ಮೆಂತ್ಯ ಸೊಪ್ಪಿನ ಪುಡಿ ಪಲ್ಯ :

ಸಾಮಗ್ರಿಗಳು:

ಸಣ್ಣ ಹೆಚ್ಚಿದ ಮೆಂತ್ಯ ಸೊಪ್ಪು : 1.5 ಕಪ್ 

ಕಡ್ಲೆ ಬೇಳೆ : 3 ಟೇಬಲ್ ಚಮಚ 

ಉದ್ದಿನಬೇಳೆ : 1.5 ಟೇಬಲ್ ಚಮಚ 

ಒಣ ಕೊಬ್ಬರಿತುರಿ : 1/4 ಕಪ್ 

ಬಿಳಿ ಎಳ್ಳು : 1 ಟೇಬಲ್ ಚಮಚ 

ಒಣಮೆಣಸಿನಕಾಯಿ : 6-7

ಇಂಗು : 2-3 ಚಿಟಿಕೆ 

ಸಣ್ಣ ಹೆಚ್ಚಿದ ಈರುಳ್ಳಿ : 1/4 ಕಪ್ 

ವಾಟೆ ಪುಡಿ / ಆಮಚೂರ್ ಪುಡಿ : 1/4 ಚಮಚ 

ಸಕ್ಕರೆ : 1/4 ಟೀ ಚಮಚ 

ಎಣ್ಣೆ : 4-5 ಚಮಚ 

ಸಾಸಿವೆ: 1/4 ಚಮಚ 

ಉಪ್ಪು : ರುಚಿಗೆ 

ವಿಧಾನ :

ಮೆಂತ್ಯ ಸೊಪ್ಪು ಹೆಚ್ಚುವ ಮೊದಲು ಚೆನ್ನಾಗಿ ಬಿಡಿಸಿ ತೊಳೆದುಕೊಳ್ಳಿ. ಬಾಣಲೆಗೆ ಎಣ್ಣೆ ಹಾಕದೆಯೇ ಕಡ್ಲೆಬೇಳೆ, ಉದ್ದಿನಬೇಳೆ, ತುರಿದ ಕೊಬ್ಬರಿ, ಎಳ್ಳು ಎಲ್ಲವನ್ನೂ 'ಬೇರೆ-ಬೇರೆಯಾಗಿ' ಹುರಿದುಕೊಳ್ಳಿ. ನಂತರ ೨-೩ ಹನಿ ಎಣ್ಣೆ ಹಾಕಿ ಒಣಮೆಣಸಿನಕಾಯಿ ಹುರಿದುಕೊಳ್ಳಿ. ಈಗ ಹುರಿದ ಸಾಮಗ್ರಿಗಳು, ಇಂಗು ಸೇರಿಸಿ ಮಿಕ್ಸಿಗೆ ಹಾಕಿ ನೀರು ಹಾಕದೇ ತರಿತರಿಯಾಗಿ ಪುಡಿ ಮಾಡಿಕೊಳ್ಳಿ. ಬಾಣಲೆಗೆ ಎಣ್ಣೆ ಹಾಕಿ ಸಾಸಿವೆ ಹಾಕಿ ಸಿಡಿಸಿ. ಈರುಳ್ಳಿ ಹಾಕಿ ಫ್ರೈ ಮಾಡಿ. ನಂತರ ಹೆಚ್ಚಿದ ಸೊಪ್ಪು ಹಾಕಿ ಸ್ವಲ್ಪ ಉಪ್ಪು, ಸಕ್ಕರೆ ಹಾಕಿ ಚೆನ್ನಾಗಿ ಹುರಿಯಿರಿ. ನೀರು ಹಾಕುವ ಅವಶ್ಯಕತೆ ಇಲ್ಲ. ಉಪ್ಪು, ಸಕ್ಕರೆ ಹಾಕಿದಾಗ ಸೊಪ್ಪು ಸ್ವಲ್ಪ ನೀರಿನಂಶ ಬಿಡುತ್ತದೆ. ಅದರಲ್ಲೇ ಸಣ್ಣ ಉರಿಯಲ್ಲಿ ಬೇಯುವತನಕ  ಫ್ರೈ ಮಾಡಿ. ನಂತರ ಮತ್ತೆ ಪುಡಿಗೆ ಬೇಕಾಗುವಷ್ಟು ಉಪ್ಪು, ವಾಟೆಪುಡಿ / ಆಮಚೂರ್ ಪುಡಿ ಹಾಕಿ, ಮಾಡಿಟ್ಟುಕೊಂಡ ಪುಡಿ ಹಾಕಿ (ಖಾರ ಕಮ್ಮಿ ಎನಿಸಿದರೆ ಅಚ್ಚ ಖಾರದ ಪುಡಿ ಹಾಕಬಹುದು) ಚೆನ್ನಾಗಿ ಮಿಕ್ಸ್ ಮಾಡಿ ಉರಿ ಆರಿಸಿ.  ಬಿಸಿ ಬಿಸಿ ಅನ್ನದ ಜೊತೆ ಪಲ್ಯ ಸವಿದರೆ ಆಹಾ....! 

ಮೆಂತ್ಯ ಸೊಪ್ಪು - ತೊಗರಿಬೇಳೆ ಪಲ್ಯ :

ಸಾಮಗ್ರಿಗಳು :

ಮೆಂತ್ಯ ಸೊಪ್ಪು : 1 ಕಟ್ಟು

ತೊಗರಿಬೇಳೆ : 3-4 ಚಮಚ

ಸಣ್ಣ ಹೆಚ್ಚಿದ ಈರುಳ್ಳಿ : 1

ತೆಂಗಿನ ತುರಿ : 1/2 ಕಪ್

ಲಿಂಬು ರಸ / ವಾಟೆ ಪುಡಿ / ಆಮ್ಚೂರ್ ಪುಡಿ : ಹುಳಿಗೆ ತಕ್ಕಷ್ಟು

ಹಸಿಮೆಣಸಿನ ಕಾಯಿ : 2-3

ಎಣ್ಣೆ : 4 ಚಮಚ

ಸಾಸಿವೆ : 1/2 ಚಮಚ

ಸಕ್ಕರೆ : 1 ಚಮಚ

ಉಪ್ಪು : ರುಚಿಗೆ

ವಿಧಾನ :

