ರವೆ ಸಂಡಿಗೆ :

ಸಾಮಗ್ರಿಗಳು:

ಉಪ್ಪಿಟ್ಟಿನ ರವೆ / ಸೂಜಿ ರವೆ : 1ಕಪ್ 

ನೀರು : 8 ಕಪ್ 

ಉಪ್ಪು : 1 ಚಮಚ 

ಹಸಿಮೆಣಸಿನ ಕಾಯಿ : 7-8

ಜೀರಿಗೆ : 1/2  ಚಮಚ

ಇಂಗು :1/2 ಚಮಚ 

ವಿಧಾನ :

ದೊಡ್ಡ ಪಾತ್ರೆಯಲ್ಲಿ 8 ಕಪ್ ನೀರು ಹಾಕಿ ಕುದಿಯಲು ಇಡಿ. ಹಸಿಮೆಣಸು ಮತ್ತು ಜೀರಿಗೆ ಪೇಸ್ಟ್ ಮಾಡಿಕೊಳ್ಳಿ. ಜೀರಿಗೆ ತರಿ ತರಿ ಇದ್ದರೂ ಆಯಿತು.

 ನೀರು ಕುದಿಯಲು ಶುರು ಆದ ಮೇಲೆ ರವೆ, ಉಪ್ಪು, ಇಂಗು ಹಾಕಿ ರವೆ ಗಂಟಾಗದಂತೆ ಮಧ್ಯಮ ಉರಿಯಲ್ಲಿ ಚೆನ್ನಾಗಿ ಕಲಕುತ್ತಿರಿ. ಸ್ವಲ್ಪ ದಪ್ಪ ಗಂಜಿಯಷ್ಟು ಗಟ್ಟಿಯಾದ ಮೇಲೆ ಉರಿ ಆರಿಸಬೇಕು.

 ಒಂದು ಚಮಚದಲ್ಲಿ ಮಿಶ್ರಣವನ್ನು ತೆಗೆದುಕೊಂಡು ತಟ್ಟೆಗೆ ಹಾಕಿದರೆ ಅದು ಹರಿದುಕೊಂಡು ಹೋಗದಷ್ಟು ಗಟ್ಟಿ ಇದ್ದರೆ ಸಾಕು. ತುಂಬಾ ದಪ್ಪಗಾದರೂ ಚೆನ್ನಾಗಿರುವುದಿಲ್ಲ. ತಣ್ಣಗಾದಂತೆ ಇನ್ನೂ ಗಟ್ಟಿಯಾಗುತ್ತಾ ಬರುತ್ತದೆ. ಒಂದು ಪ್ಲಾಸ್ಟಿಕ್ ಶೀಟ್ ಅನ್ನು ಬಿಸಿಲಿನಲ್ಲಿ ಹರವಿಕೊಂಡು ಹಾರಿ ಹೋಗದಂತೆ ಸುತ್ತಲೂ ಕಲ್ಲು ಇಡಿ. ಈಗ ಒಂದು ಬೌಲ್ ನಲ್ಲಿ ರವೆ  ಮಿಶ್ರಣವನ್ನು ತೆಗೆದುಕೊಂಡು ಒಂದು ಚಮಚದಿಂದ ಸಂಡಿಗೆ ಹಾಕುತ್ತಾ ಬನ್ನಿ.

 ಒಂದು ಅಥವಾ ಎರಡು ದಿನಕ್ಕೆ ಪೂರ್ತಿ ಒಣಗಿ ಪ್ಲಾಸ್ಟಿಕ್ ಬಿಡುತ್ತದೆ. ನಂತರ ಸಂಡಿಗೆಯನ್ನು ಪ್ಲಾಸ್ಟಿಕ್ ನಿಂದ ಬಿಡಿಸಿ ಒಂದು ಅಗಲವಾದ ತಟ್ಟೆಗೆ ಹಾಕಿ ಇನ್ನೊಂದು ದಿನ ಬಿಸಿಲಿನಲ್ಲಿ ಇಡಿ.

 ಗರಿ ಗರಿಯಾಗಿ ಒಣಗಿದ ಸಂಡಿಗೆಯನ್ನು ವರ್ಷದವರೆಗೆ ಗಾಳಿಯಾಡದ ಡಬ್ಬಿಯಲ್ಲಿ ಶೇಖರಿಸಿಡಬಹುದು. ಬೇಕಾದಾಗ ಕಾದ ಎಣ್ಣೆಯಲ್ಲಿ ಕರಿದು, ಬಿಸಿ ಬಿಸಿ ಅನ್ನ - ಸಾರು / ತೊವ್ವೆ ಜೊತೆ ಸವಿಯಬಹುದು.  

