ಪಾಲಕ್ ಮಟರ್ ಸಬ್ಜಿ / Green pease with spinach sabji : (Restaurant style)

ಸಾಮಗ್ರಿಗಳು:

ಪಾಲಕ್ ಸೊಪ್ಪು : 1 ಕಟ್ಟು (ಮಧ್ಯಮ ಗಾತ್ರದ ಕಟ್ಟು)

ಬಿಡಿಸಿದ ಹಸಿ ಬಟಾಣಿ (ಮಟರ್) : 2 ಕಪ್

ಸಣ್ಣ ಹೆಚ್ಚಿದ ಟೊಮೇಟೊ : 1.5 ಕಪ್

ಸಣ್ಣ ಹೆಚ್ಚಿದ ಈರುಳ್ಳಿ : 1 ಕಪ್

ಶುಂಠಿ : 1/4 ಇಂಚು

ಬೆಳ್ಳುಳ್ಳಿ : 3-4 ಎಸಳು

ಶುಂಠಿ ಬೆಳ್ಳುಳ್ಳಿ ಪೇಸ್ಟ್ : 1 ಚಮಚ

ಹಸಿಮೆಣಸಿನಕಾಯಿ : 1

ಅಚ್ಚ ಖಾರದ ಪುಡಿ : 1 ಚಮಚ

ಧನಿಯಾ ಪುಡಿ : 1/2 ಚಮಚ

ಗರಂ ಮಸಾಲಾ ಪುಡಿ : 1/2 ಚಮಚ

ಕಸೂರಿ ಮೇಥಿ : 1/2 ಚಮಚ

ಸಕ್ಕರೆ : 1/2 ಚಮಚ

ಜೀರಿಗೆ : 1/2 ಚಮಚ

ಎಣ್ಣೆ ಮತ್ತು ಬೆಣ್ಣೆ : ತಲಾ 1 ಚಮಚ

ಉಪ್ಪು: ರುಚಿಗೆ

ವಿಧಾನ :

ಚೆನ್ನಾಗಿ ತೊಳೆದ ಪಾಲಕ್ ಸೊಪ್ಪು, ಶುಂಠಿ, ಬೆಳ್ಳುಳ್ಳಿ ಎಸಳು, ಹಸಿ ಮೆಣಸು ಎಲ್ಲವನ್ನು ಕುದಿಯುತ್ತಿರುವ ನೀರಿಗೆ ಹಾಕಿ ಸ್ಟವ್ ಆರಿಸಿ 30 ಸೆಕೆಂಡ್ ಮುಚ್ಚಿಡಿ. ನಂತರ ನೀರನ್ನು ಒಂದು ಪಾತ್ರೆಯಲ್ಲಿ ಬಸಿದಿಟ್ಟು, ಪಾಲಕ್ ಮಿಶ್ರಣವನ್ನು ಪ್ಲೇಟ್ ಗೆ ಹಾಕಿ ಆರಲು ಬಿಡಿ. ಪಾನ್ ಒಲೆಯ ಮೇಲಿಟ್ಟು ಎಣ್ಣೆ, ಬೆಣ್ಣೆ ಹಾಕಿ ಕಾಯಿಸಿ ಜೀರಿಗೆ ಹಾಕಿ ಫ್ರೈ ಮಾಡಿ. ಅದಕ್ಕೆ ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಹೆಚ್ಚಿದ ಈರುಳ್ಳಿ ಹಾಕಿ ಚೆನ್ನಾಗಿ ಫ್ರೈ ಮಾಡಿ. ನಂತರ ಹೆಚ್ಚಿದ ಟೊಮೇಟೊ, ಸ್ವಲ್ಪ ಉಪ್ಪು ಹಾಕಿ ಸಣ್ಣ ಉರಿಯಲ್ಲಿ ಟೊಮೇಟೊ ಮೆತ್ತಗಾಗುವವರೆಗೆ ಫ್ರೈ ಮಾಡಿ. ನಂತರ ಹಸಿ ಬಟಾಣಿ ಹಾಕಿ ಒಂದು ಕಪ್ ನೀರು (ಪಾಲಕ್ ಬೇಯಿಸಿ ಬಸಿದ ನೀರನ್ನೇ ಹಾಕಿ) ಹಾಕಿ ಮುಚ್ಚಳ ಮುಚ್ಚಿ ಬೇಯಿಸಿ, ಇತ್ತ ತಣ್ಣಗಾದ ಪಾಲಕ್ ಮಿಶ್ರಣವನ್ನು ಮಿಕ್ಸಿಗೆ ಹಾಕಿ ರುಬ್ಬಿಕೊಳ್ಳಿ. ಬಟಾಣಿ ಬೆಂದ ಮೇಲೆ ಅದಕ್ಕೆ ಧನಿಯಾ ಪುಡಿ, ಅಚ್ಚ ಖಾರದಪುಡಿ, ಗರಂ ಮಸಾಲಾ ಪುಡಿ ಹಾಕಿ ಮಿಕ್ಸ್ ಮಾಡಿ, ಪಾಲಕ್ ಪೇಸ್ಟ್, ಉಪ್ಪು, ಸಕ್ಕರೆ ಹಾಕಿ,  ಎಷ್ಟು ಬೇಕು ನೋಡಿಕೊಂಡು ಬಸಿದಿಟ್ಟ ನೀರು ಹಾಕಿ, ಕಸೂರಿ ಮೇಥಿ ಹಾಕಿ ಕುದಿಸಿ. ಪುಲ್ಕ, ರೋಟಿ, ಚಪಾತಿ, ಪೂರಿ ಜೊತೆ ಸವಿಯಲು ಪಾಲಕ್ ಮಟರ್ / green peas with spinach sabji ಸಿದ್ಧ.

ಮೊಳಕೆ ಕಾಳಿನ ಮಸಾಲಾ ಸಾ೦ಬಾರ್:

ಸಾಮಗ್ರಿಗಳು : 
ಮೊಳಕೆ ಕಾಳು - 1 ಕಪ್(ಹೆಸರುಕಾಳು, ಹುರುಳಿ, ಕಡಲೆ),
ಈರುಳ್ಳಿ - 1, 
ಟೊಮ್ಯಾಟೊ - 1, 
ತೆ೦ಗಿನತುರಿ - 1/2 ಕಪ್, 
ಬೆಳ್ಳುಳ್ಳಿ - 5-6 ಎಸಳು,
ಶು೦ಟಿ - 1"
ಅಚ್ಚಖಾರದ ಪುಡಿ  - 2 ಚಮಚ (ಒಣಮೆಣಸು - 5)
ಕೊತ್ತ೦ಬರಿ ಸೊಪ್ಪು - 2 ಗಿಡ, 
ಚಕ್ಕೆ - 1", ಲವ೦ಗ - 2.
ಎಣ್ಣೆ - 3 ಚಮಚ
ಸಾಸಿವೆ - 1/2 ಚಮಚ , ಕರಿಬೇವು - 6-7, 
ಉಪ್ಪು ರುಚಿಗೆ ತಕ್ಕಷ್ಟು

