ಶಾಲೆಗೆ ಹೋಗುವ, ಹೊರಗಡೆ ಆಡಿ ಕುಣಿಯುವ ಮಕ್ಕಳಿಗೆ ಪದೇ ಪದೇ ಹಸಿವಾಗುವುದು ಸಹಜ. ಸಣ್ಣ ಪುಟ್ಟ ಹಸಿವುಗಳಿಗೆ ಬಿಸ್ಕಿಟ್, ಚೊಕೊಲೇಟ್, ಬೇಕರಿ ಆಹಾರ, ಜಂಕ್ ಫುಡ್ ಕೊಟ್ಟು ಮಕ್ಕಳ ಆರೋಗ್ಯ ಹಾಳು ಮಾಡದಿರಿ...! ಮಕ್ಕಳಿಗೆ ತಿಂಡಿ ಮಾಡಿಕೊಡಲು ಸಮಯವೇ ಇಲ್ಲದ ಈಗಿನ ಕಾಲಕ್ಕೆ ಐದೇ ನಿಮಿಷಕ್ಕೆ ತಯಾರಿಸುವ ಈ ಅವಲಕ್ಕಿ ಮಾಡಿ ನೋಡಿ. ರುಚಿಯಾದ ಚಟ್ನಿಪುಡಿ ಇದ್ದಷ್ಟೂ ಅವಲಕ್ಕಿಗೆ ರುಚಿ ಜಾಸ್ತಿ...!
ಸಾಮಗ್ರಿಗಳು :
ಪೇಪರ್ ಅವಲಕ್ಕಿ 2-3 ಮುಷ್ಠಿ
ತೆಂಗಿನ ತುರಿ 1/2 ಕಪ್
ಸಕ್ಕರೆ 2 ಚಮಚ
ಚಟ್ನಿ ಪುಡಿ 2 ಚಮಚ (ಕೊಬ್ಬರಿ, ಕಡ್ಲೆಬೇಳೆ ಚಟ್ನಿಪುಡಿ ಆದರೆ ರುಚಿ ಜಾಸ್ತಿ)
ಉಪ್ಪು ಚಿಟಿಕೆ
ವಿಧಾನ :
ಪೇಪರ್ ಅವಲಕ್ಕಿಯನ್ನು ಒಂದು ಬೌಲ್ ಗೆ ಹಾಕಿ. ತೆಂಗಿನ ತುರಿಗೆ ಉಪ್ಪು, ಸಕ್ಕರೆ, 4-5 ಚಮಚ ನೀರು ಹಾಕಿ ಚೆನ್ನಾಗಿ ಕಲಸಿ. ಇದಕ್ಕೆ ಚಟ್ನಿಪುಡಿ ಹಾಕಿ ಕಲಸಿ. ಚಟ್ನಿಪುಡಿಗೆ ಉಪ್ಪು ಇರುವುದರಿಂದ ನೋಡಿಕೊಂಡು ಬೇಕಿದ್ದಲ್ಲಿ ಮಾತ್ರ ಹಾಕಿ. (ನಿಮ್ಮನೆ ಚಟ್ನಿಪುಡಿ ತುಂಬಾ ಖಾರವಿದ್ದರೆ ಸ್ವಲ್ಪ ಕಮ್ಮಿ ಹಾಕಿ. ಮಕ್ಕಳಿಗೆ ಖಾರವಾಗಬಹುದು) ನಂತರ ಇದನ್ನು ಅವಲಕ್ಕಿಗೆ ಹಾಕಿ ಚೆನ್ನಾಗಿ ಕಲಸಿ. ಬೇಕಿದ್ದಲ್ಲಿ ಮತ್ತೆ ಒಂದೆರಡು ಚಮಚ ನೀರು ಹಾಕಿ ಕಲಸಿ. ಧಿಡೀರ್ ಅವಲಕ್ಕಿ ಆಡುವ ಮಕ್ಕಳ ಸಣ್ಣ ಸಣ್ಣ ಹಸಿವನ್ನು ನೀಗಿಸಲು ಸಿದ್ಧ...!
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