ಗುರುವಾರ, ಡಿಸೆಂಬರ್ 19, 2013

ಮಿಶ್ರ ತರಕಾರಿ ಸಾಗು

ಇದು ತೀರ ಸರಳವಾದ ವಿಧಾನ. 2-3 ತರಕಾರಿಗಳು ಸ್ವಲ್ಪ ಸ್ವಲ್ಪವೇ ಉಳಿದು ಹೋದರೆ ಈ ಸಾಗು ಮಾಡಿ ಖಾಲಿ ಮಾಡಬಹುದು...!!  ಚಪಾತಿ ತಿನ್ನುವುದರಿಂದ ಕೆಲವರಿಗೆ ಮೈ ಉಷ್ಣವು ಹೆಚ್ಚಿ ಬಾಯಿಯಲ್ಲಿ ಗುಳ್ಳೆಗಳು ಆಗುತ್ತವೆ. ಅಂಥವರು ಈ ರೀತಿ ತರಕಾರಿ ಸಾಗು / ಪಲ್ಯಗಳನ್ನು ಚಪಾತಿಯ ಜೊತೆ ಜಾಸ್ತಿ ಸೇವಿಸಿದಲ್ಲಿ ದೇಹದ ಉಷ್ಣವನ್ನು ಸಮತೋಲನದಲ್ಲಿ ಇಟ್ಟುಕೊಳ್ಳಬಹುದು. 

ಸಾಮಗ್ರಿಗಳು : ಸಣ್ಣಗೆ ಹೆಚ್ಚಿದ ಹುರುಳಿ ಕಾಯಿ (Beans) - ಸೀಮೆ ಬದನೆ / ಸೀಮೆ ಸೌತೆಕಾಯಿ (ನಾಲಿಗೆ ಸೌತೆಕಾಯಿ)  - ಆಲೂಗಡ್ಡೆ - ಕ್ಯಾರೆಟ್  - ಎಲ್ಲಾ ಸೇರಿ 2 ಕಪ್,  ಅರಿಶಿನ ಪುಡಿ ಚಿಟಿಕೆ, ತೆಂಗಿನ ತುರಿ 1 ಕಪ್, ಜೀರಿಗೆ 1/4 ಚಮಚ, ಹುರಿಗಡಲೆ (ಪುಟಾಣಿ) 1.5 ಚಮಚ, ಹಸಿಮೆಣಸಿನಕಾಯಿ 2-3, ಹೆಚ್ಚಿದ ಕೊತ್ತಂಬರಿ ಸೊಪ್ಪು  2-3 ಟೇಬಲ್ ಚಮಚ, ಚಕ್ಕೆ 1/4 ಇಂಚು (optional), ನಿಂಬೆ ರಸ 1-2 ಚಮಚ, ಉಪ್ಪು ರುಚಿಗೆ, ಸಕ್ಕರೆ 1/4 ಚಮಚ, ಕರಿಬೇವಿನ ಎಲೆಗಳು 8-10. 

ವಿಧಾನ : ಸಣ್ಣಗೆ ಹೆಚ್ಚಿದ ತರಕಾರಿಗಳನ್ನು ಪಾತ್ರೆಗೆ ಹಾಕಿ, ಒಂದೆರಡು ಕಪ್ ನೀರು ಹಾಕಿ, ಚಿಟಿಕೆ ಅರಿಶಿನ ಹಾಕಿ ಬೇಯಿಸಿ. 75% ಬೆಂದ ಮೇಲೆ ಸ್ವಲ್ಪ ಉಪ್ಪು ಸೇರಿಸಿ ಬೇಯಿಸಿ. ತುಂಬಾ ಮೆತ್ತಗೆ ಬೇಯುವುದು ಬೇಡ. 

ಅದು ಬೇಯುವಷ್ಟರಲ್ಲಿ ಮಿಕ್ಸರ್-ಗೆ ತೆಂಗಿನ ತುರಿ, ಜೀರಿಗೆ, ಹುರಿಗಡಲೆ, ಹಸಿಮೆಣಸಿನ ಕಾಯಿ, ಕೊತ್ತಂಬರಿ ಸೊಪ್ಪು, ಬೇಕಿದ್ದಲ್ಲಿ ಸಣ್ಣ ಚಕ್ಕೆಯ ಚೂರು ಹಾಕಿ, ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. 


