಂತ್ಯ : 1 ಚಮಚ

ಇತರ ಸಾಮಗ್ರಿಗಳು: 
ಈರುಳ್ಳಿ : 2,
ಕರಿ ಬೇವು : 1 ಎಸಳು,
ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು : 2 ಚಮಚ,
ಅಚ್ಚ ಮೆಣಸಿನ ಪುಡಿ : 1 ಚಮಚ,
ಸಕ್ಕರೆ : 1 ಚಮಚ, 
ಉಪ್ಪು: ರುಚಿಗೆ 

ವಿಧಾನ :
ಹಿಟ್ಟು ತಯಾರಿಸಲು ಪಟ್ಟಿ ಮಾಡಿರುವ ಸಾಮಗ್ರಿಗಳನ್ನು ಚೆನ್ನಾಗಿ ತೊಳೆದು 5-6 ಗಂಟೆಗಳ ಕಾಲ ನೆನೆಹಾಕಿ. ಮಂಡಕ್ಕಿಯನ್ನು ಒಂದು ಗಂಟೆ  ನೆನೆಸಿದರೂ ಸಾಕು.(ಬೆಳಿಗ್ಗೆ ನೆನೆ ಹಾಕಿ ರಾತ್ರಿಗೆ ರುಬ್ಬಿ). ನಂತರ ಎಲ್ಲವನ್ನು ಮಿಕ್ಸಿಗೆ ಹಾಕಿ ನುಣ್ಣಗೆ ರುಬ್ಬಿ ಒಂದು ಪಾತ್ರೆಗೆ ಹಾಕಿ ತಟ್ಟೆ ಮುಚ್ಚಿ ರಾತ್ರಿ ಹಾಗೆಯೇ ಬಿಡಿ. ಬೆಳಿಗ್ಗೆ ಸಣ್ಣಗೆ ಹೆಚ್ಚಿದ ಈರುಳ್ಳಿ ಮತ್ತು ಕರಿಬೇವು, ಕೊತ್ತಂಬರಿ ಸೊಪ್ಪು, ಮೆಣಸಿನ ಪುಡಿ, ಉಪ್ಪು, ಸಕ್ಕರೆ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ದೋಸೆ ಹಿಟ್ಟಿನ ಹದಕ್ಕೆ ಗಟ್ಟಿ ಇರಲಿ. ಪಡ್ಡು ಕಾವಲಿಯನ್ನು ಕಾಯಿಸಿ ಎಲ್ಲಾ ಕುಳಿಗಳಿಗೆ ಕಾಲು ಚಮಚದಷ್ಟು ಎಣ್ಣೆ ಬಿಟ್ಟು ಪಡ್ಡು  ಹಿಟ್ಟನ್ನು ಮುಕ್ಕಾಲು ಕುಳಿ ತುಂಬುವಷ್ಟು ಹಾಕಿ ಮುಚ್ಚಳ ಮುಚ್ಚಿ ಬೇಯಿಸಿ. 

ಪಡ್ಡು ಉಬ್ಬಿ ದೊಡ್ಡದಾಗುತ್ತದೆ.  ನಂತರ ಒಂದು ತೆಳ್ಳಗಿನ  ಚಮಚ ಅಥವಾ ಕಡ್ಡಿಯ ಸಹಾಯದಿಂದ ಅದನ್ನು ತಿರುವಿ ಹಾಕಿ ಬೇಯಿಸಿ ತೆಗೆಯಿರಿ. ಬಿಸಿ ಬಿಸಿ ಪಡ್ಡುಗಳನ್ನು ಚಟ್ನಿ ಜೊತೆ ಸವಿಯಿರಿ. 


ಚಟ್ನಿಗೆ ಸಾಮಗ್ರಿಗಳು :
ತೆಂಗಿನ ತುರಿ : 1/2 ಕಪ್,
ಹುರಿಗಡಲೆ : 2 ಚಮಚ,
ಹಸಿಮೆಣಸಿನ ಕಾಯಿ : 3-4,
ಎಳ್ಳು : 1/4 ಚಮಚ, 
ಎಣ್ಣೆ : 1/4 ಚಮಚ,
ಕೊತ್ತಂಬರಿ ಸೊಪ್ಪು : ಸ್ವಲ್ಪ,
ಶುಂಟಿ : ಸಣ್ಣ ಚೂರು,
ಉಪ್ಪು : ರುಚಿಗೆ 

ವಿಧಾನ:
ಹಸಿಮೆಣಸಿನ ಕಾಯಿ ಮತ್ತು ಎಳ್ಳನ್ನು ಎಣ್ಣೆಯಲ್ಲಿ ಹುರಿದು, ಉಳಿದ ಸಾಮಗ್ರಿಗಳನ್ನು ಸೇರಿಸಿ ರುಬ್ಬಿದರೆ ಚಟ್ನಿ ಸಿಧ್ಧ.