 

ಸಲಹೆ : ಹಸಿಮೆಣಸಿನ ಪೇಸ್ಟ್ ಬದಲು ಅಚ್ಚ ಖಾರದ ಪುಡಿಯನ್ನೂ ಬಳಸಬಹುದು ಮತ್ತು ಇಂಗು ಹಾಕುವ ಬದಲು ಬೆಳ್ಳುಳ್ಳಿ ಪೇಸ್ಟ್ ಕೂಡ ಹಾಕಬಹುದು. 

ಶಾಬಕ್ಕಿ/ಸಬ್ಬಕ್ಕಿ ಸ೦ಡಿಗೆ:

ಸಾಮಗ್ರಿಗಳು: ಶಾಬಕ್ಕಿ/ಸಬ್ಬಕ್ಕಿ - 100 ಗ್ರಾ೦, ಉಪ್ಪು, ಜೀರಿಗೆ - 1/2 ಚಮಚ.

ವಿಧಾನ : ಶಾಬಕ್ಕಿಯನ್ನು ತೊಳೆದು 5-6 ತಾಸು ನೀರಿನಲ್ಲಿ ನೆನೆಸಿಡಿ. ನೆನೆಸಿದ ಶಾಬಕ್ಕಿಯನ್ನು ಕುಕ್ಕರ್ ಗೆ ಹಾಕಿ 3-4 ವಿಶಲ್ ಕೂಗಿಸಿ, ಬಿಸಿ ಆರಿದ ಮೇಲೆ ಉಪ್ಪು, ಜೀರಿಗೆ ಸೇರಿಸಿ. ಒ೦ದು ಪ್ಲಾಸ್ಟಿಕ್ ಶೀಟ್ ನಲ್ಲಿ ಈ ಮಿಶ್ರಣವನ್ನು ಸಣ್ಣ ಸಣ್ಣದಾಗಿ ಹಾಕಿ ಸಲ್ಪ ಹರಡಿ 2-3 ದಿನ ಬಿಸಿಲಿನಲ್ಲಿ ಒಣಗಿಸಿ. ಇದನ್ನು ಗಾಳಿಯಾಡದ ಡಬ್ಬಿಯಲ್ಲಿ ತು೦ಬಿಡಿ. ಬೇಕಾದಾಗ ಎಣ್ಣೆಯಲ್ಲಿ ಕರಿಯಿರಿ.

ಸೂಚನೆ: ಬೇಯಿಸಿದ ಶಾಬಕ್ಕಿಯನ್ನು ರುಬ್ಬಿ ಕೂಡ ಮಾಡಬಹುದು. (ಬೇಕಾದರೆ ಹಿಟ್ಟಿಗೆ 2 ಹಸಿಮೆಣಸನ್ನು ರುಬ್ಬಿ ಹಾಕಬಹುದು)

ಅಕ್ಕಿ ಹಪ್ಪಳ :

ಸಾಮಗ್ರಿಗಳು :

ದೋಸೆ ಅಕ್ಕಿ : ೧ ಕಿಗ್ರಾಂ,

ಸಬ್ಬಕ್ಕಿ : ೧/೪ ಕಿಗ್ರಾಂ,

ನೀರು & ಉಪ್ಪು

ಹಪ್ಪಳ ಒತ್ತಲು ಪ್ರೆಸ್ಸಿಂಗ್ ಮಷೀನ್ ಅಥವಾ ರೋಟಿ ಮೇಕರ್ ಬೇಕು. ಮತ್ತು ಹಪ್ಪಳ ಒಣಗಿಸಲು ದೊಡ್ಡ ಪ್ಲಾಸ್ಟಿಕ್ ಅಥವಾ ತೆಳ್ಳಗಿನ ಸಿಂಥೆಟಿಕ್ ಸೀರೆ ಆದರೂ ನಡೆದೀತು. 

ಮಸಾಲೆಗೆ ಸಾಮಗ್ರಿಗಳು :

ಹಸಿಮೆಣಸಿನ ಕಾಯಿ : ೧೦-೧೫,

ಜೀರಿಗೆ : ೨ ಚಮಚ,

ಇಂಗು : ೧/೪ ಚಮಚ

ವಿಧಾನ:

    ಅಕ್ಕಿಯನ್ನು ಚೆನ್ನಾಗಿ ತೊಳೆದು ನೆರಳಿನಲ್ಲಿ ಒಣಗಿಸಿಕೊಳ್ಳಿ. ನಂತರ ಇದಕ್ಕೆ ಸಬ್ಬಕ್ಕಿ ಸೇರಿಸಿ ಗಿರಣಿಯಲ್ಲಿ ನುಣ್ಣಗೆ ಹಿಟ್ಟು ಮಾಡಿಸಿಕೊಳ್ಳಿ.

