ಸಣ್ಣಕ್ಕಿ ಕೇಸರಿ ಪಾಯಸ :

ಓದುಗರಿಗೆ ಶರನ್ನವರಾತ್ರಿ ಶುಭಾಶಯಗಳು. ನವರಾತ್ರಿಯಲ್ಲಿ ದೇವಿಗೆ ನೈವೇದ್ಯ ಮಾಡಲು ಒಂದು ಪಾಯಸ ನಿಮಗಾಗಿ...  ಸಣ್ಣಕ್ಕಿ ಎಂದರೆ ಮಲೆನಾಡಿನ ಕಡೆ ಸಿಗುವ ಸುವಾಸನೆಯುಕ್ತ, ಗಾತ್ರದಲ್ಲಿ ಬೇರೆ ಅಕ್ಕಿಗಿಂತ ಸಣ್ಣದಾದ ಅಕ್ಕಿ. ಬೆಂಗಳೂರಿನಲ್ಲಿ ಸಿಗುವ ಜೀರಿಗೆ ಅಕ್ಕಿ ಇದನ್ನು ಹೋಲುತ್ತದೆ ಆದರೆ ಸಣ್ಣಕ್ಕಿಯಂತೆ ಸುವಾಸನೆಯಿರುವುದೇ ಎಂಬುದನ್ನು ನಾನು ತಂದು ನೋಡಿಲ್ಲ... ! 

ಸಾಮಗ್ರಿಗಳು :

ಸಣ್ಣಕ್ಕಿ : 1/2 ಕಪ್

ಹಾಲು:  3/4 - 1 ಲೀಟರ್

ಸಕ್ಕರೆ : 1.5 -2 ಕಪ್

ಕೇಸರಿ ದಳ : 1 ಚಿಟಿಕೆ

ಉಪ್ಪು : 2 ಚಿಟಿಕೆ

ವಿಧಾನ :

2 ಚಮಚ ಹಾಲಿನಲ್ಲಿ ಕೇಸರಿ ದಳಗಳನ್ನು ನೆನೆಸಿಡಿ. ಅಕ್ಕಿಯನ್ನು ತೊಳೆದು ಅರ್ಧ ಲೀಟರ್ ಹಾಲು ಬೇಕಿದ್ದಲ್ಲಿ ಒಂದು ಕಪ್ ನೀರು ಹಾಕಿ ಬೇಯಲು ಇಡಿ. ಆಗಾಗ ಕಲಕುತ್ತಿರಿ. ಹಾಲು ಕಮ್ಮಿಯಾದಂತೆ ಹಾಕುತ್ತಿರಿ. ಅಕ್ಕಿ ಚೆನ್ನಾಗಿ ಅರಳುವಷ್ಟು ಬೇಯಬೇಕು. ಅಂದರೆ ಪೂರ್ತಿ ಮೆತ್ತಗೆ ಬೇಯಬೇಕು. ಚೆನ್ನಾಗಿ ಬೆಂದು, ಅನ್ನ ಅರಳಿದ ಮೇಲೆ ಸಕ್ಕರೆ, ನೆನಸಿಟ್ಟ ಕೇಸರಿ ಹಾಲು ಹಾಕಿ ಕಲಕಿ. ಎಷ್ಟು ದಪ್ಪ ಬೇಕು ನೋಡಿಕೊಂಡು ಮತ್ತೆ ಹಾಲು ಬೇಕಿದ್ದಲ್ಲಿ ಹಾಕಿ, ಉಪ್ಪು ಹಾಕಿ ಕುದಿಸಿ. ದೇವಿಗೆ ನೈವೇದ್ಯ ಮಾಡಿಕೊಂಡು ಬಿಸಿ ಬಿಸಿ ಪಾಯಸಕ್ಕೆ ತುಪ್ಪ ಹಾಕಿಕೊಂಡು ಸವಿಯಿರಿ. 

ಸಿಹಿ ಕು೦ಬಳ (ಗೋವೆಕಾಯಿ) ಕಡುಬು:

ಸಾಮಗ್ರಿಗಳು: 
ಅಕ್ಕಿ - 1 ಕಪ್, 
ಬೆಲ್ಲ - 1/2 ಕಪ್, 
ಸಿಹಿ ಕು೦ಬಳ ಸಿಪ್ಪೆ ತೆಗೆದು ಹೆಚ್ಚಿದ್ದು - 1 ಕಪ್,
ಉಪ್ಪು - 1/2 ಚಮಚ.
ತೆ೦ಗಿನ ತುರಿ - 2-3 ಚಮಚ

ವಿಧಾನ: ಅಕ್ಕಿಯನ್ನು 3 ಗ೦ಟೆ ನೆನೆಸಿಟ್ಟುಕೊಳ್ಳಿ. ನ೦ತರ ಇದನ್ನು ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ಹೆಚ್ಚಿಟ್ಟುಕೊ೦ಡ ಸಿಹಿ ಕು೦ಬಳಕ್ಕೆ ಉಪ್ಪು, ಬೆಲ್ಲ ಸ್ವಲ್ಪ ನೀರು ಹಾಕಿ 10-15 ನಿಮಿಷ ಬೇಯಿಸಿ. ನ೦ತರ ಉರಿ ಸಣ್ಣ ಮಾಡಿ ರುಬ್ಬಿಟ್ಟ ಅಕ್ಕಿ ಹಿಟ್ಟನ್ನು ಹಾಕಿ ಗ೦ಟಾಗದ೦ತೆ ಕಲೆಸುತ್ತಾ ಇರಬೇಕು. 10 ನಿಮಿಷ ಬಿಡದೆ ಕಲಸಿ, ಉರಿ ಆರಿಸಿ. ಬಿಸಿ ಆರಿದ ಮೇಲೆ ಬಾಳೆ ಎಲೆಗೆ ಸ್ವಲ್ಪ ನೀರು ಹಾಕಿ ವರೆಸಿಕೊ೦ಡು ಹಿಟ್ಟನ್ನು ತೆಳ್ಳಗೆ ತಟ್ಟಿ ಅದರ ಮೇಲೆ ತೆ೦ಗಿನ ತುರಿ ಉದುರಿಸಿ. ನ೦ತರ ಬಾಳೆ ಎಲೆಯನ್ನು ಮಡಿಸಿ ಇಡ್ಲಿ ಪಾತ್ರೆಯಲ್ಲಿ ಹಾಕಿ 45 ನಿಮಿಷ  ಬೇಯಿಸಿ. ಈಗ ಬಿಸಿ ಬಿಸಿ ಸಿಹಿಕು೦ಬಳದ ಕಡುಬು ತಿನ್ನಲು ಸಿದ್ಧ. ಇದಕ್ಕೆ ತುಪ್ಪ ಅಥವಾ ಗಟ್ಟಿ ಮೊಸರು ಹಾಕಿಕೊ೦ಡು ತಿನ್ನಲು ಚೆನ್ನಾಗಿರುತ್ತದೆ.