ಮೆಂತ್ಯ ಸೊಪ್ಪನ್ನು ಚೆನ್ನಾಗಿ ತೊಳೆದು ಸಣ್ಣಗೆ ಹೆಚ್ಚಿ. ತೊಗರಿಬೇಳೆ ತೊಳೆದು ಸ್ವಲ್ಪ ಗಟ್ಟಿ ಇರುವಂತೆ (ಪೂರ್ತಿ ಬೆಂದು ಕರಗದಂತೆ) ಬೇಯಿಸಿಕೊಳ್ಳಿ. ಹಸಿಮೆಣಸಿನಕಾಯಿ ಉದ್ದುದ್ದ ಸೀಳಿಕೊಳ್ಳಿ. ಬಾಣಲೆಗೆ ಎಣ್ಣೆ, ಸಾಸಿವೆ ಹಾಕಿ ಚಿಟಪಟಾಯಿಸಿ. ಅದಕ್ಕೆ ಹೆಚ್ಚಿದ ಈರುಳ್ಳಿ ಹಾಕಿ ಫ್ರೈ ಮಾಡಿ. ಈಗ ಹೆಚ್ಚಿದ ಮೆಂತ್ಯ ಸೊಪ್ಪು ಹಾಕಿ ಸ್ವಲ್ಪ ಉಪ್ಪು, ಸಕ್ಕರೆ ಹಾಕಿ ಸೊಪ್ಪನ್ನು ಚೆನ್ನಾಗಿ ಫ್ರೈ ಮಾಡಿ. ಉಪ್ಪು, ಸಕ್ಕರೆ ಹಾಕಿ ಫ್ರೈ ಮಾಡುವುದರಿಂದ ಮೆಂತ್ಯ ಸೊಪ್ಪಿನ ಕಹಿ ಅಂಶ ಹೋಗುತ್ತದೆ. ನಂತರ ಬೇಯಿಸಿದ ಬೇಳೆ, ಸ್ವಲ್ಪ ನೀರು, ಮುಂಚೆ ಹಾಕಿರುವ ಉಪ್ಪನ್ನು ಗಮನದಲ್ಲಿಟ್ಟುಕೊಂಡು ಇನ್ನು ಸ್ವಲ್ಪ ಉಪ್ಪು, ವಾಟೆ ಪುಡಿ / ಆಮ್ಚೂರ್ ಪುಡಿ (ಲಿಂಬುರಸ ಆದರೆ ಕೊನೆಯಲ್ಲಿ ಉರಿ ಆರಿಸಿ ಹಾಕಿ), ತೆಂಗಿನತುರಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. 1-2 ನಿಮಿಷ ಮುಚ್ಚಳ ಮುಚ್ಚಿ ಬೇಯಿಸಿ, ನೀರು ಆರಿಸಿದರೆ ಮೆಂತ್ಯ ಸೊಪ್ಪು - ತೊಗರಿಬೇಳೆ ಪಲ್ಯ ಸಿದ್ಧ. ಅನ್ನ ಮತ್ತು ಚಪಾತಿಯ ಜೊತೆ ಚೆನ್ನಾಗಿರುತ್ತದೆ. 

ಕೆಸುವಿನ ಬೀಳು (ಬೀಳಲು) ಪಲ್ಯ :

ಮಲೆನಾಡಿನಲ್ಲಿ ಮಳೆಗಾಲದ ಸಮಯದಲ್ಲಿ ಸಣ್ಣ ಕೆಸುವಿನ ಎಳೆಗಳ ಬುಡದಲ್ಲಿ ಬೇರುಗಳಂತೆ ಬಿಳಲುಗಳು ಹಬ್ಬುತ್ತವೆ. ಅದನ್ನು ತಂದು ಅದರ ಮೇಲಿರುವ ಸಿಪ್ಪೆಯಂತ ನಾರನ್ನು ತೆಗೆದು ವಿವಿಧ ಅಡುಗೆಗಳನ್ನು ಮಾಡುತ್ತಾರೆ. ಇದರ ನಾರನ್ನು ತೆಗೆಯುವುದು ಸ್ವಲ್ಪ ಕಿರಿಕಿರಿಯ ಕೆಲಸವಾದರೂ ನಂತರ ಮಾಡುವ ಅಡುಗೆಯ ರುಚಿ ಇದನ್ನು ಮರೆಸಿಬಿಡುತ್ತದೆ. ಮಲೆನಾಡಲ್ಲಿ ಈಳಿಗೆ ಮಣೆಯ ಕಾವಿನ ಹಿಂಭಾಗಕ್ಕೆ ತಿಕ್ಕಿ ನಾರು ತೆಗೆಯುತ್ತಾರೆ. ಚಾಕುವಿನ ಹಿಂಭಾಗ (ಮೊಂಡು ಇರುವ ಭಾಗ) ದಿಂದ ಕೂಡ ತೆಗೆಯಬಹುದು. ತೆಗೆದ ತಕ್ಷಣ ಕೈ ತೊಳೆದರೆ ಕೈ ಅಲ್ಲಿ ಸ್ವಲ್ಪ ಕಡಿತ ಕಾಣಿಸಬಹುದು. ಲಿಂಬು ರಸ ತಿಕ್ಕಿ ಕೈ ತೊಳೆದರೆ ಹೋಗುತ್ತದೆ.

ಸಾಮಗ್ರಿಗಳು :

ನಾರು ತೆಗೆದು 1/2 ಇಂಚು ಉದ್ದ ಹೆಚ್ಚಿದ ಕೆಸುವಿನ ಬೀಳು : ೧.೫ ಕಪ್

ಸಣ್ಣ ಹೆಚ್ಚಿದ ಈರುಳ್ಳಿ : 1/2 ಕಪ್

ಬೆಳ್ಳುಳ್ಳಿ : 10-12 ಎಸಳು

ತೆಂಗಿನ ತುರಿ: 3/4 ಕಪ್

ಹಸಿಮೆಣಸಿನ ಕಾಯಿ : 4-5

ಕರಿಬೇವು : 8-10 ಎಲೆಗಳು

ಎಣ್ಣೆ : 4-5 ಚಮಚ

ಸಾಸಿವೆ : 1/2 ಚಮಚ

ಅರಿಶಿನ ಪುಡಿ : 1/4 ಚಮಚ

ವಾಟೆ ಪುಡಿ / ಆಮ್ಚುರ್ ಪುಡಿ : 1/2 ಚಮಚ

ಉಪ್ಪು : ರುಚಿಗೆ ತಕ್ಕಷ್ಟು

ವಿಧಾನ :

ಹೆಚ್ಚಿದ ಕೆಸುವಿನ ಬೀಳನ್ನು ನೀರು, 1/4 ಚಮಚ ವಾಟೆ ಪುಡಿ ಹಾಕಿ ಬೇಯಿಸಿ. ನೀರು ಬಸಿದುಕೊಳ್ಳಿ. ಒಂದು ಬಾಣಲೆಗೆ ಎಣ್ಣೆ ಹಾಕಿ ಸಾಸಿವೆ ಹಾಕಿ ಸಿಡಿಸಿ. ಅದಕ್ಕೆ ಹಸಿ ಮೆಣಸಿನ ಕಾಯಿ, ಕರಿಬೇವು ಹಾಕಿ, ಜಜ್ಜಿದ ಬೆಳ್ಳುಳ್ಳಿ ಹಾಕಿ ಹುರಿಯಿರಿ. ಇದಕ್ಕೆ ಸಣ್ಣಗೆ ಹೆಚ್ಚಿದ ಈರುಳ್ಳಿ ಹಾಕಿ ಹುರಿದು, ಅರಿಶಿನಪುಡಿ ಹಾಕಿ ಮಿಕ್ಸ್ ಮಾಡಿ. ಈಗ ಬೇಯಿಸಿಕೊಂಡ ಹೋಳುಗಳು, ತೆಂಗಿನ ತುರಿ, ಉಪ್ಪು, ಉಳಿದ ವಾಟೆ / ಆಮ್ಚುರ್ ಪುಡಿ ಹಾಕಿ ಸ್ವಲ್ಪವೇ ಸ್ವಲ್ಪ (ಎಲ್ಲಾ ಹೊಂದಿಕೊಳ್ಳುವಷ್ಟು) ನೀರು ಹಾಕಿ ಮಿಕ್ಸ್ ಮಾಡಿ ಮೂರ್ನಾಲ್ಕು ನಿಮಷ ಬೇಯಿಸಿ. ಬಿಸಿ ಬಿಸಿ ಅನ್ನದ ಒಳ್ಳೆಯ ಜೊತೆಯಾಗುತ್ತದೆ. 