ವಿಧಾನ: ಒ೦ದು ಬಾಣಲೆಗೆ ಸ್ವಲ್ಪ ಎಣ್ಣೆ ಹಾಕಿ ಒಣ ಮೆಣಸು (ಒಣಮೆಣಸಿನ ಬದಲು ಅಚ್ಚ ಖಾರದ ಪುಡಿ ಹಾಕಬಹುದು) ಹುರಿದುಕೊಳ್ಳಿ. ತೆ೦ಗಿನತುರಿ, ಬೆಳ್ಳುಳ್ಳಿ, ಶು೦ಟಿ, ಕೊತ್ತ೦ಬರಿ ಸೊಪ್ಪು, ಚಕ್ಕೆ, ಲವ೦ಗ, ಹುರಿದ ಒಣ ಮೆಣಸು ಹಾಕಿ ಸಲ್ಪ ನೀರು ಹಾಕಿ ರುಬ್ಬಿಕೊಳ್ಳಿ. ಈಗ ಕುಕ್ಕರ್ ಗೆ 2 ಚಮಚ ಎಣ್ಣೆ ಹಾಕಿ ಅದು ಕಾದ ಮೇಲೆ ಸಾಸಿವೆ, ಕರಿಬೇವು ಹಾಕಿ ನ೦ತರ ಹೆಚ್ಚಿಟ್ಟ ಈರುಳ್ಳಿ & ಟೊಮ್ಯಾಟೊ ಹಾಕಿ ಸ್ವಲ್ಪ ಬಾಡಿಸಿ ನ೦ತರ ರುಬ್ಬಿಟ್ಟ ಮಸಾಲೆ ಹಾಕಿ 5 ನಿಮಿಷ ಫ್ರೈ ಮಾಡಿ ಹಾಗೆ ಉಪ್ಪು ಮೊಳಕೆ ಕಾಳುಗಳನ್ನು ಹಾಕಿ ನೀರು ಹಾಕಿ ಕುಕ್ಕರ್ ಮುಚ್ಚಳ ಮುಚ್ಚಿ 2  ವಿಶಲ್ ಕೂಗಿಸಿ. ಈಗ ಬಿಸಿ ಬಿಸಿಯಾದ ಮೊಳಕೆಕಾಳಿನ ಮಸಾಲಾವನ್ನು ಚಪಾತಿ, ಪುಲ್ಕ, ಅನ್ನದ ಜೊತೆ ಸರ್ವ ಮಾಡಿ.

ಸಾಂಬಾರ್ ಭಾಜಿ : (Using leftover Sambar)

ಊಟಕ್ಕೆಂದು ಮಾಡಿದ ಸಾಂಬಾರ್ ಹೆಚ್ಚು ಉಳಿದು ಬಿಟ್ಟರೆ ಮತ್ತೆ ಅದನ್ನೇ ಮರುದಿನ ಊಟಕ್ಕೆ ತಿನ್ನಲು ಬೇಜಾರು, ಚೆಲ್ಲಲೂ ಮನಸ್ಸು ಬಾರದು.... ಅಂಥ ಸಮಯದಲ್ಲಿ ಅದನ್ನೇ ಸ್ವಲ್ಪ ರುಚಿ ಬದಲಿಸಿ ಮರುದಿನ ಬೆಳಿಗ್ಗೆಯ ಉಪಹಾರದ ದೋಸೆ ಅಥವಾ ಚಪಾತಿ ಜೊತೆ ತಿನ್ನಬಹುದು.... 

ಸಾಮಗ್ರಿಗಳು:

ಉಳಿದ ಸಾಂಬಾರ್ : 2 ಕಪ್ 

ಈರುಳ್ಳಿ : 2

ಬೆಳ್ಳುಳ್ಳಿ : 4-5 ಎಸಳು 

ತೆಂಗಿನ ತುರಿ : 2-3 ಚಮಚ 

ಸಕ್ಕರೆ: 1/2 ಚಮಚ 

ಹಸಿಮೆಣಸಿನ ಕಾಯಿ : 1-2

ತುಪ್ಪ : 2 ಚಮಚ 

ಎಣ್ಣೆ :1 ಚಮಚ (Optional) 

ಸಾಸಿವೆ : 1/2 ಚಮಚ 

ವಿಧಾನ :

ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಬೆಳ್ಳುಳ್ಳಿ ಸಿಪ್ಪೆ ತೆಗೆದು ಜಜ್ಜಿಕೊಳ್ಳಿ ಮತ್ತು ಹಸಿಮೆಣಸಿನ ಕಾಯಿಯನ್ನು ಉದ್ದುದ್ದ ಸೀಳಿಕೊಳ್ಳಿ. ಬಾಣಲೆಗೆ ತುಪ್ಪ ಮತ್ತು ಎಣ್ಣೆ ಹಾಕಿ ಕಾಯಿಸಿ ಅದಕ್ಕೆ ಸಾಸಿವೆ ಹಾಕಿ ಚಿಟಪಟಾಯಿಸಿ, ಹಸಿಮೆಣಸಿನ ಕಾಯಿ ಹಾಕಿ ಫ್ರೈ ಮಾಡಿ. ಜಜ್ಜಿದ ಬೆಳ್ಳುಳ್ಳಿ ಹಾಕಿ ಸ್ವಲ್ಪ ಹುರಿದು, ಹೆಚ್ಚಿದ ಈರುಳ್ಳಿ ಹಾಕಿ ಚೆನ್ನಾಗಿ ಹುರಿಯಿರಿ. ನಂತರ ಸಾಂಬಾರ್, ಸಕ್ಕರೆ, ತೆಂಗಿನ ತುರಿ ಬೇಕಿದ್ದಲ್ಲಿ ಸ್ವಲ್ಪ ಕೊತ್ತಂಬರಿ ಸೊಪ್ಪು ಹಾಕಿ ಕುದಿಸಿ. ಬಿಸಿ ಬಿಸಿ ಸಾಂಬಾರ್ ಭಾಜಿ ದೋಸೆಯ ಜೊತೆ ಬಲು ರುಚಿ. ಚಪಾತಿಯ ಜೊತೆಯೂ ತಿನ್ನಬಹುದು. 

ಆಲೂ ಗೋಬಿ ಡ್ರೈ:

ಸಾಮಗ್ರಿಗಳು : 
ಹೆಚ್ಚಿಟ್ಟ ಆಲೂಗಡ್ಡೆ - 1 ಕಪ್
ಬಿಡಿಸಿಟ್ಟ ಗೋಬಿ (ಹೂಕೋಸು) - 1 ಕಪ್ ,
ಹಸಿಮೆಣಸು - 2
ಧನಿಯಾ ಪುಡಿ -  1 ಟೀ ಚಮಚ
ಗರ೦ ಮಸಾಲ ಪುಡಿ - 1/2  ಟೀ ಚಮಚ
ಕರಿಬೇವು - 7-8 ಎಲೆಗಳು,
ಜೀರಿಗೆ - 1/2  ಟೀ ಚಮಚ ,
ಸಾಸಿವೆ - 1/2  ಟೀ ಚಮಚ
ಅರಿಶಿನ ಪುಡಿ - 1/4 ಟೀ ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು
ಎಣ್ಣೆ - 2 ಟೇ. ಚಮಚ