ಇದು ದೀಪಾವಳಿ ಹಬ್ಬದ ವಿಶೇಷ ಸಿಹಿ.

ಹೆಸರುಬೇಳೆ ಪಾಯಸ :

ಹೆಸರುಬೇಳೆ ಪಾಯಸವನ್ನು ಶಿವರಾತ್ರಿ ಹಬ್ಬಕ್ಕೆ ನೈವೇದ್ಯಕ್ಕೆ ಮಾಡುವ ಪದ್ಧತಿ ಕೆಲವೆಡೆ ಇದೆ. ಈ ಪಾಯಸ ತಿನ್ನುವುದರಿಂದ ರಾತ್ರಿ ಜಾಗರಣೆ ಮಾಡಿದರೆ ದೇಹದ ಉಷ್ಣತೆ ಜಾಸ್ತಿಯಾಗದೇ ತಂಪಾಗಿರುತ್ತದೆ. ಬೇರೆ ಯಾವುದೇ ಹಬ್ಬಕ್ಕೂ ನೈವೇದ್ಯಕ್ಕೆ ಮಾಡಬಹುದು. 

ಸಾಮಗ್ರಿಗಳು:

ಹೆಸರುಬೇಳೆ 1.5 ಕಪ್,

ಬೆಲ್ಲ 1/2 ಕಪ್,

ಸಕ್ಕರೆ 1/2 ಕಪ್,

ತೆಂಗಿನ ತುರಿ 1 ಕಪ್,

ಹಾಲು 1/2 ಕಪ್,

ಏಲಕ್ಕಿ ಪುಡಿ 1/4 ಚಮಚ,

ಗೋಡಂಬಿ 8-10,

ಉಪ್ಪು 1/4 ಚಮಚ 

ವಿಧಾನ :

ಹೆಸರುಬೇಳೆ ತೊಳೆದುಕೊಂಡು ನೀರು ಹಾಕಿ ಕುಕ್ಕರ್ ನಲ್ಲಿ ಎರಡು ಕೂಗು ಕೂಗಿಸಿ ಅಥವಾ ಹಾಗೆಯೇ ಪಾತ್ರೆಯಲ್ಲಿ ಹಾಕಿ ಒಲೆಯ ಮೇಲಿಟ್ಟು ಬೇಯಿಸಬಹುದು. ಬೇಳೆ ಪೂರ್ತಿ ಕರಗುವಷ್ಟು ಬೇಯಿಸಬಾರದು,  ತೆಂಗಿನ ತುರಿಗೆ ಏಲಕ್ಕಿ ಪುಡಿ ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ಬೆಂದ ಹೆಸರುಬೇಳೆಗೆ ಹಾಲು, ರುಬ್ಬಿದ ತೆಂಗಿನಕಾಯಿ, ಗೋಡಂಬಿ ಚೂರುಗಳು, ಸಕ್ಕರೆ ಮತ್ತು ಬೆಲ್ಲ ಹಾಕಿ ಬೇಕಿದ್ದರೆ ಸ್ವಲ್ಪ ನೀರು ಹಾಕಿ ಕುದಿಯಲು ಬಿಡಿ. ಹೆಸರುಬೇಳೆ ಬೇಗ  ತಳಹಿಡಿಯುತ್ತದೆ, ಆಗಾಗ ಕಲಕುತ್ತಿರಿ. ಚೆನ್ನಾಗಿ  ಕುದಿ ಬಂದ ಮೇಲೆ ಉರಿ ಆರಿಸಿ. ಬಿಸಿ ಬಿಸಿ ಪಾಯಸಕ್ಕೆ ತುಪ್ಪ ಹಾಕಿಕೊಂಡು ಸವಿದರೆ ಆಹಾ ...! 

ಅಕ್ಕಿ ವಡೆ:

ಸಾಮಗ್ರಿಗಳು: ಉದ್ದಿನಬೇಳೆ - 2 ಕಪ್, ಅಕ್ಕಿ (ದೊಡ್ಡ ಮುಳ್ಳರೆ / ಬಾಳೆಸುಳಿ) - 2 ಕಪ್, ಜೀರಿಗೆ 1 ಟೀ ಚಮಚ , ಓಮು 1/2 ಟೀ ಚಮಚ, ಇ೦ಗು ಚಿಟಿಕೆ, ಹಸಿ ಮೆಣಸು 2,  ಉಪ್ಪು.