ಕಳಲೆ ಪಲ್ಯ (bamboo shoot):

ಸಾಮಗ್ರಿಗಳು:
ಸಣ್ಣಗೆ ಹೆಚ್ಚಿಟ್ಟ ಕಳಲೆ - 1 ಬೌಲ್,
ಹಸಿಮೆಣಸು - 4
ಎಣ್ಣೆ - 2 ಟೇ.ಚಮಚ,
ಸಾಸಿವೆ - 1/2 ಟೀ. ಚಮಚ
ಉದ್ದಿನಬೇಳೆ - 1 ಟೀ. ಚಮಚ
ಅರಿಶಿನಪುಡಿ - 1/4 ಟೀ. ಚಮಚ
ಕರಿಬೇವು - 5-6 ಎಲೆಗಳು
ಉಪ್ಪು & ಲಿ೦ಬುರಸ.

ವಿಧಾನ: ಬಾಣಲೆಗೆ ಎಣ್ಣೆಹಾಕಿಕೊ೦ಡು ಎಣ್ಣೆ ಸ್ವಲ್ಪ ಬಿಸಿಯಾದ ಮೇಲೆ ಉದ್ದಿನಬೇಳೆ, ಸಾಸಿವೆ, ಹಸಿಮೆಣಸು ಕರಿಬೇವು ನ೦ತರ ಅರಿಶಿನಪುಡಿ ಹಾಕಿ. ಈಗ ಹೆಚ್ಚಿಟ್ಟ ಕಳಲೆಯನ್ನು ಹಾಕಿ ಉಪ್ಪು ಲಿ೦ಬುರಸ ಹಾಕಿ 15- 20 ನಿಮಿಷ ಸಣ್ಣ ಉರಿಯಲ್ಲಿ ಚೆನ್ನಾಗಿ ಹುರಿದರೆ ರುಚಿಯಾದ ಕಳಕೆ ಪಲ್ಯ ಸವಿಯಲು ಸಿದ್ಧ.

(ಕಳಲೆಯನ್ನು ಹೆಚ್ಚಿ ೨ ದಿನ ನೀರಲ್ಲಿ ನೆನೆಸಿಡಬೇಕು. ದಿನಾಲೂ ನೀರು ಬದಲಿಸಬೇಕು)

ಸೌತೆಕಾಯಿ ಪಲ್ಯ :

 ಹಸಿಯಾಗಿ ತಿನ್ನಲೆಂದು ತಂದಿಟ್ಟ ಸೌತೆಕಾಯಿ ಇಟ್ಟಲ್ಲೇ ಸ್ವಲ್ಪ ಒಣಗಿದ ಮೇಲೆ ನೋಡುತ್ತೀರಾ..! ಆಗ ತಿನ್ನಲು ಚೆನ್ನಾಗಿರುವುದಿಲ್ಲ. ಅಂಥ ಸಮಯದಲ್ಲಿ ಈ ಸರಳ ಪಲ್ಯ ಟ್ರೈ ಮಾಡಬಹುದು...... 

ಸಾಮಗ್ರಿಗಳು :

ಸೌತೆಕಾಯಿ :2,

ಈರುಳ್ಳಿ : 1(ಮಧ್ಯಮ ಗಾತ್ರದ್ದು- Optional),

ಹಸಿ ಮೆಣಸಿನ ಕಾಯಿ : 2-3,

ಕರಿಬೇವು : 6-8 ಎಲೆಗಳು,

ಎಣ್ಣೆ : 2 ಚಮಚ,

ಉದ್ದಿನ ಬೇಳೆ: 1/2 ಚಮಚ,

ಸಾಸಿವೆ: 1/4 ಚಮಚ,

ಸಕ್ಕರೆ : 1/2 ಚಮಚ,

 ಅರಿಶಿನ ಪುಡಿ: 2-3 ಚಿಟಿಕೆ, 

ವಾಟೆ ಪುಡಿ / ಲಿಂಬು ರಸ: 1/2 ಚಮಚ,

ತೆಂಗಿನ ತುರಿ: 2-3 ಟೇಬಲ್ ಚಮಚ, 

ಉಪ್ಪು: ರುಚಿಗೆ. 

ವಿಧಾನ: 

ಸೌತೆಕಾಯಿ ಮತ್ತು ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಹಸಿಮೆಣಸನ್ನು ಸೀಳಿಕೊಳ್ಳಿ. ಬಾಣಲೆಗೆ ಎಣ್ಣೆ, ಉದ್ದಿನ ಬೇಳೆ ಹಾಕಿ ಸ್ವಲ್ಪ ಕೆಂಪಗಾದಾಗ ಸಾಸಿವೆ ಹಾಕಿ ಸಿಡಿಸಿ. ನಂತರ ಹಸಿಮೆಣಸಿನ ಕಾಯಿ, ಕರಿಬೇವು ಹಾಕಿ ಕಲಕಿ, ಈರುಳ್ಳಿ ಹಾಕಿ ಸ್ವಲ್ಪ ಫ್ರೈ ಮಾಡಿ. ಈಗ ಅರಿಶಿನ ಪುಡಿ, ಹೆಚ್ಚಿದ ಸೌತೆಕಾಯಿ, ಉಪ್ಪು, ವಾಟೆ ಪುಡಿ/ ಲಿಂಬುರಸ, ಸಕ್ಕರೆ ಮತ್ತು ಸ್ವಲ್ಪ ನೀರು ಹಾಕಿ ಬೇಯಿಸಿ. ನೀರು ಆರುತ್ತಿರುವಾಗ ತೆಂಗಿನ ತುರಿ ಹಾಕಿ ಕಲಕಿ ಪೂರ್ತಿ ನೀರು ಆರಿದ ಮೇಲೆ ಉರಿ ಆರಿಸಿ. ಬಿಸಿ ಬಿಸಿ ಅನ್ನದ ಜೊತೆ ಸೌತೆಕಾಯಿ ಕಾಯಿ ಪಲ್ಯ ಸವಿಯಿರಿ. ಇದಲ್ಲದೇ ಪೂರಿ, ಚಪಾತಿಯ ಜೊತೆ ಕೂಡ ಚೆನ್ನಾಗಿರುತ್ತದೆ. 

ಸೂಚನೆ: 

1) ಸೌತೆಕಾಯಿ ಸಿಪ್ಪೆ ಕೂಡ ಆರೋಗ್ಯಕ್ಕೆ ಒಳ್ಳೆಯದಾದ್ದರಿಂದ, ಸೌತೆಕಾಯಿ ಎಳೆಯದಿದ್ದರೆ ಸಿಪ್ಪೆ ತೆಗೆಯುವುದು ಬೇಡ.  
2) ಬೀಜ ಬಲಿತಿದ್ದರೆ ಬೀಜ ತೆಗೆದು ಮಾಡಬಹುದು. 

ನವಿಲು ಕೋಸಿನ ಪಲ್ಯ :

ಸಾಮಗ್ರಿಗಳು :

ಸಣ್ಣಗೆ ಹೆಚ್ಚಿದ ನವಿಲು ಕೋಸು : 2 (ಮಧ್ಯಮ ಗಾತ್ರ),

ಸಣ್ಣಗೆ / ಉದ್ದುದ್ದ ಹೆಚ್ಚಿದ ಈರುಳ್ಳಿ : 1 (ದೊಡ್ಡದು)

ಕರಿಬೇವು : ಸ್ವಲ್ಪ,

ಎಣ್ಣೆ : 1 ಟೇಬಲ್ ಚಮಚ, 

ಸಾಸಿವೆ : 1 ಟೀ ಚಮಚ,

ಅರಿಶಿನ ಪುಡಿ : 1/2 ಟೀ ಚಮಚ, 

ಸಕ್ಕರೆ : 1 ಟೀ ಚಮಚ, 

ಉಪ್ಪು : ರುಚಿಗೆ 

ಮಸಾಲೆಗೆ ಸಾಮಗ್ರಿಗಳು :