ವಿಧಾನ : ಆಲೂಗಡ್ಡೆ ಸಿಪ್ಪೆ ತೆಗೆದು ಚೌಕ ಹೋಳು ಮಾಡಿಕೊಳ್ಳಿ. ಹೂಕೋಸನ್ನು ಬಿಡಿಸಿಕೊ೦ಡು ಕುದಿಯುವ ನೀರಿಗೆ ಹಾಕಿ ಹಾಗೆ ಉರಿ ಆರಿಸಿ ೨ ನಿಮಿಷದ ನ೦ತರ ನೀರು ಬಸಿದುಕೊಳ್ಳಿ. ಬಾಣಲೆಗೆ ಎಣ್ಣೆ ಹಾಕಿ ಕಾದ ಮೇಲೆ ಜೀರಿಗೆ ಹಸಿಮೆಣಸು ಅರಿಶಿನ ಪುಡಿ, ಕರಿಬೇವು ಹಾಕಿ ನ೦ತರ ಆಲೂಗಡ್ಡೆ & ಹೂಕೋಸನ್ನು ಹಾಕಿ ಉಪ್ಪು ಹಾಕಿ ಅದನ್ನು ಮೀಡಿಯಮ್ ಉರಿಯಲ್ಲಿ ಬೇಯಿಸಿ. ಎಣ್ಣೆ ಕಡಿಮೆ ಹಾಕಿದರೆ ಬೇಯಲು ಜಾಸ್ತಿ ಸಮಯ ಬೇಕು. ಆದರೂ ಕಡಿಮೆ ಎಣ್ಣೆಯನ್ನು ಹಾಕಿ. ಬೇಕಾದಲ್ಲಿ ಮತ್ತೆ ಎಣ್ಣೆ ಸೇರಿಸಬಹುದು. ತಳ ಹಿಡಿಯದ೦ತೆ ನೋಡಿಕೊಳ್ಳಿ. ಕೊನೆಯಲ್ಲಿ ಧನಿಯಾಪುಡಿ ಗರ೦ ಮಸಾಲ ಪುಡಿ ಸೇರಿಸಿ.

ಈ ಬಿಸಿ ಬಿಸಿ ಆಲೂ ಗೋಬಿ ಚಪಾತಿ, ಪುಲ್ಕ ಜೊತೆ ತಿನ್ನಲು ಬಲು ರುಚಿ.

ಸೂಚನೆ: ಇದಕ್ಕೆ ಟೊಮ್ಯಾಟೊ, ಈರುಳ್ಳಿ ಹಾಗೂ ಹಸಿ ಬಟಾಣಿ ಕೂಡ ಸೇರಿಸ ಬಹುದು. ಜಾಸ್ತಿ ಖಾರ ಬೇಕಾದಲ್ಲಿ ಕೊನೆಯಲ್ಲಿ ಮೆಣಸಿನ ಪುಡಿ ಸೇರಿಸಿ.

ಸ್ವೀಟ್ ಕಾರ್ನ್ ಸಬ್ಜಿ :

ಸಾಮಗ್ರಿಗಳು:
ಬಿಡಿಸಿದ ಸ್ವೀಟ್ ಕಾರ್ನ್: 1.5 ಕಪ್
ಫಾರಂ ಟೊಮೇಟೊ : 2
ಈರುಳ್ಳಿ: 2
ಕ್ಯಾಪ್ಸಿಕಂ : 1 ಸಣ್ಣದು
ಗೋಡಂಬಿ : 10-12
ಕಸೂರಿ ಮೇಥಿ : 1 ಚಮಚ
ಗರಂ ಮಸಾಲಾ ಪುಡಿ: 1 ಟೀ ಚಮಚ
ಜೀರಿಗೆ ಪುಡಿ: 1/2 ಟೀ ಚಮಚ
ಧನಿಯಾ ಪುಡಿ: 1/2 ಟೀ ಚಮಚ
ಅಚ್ಚ ಮೆಣಸಿನ ಪುಡಿ : 1/2 ಟೀ ಚಮಚ
ಹಸಿಮೆಣಸಿನ ಕಾಯಿ: 2-3
ಕೊತ್ತಂಬರಿ ಸೊಪ್ಪು : 1/2 ಚಮಚ
ಎಣ್ಣೆ : 3-4 ಚಮಚ
ಶುಂಠಿ -ಬೆಳ್ಳುಳ್ಳಿ ಪೇಸ್ಟ್: 1 ಟೀ ಚಮಚ
ಉಪ್ಪು : ರುಚಿಗೆ

ವಿಧಾನ:

ಗೋಡಂಬಿಯನ್ನು 1 ಘಂಟೆ ನೀರಿನಲ್ಲಿ ನೆನೆಸಿಡಿ. ಟೊಮೇಟೊ, ಈರುಳ್ಳಿ, ಕ್ಯಾಪ್ಸಿಕಂ ಗಳನ್ನ ಸಣ್ಣದಾಗಿ ಹೆಚ್ಚಿಕೊಳ್ಳಿ. ಬಾಣಲೆಗೆ ಎಣ್ಣೆ ಹಾಕಿ ಕಾದ ನಂತರ ಈರುಳ್ಳಿ ಹಾಕಿ ಸ್ವಲ್ಪ ಫ್ರೈ ಮಾಡಿ, ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಹಾಕಿ ಹಸಿ ವಾಸನೆ ಹೋಗುವ ತನಕ ಫ್ರೈ ಮಾಡಿ. ನಂತರ ಟೊಮೇಟೊ ಸ್ವಲ್ಪ ಉಪ್ಪು ಹಾಕಿ ಮೆತ್ತಗಾಗುವವರೆಗೆ ಫ್ರೈ ಮಾಡಿ. ಇದಕ್ಕೆ ಕ್ಯಾಪ್ಸಿಕಂ ಹಾಕಿ ಫ್ರೈ ಮಾಡಿ. ನಂತರ ಸ್ವೀಟ್ ಕಾರ್ನ್ ಹಾಕಿ ಒಂದು ನಿಮಿಷ ಮುಚ್ಚಳ ಮುಚ್ಚಿ ಸಣ್ಣ ಉರಿಯಲ್ಲಿ ಬೇಯಿಸಿ, ಉರಿ ಆರಿಸಿ.  ನೀರು ಹಾಕುವ ಅಗತ್ಯವಿಲ್ಲ. ಮಿಕ್ಸಿ ಜಾರ್ ಗೆ ನೆನೆಸಿದ ಗೋಡಂಬಿ ಜೊತೆ ಫ್ರೈ ಮಾಡಿದ ಮಿಶ್ರಣವನ್ನು 2-3 ಚಮಚದಷ್ಟು ಹಾಕಿ ರುಬ್ಬಿ  ಪೇಸ್ಟ್ ಮಾಡಿಕೊಳ್ಳಿ. ಈಗ ಉಳಿದ ಮಿಶ್ರಣ ಇರುವ ಬಾಣಲೆಗೆ ಉರಿ ಹಚ್ಚಿ ಅದಕ್ಕೆ ಗರಂ ಮಸಾಲಾ ಪುಡಿ, ಜೀರಿಗೆ ಪುಡಿ, ಧನಿಯಾ ಪುಡಿ, ಅಚ್ಚ ಮೆಣಸಿನ ಪುಡಿ, ಕಸೂರಿ ಮೇಥಿ, ಕೊತ್ತಂಬರಿ ಸೊಪ್ಪು, ಉದ್ದ ಸೀಳಿದ ಹಸಿಮೆಣಸಿನ ಕಾಯಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ, ಅರ್ಧ ನಿಮಿಷ ಫ್ರೈ ಮಾಡಿ. ನಂತರ ರುಬ್ಬಿದ ಮಿಶ್ರಣ ಹಾಕಿ, ಸಬ್ಜಿ ಎಷ್ಟು ಗಟ್ಟಿ ಬೇಕು ನೋಡಿಕೊಂಡು ನೀರು ಹಾಕಿಕೊಳ್ಳಿ.. ಉಪ್ಪು ಹಾಕಿ ಚೆನ್ನಾಗಿ ಕುದಿಸಿ. ಈಗ ಬಿಸಿ ಬಿಸಿಯಾದ ಸ್ವೀಟ್ ಕಾರ್ನ್ ಸಬ್ಜಿಯನ್ನು ಚಪಾತಿ, ಪುಲ್ಕ, ರೋಟಿ, ಪೂರಿ ಜೊತೆ ಸರ್ವ್ ಮಾಡಿ. 