ಸೂಚನೆಗಳು :
1) ಪಡ್ಡು ಹಿಟ್ಟಿಗೆ ಮೆಣಸಿನ ಪುಡಿ ಬದಲು ಸಣ್ಣಗೆ ಹೆಚ್ಚಿದ ಹಸಿಮೆಣಸಿನ ಕಾಯಿ ಹಾಕಬಹುದು. ತಿನ್ನುವಾಗ ಬಾಯಿಗೆ ಸಿಕ್ಕು ಖಾರವೆನಿಸುವುದರಿಂದ ನಾನು ಹಾಕುವುದಿಲ್ಲ. 
2) ಪಡ್ಡು ಹಿಟ್ಟಿಗೆ ಇಷ್ಟ ಪಡುವವರು ಸಾಸಿವೆ ಒಗ್ಗರಣೆ ಮಾಡಿ ಹಾಕಿಕೊಳ್ಳಬಹುದು. 
3) ಚಟ್ನಿಗೂ ಬೇಕಿದ್ದರೆ ಸಾಸಿವೆ, ಕರಿಬೇವು, ಇಂಗಿನ ಒಗ್ಗರಣೆ ಮಾಡಿಕೊಳ್ಳಬಹುದು. 


ಗುರುವಾರ, ನವೆಂಬರ್ 5, 2015

ಅಕ್ಕಿ ಶ್ಯಾವಿಗೆ ಭಾತ್ :

ಸಾಮಗ್ರಿಗಳು:
ಅಕ್ಕಿ ಶ್ಯಾವಿಗೆ - ೨೦೦ ಗ್ರಾ೦ (Anil)
ಬೀನ್ಸ್ : ೮-೧೦
ಕ್ಯಾರೇಟ್ : ೧
ಹಸಿಮೆಣಸು : ೨-೩
ಈರುಳ್ಳಿ : ೧
ಒಗ್ಗರಣೆಗೆ: ಸಾಸಿವೆ, ಕರಿಬೇವು, ಉದ್ದಿನಬೇಳೆ, ಕಡಲೇಬೇಳೆ, ಶೇ೦ಗಾ, ಅರಿಶಿನ, ಜೀರಿಗೆ, ಎಣ್ಣೆ. 
ಉಪ್ಪು - ರುಚಿಗೆ ತಕ್ಕಷ್ಟು.
ಸಕ್ಕರೆ ೧/೨ ಚಮಚ


ವಿಧಾನ: ಮೊದಲು ಒ೦ದು ಪಾತ್ರೆಯಲ್ಲಿ ನೀರನ್ನು ಬಿಸಿಗಿಡಿ. ಅದಕ್ಕೆ ಉಪ್ಪು ಎಣ್ಣೆ ಹಾಕಿ. ನೀರು ಕುದಿಯಲು ಶುರುವಾದಮೇಲೆ ಶ್ಯಾವಿಗೆ ಹಾಕಿ. ಶ್ಯಾವಿಗೆಯನ್ನು ಉದುರುದುರಾಗಿ ಬೇಯಿಸಿ, ನೀರು ಬಸಿದಿಟ್ಟುಕೊಳ್ಳಿ. ಬೀನ್ಸ್, ಕ್ಯಾರೇಟ್ & ಈರುಳ್ಳಿಯನ್ನು ಸಣ್ಣದಾಗಿ ಹೆಚ್ಚಿಕೊಳ್ಳಬೇಕು. ಈಗ ಬಾಣಲೆಗೆ ಎಣ್ಣೆ ಹಾಕಿಕೊ೦ಡು ಅದು ಕಾದ ಮೇಲೆ ಶೇ೦ಗಾ, ಉದ್ದಿನಬೇಳೆ, ಕಡಲೇಬೇಳೆ ಹಾಕಿ ಫ್ರೈ ಮಾಡಿ. ನ೦ತರ ಇದಕ್ಕೆ ಸಾಸಿವೆ ಜೀರಿಗೆ ಅರಿಶಿನ ಕರಿಬೇವು ಹಾಕಿ ಹೆಚ್ಚಿಟ್ಟ ತರಕಾರಿಗಳು & ಉಪ್ಪು ಹಾಕಿ ೮-೧೦ ನಿಮಿಷ ಫ್ರೈ ಮಾಡಿ ಕೊನೆಯಲ್ಲಿ ಉದುರುದುರಾಗಿ ಬೇಯಿಸಿಟ್ಟುಕೊ೦ಡ ಶ್ಯಾವಿಗೆಯನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ರುಚಿ ನೋಡಿಕೊ೦ಡು ಬೇಕಾದಲ್ಲಿ ಉಪ್ಪು & ಸಕ್ಕರೆ ಸೇರಿಸಿ.