ತೆಂಗಿನ ತುರಿ : 1/2 ಕಪ್,

ಒಣ ಮೆಣಸಿನ ಕಾಯಿ : 4-5,

ಕೊತ್ತಂಬರಿ : 1 ಟೇಬಲ್ ಚಮಚ,

ಕಡಲೆ ಬೇಳೆ : 1/2 ಟೇಬಲ್ ಚಮಚ,

ಜೀರಿಗೆ : 1 ಟೀ ಚಮಚ,

ಬಿಳಿ ಎಳ್ಳು : 1 ಟೀ ಚಮಚ, 

ನೆನೆಸಿದ ಹುಣಸೆ ಹಣ್ಣು :  ನೆಲ್ಲಿಕಾಯಿ ಗಾತ್ರ / ಒಂದು ಎಸಳು,

ಎಣ್ಣೆ : 1/4 ಟೀ ಚಮಚ

ವಿಧಾನ : ಬಾಣಲೆಗೆ ಎಣ್ಣೆ ಹಾಕಿ ಸಾಸಿವೆ ಹಾಕಿ ಸಿಡಿದ ನಂತರ ಕರಿಬೇವು, ಹೆಚ್ಚಿದ ಈರುಳ್ಳಿ ಹಾಕಿ 1 ನಿಮಿಷ ಹುರಿಯಿರಿ. ನಂತರ ಹೆಚ್ಚಿದ ನವಿಲುಕೋಸು ಹಾಕಿ ಒಂದೆರಡು ಕಪ್ ನೀರು, ಸ್ವಲ್ಪ ಉಪ್ಪು- ಸಕ್ಕರೆ ಹಾಕಿ ಬೇಯಿಸಿ. ತೆಂಗಿನ ತುರಿ, ಹುಣಸೆಹಣ್ಣು ಬಿಟ್ಟು ಉಳಿದ ಮಸಾಲೆ ಸಾಮಗ್ರಿಗೆ ಎಣ್ಣೆ ಹಾಕಿ ಹದವಾಗಿ ಹುರಿಯಿರಿ. ನಂತರ ಈ ಮಿಶ್ರಣವನ್ನು ಹುಣಸೆ ಹಣ್ಣು, ತೆಂಗಿನ ತುರಿ ಸೇರಿಸಿ ಸ್ವಲ್ಪವೇ ತರಿ ತರಿಯಾಗಿ ರುಬ್ಬಿ. ಇದನ್ನು ನವಿಲುಕೋಸು ಬೆಂದ ಮೇಲೆ ಅದಕ್ಕೆ ಹಾಕಿ ಉಪ್ಪು ಹಾಕಿ (ಬೇಯಿಸಲು ಉಪ್ಪು ಹಾಕಿರುವುದರಿಂದ ನೋಡಿಕೊಂಡು ಹಾಕಿ), ನೀರು ಆರುವ ತನಕ ಬೇಯಿಸಿ. ಬಿಸಿ ಬಿಸಿ ನವಿಲುಕೋಸು ಪಲ್ಯವನ್ನು ಅನ್ನ ಮತ್ತು ಚಪಾತಿ ಜೊತೆ ಸವಿಯಿರಿ.   

ಸಲಹೆಗಳು :

1) ಹುಣಸೆ ಹಣ್ಣಿನ ಬದಲು 1 ಚಮಚದಷ್ಟು ವಾಟೆ ಪುಡಿ / ಅಮ್ಚೂರ್ ಪುಡಿಯನ್ನು ನವಿಲು ಕೋಸನ್ನು ಬೇಯಿಸುವಾಗ ಹಾಕಬಹುದು. 

2) ಮತ್ತೊಂದು ಸರಳ ವಿಧಾನ:  ಎಣ್ಣೆ, ಉದ್ದಿನ ಬೇಳೆ, ಸಾಸಿವೆ, ಕರಿಬೇವು, ಅರಿಶಿನ, ಹೆಚ್ಚಿದ ಈರುಳ್ಳಿ, ಹಸಿಮೆಣಸಿನ ಒಗ್ಗರಣೆ ಮಾಡಿ ಸಣ್ಣಗೆ ಹೆಚ್ಚಿದ ನವಿಲು ಕೋಸು, ಉಪ್ಪು, ಹುಳಿ ಮತ್ತು ನೀರು ಹಾಕಿ ಬೇಯಿಸಿ ತೆಂಗಿನ ತುರಿ ಉದುರಿಸಿ ಪಲ್ಯ ಮಾಡಬಹುದು. 

ಎಲೆಕೋಸು - ಹೆಸರು ಕಾಳು ಪಲ್ಯ :

ಸಾಮಗ್ರಿಗಳು :

ಸಣ್ಣಗೆ ಹೆಚ್ಚಿದ ಎಲೆಕೋಸು (Cabbage) - 2 ಕಪ್,

ಮೊಳಕೆ ಹೆಸರು ಕಾಳು - 1 ಕಪ್,

ತೆಂಗಿನ ತುರಿ - 4-5 ಟೇಬಲ್ ಚಮಚ,

ಹಸಿಮೆಣಸಿನ ಕಾಯಿ - 4-5, (ನಿಮ್ಮ ಖಾರಕ್ಕೆ ಅನುಗುಣವಾಗಿ)

ಕರಿಬೇವು - 10-15 ಎಲೆಗಳು,

ಎಣ್ಣೆ - 2-3 ಟೇಬಲ್ ಚಮಚ,

ಸಾಸಿವೆ - 1/4 ಟೀ ಚಮಚ,

ಅರಿಶಿನ ಪುಡಿ - 1/4 ಟೀ ಚಮಚ,

ಸಕ್ಕರೆ - 1 ಟೇಬಲ್ ಚಮಚ,

ನಿಂಬೆ ರಸ - 2 ಟೇಬಲ್ ಚಮಚ,

ಉಪ್ಪು ರುಚಿಗೆ ತಕ್ಕಷ್ಟು

ವಿಧಾನ  : 

ಒಂದು ಬಾಣಲೆಗೆ ಎಣ್ಣೆ ಹಾಕಿ ಕಾದ ನಂತರ ಸಾಸಿವೆ ಹಾಕಿ ಸಿಡಿಸಿ. ಇದಕ್ಕೆ ಉದ್ದುದ್ದ ಸೀಳಿಕೊಂಡ ಹಸಿ ಮೆಣಸಿನ ಕಾಯಿ, ಕರಿಬೇವು, ಅರಿಶಿನ ಹಾಕಿ ಒಮ್ಮೆ ಕಲಕಿ, ಮೊಳಕೆ ಕಟ್ಟಿದ ಹೆಸರು ಕಾಳು, ಹೆಚ್ಚಿದ ಎಲೆಕೋಸು, 1/2 ಕಪ್ ನಷ್ಟು ನೀರು ಹಾಕಿ ಒಮ್ಮೆ ಕಲಕಿ. ನಂತರ ಉಪ್ಪು, ಸಕ್ಕರೆ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಒಂದು ಪ್ಲೇಟ್ ಮುಚ್ಚಿ ಸಣ್ಣ ಉರಿಯಲ್ಲಿ ಬೇಯಿಸಿ. ಇದು 80% ಬೆಂದಾಗ ತೆಂಗಿನ ತುರಿ ಮತ್ತು ನಿಂಬೆ ರಸ ಹಾಕಿ ಮತ್ತೆ ಚೆನ್ನಾಗಿ ಮಿಶ್ರಣ ಮಾಡಿ ಬೇಯಿಸಿ. ಹದವಾದ ಖಾರ, ಸಿಹಿ, ಹುಳಿ ಇರುವ ಈ ಪಲ್ಯ ಚಪಾತಿ ಜೊತೆ ಒಳ್ಳೆಯ ಕಾಂಬಿನೇಶನ್.... ಊಟ / ಅನ್ನದ ಜೊತೆಯೂ ಸವಿಯಬಹುದು.