ಟೊಮೇಟೊ ಗೊಜ್ಜು -2:

ಸಾಮಗ್ರಿಗಳು:

ಫಾರ್ಮ್ ಟೊಮೇಟೊ : 4,

ಮಧ್ಯಮ ಗಾತ್ರದ ಈರುಳ್ಳಿ : 2,

ಹಸಿಮೆಣಸಿನ ಕಾಯಿ : 3-4,

ಬೆಳ್ಳುಳ್ಳಿ : 4-5 ಎಸಳು,

ಸಕ್ಕರೆ : 2 ಚಮಚ,

ಉಪ್ಪು : ರುಚಿಗೆ,

ತುಪ್ಪ / ಎಣ್ಣೆ : 4 ಚಮಚ,

ಜೀರಿಗೆ : 1/2 ಚಮಚ,

ಸಾಸಿವೆ : 1/2 ಚಮಚ,

ಕರಿಬೇವು : 5-6 ಎಲೆಗಳು 

ವಿಧಾನ :

ಟೊಮೇಟೊ ಮತ್ತು ಈರುಳ್ಳಿ ಯನ್ನು ಹೆಚ್ಚಿಕೊಳ್ಳಿ. ಬೆಳ್ಳುಳ್ಳಿ ಬಿಡಿಸಿ ಜಜ್ಜಿಕೊಳ್ಳಿ. ಬಾಣಲೆಗೆ ಒಂದು ಚಮಚ ಎಣ್ಣೆ ಹಾಕಿ ಈರುಳ್ಳಿ ಹಾಕಿ ಒಮ್ಮೆ ಕಲಕಿ, ಟೊಮೇಟೊ,ಹಸಿಮೆಣಸಿನಕಾಯಿ ಹಾಕಿ ಅರ್ಧ ನಿಮಿಷ ಹುರಿಯಿರಿ. ಇದು ತಣ್ಣಗಾದ ಮೇಲೆ ಮಿಕ್ಸಿಗೆ ಹಾಕಿ ರುಬ್ಬಿಕೊಳ್ಳಿ. ಬಾಣಲೆಗೆ ತುಪ್ಪ ಹಾಕಿ, ಜೀರಿಗೆ, ಸಾಸಿವೆ ಹಾಕಿ ಸಿಡಿಸಿ. ಅದಕ್ಕೆಕರಿಬೇವು, ಜಜ್ಜಿದ ಬೆಳ್ಳುಳ್ಳಿ ಹಾಕಿ ಫ್ರೈ ಮಾಡಿ. ಇದಕ್ಕೆ ರುಬ್ಬಿದ ಮಿಶ್ರಣ ಹಾಕಿ, ಸಕ್ಕರೆ, ಉಪ್ಪು ಹಾಕಿ ಕುದಿಸಿ. ಬಿಸಿ ಬಿಸಿ ಟೊಮೇಟೊ ಗೊಜ್ಜನ್ನು ಚಪಾತಿ, ದೋಸೆ ಜೊತೆ ಸವಿಯಿರಿ. 

ಟೊಮೇಟೊ ಗೊಜ್ಜು:

ಸಾಮಗ್ರಿಗಳು :

ಫಾರ್ಮ್ ಟೊಮೇಟೊ - 4-5,

ಮಧ್ಯಮ ಗಾತ್ರದ ಈರುಳ್ಳಿ - 2,

ತೆಂಗಿನ ತುರಿ - 3-4 ಚಮಚ,

ಬೆಳ್ಳುಳ್ಳಿ - 5-6 ಎಸಳು (ಜಜ್ಜಿಕೊಳ್ಳಿ),

ಎಣ್ಣೆ - 4 ಚಮಚ,

ಜೀರಿಗೆ - ಸಾಸಿವೆ - ತಲಾ 1/2 ಚಮಚ,

ಕರಿಬೇವು - 1 ಎಸಳು,
ಹೆಚ್ಚಿದ ಕೊತ್ತಂಬರಿ ಸೊಪ್ಪು - 1 ಚಮಚ,

ಅಚ್ಚ ಮೆಣಸಿನ ಪುಡಿ - 1 ಚಮಚ (ಅಥವಾ ನಿಮ್ಮ ಖಾರಕ್ಕೆ ತಕ್ಕಷ್ಟು) 

ಗರಂ ಮಸಾಲ ಪುಡಿ - 1/2 ಚಮಚ,

ಅರಿಶಿನ ಪುಡಿ - 1/4 ಚಮಚ, 

ಸಕ್ಕರೆ - 1 ಚಮಚ,

ಉಪ್ಪು - ರುಚಿಗೆ 

ವಿಧಾನ :

ಟೊಮೇಟೊ ತೊಳೆದು ಸಣ್ಣಗೆ ಹೆಚ್ಚಿಕೊಳ್ಳಿ. ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಬಾಣಲೆಗೆ ಎಣ್ಣೆ ಹಾಕಿ ಜೀರಿಗೆ, ಸಾಸಿವೆ ಹಾಕಿ ಸಿಡಿಸಿ. ನಂತರ ಇದಕ್ಕೆ ಕರಿಬೇವು, ಜಜ್ಜಿದ ಬೆಳ್ಳುಳ್ಳಿ ಹಾಕಿ ಸ್ವಲ್ಪ ಫ್ರೈ ಮಾಡಿ. ನಂತರ ಹೆಚ್ಚಿದ ಈರುಳ್ಳಿ, ಅರಶಿನ ಪುಡಿ ಹಾಕಿ ಎರಡು ನಿಮಿಷ ಫ್ರೈ ಮಾಡಿ. ಹೆಚ್ಚಿದ ಟೊಮೇಟೊ ಹಾಕಿ, ಉಪ್ಪು, ಸಕ್ಕರೆ ಹಾಕಿ ಟೊಮೇಟೊ ಮೆತ್ತಗಾಗುವ ತನಕ ಫ್ರೈ ಮಾಡಿ. ನಂತರ ಇದಕ್ಕೆ ಅಚ್ಚ ಮೆಣಸಿನ ಪುಡಿ, ಗರಂ ಮಸಾಲ ಪುಡಿ, ತೆಂಗಿನ ತುರಿ, ಕೊತ್ತಂಬರಿ ಸೊಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಒಂದೆರಡು ನಿಮಿಷ ಬೇಯಿಸಿದರೆ ಬಿಸಿ ಬಿಸಿ ಟೊಮೇಟೊ ಗೊಜ್ಜು ದೋಸೆ, ಚಪಾತಿ, ರೋಟಿ ಜೊತೆ ಸವಿಯಲು ಸಿಧ್ಧ. 

ಸಲಹೆ:
ಅಚ್ಚ ಖಾರದ ಪುಡಿ ಬದಲು ಹಸಿಮೆಣಸಿನಕಾಯಿ ಹಾಕಬಹುದು. 