    ಒಂದು ದಪ್ಪ ತಳದ, ದೊಡ್ಡ ಪಾತ್ರೆಯಲ್ಲಿ ೨.೫ - ೩ ಲೀಟರ್ ನಷ್ಟು ನೀರು ಹಾಕಿ ಕುದಿಸಿ. ಮಸಾಲೆ ಸಾಮಗ್ರಿಗಳನ್ನು ಮಿಕ್ಸಿಗೆ ಹಾಕಿ ಪೇಸ್ಟ್ ಮಾಡಿಕೊಳ್ಳಿ. ನೀರು ಚೆನ್ನಾಗಿ ಕುದಿಯುವಾಗ ರುಬ್ಬಿದ ಮಿಶ್ರಣ, ಉಪ್ಪು, ಅಕ್ಕಿ-ಸಬ್ಬಕ್ಕಿ ಹಿಟ್ಟು ಹಾಕಿ ೧೫-೨೦ ನಿಮಿಷ ಸಣ್ಣ ಉರಿಯಲ್ಲಿ, ಕಲಕುತ್ತಾ ಬೇಯಿಸಿ. ನೀರು ಆರಿ ಹಿಟ್ಟು ಗಟ್ಟಿಯಾಗಬೇಕು. ತಿಕ್ಕಿ ಉಂಡೆ ಮಾಡುವಷ್ಟು ಗಟ್ಟಿಯಾಗಬೇಕು. (ಕಮ್ಮಿ ನೀರು ಹಾಕಿ ಜಾಸ್ತಿ ಹೊತ್ತು ಬೇಯಿಸದಿದ್ದರೆ ಹಪ್ಪಳ ಕರಿದಾಗ ಚೆನ್ನಾಗಿ ಅರಳುವುದಿಲ್ಲ.) 

ಹಿಟ್ಟು ಸ್ವಲ್ಪ ತಣ್ಣಗಾದ ಮೇಲೆ ಕೈಗೆ ಸ್ವಲ್ಪ ಎಣ್ಣೆ ಸವರಿಕೊಂಡು ನೆಲ್ಲಿಕಾಯಿ ಗಾತ್ರದ ಹಿಟ್ಟು ತೆಗೆದುಕೊಂಡು ಚೆನ್ನಾಗಿ ತಿಕ್ಕಿ ತಿಕ್ಕಿ ಉಂಡೆ ಮಾಡಿಕೊಳ್ಳಿ. ತೊಳೆದ ಹಾಲಿನ ಕವರ್ ಕತ್ತರಿಸಿಕೊಂಡು, ಎಣ್ಣೆ ಸವರಿ ಒಂದನ್ನು ಪ್ರೆಸ್ಸಿಂಗ್ ಮಷೀನ್ ನಲ್ಲಿಟ್ಟು ಅದರ ಮೇಲೆ ಒಂದು ಉಂಡೆ ಇಟ್ಟು ಮೇಲಿಂದ ಇನ್ನೊಂದು ಪ್ಲಾಸ್ಟಿಕ್ ಇಟ್ಟು ಒತ್ತಿ.

ಹಪ್ಪಳ ಒಣಗಿಸುವ ಪ್ಲಾಸ್ಟಿಕ್/ ಬಟ್ಟೆ ಮೇಲೆ ಒಂದೊಂದಾಗಿ ಹಾಕುತ್ತಾ ಬನ್ನಿ. ಎಲ್ಲಾ ಮುಗಿದ ಮೇಲೆ ಬಿಸಿಲಿನಲ್ಲಿ ಒಣಗಿಸಿ. 

ಖಡಕ್ ಬಿಸಿಲಿದ್ದರೆ ಒಂದು ದಿನ ಒಣಗಿದರೆ ಸಾಕು. ಇದನ್ನು ಗಾಳಿ ಆಡದ ಡಬ್ಬದಲ್ಲಿ ತುಂಬಿಡಿ. ಒಂದು ವರ್ಷಕ್ಕೂ ಹೆಚ್ಚು ದಿನ ಕೆಡದಂತೆ ಇಡಬಹುದು. 

    ಊಟಕ್ಕೆ ಸಾಂಬಾರ್, ತೊವ್ವೆ, ತಿಳಿಸಾರು ಮಾಡಿದಾಗ ಕಾದ ಎಣ್ಣೆಯಲ್ಲಿ ಹಪ್ಪಳ ಕರಿದುಕೊಳ್ಳಿ.