 

   

ಸಲಹೆಗಳು : 

1) ಹೆಸರು ಕಾಳಿನ ಬದಲು ನೆನೆಸಿದ ಕಾಬೂಲ್ ಕಡಲೆ, ಅಲಸಂದೆ, ಹಸಿ ಬಟಾಣಿ ಕೂಡ ಹಾಕಬಹುದು. ಆದರೆ ನೆನೆಸಿದ ಕಡಲೆಯನ್ನು ನೀರು ಸ್ವಲ್ಪ ಉಪ್ಪು ಹಾಕಿ ಕುಕ್ಕರ್ ನಲ್ಲಿ 2 ವಿಸಲ್ ಕೂಗಿಸಿಕೊಂಡು ಕ್ಯಾಬೇಜ್ ಜೊತೆ ಮತ್ತೆ ಬೇಯಿಸಿ.

2) ಹೆಸರು ಕಾಳನ್ನು ಒಂದು ದಿನ ಮುಂಚೆ ರಾತ್ರಿ ನೆನೆ ಹಾಕಿ ಬೆಳಿಗ್ಗೆ ನೀರು ಬಸಿದು ಒಂದು ಪಾತ್ರೆಗೆ ಹಾಕಿ ತಟ್ಟೆ ಮುಚ್ಚಿ ಸ್ಟವ್ ಬಿಸಿ ತಾಗುವಲ್ಲಿಟ್ಟರೆ ಸಂಜೆಯಾಗುವಷ್ಟರಲ್ಲಿ ಮೊಳಕೆ ಬಂದಿರುತ್ತದೆ. ಅಥವಾ ನೆಂದ ಕಾಳನ್ನು ಶುಭ್ರವಾದ ತೆಳ್ಳಗಿನ ಕಾಟನ್ ಬಟ್ಟೆಯಲ್ಲಿ ಗಂಟು ಕಟ್ಟಿ ಇಟ್ಟೂ ಮೊಳಕೆ ತರಿಸಬಹುದು. 

ಅಡುಗೆ ಮನೆಗೊಂದು ಸಲಹೆ : ಸ್ಟವ್ ಮೇಲ್ಭಾಗ ಕಪ್ಪಾಗಿದ್ದರೆ ಮೇಲ್ಭಾಗದ ಮೇಲೆ ಬೇಕಿಂಗ್ ಸೋಡಾ ಉದುರಿಸಿ ಅದರ ಮೇಲೆ ಬಿಸಿ ನೀರನ್ನು ಸ್ಪ್ರೇ ಮಾಡಿ ಅರ್ಧ ಘಂಟೆ ಬಿಟ್ಟು ಬಟ್ಟೆಯಿಂದ ಉಜ್ಜಿ ಶುಚಿಗೊಳಿಸಿದರೆ ಕಲೆಗಳು ಮಾಯವಾಗುತ್ತವೆ. 

ಮಾವಿನ ಕಾಯಿ ಪಲ್ಯ

ಸಾಮಗ್ರಿಗಳು : ಮಾವಿನ ಕಾಯಿ - 4-5 (ಚಿಕ್ಕದು), ಎಣ್ಣೆ 6 ಚಮಚ, ಸಾಸಿವೆ, 1/2 ಚಮಚ, ಉದ್ದಿನ ಬೇಳೆ 1 ಚಮಚ, ತೆಂಗಿನ ತುರಿ 1/4 ಕಪ್, ಹಸಿ ಮೆಣಸಿನಕಾಯಿ 3-4, ಕರಿಬೇವು ಸ್ವಲ್ಪ, ಸಕ್ಕರೆ 2 ಚಮಚ, ಅರಿಶಿನ ಪುಡಿ 1/4 ಚಮಚ, ಉಪ್ಪು ರುಚಿಗೆ ತಕ್ಕಷ್ಟು 

ವಿಧಾನ: ಮಾವಿನ ಕಾಯಿಗೆ ನೀರು, ಸ್ವಲ್ಪ ಉಪ್ಪು ಹಾಕಿ ಹೆಚ್ಚಲು ಬರುವಷ್ಟು ಗಟ್ಟಿಯಾಗಿ ಬೇಯಿಸಿಕೊಂಡು, ಸಣ್ಣಗೆ ಹೆಚ್ಚಿಕೊಳ್ಳಿ. ಬಾಣಲೆಗೆ ಎಣ್ಣೆ ಹಾಕಿ ಬಿಸಿಯಾದ ನಂತರ ಸಾಸಿವೆ, ಉದ್ದಿನ ಬೇಳೆ, ಹೆಚ್ಚಿದ ಹಸಿಮೆಣಸು, ಕರಿಬೇವು ಹಾಕಿ. ನಂತರ ಹೆಚ್ಚಿದ ಮಾವಿನಕಾಯಿ ಹಾಕಿ ಚೆನ್ನಾಗಿ ಬಾಡಿಸಿ. ಇದಕ್ಕೆ ಸ್ವಲ್ಪ ಅರಿಶಿನ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು, ಸಕ್ಕರೆ ಹಾಕಿ 3-4 ನಿಮಿಷ ಫ್ರೈ ಮಾಡಿ ಕಾಯಿ ತುರಿ ಹಾಕಿ ಸ್ವಲ್ಪ ಹುರಿದರೆ ಮಾವಿನ ಕಾಯಿ ಪಲ್ಯ ಅನ್ನದ ಜೊತೆ ಸವಿಯಲು ಸಿದ್ಧ.   

ಸೂಚನೆ: ಮಾವಿನ ಕಾಯಿ ಬೇಯಿಸುವಾಗ ಉಪ್ಪು ಹಾಕಿರುವುದರಿಂದ ಪಲ್ಯ ಮಾಡುವಾಗ ಸ್ವಲ್ಪವೇ ಉಪ್ಪು ಹಾಕಿ. 

ಬದನೆ ಕಾಯಿ ಪಲ್ಯ- 2 :

ಸಾಮಗ್ರಿಗಳು : ಸಣ್ಣಗೆ ಹೆಚ್ಚಿದ ಯಾವುದೇ ತರಹದ ಬದನೇ ಕಾಯಿ 3 ಕಪ್, ಈರುಳ್ಳಿ (ದೊಡ್ಡದು) 1, ಹಸಿ  ಮೆಣಸಿನ ಕಾಯಿ 4-5, ತೆಂಗಿನ ತುರಿ 1/4 ಕಪ್, ಎಣ್ಣೆ 4-5 ಚಮಚ, ಉದ್ದಿನ ಬೇಳೆ 1/2 ಚಮಚ, ಸಾಸಿವೆ 1/4 ಚಮಚ, ಕರಿಬೇವು 1 ಎಸಳು, ಅರಿಶಿನ 1/4 ಚಮಚ, ಉಪ್ಪು ಮತ್ತು ವಾಟೆ ಪುಡಿ / ಅಮ್ಚೂರ್ ಪೌಡರ್ ರುಚಿಗೆ ತಕ್ಕಷ್ಟು. 