ನವಿಲು ಕೋಸಿನ ಪಲ್ಯ :

ಸಾಮಗ್ರಿಗಳು :

ಸಣ್ಣಗೆ ಹೆಚ್ಚಿದ ನವಿಲು ಕೋಸು : 2 (ಮಧ್ಯಮ ಗಾತ್ರ),

ಸಣ್ಣಗೆ / ಉದ್ದುದ್ದ ಹೆಚ್ಚಿದ ಈರುಳ್ಳಿ : 1 (ದೊಡ್ಡದು)

ಕರಿಬೇವು : ಸ್ವಲ್ಪ,

ಎಣ್ಣೆ : 1 ಟೇಬಲ್ ಚಮಚ, 

ಸಾಸಿವೆ : 1 ಟೀ ಚಮಚ,

ಅರಿಶಿನ ಪುಡಿ : 1/2 ಟೀ ಚಮಚ, 

ಸಕ್ಕರೆ : 1 ಟೀ ಚಮಚ, 

ಉಪ್ಪು : ರುಚಿಗೆ 

ಮಸಾಲೆಗೆ ಸಾಮಗ್ರಿಗಳು :

ತೆಂಗಿನ ತುರಿ : 1/2 ಕಪ್,

ಒಣ ಮೆಣಸಿನ ಕಾಯಿ : 4-5,

ಕೊತ್ತಂಬರಿ : 1 ಟೇಬಲ್ ಚಮಚ,

ಕಡಲೆ ಬೇಳೆ : 1/2 ಟೇಬಲ್ ಚಮಚ,

ಜೀರಿಗೆ : 1 ಟೀ ಚಮಚ,

ಬಿಳಿ ಎಳ್ಳು : 1 ಟೀ ಚಮಚ, 

ನೆನೆಸಿದ ಹುಣಸೆ ಹಣ್ಣು :  ನೆಲ್ಲಿಕಾಯಿ ಗಾತ್ರ / ಒಂದು ಎಸಳು,

ಎಣ್ಣೆ : 1/4 ಟೀ ಚಮಚ

ವಿಧಾನ : ಬಾಣಲೆಗೆ ಎಣ್ಣೆ ಹಾಕಿ ಸಾಸಿವೆ ಹಾಕಿ ಸಿಡಿದ ನಂತರ ಕರಿಬೇವು, ಹೆಚ್ಚಿದ ಈರುಳ್ಳಿ ಹಾಕಿ 1 ನಿಮಿಷ ಹುರಿಯಿರಿ. ನಂತರ ಹೆಚ್ಚಿದ ನವಿಲುಕೋಸು ಹಾಕಿ ಒಂದೆರಡು ಕಪ್ ನೀರು, ಸ್ವಲ್ಪ ಉಪ್ಪು- ಸಕ್ಕರೆ ಹಾಕಿ ಬೇಯಿಸಿ. ತೆಂಗಿನ ತುರಿ, ಹುಣಸೆಹಣ್ಣು ಬಿಟ್ಟು ಉಳಿದ ಮಸಾಲೆ ಸಾಮಗ್ರಿಗೆ ಎಣ್ಣೆ ಹಾಕಿ ಹದವಾಗಿ ಹುರಿಯಿರಿ. ನಂತರ ಈ ಮಿಶ್ರಣವನ್ನು ಹುಣಸೆ ಹಣ್ಣು, ತೆಂಗಿನ ತುರಿ ಸೇರಿಸಿ ಸ್ವಲ್ಪವೇ ತರಿ ತರಿಯಾಗಿ ರುಬ್ಬಿ. ಇದನ್ನು ನವಿಲುಕೋಸು ಬೆಂದ ಮೇಲೆ ಅದಕ್ಕೆ ಹಾಕಿ ಉಪ್ಪು ಹಾಕಿ (ಬೇಯಿಸಲು ಉಪ್ಪು ಹಾಕಿರುವುದರಿಂದ ನೋಡಿಕೊಂಡು ಹಾಕಿ), ನೀರು ಆರುವ ತನಕ ಬೇಯಿಸಿ. ಬಿಸಿ ಬಿಸಿ ನವಿಲುಕೋಸು ಪಲ್ಯವನ್ನು ಅನ್ನ ಮತ್ತು ಚಪಾತಿ ಜೊತೆ ಸವಿಯಿರಿ.   

ಸಲಹೆಗಳು :

1) ಹುಣಸೆ ಹಣ್ಣಿನ ಬದಲು 1 ಚಮಚದಷ್ಟು ವಾಟೆ ಪುಡಿ / ಅಮ್ಚೂರ್ ಪುಡಿಯನ್ನು ನವಿಲು ಕೋಸನ್ನು ಬೇಯಿಸುವಾಗ ಹಾಕಬಹುದು. 

2) ಮತ್ತೊಂದು ಸರಳ ವಿಧಾನ:  ಎಣ್ಣೆ, ಉದ್ದಿನ ಬೇಳೆ, ಸಾಸಿವೆ, ಕರಿಬೇವು, ಅರಿಶಿನ, ಹೆಚ್ಚಿದ ಈರುಳ್ಳಿ, ಹಸಿಮೆಣಸಿನ ಒಗ್ಗರಣೆ ಮಾಡಿ ಸಣ್ಣಗೆ ಹೆಚ್ಚಿದ ನವಿಲು ಕೋಸು, ಉಪ್ಪು, ಹುಳಿ ಮತ್ತು ನೀರು ಹಾಕಿ ಬೇಯಿಸಿ ತೆಂಗಿನ ತುರಿ ಉದುರಿಸಿ ಪಲ್ಯ ಮಾಡಬಹುದು. 

ಮೊಸರು ಬೆಂಡೆ ಮಸಾಲಾ:

ಸಾಮಗ್ರಿಗಳು :

ಹೆಚ್ಚಿದ ಬೆಂಡೆಕಾಯಿ : 1.5 ಕಪ್, (ಚಿತ್ರದಲ್ಲಿ ತೋರಿಸಿದಂತೆ ಅಥವಾ ಉದ್ದುದ್ದ ಹೆಚ್ಚಿಕೊಳ್ಳಬಹುದು)

ಸಣ್ಣಗೆ ಹೆಚ್ಚಿದ ಈರುಳ್ಳಿ : 1/2 ಕಪ್,

ಸಣ್ಣಗೆ ಹೆಚ್ಚಿದ ಟೊಮೇಟೊ: 3/4 ಕಪ್,

ಮೊಸರು: 1/2 ಕಪ್ (ಹುಳಿ ಇರಬಾರದು), 

ಎಣ್ಣೆ: 2-3 ಟೇಬಲ್ ಚಮಚ,

ಜೀರಿಗೆ: 1/4 ಟೇಬಲ್ ಚಮಚ,

ಸಾಸಿವೆ: 1/4 ಟೇಬಲ್ ಚಮಚ,  

ಉದ್ದಿನ ಬೇಳೆ: 1/4 ಟೇಬಲ್ ಚಮಚ,

ಒಣ  ಮೆಣಸಿನ ಕಾಯಿ: 1,

ಕರಿ ಬೇವು: 5-6 ಎಲೆಗಳು,

ಒಣ ಮೆಣಸಿನ ಪುಡಿ: 1/2 ಟೇಬಲ್ ಚಮಚ (ನಿಮ್ಮ ಖಾರಕ್ಕೆ ತಕ್ಕಂತೆ),

ಗರಂ ಮಸಾಲಾ ಪುಡಿ: 1/4 ಟೇಬಲ್ ಚಮಚ,

ಅರಿಶಿನ ಪುಡಿ: 1/4 ಟೀ ಚಮಚ,

ಉಪ್ಪು: ರುಚಿಗೆ ತಕ್ಕಷ್ಟು. 

ರುಬ್ಬಲು ಸಾಮಗ್ರಿಗಳು:

ತೆಂಗಿನ ತುರಿ: 1/2 ಕಪ್,

ಗೋಡಂಬಿ: 5-6 

ವಿಧಾನ:

ತೆಂಗಿನ ತುರಿ & ಗೋಡಂಬಿ ಸೇರಿಸಿ ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ಬಾಣಲೆಗೆ 2 ಚಮಚ ಎಣ್ಣೆ ಹಾಕಿ ಹೆಚ್ಚಿಕೊಂಡ ಬೆಂಡೆ ಕಾಯಿ ಹಾಕಿ ಅದು ಸ್ವಲ್ಪ ಗರಿಯಾಗುವ ತನಕ (ಬೇಯುವ ತನಕ) ಹುರಿದು ಟಿಶ್ಯೂ ಪೇಪರ್ ಮೇಲೆ ಹರವಿಡಿ. 