ವಿಧಾನ : ಅಕ್ಕಿಯನ್ನು 1 ಗ೦ಟೆ ನೀರಿನಲ್ಲಿ ನೆನೆಹಾಕಿ. ಹಾಗೆ ಉದ್ದಿನಬೇಳೆಯನ್ನು ಬೇರೆ ಪಾತ್ರೆಯಲ್ಲಿ 1 ತಾಸು ನೆನೆಹಾಕಿ. ಈಗ ಅಕ್ಕಿಯಲ್ಲಿನ ನೀರನ್ನು ಪೂರ್ಣವಾಗಿ ತೆಗೆದು ಕಾಟನ್ ಬಟ್ಟೆಯಲ್ಲಿ 1/2 ಗ೦ಟೆ ಹರವಿಡಿ. ನ೦ತರ ಈ ಅಕ್ಕಿಯನ್ನು ಮಿಕ್ಸಿಯಲ್ಲಿ ತರಿ ತರಿ ಪುಡಿ ಮಾಡಿಕೊಳ್ಳಿ. ದೊಡ್ಡ ರವಾ (ಉಪ್ಪಿಟ್ಟಿನ ರವೆ) ಹದಕ್ಕೆ ಅಕ್ಕಿ ಕಡಿ ಇರಬೇಕು.ಇದನ್ನು ಜರಡಿ ಹಿಡಿದು ನುಣುಪಾದ ಹಿಟ್ಟನ್ನು ತೆಗೆದುಬಿಡಿ. ಮಿಕ್ಸಿ ಜಾರಿಗೆ ಜೀರಿಗೆ, ಓಮು, ಇ೦ಗು, ಹಸಿಮೆಣಸು, ಉಪ್ಪು ಹಾಕಿ ಪುಡಿ ಮಾಡಿಕೊ೦ಡು ಅಕ್ಕಿ ಕಡಿಗೆ ಸೇರಿಸಿ. ಈಗ ಇದಕ್ಕೆ ನುಣ್ಣಗೆ ರುಬ್ಬಿಕೊ೦ಡ ಉದ್ದಿನಬೇಳೆಯ ಹಿಟ್ಟನ್ನು ಹಾಕುತ್ತ ಚೆನ್ನಾಗಿ ಕಲೆಸಿ ಹಾಗೆ 1/2 ಗ೦ಟೆಗಳ ಕಾಲ ಇಡಿ. ನ೦ತರ ಮತ್ತೆ ತಿಕ್ಕಿ ತಿಕ್ಕಿ ಕಲೆಸಿ ಬೇಕಾದಲ್ಲಿ ಉದ್ದಿನಹಿಟ್ಟು ಸೇರಿಸಿ. ಚಪಾತಿ ಹಿಟ್ಟಿಗಿ೦ತ ಸ್ವಲ್ಪ ಮೆದು ಇರಬೇಕು.

ಈಗ ಬಾಣಲೆಯನ್ನು ಒಲೆಯ ಮೆಲೆ ಇಟ್ಟು ಉರಿ ದೊಡ್ಡ ಮಾಡಿ. ಬಾಳೆ ಎಲೆ / ಎಣ್ಣೆ ಕವರ್ ಗೆ ದಪ್ಪಗೆ ಎಣ್ಣೆ ಹಚ್ಚಿಕೊ೦ಡು ಪುರಿ ಉ೦ಡೆಯಷ್ಟು ದೊಡ್ಡ ಹಿಟ್ಟು ತೆಗೆದುಕೊ೦ಡು ಕೈಯಲ್ಲಿ ಚೆನ್ನಾಗಿ ತಿಕ್ಕಿ ಉ೦ಡೆ ಮಾಡಿ ಲಟ್ಟಿಸಿ. ಹೊಗೆ ಬರುವಷ್ಟು ಎಣ್ಣೆ ಕಾದಿರ ಬೇಕು. ಈಗ ಲಟ್ಟಿಸಿದ ಹಿಟ್ಟನ್ನು ಎಣ್ಣೆಯಲ್ಲಿ ಬಿಡಿ. (ಎಣ್ಣೆಗೆ ಹಾಕುವಾಗ ಬಹಳ ನಾಜೂಕಿನಿ೦ದ ಹಾಕಬೇಕು. ಇಲ್ಲದಿದ್ದರೆ ಅದು ಮಡಚಿ ವಡೆ ಉಬ್ಬುವುದಿಲ್ಲ). ಈಗ ಗರಿ ಗರಿ ಅಕ್ಕಿ ವಡೆ ತಿನ್ನಲು ಸಿದ್ಧ. ಅನ್ನ ಸಾ೦ಬಾರ್ ಊಟ ಮಾಡುವಾಗ ಅಕ್ಕಿ ವಡೆ ಒಳ್ಳೆಯ ಜೊತೆಯಾಗುತ್ತದೆ.

ಅತಿರಸ/ಅತ್ರಾಸ/ಕಜ್ಜಾಯ:

ಸಾಮಗ್ರಿಗಳು: ಅಕ್ಕಿ ಹಿಟ್ಟು- ೧ ಕಪ್, ಬೆಲ್ಲ - ೧ ೧/೨ ಕಪ್, ಎಳ್ಳು ೨ ಚಮಚ, ತೆ೦ಗಿನತುರಿ ೧ ಕಪ್, ಏಲಕ್ಕಿಪುಡಿ ೧/೪ ಟೀ ಚಮಚ, ಕರಿಯಲು ಎಣ್ಣೆ.

ವಿಧಾನ : ಒ೦ದು ದಪ್ಪ ತಳದ ಪಾತ್ರೆಯಲ್ಲಿ ಬೆಲ್ಲ ಹಾಕಿ ಅದಕ್ಕೆ ನೀರು/ಹಾಲು ಹಾಕಿ ಕುದಿಸಿ ಆಗಾಗ ತಳಹಿಡಿಯದ೦ತೆ ಕೈಯಾಡಿಸಿ ಬೆಲ್ಲದ ನೀರು ಬೆಳಿ ನೊರೆ ಬರಲು ಶುರುವಾದಮೇಲೆ ಅದಕ್ಕೆ ಎಳ್ಳು, ತೆ೦ಗಿನತುರಿ, ಏಲಕ್ಕಿಪುಡಿ ಹಾಕಿ ಮತ್ತೆ ೫ ನಿಮಿಷ ಬಿಡಿ. ನ೦ತರ ಉರಿ ಸಣ್ಣ ಮಾಡಿ ಅಕ್ಕಿ ಹಿಟ್ಟು ಸೇರಿಸುತ್ತಾ ಬನ್ನಿ. ಗ೦ಟಾಗದ೦ತೆ ತೊಳೆಸುತ್ತಿರಬೇಕು. ಮಿಶ್ರಣವು ಪಾತ್ರೆಬಿಡಲು ಶುರುವಾದಮೇಲೆ ಉರಿ ಆರಿಸಿ. ಈ ಮಿಶ್ರಣ ತಣ್ಣಗಾದ ಮೇಲೆ ಪುರಿ ಥರ ಚಿಕ್ಕ ಚಿಕ್ಕ ಉ೦ಡೆ ಮಾಡಿಟ್ಟುಕೊಳ್ಳಿ.ಬಾಣಲೆಗೆ ಎಣ್ಣೆ ಹಾಕಿ ಬಿಸಿ ಮಾಡಲು ಇಡಿ. ಈಗ ಬಾಳೆ ಎಲೆ ಅಥವಾ ಎಣ್ಣೆ ಕವರ್ ಗೆ ಎಣ್ಣೆ ಸವರಿಕೊ೦ಡು ಕೈಗೂ ಸ್ವಲ್ಪ ಎಣ್ಣೆ ಸವರಿಕೊ೦ಡು ಅದನ್ನು ತಟ್ಟಿ ಕಾದ ಎಣ್ಣೆಯಲ್ಲಿ ಬೇಯಿಸಿ ಬೆ೦ದ ಮೇಲೆ ಮತ್ತೊ೦ದು ಚಪ್ಪಟೆ ಸೌಟು ತೆಗೆದುಕೊ೦ಡು ಬಾಣಲೆ ಇ೦ದ ತೆಗೆದ ತಕ್ಷಣ ಎಣ್ಣೆಯನ್ನು ಹಿ೦ಡಿ ತೆಗೆಯಿರಿ. ಈಗ ಗರಿ ಗರಿಯಾದ ಅತಿರಸ/ಅತ್ರಾಸ/ಕಜ್ಜಾಯ ತಿನ್ನಲು ಸಿದ್ಧ.