ವಿಧಾನ : ಮೊದಲು ಸಣ್ಣಗೆ ಹೆಚ್ಚಿದ ಬದನೆಕಾಯಿಗೆ 1/4 ಚಮಚದಷ್ಟು ಉಪ್ಪು ಹಾಕಿ ಕಲಸಿ 10-15 ನಿಮಿಷ ಹಾಗೆಯೇ ಬಿಡಿ. ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಹಸಿಮೆಣಸಿನ ಕಾಯಿಯನ್ನು ಉದ್ದುದ್ದ ಸೀಳಿಕೊಳ್ಳಿ. ಬಾಣಲೆಗೆ ಎಣ್ಣೆ ಉದ್ದಿನಬೇಳೆ ಹಾಕಿ ಕೆಂಪಗಾದ ಮೇಲೆ ಸಾಸಿವೆ ಹಾಕಿ ಸಿಡಿಸಿ, ಹಸಿಮೆಣಸಿನ ಕಾಯಿ, ಕರಿಬೇವು ಹಾಕಿ ಕಲಕಿ. ನಂತರ ಹೆಚ್ಚಿದ ಈರುಳ್ಳಿ ಹಾಕಿ 3-4 ನಿಮಿಷ ಹುರಿದು ಅರಿಶಿನ ಪುಡಿ ಹಾಕಿ ಕಲಸಿ. ಇದಕ್ಕೆ ಉಪ್ಪು ಹಾಕಿ ಕಲಸಿಟ್ಟ ಬದನೆಕಾಯಿಯನ್ನು ಹಿಂಡಿ ರಸ ತೆಗೆದು ಹಾಕಿ ಕಲಸಿ, ಉಪ್ಪು, ವಾಟೆ ಪುಡಿ ಹಾಕಿ ಮುಚ್ಚಿ (ನೀರು ಹಾಕಬೇಡಿ). ಉರಿ ಸಣ್ಣದಿರಲಿ. ಆಗಾಗ ಕೈ ಆಡಿಸುತ್ತಿರಿ. ಎಣ್ಣೆ ಕಮ್ಮಿ ಎನಿಸಿದರೆ ಸ್ವಲ್ಪ ಎಣ್ಣೆ ಸೇರಿಸಿಕೊಳ್ಳಬಹುದು. ಬದನೆ ಹೋಳುಗಳು ಮೆತ್ತಗಾದ ಮೇಲೆ ತೆಂಗಿನ ತುರಿ ಸೇರಿಸಿ ಮತ್ತೆ ಒಂದೆರಡು ನಿಮಿಷ ಚೆನ್ನಾಗಿ ಹುರಿದು ಉರಿ ಆರಿಸಿ. ಊಟದ ಜೊತೆ ಬಿಸಿ ಬಿಸಿ ಪಲ್ಯ ಬಡಿಸಿ. 

ಬದನೆಕಾಯಿ ಎಣ್ಣೆಗಾಯಿ

ಸಾಮಾಗ್ರಿಗಳು:  ಸಣ್ಣ ಬದನೆಕಾಯಿ 6-7, ಈರುಳ್ಳಿ 2, ವಾಟೆಪುಡಿ 1 ಚಮಚ.

ಮಸಾಲೆ:ಶೇ೦ಗಾ ½ ಕಪ್, ಕಡ್ಲೆಬೇಳೆ 5-6 ಚಮಚ, ಕಾಯಿತುರಿ ¼ ಕಪ್, ಉದ್ದಿನ ಬೇಳೆ 3-4 ಚಮಚ, ಇ೦ಗು ಚಿಟಿಕೆ, ಜೀರಿಗೆ 1 ½ ಚಮಚ, ಧನಿಯ 1 ½ ಚಮಚ, ಲವ೦ಗ- 1, ಒಣಮೆಣಸು – 6-7. 
ಒಗ್ಗರಣೆಗೆ: ಎಣ್ಣೆ, ಸಾಸಿವೆ, ಕರಿಬೇವು.

ಮಾಡುವ ವಿಧಾನ: ಶೇ೦ಗಾ,ಕಡ್ಲೆಬೇಳೆ,ಉದ್ದಿನ ಬೇಳೆ,ಜೀರಿಗೆ,ಧನಿಯ,ಒಣಮೆಣಸು ಇವೆಲ್ಲವನ್ನು ಸಣ್ಣ ಉರಿಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ ಹುರಿದು ಪಕ್ಕಕ್ಕಿಡಿ. ಕೊನೆಯಲ್ಲಿ ಇ೦ಗು ಹಾಕಬೇಕು. ಬದನೆಕಾಯಿಯನ್ನು ಸ್ವಲ್ಪ ದೊಡ್ದದಾಗಿ ಕಟ್ ಮಾಡಿ(ಚಿತ್ರದಲ್ಲಿ ತೋರಿಸಿದ೦ತೆ - ಬದನೇಕಾಯಿಯನ್ನು ಮಧ್ಯದಲ್ಲಿ ಸೀಳಿ ಬುಡದಲ್ಲಿ ಸೇರಿಕೊ೦ಡಿರುವ೦ತೆ ಮಾಡಬಹುದು ಇಡೀ ಬದನೇಕಾಯಿ ಥರ ಕಾಣಿಸುತ್ತದೆ. ಆದರೆ ಬದನೇಕಾಯಿ ಬೇಯಲು ಜಾಸ್ತಿ ಸಮಯ ಬೇಕು. ಅದಕ್ಕೆ ಇಲ್ಲಿ ಭಾಗಗಳನ್ನು ಮಾಡಿದ್ದೇನೆ.) ಬಾಣಲೆಗೆ ಎಣ್ಣೆ (ಜಾಸ್ತಿನೆ ಬೇಕು ಬದನೆಕಾಯಿ ಎಣ್ಣೆಯಲ್ಲೆ ಬೇಯಬೇಕು) ಹಾಕಿ ಸ್ವಲ್ಪ ಕಾದ ನ೦ತರ ಸಾಸಿವೆ, ಕರಿಬೇವು ಹಾಕಿ, ಬದನೆಕಾಯಿಯನ್ನು ಹಾಕಬೇಕು. ಇದಕ್ಕೆ ಸ್ವಲ್ಪ ಉಪ್ಪು & ವಾಟೆಪುಡಿ ಹಾಕಿ. 

ಹುರಿದಿಟ್ಟ ಮಸಾಲೆಗೆ ಕಾಯಿತುರಿ ಹಾಕಿ ನೀರು ಹಾಕದೆ ತರಿ ತರಿ ಪುಡಿ ಮಾಡಿಕೊಳ್ಳಿ. ಬದನೆಕಾಯಿ ಅರ್ಧ ಬೆ೦ದ ಮೇಲೆ ಉದ್ದುದ್ದ ಸೀಳಿದ ಈರುಳ್ಳಿ ಹಾಕಿ. ಬದನೇಕಾಯಿ ಬೇಯುವವರೆಗೂ ಅಗಾಗ ಅದನ್ನು ಕೈಯಾಡಿಸುತ್ತಿರಬೇಕು. ಇಲ್ಲವಾದಲ್ಲಿ ಅದು ಸೀದು ಹೊಗುವ ಸಾಧ್ಯತೆ ಇದೆ. ಬದನೆಕಾಯಿ ಬೆ೦ದ ನ೦ತರ ಅದಕ್ಕೆ ಪುಡಿ ಮಾಡಿಟ್ಟ ಮಸಾಲೆ ಹಾಕಿ, ಅಗತ್ಯವಿದ್ದಲ್ಲಿ ಸ್ವಲ್ಪ ನೀರು ಹಾಕಿ. ಎಣ್ಣೆಗಾಯಿ ಗೊಜ್ಜಿನ ಥರ ಬೇಕೆ೦ದು ಇಷ್ಟಪಡುವವರು ಮಸಾಲೆ ರುಬ್ಬುವಾಗ ನೀರು ಸೇರಿಸಬಹುದು. ಇದು ಎಲ್ಲ ಥರಹದ ರೋಟಿಯ ಜೊತೆ ಮತ್ತು ಅನ್ನದ ಜೊತೆ ಕೂಡ ಚೆನ್ನಾಗಿರುತ್ತದೆ.