ಅದೇ ಬಾಣಲೆಯಲ್ಲಿ ಉಳಿದ ಎಣ್ಣೆಗೆ ಇನ್ನೊಂದು ಚಮಚ ಎಣ್ಣೆ ಬೇಕಿದ್ದಲ್ಲಿ ಸೇರಿಸಿ ಕಾದ ಮೇಲೆ ಉದ್ದಿನ ಬೇಳೆ, ಜೀರಿಗೆ, ಸಾಸಿವೆ ಒಗ್ಗರಣೆ ಮಾಡಿ ಅದಕ್ಕೆ ಕತ್ತರಿಸಿದ ಒಣ ಮೆಣಸು, ಕರಿಬೇವು ಹಾಕಿ ಕಲಕಿ. ಇದಕ್ಕೆ ಹೆಚ್ಚಿದ ಈರುಳ್ಳಿ ಹಾಕಿ 2-3 ನಿಮಿಷ ಫ್ರೈ ಮಾಡಿ. ನಂತರ ಹೆಚ್ಚಿದ ಟೊಮೇಟೊ ಹಾಕಿ ಸ್ವಲ್ಪ ಫ್ರೈ ಮಾಡಿ ಇದಕ್ಕೆ ಒಣ ಮೆಣಸಿನ ಪುಡಿ, ಅರಿಶಿನ ಪುಡಿ ಹಾಕಿ ಕಲಕಿ, ರುಬ್ಬಿದ ಮಿಶ್ರಣ ಮತ್ತು ಉಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಮಧ್ಯಮ ಉರಿಯಲ್ಲಿ 2-3 ನಿಮಿಷ ಕುದಿಸಿ. ಮೊಸರಿಗೆ ಸ್ವಲ್ಪ ನೀರು ಬೆರೆಸಿ ಚೆನ್ನಾಗಿ ಮಿಕ್ಸ್ ಮಾಡಿಕೊಂಡು ಕುದಿಯುತ್ತಿರುವ ಮಿಶ್ರಣಕ್ಕೆ ಹಾಕಿ ಸಣ್ಣ ಉರಿಯಲ್ಲಿ 1 ನಿಮಿಷ ಬಿಡದೇ ಕಲಕುತ್ತಿರಿ. ನಂತರ ಇದಕ್ಕೆ ಹುರಿದಿಟ್ಟ ಬೆಂಡೆ ಹೋಳುಗಳನ್ನು ಹಾಕಿ 1-2 ನಿಮಿಷ ಕುದಿಸಿದರೆ ಮೊಸರು - ಬೆಂಡೆ  ಮಸಾಲಾ ಸಿದ್ಧ. ಇದನ್ನು ಬಿಸಿ ಬಿಸಿಯಾಗಿ ಚಪಾತಿ/ಪುಲ್ಕಾ, ಪೂರಿ ಜೊತೆ ಸರ್ವ್ ಮಾಡಿ. 

 

ಸ್ವೀಟ್ ಕಾರ್ನ್ ಪಾಲಕ್ ಸಬ್ಜಿ :

ಸಾಮಗ್ರಿಗಳು : 

ಸ್ವೀಟ್ ಕಾರ್ನ್ : 1 ಕಪ್,

ಧನಿಯ ಪುಡಿ : 1 ಟೇಬಲ್ ಚಮಚ,

ಜೀರಿಗೆ ಪುಡಿ : 1 ಟೇಬಲ್ ಚಮಚ,

ಅರಿಶಿನ ಪುಡಿ : 1/4 ಟೀ ಚಮಚ,

ಗರಂ ಮಸಾಲಾ ಪುಡಿ : 1/4 ಟೇಬಲ್ ಚಮಚ,

ತುಪ್ಪ : 1 ಟೇಬಲ್ ಚಮಚ,

ಹಾಲು: 1/2 ಕಪ್,

ಉಪ್ಪು : ರುಚಿಗೆ,

ಈರುಳ್ಳಿ : 2 

ಟೊಮೇಟೊ : 2 

ಪಾಲಕ್ ಪ್ಯೂರಿಗೆ ಬೇಕಾಗುವ ಸಾಮಗ್ರಿಗಳು:

ಹೆಚ್ಚಿದ ಪಾಲಕ್ ಸೊಪ್ಪು : 1 ಕಪ್,

ಕಸೂರಿ ಮೇಥಿ : 1 ಟೀ ಚಮಚ,

ಸಕ್ಕರೆ : 1/2 ಟೇಬಲ್ ಚಮಚ,

ಹೆಚ್ಚಿದ ಕೊತ್ತಂಬರಿ ಸೊಪ್ಪು: 2-3 ಟೇಬಲ್ ಚಮಚ,

ಬೆಳ್ಳುಳ್ಳಿ : 4-5 ಎಸಳು,

ಶುಂಠಿ : 1 ಇಂಚು,  

ಹಸಿ ಮೆಣಸಿನ ಕಾಯಿ: 2-3 

ವಿಧಾನ :

ಒಂದು ಪಾತ್ರೆಗೆ ಹೆಚ್ಚಿದ ಪಾಲಕ್ ಸೊಪ್ಪು, ಕಸೂರಿ ಮೇಥಿ, ಸಕ್ಕರೆ ಹಾಕಿ, ಅರ್ಧ ಕಪ್  ನೀರು ಹಾಕಿ ಬೇಯಿಸಿಕೊಂಡು ಮಿಶ್ರಣ ತಣ್ಣಗಾಗಲು ಬಿಡಿ. ಈರುಳ್ಳಿ ಮತ್ತು ಟೊಮೇಟೊವನ್ನು ಬೇರೆ ಬೇರೆ ಹೆಚ್ಚಿಕೊಂಡು  ಒಂದಾದ ಮೇಲೆ ಒಂದರಂತೆ ಬೇರೆ ಬೇರೆಯಾಗಿಯೇ ನೀರು ಹಾಕದೇ ಮಿಕ್ಸಿಗೆ ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ಈರುಳ್ಳಿ ಪೇಸ್ಟ್ ಮತ್ತು ಟೊಮೇಟೊ ಪೇಸ್ಟ್ ತಯಾರಾಯಿತು. ನಂತರ ತಣ್ಣಗಾದ ಪಾಲಕ್ ಮಿಶ್ರಣಕ್ಕೆ 'ಪಾಲಕ್ ಪ್ಯೂರಿ ಸಾಮಗ್ರಿ'ಗಳಲ್ಲಿರುವ ಉಳಿದ ಸಾಮಗ್ರಿಗಳನ್ನು ಹಾಕಿ ಮಿಕ್ಸಿಗೆ ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ.