ತರಕಾರಿ ಬೆಂದ ಮೇಲೆ ಅದಕ್ಕೆ ರುಬ್ಬಿದ ಮಿಶ್ರಣ ಹಾಕಿ, ಉಪ್ಪು, ನಿಂಬೆರಸ, ಸಕ್ಕರೆ (optional), ಕರಿಬೇವು ಹಾಕಿ ನೀರು ಸೇರಿಸಿ ಕುದಿಸಿ (ಬೆಂದ ತರಕಾರಿ ಜೊತೆ ನೀರು ಇರುವುದರಿಂದ ನೋಡಿಕೊಂಡು ನೀರು ಸೇರಿಸಿ). ಪೂರಿ / ಚಪಾತಿ ಜೊತೆ ಸರ್ವ್ ಮಾಡಿ... 


    

ಸೂಚನೆ: ಈ ಸಾಗು ಖಾರ ಜಾಸ್ತಿ ಆದರೆ ಚೆನ್ನಾಗಿರುವುದಿಲ್ಲ. 

ಸೋಮವಾರ, ನವೆಂಬರ್ 25, 2013

ಅಕ್ಕಿ - ರಾಗಿ ತಾಳಿಪಿಟ್ಟು (ವಡಪೆ / ರೊಟ್ಟಿ)

ಸಾಮಗ್ರಿ: ಸೌತೆಕಾಯಿ 1 (ಮೀಡಿಯಂ ಗಾತ್ರದ್ದು), ಕ್ಯಾರೆಟ್ 1, ಅಕ್ಕಿ ಹಿಟ್ಟು 2-3 ಕಪ್, ರಾಗಿ ಹಿಟ್ಟು 2-3 ಚಮಚ, ತೆಂಗಿನ ತುರಿ 2-3 ಚಮಚ, ಹೆಚ್ಚಿದ ಕೊತ್ತಂಬರಿ ಸೊಪ್ಪು1 ಚಮಚ (optional), ಸಣ್ಣಗೆ ಹೆಚ್ಚಿದ ಕರಿಬೇವು 1/2 ಚಮಚ, ಅಚ್ಚ ಮೆಣಸಿನ ಪುಡಿ 1 ಚಮಚ, ಎಣ್ಣೆ ಸ್ವಲ್ಪ, ಉಪ್ಪು ರುಚಿಗೆ. 