ಗೋಧಿ ನುಚ್ಚಿನ ಪಾಯಸ :

ಸಾಮಗ್ರಿಗಳು:
ದೊಡ್ಡ ಅಥವಾ ಮಧ್ಯಮ ಗೋಧಿ ನುಚ್ಚು (ಕಡಿ): 1.5 ಕಪ್
ಹಾಲು : 2 ಕಪ್
ತೆಂಗಿನ ತುರಿ :1/2 ಕಪ್
ಸಕ್ಕರೆ :3 ಕಪ್
ಒಣ ದ್ರಾಕ್ಷಿ : 1 ಚಮಚ
ಗೋಡಂಬಿ : 8
ಖರ್ಜೂರ : 4-5
ತುಪ್ಪ : 2 ಚಮಚ 
ಉಪ್ಪು: 1/4 ಚಮಚ

ವಿಧಾನ:

ಗೋಧಿ ನುಚ್ಚನ್ನು 4-5 ಘಂಟೆ ನೀರಿನಲ್ಲಿ ನೆನೆಸಿಕೊಳ್ಳಿ. ನಂತರ ಆ ನೀರಿನ ಜೊತೆಯೇ ಕುಕ್ಕರ್ ನಲ್ಲಿ ೩ ವಿಶಲ್ ಕೂಗಿಸಿ ಬೇಯಿಸಿಕೊಳ್ಳಿ. ಇದನ್ನು ದಪ್ಪ ತಳದ ಪಾತ್ರೆಗೆ ಹಾಕಿ ಹಾಲು, ಸಕ್ಕರೆ ಹಾಕಿ ಒಲೆಯ ಮೇಲಿಡಿ. ಇತ್ತ ತೆಂಗಿನ ತುರಿಗೆ ಸ್ವಲ್ಪ ನೀರು ಸೇರಿಸಿ ನುಣ್ಣಗೆ ರುಬ್ಬಿಕೊಂಡು ಪಾಯಸಕ್ಕೆ ಹಾಕಿ. ದ್ರಾಕ್ಷಿ, ಗೋಡಂಬಿ ಚೂರುಗಳು ಮತ್ತು ಉಪ್ಪು ಹಾಕಿ ಚೆನ್ನಾಗಿ ಕುದಿಸಿ. ಪಾಯಸ ದಪ್ಪ ಅನಿಸಿದರೆ ಹಾಲು / ನೀರು ಸೇರಿಸಿ ಕುದಿಸಿ. ಕೊನೆಯಲ್ಲಿ ಖರ್ಜೂರವನ್ನು ಸಣ್ಣದಾಗಿ ಹೆಚ್ಚಿಕೊಂಡು ತುಪ್ಪದಲ್ಲಿ ಹುರಿದು ಪಾಯಸಕ್ಕೆ ಹಾಕಿದರೆ ರುಚಿಯಾದ ಪಾಯಸ ಸಿದ್ಧ. 

ಸಲಹೆ :

1) ಗೋಧಿ ಕಡಿ / ನುಚ್ಚಿನ ಬದಲು ಗೋಧಿಯಿಂದಲೇ ಪಾಯಸ  ಮಾಡಬಹುದು. ಆದರೆ ರಾತ್ರಿಯಿಡೀ ಗೋಧಿಯನ್ನು ನೆನೆಸಿಟ್ಟು ಮಾಡಬೇಕು. ಪೂರ್ತಿ ಗೋಧಿ ಅಗಿಯಲು ಸಿಗುವದರಿಂದ ಗೋಧಿ ಪಾಯಸ ಕೂಡ ಚೆನ್ನಾಗಿರುತ್ತದೆ. 

2) ಹಾಲನ್ನು ಹಾಕುವಾಗ ಪಾಯಸ ನಿಮಗೆ ಎಷ್ಟು ದಪ್ಪ ಬೇಕು ನೋಡಿಕೊಂಡು ಹಾಕಿಕೊಳ್ಳಿ. ಪೂರ್ತಿ ಹಾಲನ್ನು ಒಮ್ಮೆಲೇ ಹಾಕಿಕೊಳ್ಳಬೇಡಿ. 

3) ಸಕ್ಕರೆ ಬದಲು ಬೆಲ್ಲ ಕೂಡ ಹಾಕಬಹುದು. ಅಥವಾ ಬೆಲ್ಲ ಸಕ್ಕರೆ ಎರಡನ್ನೂ ಹಾಕಿ ಮಾಡಬಹುದು. 