ಸ್ವೀಟ್ ಕಾರ್ನ್ ಗೆ ನೀರು ಹಾಕಿ ಸ್ವಲ್ಪ ಉಪ್ಪು ಹಾಕಿ 80% ನಷ್ಟು ಬೇಯಿಸಿಕೊಳ್ಳಿ.  ಈಗ ಬಾಣಲೆಗೆ ತುಪ್ಪ ಹಾಕಿ ಕಾದ ನಂತರ ಈರುಳ್ಳಿ ಪೇಸ್ಟ್ ಹಾಕಿ ಸಣ್ಣ ಉರಿಯಲ್ಲಿ ಒಂದು ನಿಮಿಷ ಫ್ರೈ ಮಾಡಿ. ನಂತರ ಟೊಮೇಟೊ ಪೇಸ್ಟ್ ಹಾಕಿ ಒಂದು ನಿಮಿಷ ಫ್ರೈ ಮಾಡಿ. ಈಗ ಅರಿಶಿನ ಪುಡಿ, ಧನಿಯಾ ಪುಡಿ, ಜೀರಿಗೆ ಪುಡಿ, ಗರಂ ಮಸಾಲ ಪುಡಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಒಂದು ನಿಮಿಷ ಫ್ರೈ ಮಾಡಿ. ನಂತರ ರುಬ್ಬಿದ ಪಾಲಕ್ ಮಿಶ್ರಣ (ಪಾಲಕ್ ಪ್ಯೂರಿ) ಹಾಕಿ 2-3 ನಿಮಿಷ ಸಣ್ಣ ಉರಿಯಲ್ಲಿ ಫ್ರೈ ಮಾಡಿ (ನೀರು ಹಾಕಬೇಡಿ). ಈಗ ಉಪ್ಪು ಮತ್ತು ಹಾಲು ಹಾಕಿ 2-3 ನಿಮಿಷ ಫ್ರೈ ಮಾಡಿ ಬೇಯಿಸಿದ ಕಾರ್ನ್ ಹಾಕಿ 1-2 ನಿಮಿಷ ಫ್ರೈ ಮಾಡಿದರೆ ರುಚಿಯಾದ ಸ್ವೀಟ್ ಕಾರ್ನ್ ಪಾಲಕ್ ಪರೋಟ, ಚಪಾತಿ ಅಥವಾ ಪುಲ್ಕಾ ಜೊತೆ ಸವಿಯಲು ಸಿದ್ಧ.... 

ಸಲಹೆ: 1) ಇದೇ ತರಹ ಸ್ವೀಟ್ ಕಾರ್ನ್ ಬದಲು ಹಸಿ ಬಟಾಣಿ ಹಾಕಿ 'ಪಾಲಕ್ ಮಟರ್' ಮಾಡಬಹುದು. ಎರಡಕ್ಕೂ ಗ್ರೇವಿ ಒಂದೇ ಇರುತ್ತದೆ. ಕಾಳುಗಳು ಮಾತ್ರ ಬೇರೆ ಬೇರೆ....   

ಅಡುಗೆಗೊಂದು ಸಲಹೆ :  ಯಾವುದೇ ಸೊಪ್ಪನ್ನು ಬೇಯಿಸುವಾಗ ಅದಕ್ಕೆ ಪ್ಲೇಟ್ ಮುಚ್ಚದೇ ಹಾಗೆಯೇ ಬೇಯಿಸಿದರೆ ಸೊಪ್ಪಿನ ಹಸಿರು ಬಣ್ಣ ಹಾಗೆಯೇ ಇರುತ್ತದೆ. 

ಕ್ಯಾಪ್ಸಿಕಂ - ಶೇಂಗಾ ಸಬ್ಜಿ :

ಸಾಮಗ್ರಿಗಳು: 

ಕ್ಯಾಪ್ಸಿಕಂ - 2 (ದೊಡ್ಡದು),

ಶೇಂಗಾ (ಕಡ್ಲೆ ಕಾಯಿ) - 1/4 ಕಪ್,

ಬಿಳಿ ಎಳ್ಳು - 2 ಟೀ ಚಮಚ, 

ಜೀರಿಗೆ - 2 ಟೀ ಚಮಚ,

ಎಣ್ಣೆ - 3-4 ಟೇಬಲ್ ಚಮಚ,

ಹುಣಸೆ ರಸ - 1 ಟೇಬಲ್ ಚಮಚ,

ಅರಿಶಿನ ಪುಡಿ - 1/2 ಟೀ ಚಮಚ,

ಅಚ್ಚ ಮೆಣಸಿನ ಪುಡಿ - 1 ಟೀ ಚಮಚ,

ಧನಿಯಾ ಪುಡಿ - 1.5 ಟೀ ಚಮಚ,

ಜೀರಿಗೆ ಪುಡಿ - 1.5 ಟೀ ಚಮಚ,

ಸಾಸಿವೆ - 1 ಟೀ ಚಮಚ,

ಮೆಂತ್ಯ ಕಾಳು - 1/2 ಟೀ ಚಮಚ,
ಉಪ್ಪು - ರುಚಿಗೆ 

ಮಸಾಲೆಗೆ ಬೇಕಾಗುವ ಸಾಮಗ್ರಿಗಳು:

ಈರುಳ್ಳಿ - 1 (ದೊಡ್ಡದು),

ಟೊಮೇಟೊ - 3 (ಮಧ್ಯಮ ಗಾತ್ರ),

ಶುಂಠಿ - 1 ಇಂಚು,

ಬೆಳ್ಳುಳ್ಳಿ - 5-6 ಎಸಳು,

ತೆಂಗಿನ ತುರಿ - 2-3 ಟೇಬಲ್ ಚಮಚ

ವಿಧಾನ : ಒಂದು ಬಾಣಲೆಗೆ ಶೇಂಗಾ ಹಾಕಿ ಹುರಿಯಿರಿ. ಅದು ಹುರಿಯುತ್ತಾ ಬಂತು ಎನ್ನುವಾಗ ಜೀರಿಗೆ ಹಾಕಿ. ಜೀರಿಗೆ ಚಿಟಪಟಾಯಿಸಿದಾಗ ಎಳ್ಳು ಹಾಕಿ ಉರಿ ಆರಿಸಿ, ತಣ್ಣಗಾಗಲು ಬಿಡಿ. ಕ್ಯಾಪ್ಸಿಕಂ ಅನ್ನು ಉದ್ದುದ್ದ ಅಥವಾ ನಿಮಗೆ ಬೇಕಾದ ಅಳತೆಯಲ್ಲಿ ಹೆಚ್ಚಿಕೊಳ್ಳಿ. 

ಬಾಣಲೆಯಲ್ಲಿರುವ ಶೇಂಗಾ ಮಿಶ್ರಣವನ್ನು ಮಿಕ್ಸಿಗೆ ಹಾಕಿ ನೀರು ಹಾಕದೇ ತರಿ ತರಿಯಾಗಿ ಪುಡಿ ಮಾಡಿ. ಅದೇ ಬಾಣಲೆಗೆ 2 ಚಮಚ ಎಣ್ಣೆ ಹಾಕಿ ಹೆಚ್ಚಿದ ಕ್ಯಾಪ್ಸಿಕಂ ಹಾಕಿ, ಸ್ವಲ್ಪ ಉಪ್ಪು ಹಾಕಿ 2-3 ನಿಮಿಷ ಸಣ್ಣ ಉರಿಯಲ್ಲಿ ಫ್ರೈ ಮಾಡಿ. ಇದನ್ನು ಒಂದು ತಟ್ಟೆಗೆ ಹಾಕಿಕೊಳ್ಳಿ. ನಂತರ ಮಸಾಲೆ ಸಾಮಗ್ರಿಗಳೆಲ್ಲವನ್ನು ಮಿಕ್ಸಿಗೆ ಹಾಕಿ ನೀರು ಹಾಕದೆ ನುಣ್ಣಗೆ ರುಬ್ಬಿಕೊಳ್ಳಿ. 