ಶುಕ್ರವಾರ, ಆಗಸ್ಟ್ 21, 2015

ಅಕ್ಕಿ ರೊಟ್ಟಿ ಮತ್ತು ಶೇಂಗಾ ಚಟ್ನಿ :

ಅಕ್ಕಿ ರೊಟ್ಟಿಗೆ ಸಾಮಗ್ರಿಗಳು :
ಅಕ್ಕಿ ಹಿಟ್ಟು : ೧.೫ ಕಪ್,
ಸೌತೆಕಾಯಿ : ೨,
ಜೀರಿಗೆ : ೧/೪ ಚಮಚ,
ಉಪ್ಪು: ೧/೨ ಚಮಚ 

ವಿಧಾನ :
ಸೌತೆಕಾಯಿಯನ್ನು ಹೆಚ್ಚಿ (ಬಲಿತಿದ್ದರೆ ಬೀಜ ತೆಗೆಯಿರಿ). ಮಿಕ್ಸಿಗೆ ಹಾಕಿ ನುಣ್ಣಗೆ  ರುಬ್ಬಿ. ರಸ  ೩ ಕಪ್ ನಷ್ಟು ಆಗಬೇಕು ಆಗಿಲ್ಲವಾದರೆ ಸ್ವಲ್ಪ ನೀರು ಸೇರಿಸಿ. ದಪ್ಪ ತಳದ ಬಾಣಲೆ / ಪಾತ್ರೆಗೆ ಸೌತೆಕಾಯಿ ರಸ, ಉಪ್ಪು ಮತ್ತು ಜೀರಿಗೆ ಹಾಕಿ ಕುದಿಯಲು ಬಿಡಿ. ರಸ ಕುದಿಯುತ್ತಿರುವಾಗ ಸ್ವಲ್ಪ ಸ್ವಲ್ಪವೇ ಅಕ್ಕಿಹಿಟ್ಟು ಹಾಕುತ್ತಾ ಕಲಕುತ್ತ ಬನ್ನಿ. ಮಿಶ್ರಣವನ್ನು ಚೆನ್ನಾಗಿ ಕಸುತ್ತಿರಿ. ಹಿಟ್ಟು ಚೆನ್ನಾಗಿ ಬೇಯಬೇಕು. ಅಂದರೆ ಸುಮಾರು ೨-೩ ನಿಮಿಷ ಸಣ್ಣ ಉರಿಯಲ್ಲಿ ಕಲಸುತ್ತಿರಿ.  


ಹಿಟ್ಟು ತಳಕ್ಕೆ ಅಂಟುತ್ತಿರುತ್ತದೆ, ಆದರೂ ಬಿಡದೇ ಕಲಕಿ. ಇಲ್ಲವಾದರೆ ರೊಟ್ಟಿ ಗಟ್ಟಿಯಾಗುತ್ತದೆ. ಮಿಶ್ರಣ ಸ್ವಲ್ಪ ತಣ್ಣಗಾದ ಮೇಲೆ ಚೆನ್ನಾಗಿ ಮೆದ್ದು ಕಲಸಿ. ತುಂಬಾ ಕೈಗೆ ಅಂಟುತ್ತಿದ್ದರೆ (ಮೆತ್ತಗಿದ್ದರೆ) ಸ್ವಲ್ಪ ಅಕ್ಕಿಹಿಟ್ಟು ಸೇರಿಸಿ ಕಲಸಿ. ದೊಡ್ಡ ಲಿಂಬು ಗಾತ್ರದ ಉಂಡೆ ಮಾಡಿ ಲಟ್ಟಿಸಿ. ಕೆಳಗೆ ಚಿತ್ರದಲ್ಲಿ ತೋರಿಸಿದಂತೆ ಅಂಚು ಸರಿ ಪಡಿಸುತ್ತಾ ತೆಳ್ಳಗೆ ಲಟ್ಟಿಸಿ. 