ಬದನೇಕಾಯಿ ಪಲ್ಯ - 1 :

ಸಾಮಗ್ರಿಗಳು: ಮಧ್ಯಮ ಗಾತ್ರದ ಬಲೂನ್ ಬದನೇಕಾಯಿ 1, ತೆಂಗಿನ ತುರಿ 2 ಕಪ್, ಬೆಳ್ಳುಳ್ಳಿ 10-15 ಎಸಳು, ಹಸಿ ಮೆಣಸಿನ ಕಾಯಿ (ಅಥವಾ ಸೂಜು ಮೆಣಸು / ಜೀರಿಗೆ ಮೆಣಸು) ಖಾರಕ್ಕೆ, ವಾಟೆ ಪುಡಿ / ಅಮ್ಚೂರ್ ಪೌಡರ್ 1 ಚಮಚ, ಎಣ್ಣೆ 4-5 ಚಮಚ, ಕರಿಬೇವು ಸ್ವಲ್ಪ, ಸಾಸಿವೆ - ಜೀರಿಗೆ ಸ್ವಲ್ಪ, ಅರಿಶಿನ ಪುಡಿ 1/4 ಚಮಚ, ಉಪ್ಪು ರುಚಿಗೆ ತಕ್ಕಷ್ಟು. 

ವಿಧಾನ: ಬದನೆಕಾಯಿಯನ್ನು ಕೆಳಗೆ ಚಿತ್ರದಲ್ಲಿ ತೋರಿಸಿದಂತೆ ಹೆಚ್ಚಿಕೊಳ್ಳಿ. 
                                       

ಬೆಳ್ಳುಳ್ಳಿಯನ್ನು ಜಜ್ಜಿಕೊಳ್ಳಿ (ಸೂಜು ಮೆಣಸಾದರೆ ಬೆಳ್ಳುಳ್ಳಿ ಜೊತೆಯೇ ಜಜ್ಜಿ), ಹಸಿ ಮೆಣಸನ್ನು ಉದ್ದಕ್ಕೆ ಸೀಳಿಕೊಳ್ಳಿ. ನಂತರ ಬಾಣಲೆಗೆ ಎಣ್ಣೆ, ಜೀರಿಗೆ, ಸಾಸಿವೆ, ಕರಿಬೇವು ಹಾಕಿ ಒಗ್ಗರಣೆ ಮಾಡಿ ಅದಕ್ಕೆ ಜಜ್ಜಿದ ಬೆಳ್ಳುಳ್ಳಿ, ಮೆಣಸಿನ ಕಾಯಿ, ಅರಿಶಿನ ಪುಡಿ ಹಾಕಿ. ಬೆಳ್ಳುಳ್ಳಿ ಹುರಿದ ಮೇಲೆ ಹೆಚ್ಚಿಟ್ಟುಕೊಂಡ ಬದನೇಕಾಯಿ ಹಾಕಿ, ಅದು ಮುಳುಗುವಷ್ಟು ನೀರು ಹಾಕಿ, ಉಪ್ಪು, ವಾಟೆ ಪುಡಿ / ಅಮ್ಚೂರ್ ಪುಡಿ ಹಾಕಿ ಕಲಕಿ, ಮುಚ್ಚಿ ಚೆನ್ನಾಗಿ ಬೇಯಿಸಿ.  

ಬದನೇಕಾಯಿ ಮೆತ್ತಗೆ ಬೆಂದ ಮೇಲೆ (ಸ್ವಲ್ಪ ಪ್ರಮಾಣದಲ್ಲಿ ನೀರು ಇರಲಿ, ಪೂರ್ತಿ ಆರುವುದು ಬೇಡ, ಬೇಕಿದ್ದರೆ ಸ್ವಲ್ಪ ನೀರು ಸೇರಿಸಿ) ತುರಿದಿಟ್ಟ ತೆಂಗಿನಕಾಯಿ ಹಾಕಿ ಚೆನ್ನಾಗಿ ಕಲಕಿ. ಉಳಿದ ನೀರಿನಲ್ಲಿ ತೆಂಗಿನ ಕಾಯಿ ಬೇಯಲಿ. ಉಪ್ಪು, ಹುಳಿ ಸರಿಯಿದೆಯೇ ಎಂದು ಪರೀಕ್ಷಿಸಿಕೊಳ್ಳಬಹುದು, ಖಾರ ಸ್ವಲ್ಪ ಜಾಸ್ತಿ ಇರಲಿ. ನೀರು ಪೂರ್ತಿ ಆರಿದ ಮೇಲೆ ಉರಿ ಆರಿಸಿ.  ಈ ಪಲ್ಯವನ್ನು ಬಿಸಿ ಬಿಸಿ ಅನ್ನದೊಡನೆ ಮತ್ತು ಚಪಾತಿಯೊಡನೆ ಸವಿದು ನೋಡಿ.  

                                 

ಸೂಚನೆ : ಈ ಪಲ್ಯಕ್ಕೆ ತೆಂಗಿನ ಕಾಯಿ ಮತ್ತು ಖಾರ ಜಾಸ್ತಿ ಇದ್ದರೆ ಮಾತ್ರ ರುಚಿ ಜಾಸ್ತಿ. 

ಹಾಗಲಕಾಯಿ ಪಲ್ಯ - 1

ಸಾಮಾಗ್ರಿಗಳು: ಹಾಗಲಕಾಯಿ 2, ಈರುಳ್ಳಿ 1, ತೆ೦ಗಿನಕಾಯಿ ತುರಿ1/2 ಕಪ್, ಹಸಿ ಮೆಣಸು4-5 (ಜಾಸ್ತಿ ಖಾರ ಇದ್ದರೆ ಒಳ್ಳೆಯದು), ಹುಣಸೆಹಣ್ಣಿನ ರಸ 2-3 ಚಮಚ,

ಒಗ್ಗರಣೆಗೆ:ಎಣ್ಣೆ ಸ್ವಲ್ಪ ಜಾಸ್ತಿ ಇದ್ದರೆ ಒಳ್ಳೆಯದು, ಸಾಸಿವೆ, ಚಿಟಿಕೆ ಇ೦ಗು & ಅರಿಶಿನ, ಕರಿಬೇವು

ವಿಧಾನ: ಹಾಗಲಕಾಯಿ ಮತ್ತು ಈರುಳ್ಳಿಯನ್ನು ಸಣ್ಣದಾಗಿ ಹೆಚ್ಚಿಕೊಳ್ಳಿ. ಮೊದಲು ಬಾಣಲೆಯನ್ನು ಒಲೆಯಮೇಲೆ ಇಟ್ಟು, ಎಣ್ಣೆ ಹಾಕಿ ಅದು ಸ್ವಲ್ಪ ಕಾದ ನ೦ತರ ಅದಕ್ಕೆ ಸಾಸಿವೆ ಹಾಕಿ ಅದು ಚಿಟಪಟಿಸಿದ ನ೦ತರ ಹಸಿ ಮೆಣಸು, ಕರಿಬೇವು, ಅರಿಶಿನ, ಇ೦ಗು ಹಾಕಿದ ತಕ್ಷಣ ಹಾಗಲಕಾಯಿ ಕೊಚ್ಚಲು (ಸಣ್ಣಗೆ ಹೆಚ್ಚಿದ ಎಲ್ಲ ತರಕಾರಿಗಳನ್ನು ಕೊಚ್ಚಲು ಎನ್ನುವುದು ವಾಡಿಕೆ) ಹಾಕಬೇಕು. ಅದಕ್ಕೆ ಉಪ್ಪು, ಹುಣಸೆಹಣ್ಣಿನ ರಸ ಹಾಕಿ 20 ನಿಮಿಷ ಸಣ್ಣ ಉರಿಯಲ್ಲಿ ಚೆನ್ನಾಗಿ ಹುರಿಯಿರಿ.ಆಮೇಲೆ ತೆ೦ಗಿನ ತುರಿ, ಈರುಳ್ಳಿ ಸೇರಿಸಿ  5 ನಿಮಿಷ ಮತ್ತೆ ಹುರಿದರೆ ಹಾಗಲಕಾಯಿ ಪಲ್ಯ ರೆಡಿ. ಇದು ಅನ್ನದ ಜೊತೆ ಚೆನ್ನಾಗಿರುತ್ತದೆ. (ಪಲ್ಯ ಮಾಡುವಾಗ ನೀರನ್ನು ಸೇರಿಸಬಾರದು).