ಅದೇ ಬಾಣಲೆಯನ್ನು ಒಲೆಯ ಮೇಲಿಟ್ಟು ಉಳಿದ ಎಣ್ಣೆ ಹಾಕಿ ಕಾದ ನಂತರ ಮೆಂತ್ಯ ಕಾಳು, ಜೀರಿಗೆ, ಸಾಸಿವೆ ಹಾಕಿ ಅದು ಸಿಡಿದ ಮೇಲೆ ರುಬ್ಬಿದ ಮಸಾಲೆ ಹಾಕಿ ಹಸಿ ವಾಸನೆ ಹೋಗುವ ತನಕ ಹುರಿಯಿರಿ. ನಂತರ ಇದಕ್ಕೆ ಅಚ್ಚ ಮೆಣಸಿನ ಪುಡಿ, ಅರಿಶಿನ ಪುಡಿ, ಧನಿಯಾ ಪುಡಿ, ಜೀರಿಗೆ ಪುಡಿ, ಉಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ, ಪುಡಿ ಮಾಡಿದ ಶೇಂಗಾ ಮಿಶ್ರಣ ಹಾಕಿ ಒಂದು ನಿಮಿಷ ಬೇಯಿಸಿ. ನಂತರ ಹುಣಸೆ ರಸ, ಒಂದು ಕಪ್ ನೀರು (ಗ್ರೇವಿ ಎಷ್ಟು ತೆಳ್ಳಗೆ ಬೇಕು ಅಷ್ಟು ನೀರು) ಹಾಕಿ ಮುಚ್ಚಿ 1-2 ನಿಮಿಷ ಕುದಿಸಿ. ಇದು ಚೆನ್ನಾಗಿ ಕುದಿಯುತ್ತಿರುವಾಗ ಫ್ರೈ ಮಾಡಿ ಇಟ್ಟುಕೊಂಡ ಕ್ಯಾಪ್ಸಿಕಂ ಹಾಕಿ, ಬೇಕಿದ್ದರೆ ಸ್ವಲ್ಪ ನೀರು ಹಾಕಿ ಕುದಿಸಿ ಸ್ಟವ್ ಆರಿಸಿ. 

ಬಿಸಿ ಬಿಸಿ ಕ್ಯಾಪ್ಸಿಕಂ - ಶೇಂಗಾ ಸಬ್ಜಿಯನ್ನು ಚಪಾತಿ / ಪುಲ್ಕಾ / ಜೋಳದ ರೊಟ್ಟಿ / ದೋಸೆ ಜೊತೆ ಸವಿಯಿರಿ. ಅನ್ನದ ಜೊತೆ ಕೂಡ ಒಳ್ಳೆಯ ಕಾಂಬಿನೇಶನ್....!  

ಸೂಚನೆ : ಕ್ಯಾಪ್ಸಿಕಂ ಅನ್ನು ಎಣ್ಣೆಯಲ್ಲಿ ಫ್ರೈ ಮಾಡಿ ಕೊನೆಯಲ್ಲಿ ಸೇರಿಸುವುದರಿಂದ ತಿನ್ನುವಾಗ crispy ಅನುಭವ ಆಗುತ್ತದೆ.     

ಸೌಂದರ್ಯ ಸಲಹೆ: ಮೊಡವೆ ತೊಂದರೆ ಇರುವವರು ice cubes ನಿಂದ ದಿನಾಲೂ ಸ್ವಲ್ಪ ಹೊತ್ತು ಮಸಾಜ್ ಮಾಡುತ್ತಿದ್ದರೆ ಮೊಡವೆಗಳು ಕಮ್ಮಿ ಆಗಿ ಮುಖ ನಯವಾಗುತ್ತದೆ.  

ಬೆಂಡೆ ಮಸಾಲಾ :

ಬೇಕಾಗುವ ಸಾಮಗ್ರಿಗಳು : ಬೆಂಡೆ ಕಾಯಿ 15 - 20 , ಎಣ್ಣೆ - 6 ಚಮಚ,  ಜೀರಿಗೆ - 1  ಚಮಚ, ಕೊತ್ತಂಬರಿ -3 ಚಮಚ, ಅಚ್ಚ ಮೆಣಸಿನ ಪುಡಿ - 1  ಚಮಚ, ತೆಂಗಿನ ತುರಿ - 1/2  ಕಪ್, ಹಸಿ ಮೆಣಸಿನ ಕಾಯಿ 2  -3,  ಬೆಳ್ಳುಳ್ಳಿ - 5  ಎಸಳು, ಶುಂಟಿ ಅರ್ಧ ಇಂಚು, ಕರಿಬೇವು 6-7 ಎಲೆಗಳು, ಬೆಲ್ಲ ಸ್ವಲ್ಪ (1-2 ಚಮಚ), ವಾಟೆ ಪುಡಿ ( or amchoor powder) ಅಥವಾ ನಿಂಬೆ ರಸ - 1 ಚಮಚ, ಅರಿಶಿನ ಪುಡಿ- 3-4 ಚಿಟಿಕೆ.

 ಮಾಡುವ ವಿಧಾನ: ಬೆಂಡೆಕಾಯಿಯನ್ನು ತೊಳೆದು ನೀರು ಒರೆಸಿಕೊಂಡು ಸಿಗಿದು ಅರ್ಧ ಇಂಚು ಉದ್ದಕ್ಕೆ ಹೆಚ್ಚಿಕೊಳ್ಳಿ.  ಚಿಕ್ಕ ಒಗ್ಗರಣೆ ಪಾತ್ರೆಗೆ 2  ಚಮಚ ಎಣ್ಣೆ ಹಾಕಿ ಕಾದ ನಂತರ ಜೀರಿಗೆ , ಕೊತ್ತಂಬರಿ ಹಾಗೂ  ಕರಿಬೇವು ಹಾಕಿ ಹುರಿದುಕೊಳ್ಳಿ. ಮಿಕ್ಸರ್ ಗೆ  ಅಚ್ಚ ಮೆಣಸಿನ ಪುಡಿ, ಶುಂಟಿ, ಬೆಳ್ಳುಳ್ಳಿ, ಹಸಿ ಮೆಣಸಿನ ಕಾಯಿ , ತೆಂಗಿನ ತುರಿ,  ಹುರಿದುಕೊಂಡ ಮಿಶ್ರಣ, ಸ್ವಲ್ಪ ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ನಂತರ ಬಾಣೆಲೆಗೆ  4  ಚಮಚ ಎಣ್ಣೆ ಹಾಕಿ , ಕಾದ ನಂತರ ಹೆಚ್ಚಿದ ಬೆಂಡೆ ಕಾಯಿ, ಉಪ್ಪು, ವಾಟೆ ಪುಡಿ ಅಥವಾ ಲಿಂಬೆ ರಸ ಹಾಕಿ ಲೋಳೆ ಬಿಡುವ ತನಕ ಚೆನ್ನಾಗಿ ಹುರಿಯಿರಿ. ನಂತರ ಅರಿಶಿನ ಪುಡಿ, ರುಬ್ಬಿದ ಮಿಶ್ರಣ, ಉಪ್ಪು, ಸ್ವಲ್ಪ ಬೆಲ್ಲ ಹಾಗೂ ನೀರು ಹಾಕಿ ಕುದಿಸಿ (ಗಟ್ಟಿ ಸಾಂಬಾರ್ ಹದಕ್ಕೆ ನೀರು ಹಾಕಿದರೆ ಸಾಕು). ಬಿಸಿ ಬಿಸಿ ಅನ್ನದ ಜೊತೆ ಬೆಂಡೆ ಮಸಾಲಾ ಸವಿದು ನೋಡಿ. ಚಪಾತಿ / ರೋಟಿ ಜೊತೆ ಕೂಡ ಚೆನ್ನಾಗಿರುತ್ತದೆ.