ಕಾದ ತವಾ ಮೇಲೆ ಎರಡೂ ಕಡೆ ಒಮ್ಮೆ ತಿರುಗಿಸಿ ನಂತರ ದೊಡ್ಡ ಉರಿಯಲ್ಲಿ ಒಲೆಯ ಮೇಲೆ ಹಾಕಿದರೆ ರೊಟ್ಟಿ ಚೆನ್ನಾಗಿ ಉಬ್ಬುತ್ತದೆ. 

ಬಿಸಿ ಬಿಸಿ ರೊಟ್ಟಿಯನ್ನು ತುಪ್ಪ, ಚಟ್ನಿ ಜೊತೆ ಸವಿಯಿರಿ. 



ಶೇಂಗಾ ಚಟ್ನಿಗೆ ಬೇಕಾದ ಸಾಮಗ್ರಿಗಳು:
ತೆಂಗಿನ ತುರಿ : ೧/೨ ಕಪ್,
ಶೇಂಗಾ : ೩-೪ ಟೇಬಲ್ ಚಮಚ,
ಒಣಮೆಣಸಿನ ಕಾಯಿ : ೪-೫,
ಎಣ್ಣೆ : ೧/೨ ಚಮಚ,
ಸಕ್ಕರೆ: ೧/೪ ಚಮಚ,
ಉಪ್ಪು: ರುಚಿಗೆ 

ವಿಧಾನ:
ಶೇಂಗಾ ಮತ್ತು ಒಣಮೆಣಸಿನ ಕಾಯಿಗೆ ಸ್ವಲ್ಪ ಎಣ್ಣೆ ಹಾಕಿ ಚೆನ್ನಾಗಿ ಹುರಿಯಿರಿ. (ಬೇರೆ ಬೇರೆ ಹುರಿದರೆ ಒಳ್ಳೆಯದು). ನಂತರ ಇದನ್ನು ತೆಂಗಿನ ತುರಿ, ಉಪ್ಪು, ಸಕ್ಕರೆ ಸೇರಿಸಿ ರುಬ್ಬಿದರೆ ಶೇಂಗಾ ಚಟ್ನಿ ಸಿದ್ಧ. 

ಬುಧವಾರ, ಏಪ್ರಿಲ್ 22, 2015

ಗೋಭಿ ಪರೋಟ (ವಿಧಾನ 2) :

ಸಾಮಗ್ರಿಗಳು: 
ಹೂಕೋಸು (ಗೋಬಿ) : 1 (ಮಧ್ಯಮ ಗಾತ್ರ),
ಧನಿಯಾ ಪುಡಿ : 1/2 ಟೇಬಲ್ ಚಮಚ,
ಜೀರಿಗೆ ಪುಡಿ : 1/2 ಟೇಬಲ್ ಚಮಚ,
ಗರಂ ಮಸಾಲಾ ಪುಡಿ : 1/2 ಟೇಬಲ್ ಚಮಚ,
ಅಚ್ಚ ಮೆಣಸಿನ ಪುಡಿ : 1/2 ಟೇಬಲ್ ಚಮಚ,
ಅರಿಶಿನ ಪುಡಿ : 1/4 ಟೇಬಲ್ ಚಮಚ,
ಕೊತ್ತಂಬರಿ ಸೊಪ್ಪು : 2 ಚಮಚ ಸಣ್ಣ ಹೆಚ್ಚಿದ್ದು
ಎಣ್ಣೆ : 1 ಚಮಚ,
ಉಪ್ಪು :  1/4 ಟೇಬಲ್ ಚಮಚ,
ತುಪ್ಪ : ಪರೋಟ ಬೇಯಿಸಲು 

ಪರೋಟ ಹಿಟ್ಟು ತಯಾರಿಸಲು ಸಾಮಗ್ರಿಗಳು :
ಗೋಧಿ ಹಿಟ್ಟು : 3 ಕಪ್,
ಮೊಸರು : 2-3 ಟೇಬಲ್ ಚಮಚ,
ಉಪ್ಪು : 1/2 ಟೀ ಚಮಚ,
ತುಪ್ಪ / ಎಣ್ಣೆ : 2-3 ಟೇಬಲ್ ಚಮಚ,
ನೀರು ಅಗತ್ಯವಿದ್ದಷ್ಟು 