ಕರ್ಜಿಕಾಯಿ

ಸಾಮಗ್ರಿಗಳು: 
ತೆ೦ಗಿನತುರಿ - 1 ಕಪ್, 
ಸಕ್ಕರೆ - 1/2 ಕಪ್, 
ಎಳ್ಳು - 1 ಚಮಚ, 
ಏಲಕ್ಕಿ ಪುಡಿ - 1ಚಿಟಿಕೆ, 
ಚಿರೋಟಿ ರವಾ - 1/2 ಕಪ್ , 
ಮೈದಾ ಹಿಟ್ಟು 1/2 ಕಪ್,
 ಉಪ್ಪು ರುಚಿಗೆ ತಕ್ಕಷ್ಟು, ಎಣ್ಣೆ ಕರಿಯಲು.

ವಿಧಾನ :ಚಿರೋಟಿ ರವಾ, ಮೈದಾ ಹಿಟ್ಟು, ಉಪ್ಪು ಸೇರಿಸಿ ಸ್ವಲ್ಪ ನೀರು ಹಾಕಿ ಚಪಾತಿ ಹಿಟ್ಟಿನ ಹದಕ್ಕೆ ಕಲೆಸಿ ಇಟ್ಟುಕೊಳ್ಳಿ. ಈಗ ಒ೦ದು ಬಾಣಲೆಗೆ ಸಕ್ಕರೆ ತೆ೦ಗಿನತುರಿ ಹಾಕಿ ಸಣ್ಣ ಉರಿಯಲ್ಲಿ 10-15 ನಿಮಿಷ ಹುರಿದು ಕೊನೆಯಲ್ಲಿ ಎಳ್ಳು, ಏಲಕ್ಕಿ ಪುಡಿ ಸೇರಿಸಿ ಬಾಣಲೆಯನ್ನು ಒಲೆಯಿ೦ದ ಇಳಿಸಿ. ಈ ಹೂರಣ ತಣಿಯುವವರೆಗೆ ಹಿಟ್ಟನ್ನು ಪುರಿಯ ಉ೦ಡೆಯ ಹಾಗೆ ಚಿಕ್ಕ ಚಿಕ್ಕ ಉ೦ಡೆ ಮಾಡಿಕೊ೦ಡು ಲಟ್ಟಿಸಿ ಇದರೊಳಗೆ ಹೂರಣ ತು೦ಬಿ ಮಡಿಚಿ ಕಾದ ಎಣ್ಣೆಯಲ್ಲಿ ಹದವಾದ ಉರಿಯಲ್ಲಿ ಕರಿದರೆ ಗರಿ ಗರಿ ಕರ್ಜಿಕಾಯಿ ರೆಡಿ.

ಸೂಚನೆ:
1. ತೆ೦ಗಿನತುರಿಯ ಬದಲು ಕೊಬ್ಬರಿ ತುರಿಯನ್ನು ಬಳಸಬಹುದು. ಕೊಬ್ಬರಿ ತುರಿ ಬಳಸುವಾಗ ಸಕ್ಕರೆ ಬದಲು ಸಕ್ಕರೆ ಪುಡಿ ಹಾಕಿ ಮಾಡಿ.
2. ಮೈದಾಹಿಟ್ಟಿನ ಬದಲು ಗೋಧಿಹಿಟ್ಟೂ ಬಳಸಬಹುದು. 

ಮೋದಕ:

ಸಾಮಗ್ರಿಗಳು : ಗೋಧಿ ಹಿಟ್ಟು 1 ಕಪ್, ತೆ೦ಗಿನಕಾಯಿ ತುರಿ 1 ಕಪ್ , ಬೆಲ್ಲ (ಸಕ್ಕರೆ) 1/2 ಕಪ್ , ಎಳ್ಳು - 1 ಚಮಚ, ಏಲಕ್ಕಿ ಪುಡಿ 1/2 ಚಮಚ, ಎಣ್ಣೆ ಕರಿಯಲು.

ವಿಧಾನ : ಗೋಧಿಹಿಟ್ಟನ್ನು ಚಪಾತಿ ಹಿಟ್ಟಿನ ಹದಕ್ಕೆ ಕಲೆಸಿಕೊಳ್ಳಿ. ಒ೦ದು ಪಾತ್ರೆಗೆ ತೆ೦ಗಿನತುರಿ ಬೆಲ್ಲ ಹಾಕಿ ಚೆನ್ನಾಗಿ ಕಾಯಿಸಿ. ಆಗಾಗ ಅಡಿ ಹಿಡಿಯದ೦ತೆ ತೊಳೆಸುತ್ತಲೆ ಇರಬೇಕು. ಈ ಹೂರಣ ಹದಕ್ಕೆ ಬರಲು  15-20 ನಿಮಿಷ ಕಾಯಿಸ ಬೇಕಾಗುತ್ತದೆ. ಈಗ ಗೋಧಿಹಿಟ್ಟನ್ನು ಚಿಕ್ಕ ಚಿಕ್ಕ (ಚಿಕ್ಕ ನೆಲ್ಲಿಕಾಯಿ ಗಾತ್ರ) ಉ೦ಡೆ ಮಾಡಿಕೊ೦ಡು ಚಪಾತಿ ಥರ ತೆಳ್ಳಗೆ ಹಿಟ್ಟು ಬಳಸಿ ಲಟ್ಟಿಸಿಕೊಳ್ಳಿ (ಇದಕ್ಕೆ ಮೋದಕದ ಹಾಳೆ ಎನ್ನುತ್ತಾರೆ) . ಬಿಸಿ ಆರಿದ ಹೂರಣವನ್ನು ಚಿತ್ರದಲ್ಲಿ ತೋರಿಸಿದ೦ತೆ ಮೋದಕದ ಹಾಳೆಯಲ್ಲಿ ಮಡಿಸಿಟ್ಟುಕೊಳ್ಳಿ. ಎಣ್ಣೆಯನ್ನು ಬಾಣಲೆಗೆ ಹಾಕಿ ಎಣ್ಣೆ ಕಾದ ಮೇಲೆ ಇದನ್ನು ಹಾಕಿ ಸಣ್ಣ ಉರಿಯಲ್ಲಿ ಹೊ೦ಬಣ್ಣ ಬರುವ ವರೆಗೆ ಬೇಯಿಸಿ. ಈಗ ಮೋದಕ ರೆಡಿ.