ಹಾಗಲಕಾಯಿ ಪದಾರ್ಥಕ್ಕೆ ಒ೦ದು ಟಿಪ್ಸ್: ಹಾಗಲಕಾಯಿಯನ್ನು ಹೆಚ್ಚಿದ ಮೇಲೆ ಅದಕ್ಕೆ ಸ್ವಲ್ಪ ಉಪ್ಪು, ಅರಿಶಿನ ಸೇರಿಸಿ 10-15 ನಿಮಿಷ ಹಾಗೆ ಬಿಡಿ. ನ೦ತರ ಅದರ ರಸ ತೆಗೆದು ಕೊಚ್ಚಲನ್ನು ಮಾತ್ರ ಬಳಸುವುದರಿ೦ದ ಹಾಗಲಕಾಯಿ ಪದಾರ್ಥಗಳು ಅಷ್ಟೊ೦ದು ಕಹಿ ಅಗುವುದಿಲ್ಲ.

ಬೆ೦ಡೆಕಾಯಿ ಪಲ್ಯ

ಬೇಕಾಗುವ ಸಾಮಾಗ್ರಿಗಳು:

ಬೆ೦ಡೆಕಾಯಿ :1/2 ಕೆ.ಜಿ, ಈರುಳ್ಳಿ :1 , ಬೆಳ್ಳುಳ್ಳಿ :2 ಎಸಳು, ಶು೦ಟಿ : 1 ಇ೦ಚು, ಲಿ೦ಬುರಸ 2 ಚಮಚ, ಅಚ್ಚಖಾರದ ಪುಡಿ - 1-2 ಚಮಚ,

ಒಗ್ಗರಣೆಗೆ: ಎಣ್ಣೆ, ಸಾಸಿವೆ, ಕರಿಬೇವು, ಚಿಟಿಕೆ ಅರಿಶಿನ ಪುಡಿ

ಉಪ್ಪು ರುಚಿಗೆ,

ಮಾಡುವ ವಿಧಾನ:

ಮೊದಲು ಬೆ೦ಡೆಕಾಯಿಯನ್ನು ಹೆಚ್ಚಿ ಪಕ್ಕಕ್ಕಿಡಿ.ಬಾಣಲೆಗೆ ಎಣ್ಣೆ, ಸಸಿವೆ, ಕರಿಬೇವು, ಚಿಟಿಕೆ ಅರಿಶಿಣ, ಶು೦ಟಿ ಬೆಳ್ಳುಳ್ಳಿ ಜಜ್ಜಿದ್ದು

ಮತ್ತು ಹೆಚ್ಚಿದ ಈರುಳ್ಳಿ ಹಾಕಿ, ನ೦ತರ ಅದಕ್ಕೆ ಹೆಚ್ಚಿದ ಬೆ೦ಡೆಕಾಯಿ ರುಚಿಗೆ ಉಪ್ಪು, ಲಿ೦ಬುರಸ ಹಾಕಿ ಬೇಯಿಸಿ (ನೀರು ಹಾಕಬಾರದು) ಬೆ೦ದಮೇಲೆ ಖಾರಕ್ಕೆ ಅಚ್ಚ ಖಾರದ ಪುಡಿ ಹಾಕಿ ಕಲೆಸಿದರೆ ರುಚಿಯಾದ ಬೆ೦ಡೆಕಾಯಿ ಪಲ್ಯ ಸಿದ್ದ. ಇದು ಚಪಾತಿ ಜೊತೆ ಮತ್ತು ಅನ್ನಕ್ಕೊ ಚೆನ್ನಾಗಿರುತ್ತದೆ.



ಹಾಗಲಕಾಯಿ ಪಲ್ಯ - 2

ಸಾಮಾಗ್ರಿಗಳು: ಹಾಗಲಕಾಯಿ -2, ತೆ೦ಗಿನ ತುರಿ ½ ಕಪ್,

ಒಗ್ಗರಣೆಗೆ:ಎಣ್ಣೆ ಸ್ವಲ್ಪ ಜಾಸ್ತಿ ಇದ್ದರೆ ಒಳ್ಳೆಯದು, ಸಾಸಿವೆ ½ ಚಮಚ, ಚಿಟಿಕೆ ಅರಿಶಿನ, ಕರಿಬೇವು

ಸ೦ಬಾರ ಪುಡಿ: ಕಡಲೆ ಬೇಳೆ 5 ಟೀ. ಚಮಚ , ಉದ್ದಿನ ಬೇಳೆ 2 ಟೀ. ಚಮಚ , ಕೊತ್ತ೦ಬರಿ (ಧನಿಯಾ) ½ ಚಮಚ , ಜೀರಿಗೆ ½ ಚಮಚ , ಇ೦ಗು ಚಿಟಿಕೆ, ಒಣಮೆಣಸು 6-7,

ವಿಧಾನ:   ಮೇಲೆ ಹೇಳಿದ ಬೇಳೆಗಳನ್ನು ತರಿ ತರಿಯಾಗಿ ಪುಡಿ ಮಾಡಿ ಪಕ್ಕಕ್ಕಿಡಿ. ಮೊದಲು ಬಾಣಲೆಯನ್ನು ಒಲೆಯಮೇಲೆ ಇಟ್ಟು, ಎಣ್ಣೆ ಹಾಕಿ ಅದು ಸ್ವಲ್ಪ ಕಾದ ನ೦ತರ ಅದಕ್ಕೆ ಸಾಸಿವೆ ಹಾಕಿ ಅದು ಚಿಟಪಟಿಸಿದ ನ೦ತರ ಕರಿಬೇವು, ಅರಿಶಿನ, ಹಾಕಿದ ತಕ್ಷಣ ಹಾಗಲಕಾಯಿ ಕೊಚ್ಚಲನ್ನು ರಸ ತೆಗೆದು (ಕಹಿ ತೆಗೆಯುವ ವಿಧಾನವನ್ನು ಮೊದಲೆ ತಿಳಿಸಿದ್ದೇನೆ) ಹಾಕಬೇಕು. ಅದಕ್ಕೆ ಉಪ್ಪು, ಹುಣಸೆಹಣ್ಣಿನ ರಸ ಹಾಕಿ 40 ನಿಮಿಷ ಸಣ್ಣ ಉರಿಯಲ್ಲಿ ಚೆನ್ನಾಗಿ ಹುರಿಯಿರಿ. ಈಗ ತೆ೦ಗಿನ ತುರಿ ಮತ್ತು ಮಸಾಲೆ ಪುಡಿ ಹಾಕಿ ಮತ್ತೆ 5 ನಿಮಿಷ ಹುರಿದರೆ ಹಾಗಲಕಾಯಿ ಪಲ್ಯ ಸಿದ್ದ.