ವಿಧಾನ: 
ಹೂಕೋಸನ್ನು ಬಿಡಿಸಿಕೊಂಡು (ದೊಡ್ಡ ಹೋಳುಗಳೇ ಇರಲಿ), ಸೋಸಿಕೊಂಡು ಸ್ವಲ್ಪ ಬೆಚ್ಚಗಿನ ನೀರಿಗೆ 1/4 ಚಮಚ ಅರಿಶಿನ ಮತ್ತು ಉಪ್ಪು ಹಾಕಿಡಿ. ಒಂದು ಅಗಲವಾದ ಪಾತ್ರೆಗೆ ಮೊಸರು, ಉಪ್ಪು, ತುಪ್ಪ  ಅಥವಾ ಎಣ್ಣೆ, 1.5 ಕಪ್ ನಷ್ಟು ನೀರು ಹಾಕಿಕೊಂಡು ಕಲಕಿಕೊಂಡು ಇದಕ್ಕೆ ಸ್ವಲ್ಪ ಸ್ವಲ್ಪ ಗೋಧಿ ಹಿಟ್ಟು ಹಾಕುತ್ತಾ ಕಲಸಿ, ಚಪಾತಿ ಹಿಟ್ಟಿನಕಿಂತಾ ಗಟ್ಟಿ ಕಲಸಿ ಚೆನ್ನಾಗಿ ನಾದಿಕೊಂಡು ಮುಚ್ಚಿಡಿ. 

ಈಗ  ನೆನೆಸಿಟ್ಟ ಹೂಕೋಸನ್ನು ತೆಗೆದು ತುರಿದಿಟ್ಟುಕೊಳ್ಳಿ. 

ಒಂದು ಬಾಣಲೆಗೆ ಎಣ್ಣೆ ಹಾಕಿ ಕಾಯಿಸಿ ಅರಿಶಿನ ಪುಡಿ ಹಾಕಿ ತಕ್ಷಣ ತುರಿದಿಟ್ಟುಕೊಂಡ ಹೂಕೋಸನ್ನು ಹಾಕಿ ಕಲಕಿ. ನಂತರ ಧನಿಯಾ ಪುಡಿ, ಜೀರಿಗೆ ಪುಡಿ, ಗರಂ ಮಸಾಲಾ ಪುಡಿ, ಕೊತ್ತಂಬರಿ ಸೊಪ್ಪು, ಉಪ್ಪು ಎಲ್ಲವನ್ನೂ ಒಂದೊಂದಾಗಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಹೂಕೋಸು ನೀರು ಬಿಟ್ಟುಕೊಳ್ಳದಿದ್ದರೆ ಸ್ವಲ್ಪವೇ ನೀರು ಚಿಮಿಕಿಸಿ ಮುಚ್ಚಿ, ಆಗಾಗ ಕಲಕುತ್ತಾ ನೀರು ಪೂರ್ತಿ ಆರುವವರೆಗೆ ಬೇಯಿಸಿ. ಮಿಶ್ರಣ ತಣ್ಣಗಾಗಲು ಬಿಡಿ. 

ನಂತರ ಪರೋಟ ಹಿಟ್ಟಿನಿಂದ ದೊಡ್ಡ ಲಿಂಬು ಗಾತ್ರದ ಉಂಡೆ ಮಾಡಿಕೊಂಡು ಸಣ್ಣ ಪೂರಿ ಲಟ್ಟಿಸಿ ಅದರಲ್ಲಿ ಅರ್ಧ ಚಮಚದಷ್ಟು ಹೂಕೋಸಿನ ಮಿಶ್ರಣ ತುಂಬಿ ಸರಿಯಾಗಿ ಮುಚ್ಚಿ ಮತ್ತೆ ಲಟ್ಟಿಸಿಕೊಂಡು ಕಾದ ಕಾವಲಿಗೆ ಹಾಕಿ ಎರಡೂ ಕಡೆ ತುಪ್ಪ ಹಾಕಿ ಬೇಯಿಸಿ. 


ಬಿಸಿ ಬಿಸಿ ಹೂಕೋಸಿನ ಪರೋಟವನ್ನು ಗಟ್ಟಿ ಮೊಸರು ಮತ್ತು ಉಪ್ಪಿನ ಕಾಯಿಯೊಂದಿಗೆ ಸವಿಯಿರಿ. 
 