ಕಾಯಿ ಹೋಳಿಗೆ :

ಹೂರಣಕ್ಕೆ ಸಾಮಗ್ರಿಗಳು:

ತೆಂಗಿನ ಕಾಯಿ - 2 (medium or big) 

ಬೆಲ್ಲ - 1.5 ಕಪ್

ಏಲಕ್ಕಿ ಪುಡಿ - 1/4 ಟೀ ಚಮಚ 

ಉಪ್ಪು - 1/2 ಟೀ ಚಮಚ 

ಕಣಕಕ್ಕೆ ಸಾಮಗ್ರಿಗಳು :

ಚಿರೋಟಿ ರವೆ - 1/2 ಕೆಜಿ 

ಅರಿಶಿನ ಪುಡಿ - 1/2 ಟೀ ಚಮಚ 

ಎಣ್ಣೆ - 6-8 ಚಮಚ 

ಉಪ್ಪು - 1/4 ಟೀ ಚಮಚ

ನೀರು - 1- 1 1/4 ಕಪ್  
(ಇಷ್ಟು ಅಳತೆಗೆ 18-20 ಹೋಳಿಗೆ ಆಗಬಹುದು). 

ವಿಧಾನ : 
ಒಂದು ಅಗಲವಾದ ಪಾತ್ರೆಗೆ ಚಿರೋಟಿ ರವೆ, ಉಪ್ಪು, ಅರಿಶಿನ ಪುಡಿ, 3-4 ಚಮಚ ಎಣ್ಣೆ ಹಾಕಿ ಸ್ವಲ್ಪ ಸ್ವಲ್ಪವೇ ನೀರು ಹಾಕುತ್ತ  ಚಪಾತಿ ಹಿಟ್ಟಿನಕಿಂತ ಸ್ವಲ್ಪ ಮೆತ್ತಗೆ ಕಲಸಿ ಚೆನ್ನಾಗಿ ನಾದಿಕೊಳ್ಳಿ. ನಂತರ ಅದು ಮುಳುಗುವಷ್ಟು ನೀರು ಹಾಕಿ ಅರ್ಧ ಮುಕ್ಕಾಲು ಗಂಟೆ ಹಾಗೆಯೇ ನೀರಿನಲ್ಲಿ ನೆನೆಸಿ.

ಅಷ್ಟರಲ್ಲಿ ಹೂರಣ ತಯಾರಿಸಬಹುದು. ತೆಂಗಿನ ಕಾಯಿ ತುರಿದು ಸ್ವಲ್ಪವೇ ನೀರು ಹಾಕಿ ತರಿ ತರಿಯಾಗಿ ರುಬ್ಬಿಕೊಳ್ಳಿ. (ನೀರು ಹಾಕದೆ ರುಬ್ಬಿದರೂ ಒಳ್ಳೆಯದು). ನಂತರ ದಪ್ಪ ತಳದ ಪಾತ್ರೆ ಅಥವಾ ದೊಡ್ಡ ಕುಕ್ಕರ್ ಗೆ (cooker pan) ರುಬ್ಬಿದ ಮಿಶ್ರಣ, ಬೆಲ್ಲ, ಏಲಕ್ಕಿ ಪುಡಿ, ಉಪ್ಪು ಹಾಕಿ ಮಧ್ಯಮ ಅಥವಾ ಸ್ವಲ್ಪ ದೊಡ್ಡ ಉರಿಯಲ್ಲಿ ಕಲಕುತ್ತಿರಿ. ಇದು ಸ್ವಲ್ಪ ಗಟ್ಟಿಯಾಗುತ್ತಾ ಬಂದಂತೆ ಉರಿ ಸಣ್ಣ ಮಾಡಿ ಕೈ ಬಿಡದೇ ಕಲಕುತ್ತಿರಿ. ಸುಮಾರು ಅರ್ಧ ಗಂಟೆಯಲ್ಲಿ ಇದು ಕೈಗೆ ಅಂಟದೇ ಉಂಡೆ ಮಾಡಲು ಬರುವಷ್ಟು ಗಟ್ಟಿ ಆಗುತ್ತದೆ. ಆಗ ಉರಿ ಆರಿಸಿ ಕೆಳಗಿಳಿಸಿ. 

ಇದು ತಣ್ಣಗಾಗುವಷ್ಟರಲ್ಲಿ ಕಣಕವನ್ನು ನೀರಿನಿಂದ ತೆಗೆದು (ಪೂರ್ತಿಯಾಗಿ ನೀರು ಬಸಿಯಿರಿ) 1-2 ಚಮಚ ಎಣ್ಣೆ ಹಾಕಿ ಮತ್ತೊಮ್ಮೆ ಚೆನ್ನಾಗಿ ನಾದಿಕೊಳ್ಳಿ. ತಣ್ಣಗಾದ ಹೂರಣದಿಂದ ಚಪಾತಿ ಉಂಡೆ ಗಾತ್ರದ ಉಂಡೆ ಮಾಡಿಟ್ಟುಕೊಳ್ಳಿ. 

ಕೈಗೆ ಎಣ್ಣೆ ಸವರಿಕೊಂಡು ಲಿಂಬು ಗಾತ್ರದ  ಕಣಕದ ಉಂಡೆ ತೆಗೆದುಕೊಂಡು ಕೈ ಅಲ್ಲಿ ಹರವಿಕೊಂಡು ಹೂರಣದ ಉಂಡೆ ಇಟ್ಟು ಸರಿಯಾಗಿ ಮುಚ್ಚಿ ತುಂಬಿಕೊಳ್ಳಿ. ಖಾಲಿಯಾದ ಎಣ್ಣೆ ಕವರ್ ಕತ್ತರಿಸಿಕೊಂಡು ಅದಕ್ಕೆ ಮತ್ತು ಲಟ್ಟಣಿಗೆಗೆ ಸರಿಯಾಗಿ ಎಣ್ಣೆ ಸವರಿ, ತುಂಬಿಕೊಂಡ ಹೂರಣದ ಉಂಡೆ ಇಟ್ಟು ತೆಳ್ಳಗೆ ಲಟ್ಟಿಸಿಕೊಳ್ಳಿ.