ಸಲಹೆಗಳು:
1) ಗೋಧಿ ಹಿಟ್ಟಿನ ಜೊತೆ ಮೈದಾ ಸೇರಿಸಬಹುದು. ಮೈದಾ ಆರೋಗ್ಯಕ್ಕೆ ಒಳ್ಳೆಯದಲ್ಲವಾದ್ದರಿಂದ ನಾನು ಉಪಯೋಗಿಸುವುದಿಲ್ಲ. 
2) ಮೊಸರು ಇಷ್ಟವಿಲ್ಲದಿದ್ದರೆ ಬೇರೆ ಸಬ್ಜಿಯೊಟ್ಟಿಗೂ ಸವಿಯಬಹುದು. 
3) ಇದೇ ತರಹ ಕ್ಯಾರಟ್ ಪರೋಟ ಮಾಡಬಹುದು.
4) ಗೋಭಿ ಜೊತೆ ಸಣ್ಣ ಹೆಚ್ಚಿದ ಈರುಳ್ಳಿ ಕೂಡ ಸೇರಿಸಬಹುದು. ಗರಂ ಮಸಾಲ ಬದಲು ಪಾವ್ ಬಾಜಿ ಮಸಾಲ ಪುಡಿ ಹಾಕಬಹುದು, ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಕೂಡ ಹಾಕಬಹುದು. 

ಬುಧವಾರ, ಏಪ್ರಿಲ್ 15, 2015

ಗೋಬಿ - ಈರುಳ್ಳಿ ಪರೋಟ:


ಸಾಮಗ್ರಿಗಳು : ಗೋಬಿ - 1 ಬೌಲ್, ಈರುಳ್ಳಿ - 2, ಹಸಿಮೆಣಸು 4, ಎಣ್ಣೆ 1/2 ಕಪ್, ಉಪ್ಪು ರುಚಿಗೆ ತಕ್ಕಷ್ಟು, ಗೋಧಿಹಿಟ್ಟು 1ಕಪ್, ಮೈದಾಹಿಟ್ಟು 1/2 ಕಪ್.




ವಿಧಾನ : 
ಗೋಬಿಯನ್ನು ಸಣ್ಣದಾಗಿ ಬಿಡಿಸಿಕೊ೦ಡು ಬೇಯಿಸಿ ನೀರು ಬಸಿದಿಟ್ಟುಕೊಳ್ಳಿ. ಈಗ ಬಾಣಲೆಗೆ ಎಣ್ಣೆ ಹಾಕಿ ಅದು ಕಾದ ಮೇಲೆ ಸಣ್ಣದಾಗಿ ಹೆಚ್ಚಿದ ಈರುಳ್ಳಿ, ಹಸಿಮೆಣಸು, & ಗೋಬಿಯನ್ನು ಹಾಕಿ ಉಪ್ಪು ಹಾಕಿ ೧೦ ನಿಮಿಷ ಫ್ರೈ ಮಾಡಿ. ಅದನ್ನು ಉರಿಯಿ೦ದ ಇಳಿಸಿಡಿ. ಗೋಧಿಹಿಟ್ಟು, ಮೈದಾಹಿಟ್ಟು & ಉಪ್ಪು ಸೇರಿಸಿ ಚಪಾತಿ ಹಿಟ್ಟಿನ ಹದಕ್ಕೆ ಕಲೆಸಿಟ್ಟುಕೊಳ್ಳಿ. ೧೦ ನಿಮಿಷಬಿಟ್ಟು ಈ ಹಿಟ್ಟನ್ನು ತೆಗೆದುಕೊ೦ಡು ಗೋಬಿ ಮಿಶ್ರಣವನ್ನು ಇದರಲ್ಲಿ ತು೦ಬಿ ಪ್ಲಾಸ್ಟಿಕ್ ಕವರ್ ಮೇಲೆ ಎಣ್ಣೆ ಸವರಿಕೊ೦ಡು ಇದನ್ನು ಲಟ್ಟಿಸಿ. ಕಾವಲಿಯನ್ನು ಬಿಸಿಗೆ ಇಟ್ಟುಕೊ೦ಡು ಅದು ಬಿಸಿಯಾದ ಮೇಲೆ ಈ ಪರೋಟವನ್ನು ಕಾವಲಿಗೆ ಹಾಕಿ ಎಣ್ಣೆ ಸವರಿ ಎರಡೂ ಕಡೆ ಚೆನ್ನಾಗಿ ಬೇಯಿಸಿ. ಈಗ ಈ ಬಿಸಿ ಬಿಸಿ ಪರೋಟವನ್ನು ಮೊಸರು & ಉಪ್ಪಿನಕಾಯಿಯೊ೦ದಿಗೆ ಸವಿಯಿರಿ.