 ನಂತರ ಅದನ್ನು ಬಿಡಿಸಿ ಕೈಗೆ ಹಾಕಿಕೊಂಡು, ಎಣ್ಣೆ ಸವರಿದ ಕಾದ ತವಾ  ಮೇಲೆ ಹಾಕಿ ಮಧ್ಯಮ ಉರಿಯಲ್ಲಿ ಎರಡೂ ಕಡೆ ಬೇಯಿಸಿ ತೆಗೆಯಿರಿ. ಈ ಕಾಯಿ ಹೋಳಿಗೆಗೆ ತುಪ್ಪ ಅಥವಾ ಬಿಸಿ ಹಾಲು ಹಾಕಿಕೊಂಡು ಸವಿಯಿರಿ. 

ಕಡ್ಲೆ ಬೇಳೆ ಹೋಳಿಗೆ / ಒಬ್ಬಟ್ಟು :

ದೀಪಾವಳಿ ಮತ್ತು ಯುಗಾದಿ ಹಬ್ಬಕ್ಕೆ ನಮ್ಮ ಊರಿನಲ್ಲಿ ಹೋಳಿಗೆ ಕಡ್ಡಾಯ...! ನೀವು ಮಾಡಿ ನೋಡಿ ಸಿಹಿ ಸವಿ ಹೋಳಿಗೆ .... 
ಸಾಮಗ್ರಿಗಳು :

ಹೂರಣಕ್ಕೆ ಬೇಕಾಗುವ ಸಾಮಗ್ರಿಗಳು :

ಕಡಲೆ ಬೇಳೆ : 3 ಕಪ್,

ಉಂಡೆ ಬೆಲ್ಲ : 1 1/2,

ಆಲೂಗಡ್ಡೆ  : ಒಂದು (ಮಧ್ಯಮ ಗಾತ್ರ) 

ಕಣಕಕ್ಕೆ ಬೇಕಾಗುವ ಸಾಮಗ್ರಿಗಳು: 

ಚಿರೋಟಿ ರವೆ : 3 ಕಪ್,

ಅರಿಶಿನ ಪುಡಿ : 1/2 ಟೀ ಚಮಚ, 

ಎಣ್ಣೆ : 8-10 ಚಮಚ 

ಉಪ್ಪು : ರುಚಿಗೆ 

ಲಟ್ಟಿಸಲು ಎಣ್ಣೆ - 1 ಕಪ್ ಮತ್ತು ಖಾಲಿಯಾದ ಎಣ್ಣೆ ಕವರ್. 

ವಿಧಾನ: ಕುಕ್ಕರ್ ಗೆ ಕಡಲೆ ಬೇಳೆ, ನೀರು ಹಾಕಿ (ಬೇಳೆ ಮುಳುಗಿ ಒಂದು ಒಂದೂವರೆ ಇಂಚು ಮೇಲೆ ಬರುವಷ್ಟು ನೀರು ಹಾಕಿ), ಅದಕ್ಕೆ ತೊಳೆದು ಮಧ್ಯ ಕತ್ತರಿಸಿದ ಆಲೂಗಡ್ಡೆ ಹಾಕಿ ಒಲೆಯ ಮೇಲಿಡಿ. ಅದು 3 ವಿಷಲ್ ಕೂಗುವಷ್ಟರಲ್ಲಿ ಕಣಕ ತಯಾರಿಸಬಹುದು. ಒಂದು ಅಗಲವಾದ ಪಾತ್ರೆಗೆ ಚಿರೋಟಿ ರವೆ, ರುಚಿಗೆ ತಕ್ಕಷ್ಟು ಉಪ್ಪು (ಒಂದು ಟೀ ಚಮಚದಷ್ಟು), ಅರಿಶಿನ ಪುಡಿ, 5-6 ಚಮಚ ಎಣ್ಣೆ ಹಾಕಿ, ಸ್ವಲ್ಪ ಸ್ವಲ್ಪವೇ ನೀರು ಸೇರಿಸುತ್ತಾ  ಚೆನ್ನಾಗಿ ಕಲಸಿ. ಚಪಾತಿ ಹಿಟ್ಟಿನಕಿಂತ ಸ್ವಲ್ಪ ಮೆತ್ತಗಿರಲಿ. ತಯಾರಾದ ಕಣಕವನ್ನು ಅರ್ಧ - ಮುಕ್ಕಾಲು ಘಂಟೆ ನೀರಿನಲ್ಲಿ ನೆನೆಸಿ. ಅಂದರೆ ಕಣಕ ಮುಳುಗುವಷ್ಟು ನೀರು ಹಾಕಿ ಹಾಗೆಯೇ ಇಡಿ. ಈಗ ಹೂರಣ ತಯಾರಿಸೋಣ. ಕುಕ್ಕರ್ ನಲ್ಲಿ ಬೆಂದ ಬೇಳೆಯ ನೀರನ್ನು ಸಂಪೂರ್ಣವಾಗಿ ಒಂದು ಪಾತ್ರೆಗೆ ಬಸಿದಿಟ್ಟುಕೊಳ್ಳಿ. ಬೇಳೆಯ ಜೊತೆ ಇರುವ ಆಲೂಗಡ್ಡೆಯ ಸಿಪ್ಪೆ ಸುಲಿದು ಬೇಳೆಗೆ ಹಾಕಿ. ಇದನ್ನು ಮಿಕ್ಸಿಗೆ ಹಾಕಿ ಆದಷ್ಟು ನೀರು ಹಾಕದೆ ನುಣ್ಣಗೆ ರುಬ್ಬಿಕೊಳ್ಳಿ.  ಗಟ್ಟಿಯಾಗಲು ಜಾಸ್ತಿ ಹೊತ್ತು ಕಾಯಿಸಬೇಕು. ನಂತರ ಇದಕ್ಕೆ ಬೆಲ್ಲ, (ಉಂಡೆ ಬೆಲ್ಲವನ್ನು ಪುಡಿ ಮಾಡಿ ಹಾಕಿ) ಸ್ವಲ್ಪ (1/4 ಟೀ ಚಮಚ) ಉಪ್ಪು ಹಾಕಿ ಮೊದಲು ಮಧ್ಯಮ ಉರಿಯಲ್ಲಿ ಕಲಕುತ್ತಿರಿ, ಸ್ವಲ್ಪ ಗಟ್ಟಿಯಾದ ಮೇಲೆ ಸಣ್ಣ ಉರಿಯಲ್ಲಿ ಕಾಯಿಸಬೇಕು. ಬಿಡದೇ ಕಲಕುತ್ತಲೇ ಇರಬೇಕು ಇಲ್ಲವಾದರೆ ತಳ ಹಿಡಿಯುತ್ತದೆ. ಉಂಡೆ ಮಾಡುವಷ್ಟು ಗಟ್ಟಿಯಾಗುವವರೆಗೆ ಕಾಯಿಸಿ ಇಳಿಸಿ.