ಸಲಹೆ : ಇದೇ ಥರ ಆಲೂ ಈರುಳ್ಳಿ ಪರೋಟವನ್ನು ಮಾಡಬಹುದು.

ಬುಧವಾರ, ಫೆಬ್ರವರಿ 11, 2015

ಮಸಾಲೆ ದೋಸೆ :

ದೋಸೆ ಹಿಟ್ಟಿಗೆ ಸಾಮಗ್ರಿಗಳು: 
ದೋಸೆ ಅಕ್ಕಿ : 2 ಕಪ್,
ಕಡಲೆಬೇಳೆ : 1/2 ಕಪ್,
ಮೆಂತ್ಯ : 1 ಚಮಚ, 
ಉದ್ದಿನ ಬೇಳೆ : 2 ಚಮಚ (optional),
ಅವಲಕ್ಕಿ : 1/4 ಕಪ್, 
ಉಪ್ಪು : ರುಚಿಗೆ,
ಸಕ್ಕರೆ : 1 ಚಮಚ 

ವಿಧಾನ : 
ಉಪ್ಪು, ಸಕ್ಕರೆ ಹೊರತು ಪಡಿಸಿ ಉಳಿದೆಲ್ಲ ಸಾಮಗ್ರಿಗಳನ್ನು ತೊಳೆದು 5-6  ನೀರಿನಲ್ಲಿ ನೆನೆಸಿ, ನುಣ್ಣಗೆ ರುಬ್ಬಿಕೊಳ್ಳಿ. (ಬೆಳಿಗ್ಗೆ ನೆನೆಸಿ ರಾತ್ರಿ ರುಬ್ಬಿಕೊಂಡು ಮರುದಿನ ಬೆಳಿಗ್ಗೆ ದೋಸೆ ಮಾಡಬಹುದು). ಇದನ್ನು 6-8 ಘಂಟೆಗಳ ಕಾಲ ಹಾಗೆಯೇ ಮುಚ್ಚಿಡಿ. ಬೆಳಿಗ್ಗೆ ಚೆನ್ನಾಗಿ ಹುದುಗಿದ ದೋಸೆ ಹಿಟ್ಟಿಗೆ ಉಪ್ಪು, ಸಕ್ಕರೆ ಸೇರಿಸಿ ಕಾದ ತವಾ ಮೇಲೆ ತೆಳ್ಳಗೆ ದೋಸೆ ಎರೆದು ಅದರ ಮೇಲೆ ಸ್ವಲ್ಪ ಎಣ್ಣೆ ಹಾಕಿ, ಚಟ್ನಿ ಪುಡಿ ಉದುರಿಸಿ (ಬೇಕಿದ್ದರೆ ಮುಚ್ಚಿ) ಬೇಯಿಸಿ. ನಂತರ ಅದರ ಮೇಲೆ ಆಲೂ ಪಲ್ಯ ಹಾಕಿ ಸುರುಳಿ ಸುತ್ತಿ ಚಟ್ನಿಯ ಜೊತೆ ಸರ್ವ್ ಮಾಡಿ.   




ಆಲೂ ಪಲ್ಯಕ್ಕೆ ಸಾಮಗ್ರಿಗಳು :
ಆಲೂಗಡ್ಡೆ : 3-4 (ಮೀಡಿಯಂ ಗಾತ್ರ),
ಈರುಳ್ಳಿ : 3 (ಮೀಡಿಯಂ ಗಾತ್ರ),
ಕಡಲೆ ಬೇಳೆ : 1 ಚಮಚ,
ಉದ್ದಿನ ಬೇಳೆ : 1 ಚಮಚ,
ಸಾಸಿವೆ : 1/2 ಚಮಚ,
ಎಣ್ಣೆ : 5-6 ಟೇಬಲ್ ಚಮಚ,
ಕರಿಬೇವು : ಸ್ವಲ್ಪ, 
ಅರಿಶಿನ ಪುಡಿ : 1/4 ಚಮಚ,
ಹಸಿ ಮೆಣಸಿನ ಕಾಯಿ : 5-6 (ಮಧ್ಯ ಕತ್ತರಿಸಿ ಉದ್ದುದ್ದ ಸೀಳಿಕೊಳ್ಳಿ),
ಉಪ್ಪು : ರುಚಿಗೆ

ವಿಧಾನ : 
ಆಲೂಗಡ್ಡೆಯನ್ನು ಕುಕ್ಕರ್ ನಲ್ಲಿ ಮೆತ್ತಗೆ ಬೇಯಿಸಿಕೊಂಡು ಪುಡಿ ಮಾಡಿಕೊಳ್ಳಿ. ಒಂದು ಬಾಣಲೆಗೆ ಎಣ್ಣೆ ಹಾಕಿಕೊಂಡು ಅದಕ್ಕೆ ಕಡಲೇಬೇಳೆ, ಉದ್ದಿನ ಬೇಳೆ ಹಾಕಿ ಸ್ವಲ್ಪ ಕಂದು ಬಣ್ಣಕ್ಕೆ ತಿರುಗಿದ ಮೇಲೆ ಸಾಸಿವೆ ಹಾಕಿ ಸಿಡಿಸಿ. ನಂತರ ಹಸಿಮೆಣಸಿನ ಕಾಯಿ, ಕರಿಬೇವು ಮತ್ತು ಈರುಳ್ಳಿ, ಅರಿಶಿನ ಪುಡಿ ಹಾಕಿ ಎರಡು ನಿಮಿಷ ಹುರಿಯಿರಿ. ನಂತರ ಇದಕ್ಕೆ ಉಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ, ಪುಡಿ ಮಾಡಿಟ್ಟುಕೊಂಡ ಆಲೂ ಹಾಕಿ ಚೆನ್ನಾಗಿ ಕಲಸಿ. ಒಂದೆರಡು ನಿಮಿಷ ಕಲಕುತ್ತಲೇ ಇದ್ದು ಉರಿ ಆರಿಸಿ ಮುಚ್ಚಿಡಿ. 


ಚಟ್ನಿಗೆ ಸಾಮಗ್ರಿಗಳು : 
ತೆಂಗಿನ ತುರಿ : 1 ಕಪ್,
ಹಸಿಮೆಣಸಿನ ಕಾಯಿ : 2-3,
ಹುರಿಗಡಲೆ : 1 ಟೇಬಲ್ ಚಮಚ,
ಕರಿಬೇವು : 5-6 ಎಲೆಗಳು,
ಶುಂಠಿ : ಸಣ್ಣ ಚೂರು, 
ಎಳ್ಳು : 1/2 ಚಮಚ,
ಉಪ್ಪು ರುಚಿಗೆ 
ವಿಧಾನ : 
ಒಗ್ಗರಣೆ ಸೌಟಿಗೆ ಒಂದೆರಡು ಹನಿ ಎಣ್ಣೆ ಹಾಕಿಕೊಂಡು ಹಸಿಮೆಣಸಿನ ಕಾಯಿ, ಕರಿಬೇವು, ಹಾಕಿ ಬಾಡಿಸಿಕೊಂಡು ಎಳ್ಳು ಹಾಕಿ ಹುರಿದುಕೊಳ್ಳಿ. ಮಿಕ್ಸಿ ಜಾರ್ ಗೆ ಹುರಿದುಕೊಂಡ ಮಿಶ್ರಣ, ಶುಂಠಿ, ತೆಂಗಿನ ತುರಿ, ಉಪ್ಪು ಹಾಕಿ ರುಬ್ಬಿದರೆ ಚಟ್ನಿ ಸಿದ್ಧ.

ಸಲಹೆಗಳು: 
೧) ದೋಸೆಯ ಮೇಲೆ ಚಟ್ನಿ ಪುಡಿಯ ಬದಲು ಬೆಳ್ಳುಳ್ಳಿ ಚಟ್ನಿ ಯನ್ನು ಸವರಿಕೊಳ್ಳಬಹುದು. ಒಣ ಮೆಣಸಿನ ಕಾಯಿ ಮತ್ತು ಬೆಳ್ಳುಳ್ಳಿಯನ್ನು ಎಣ್ಣೆಯಲ್ಲಿ ಸ್ವಲ್ಪ ಹುರಿದು ತೆಂಗಿನ ತುರಿ ಮತ್ತು ಉಪ್ಪು ಸೇರಿಸಿ ಗಟ್ಟಿಯಾಗಿ ರುಬ್ಬಿಕೊಂಡರೆ ಬೆಳ್ಳುಳ್ಳಿ ಚಟ್ನಿ ಸಿದ್ಧ. 
೨) ದೋಸೆ ಹಿಟ್ಟಿಗೆ ಸಕ್ಕರೆ ಹಾಕುವುದರಿಂದ ಹೊಂಬಣ್ಣದ ಮತ್ತು ಗರಿ ಗರಿಯಾದ ದೋಸೆ ಮಾಡಬಹುದು.