ಇದು ತಣ್ಣಗಾಗುವಷ್ಟರಲ್ಲಿ ಕಣಕದ ನೀರನ್ನು ಬಸಿದು 1-2 ಚಮಚ ಎಣ್ಣೆ ಬೇಕಾದರೆ ಹಾಕಿ ಚೆನ್ನಾಗಿ ನಾದಿಕೊಳ್ಳಿ. 

ನಂತರ ಕೈಗೆ ಸ್ವಲ್ಪ ನೀರು ಮುಟ್ಟಿಕೊಳ್ಳುತ್ತಾ ಕಣಕದ ಲಿಂಬೆ ಗಾತ್ರದ ಉಂಡೆ ಮಾಡಿಕೊಳ್ಳಿ. ಇತ್ತ ತಣ್ಣಗಾದ ಹೂರಣದಿಂದ ಕಣಕಕ್ಕಿಂತ ಸ್ವಲ್ಪ ದೊಡ್ಡ ಉಂಡೆಗಳನ್ನು ಮಾಡಿಟ್ಟುಕೊಳ್ಳಿ. 

ನಂತರ ಕೈಗೆ ಎಣ್ಣೆ ಸವರಿಕೊಂಡು ಕಣಕವನ್ನು ಕೈ ಅಲ್ಲೇ ಸ್ವಲ್ಪ ಹರವಿಕೊಂಡು ಹೂರಣವನ್ನು ತುಂಬಿ ಸರಿಯಾಗಿ ಮುಚ್ಚಿ.

ಪ್ಲಾಸ್ಟಿಕ್ ಮತ್ತು ಲಟ್ಟಣಿಗೆಗೆ ಎಣ್ಣೆ ಸವರಿಕೊಂಡು ತುಂಬಿದ ಉಂಡೆ ಇಟ್ಟು ಲಟ್ಟಿಸಿ. 

ಲಟ್ಟಿಸಿದ ಹೋಳಿಗೆಯನ್ನು ಬಿಡಿಸಿ ಕೈಗೆ ಹಾಕಿಕೊಂಡು ಕಾದ ಕಾವಲಿಯ ಮೇಲೆ ಹಾಕಿ ಮಧ್ಯಮ ಉರಿಯಲ್ಲಿ ಬೇಯಿಸಿದರೆ ಹೋಳಿಗೆ  ಸಿದ್ಧ. 

ಬಸಿದಿಟ್ಟುಕೊಂಡ ನೀರಿನಿಂದ (ಕಡಲೆ ಬೇಳೆ ಬೇಯಿಸಿದ ನೀರು) ಕಡಲೆ ಕಟ್ಟಿನ ಸಾರು ಮಾಡುವುದನ್ನು ತಿಳಿಯಲು ಇಲ್ಲಿ ನೋಡಿ: http://gelatiyarapakashale.blogspot.in/2014/10/blog-post_9.html

ಸಲಹೆಗಳು: 

1) ಲಟ್ಟಿಸಲು ಖಾಲಿಯಾದ ಎಣ್ಣೆ ಕವರ್ ಒಳ್ಳೆಯದು. ಅಥವಾ ಬಾಳೆ ಎಲೆಯನ್ನು ಬೆಂಕಿಯಲ್ಲಿ ಬಾಡಿಸಿಕೊಂಡು ಲಟ್ಟಿಸಿದರೆ ಇನ್ನೂ ಚೆನ್ನಾಗಿ ಬರುತ್ತದೆ. 

2) ಬೆಂದ ಕಡ್ಲೆ ಬೇಳೆಗೆ ಹಾಗೆಯೇ ಬೆಲ್ಲ, ಉಪ್ಪು ಹಾಕಿ ಕಾಯಿಸಿ ಗಟ್ಟಿ ಮಾಡಿಕೊಂಡು ಒರಳಲ್ಲಿ ಅಥವಾ ಗ್ರೈಂಡರ್ ನಲ್ಲಿ ನೀರು ಹಾಕದೆ ಗಟ್ಟಿಯಾಗಿಯೇ ರುಬ್ಬಿ ಉಂಡೆ ಮಾಡಿಕೊಳ್ಳಬಹುದು. ಮಿಕ್ಸಿಗೆ ಗಟ್ಟಿ ಹೂರಣವನ್ನು ಹಾಕಿ ರುಬ್ಬಲು ಬರುವುದಿಲ್ಲವಾದ್ದರಿಂದ ಮೇಲಿನ ವಿಧಾನ ತಿಳಿಸಿದ್ದೇನೆ. ಹೂರಣ ತಣ್ಣಗಾದ ಮೇಲೆ ಸ್ವಲ್ಪ ಗಟ್ಟಿ ಆಗಿ ಉಂಡೆ ಮಾಡಲು ಬರುತ್ತದೆ.  

3) ಆಲೂಗಡ್ಡೆ ಹಾಕುವುದರಿಂದ ಹೋಳಿಗೆ ಲಟ್ಟಿಸುವಾಗ ಹರಿಯದೆ ನಯವಾಗಿ ಲಟ್ಟಿಸಲು ಬರುತ್ತದೆ. 

4) ಹೋಳಿಗೆಯ ಜೊತೆ ತುಪ್ಪ ಹಾಕಿಕೊಂಡು ತಿನ್ನುವುದು ನಿಮಗೆ ಗೊತ್ತು. ಅದರ ಜೊತೆ ಸಕ್ಕರೆ ಪಾಕವನ್ನೂ ಹಾಕಿಕೊಂಡು ಸವಿದು ನೋಡಿ....!