ವಿಧಾನ: ಸೌತೆಕಾಯಿ ಮತ್ತು ಕ್ಯಾರೆಟ್ ಸಿಪ್ಪೆ ತೆಗೆದು ಬೇರೆ ಬೇರೆಯಾಗಿ ತುರಿದುಕೊಳ್ಳಿ. ಒಂದು ಬಾಣಲೆಗೆ ತುರಿದ ಸೌತೆಕಾಯಿ ಹಾಕಿ ಒಲೆಯ ಮೇಲಿಡಿ.  ಸಣ್ಣಗೆ ಕುದಿ ಬರಲು ಶುರುವಾದಾಗ ತುರಿದ ಕ್ಯಾರೆಟ್ ಹಾಕಿ ಸ್ವಲ್ಪ ಬಿಸಿ ಮಾಡಿ ಅದಕ್ಕೆ ರಾಗಿ ಹಿಟ್ಟು ಹಾಕಿ ಕೆಳಗಿಳಿಸಿಕೊಂಡು,  ಅಕ್ಕಿ ಹಿಟ್ಟು, ತೆಂಗಿನ ತುರಿ, ಕೊತ್ತಂಬರಿ ಸೊಪ್ಪು, ಕರಿಬೇವು,  ಅಚ್ಚ ಮೆಣಸಿನ ಪುಡಿ, ಉಪ್ಪು ಹಾಕಿ ಕಲಸಿ. ಅಕ್ಕಿ ಹಿಟ್ಟನ್ನು ಒಮ್ಮೆಗೇ ಹಾಕದೇ ಸ್ವಲ್ಪ -ಸ್ವಲ್ಪ ಹಾಕುತ್ತ ಕಲಸಿ. ನೀರು ಹಾಕುವುದು ಬೇಡವಾದ್ದರಿಂದ ಕಲಸಿದ ಮಿಶ್ರಣ ಗಟ್ಟಿಯಾದರೆ ರೊಟ್ಟಿ ಗಟ್ಟಿಯಾಗುತ್ತದೆ. ಕಲಸಿದ ಮಿಶ್ರಣ ಎಣ್ಣೆ ಸವರಿಕೊಂಡ ಕೈಗೆ ಅಂಟದೇ ತಟ್ಟಲು ಬರುವಷ್ಟು ಗಟ್ಟಿಯಾದರೆ ಸಾಕು. (ರೊಟ್ಟಿ ತಟ್ಟಲು ಖಾಲಿಯಾದ ಎಣ್ಣೆ ಕವರ್ ಅನ್ನು ಕತ್ತರಿಸಿಕೊಂಡರೆ ಚೆನ್ನಾಗಾಗುತ್ತದೆ, ತೆಳುವಾದ ಅಲ್ಯೂಮಿನಿಯಂ ಹಾಳೆಯ ಮೇಲೆ ಕೂಡ ತಟ್ಟಬಹುದು). ಮಿಶ್ರಣವನ್ನು ಸಣ್ಣ ಕಿತ್ತಳೆ ಗಾತ್ರದ ಉಂಡೆ ಮಾಡಿಕೊಂಡು ಎಣ್ಣೆ ಸವರಿದ ಕವರ್ ಮೇಲಿಟ್ಟು ಕೈಗೆ ಎಣ್ಣೆ ಸವರಿಕೊಳ್ಳುತ್ತಾ ತೆಳುವಾಗಿ ತಟ್ಟಿ,  ತವಾ / ಕಾವಲಿಗೆ ಹಾಕಿ ಮೇಲಿನಿಂದ ಸ್ವಲ್ಪ ಎಣ್ಣೆ ಹಾಕಿ ಮುಚ್ಚಿ ಎರಡೂ ಕಡೆ ಬೇಯಿಸಿ, ಚೆಟ್ನಿ ಪುಡಿ - ಬೆಣ್ಣೆ ಅಥವಾ ಕಾಯಿ ಚೆಟ್ನಿ - ತುಪ್ಪದ ಜೊತೆ ಸವಿಯಿರಿ. 



ರೊಟ್ಟಿಗೊಂದು ಸಲಹೆ : ತಟ್ಟಿದ ಈ ರೊಟ್ಟಿಯನ್ನು ಕವರ್ ನಿಂದ ಬಿಡಿಸಿ ಕೈಗೆ ಹಾಕಿಕೊಂಡು ತವಾ ಮೇಲೆ ಹಾಕಬಹುದು.  ಸೌತೆಕಾಯಿ, ರಾಗಿ ಹಿಟ್ಟು ಹಾಕಿರುವುದರಿಂದ ಕವರ್ ಸಮೇತ ತವಾ ಮೇಲೆ ಮಗುಚಿ ಕವರ್ ಬಿಡಿಸುವ ಅಗತ್ಯವಿಲ್ಲ, ಕೈ ಇಂದ ತೆಗೆದು ಹಾಕಲು ಬರುತ್ತದೆ.

ಬುಧವಾರ, ನವೆಂಬರ್ 20, 2013

ಕ್ಯಾರೆಟ್ ಮಿಲ್ಕ್ ಶೇಕ್ :



ಬೇಕಾಗುವ ಸಾಮಾಗ್ರಿಗಳು: ಕ್ಯಾರೆಟ್ 2 ದೊಡ್ಡ ಗಾತ್ರದ್ದು, ಹಾಲು 1 ಲೀಟರ್ , ಗೋಡ೦ಬಿ 10-12, ಏಲಕ್ಕಿ 2, ಸಕ್ಕರೆ - ನಿಮ್ಮ ರುಚಿಗೆ ತಕ್ಕ೦ತೆ.




ಮಾಡುವ ವಿಧಾನ: ಕ್ಯಾರೆಟ್ ನ್ನು ತುರಿದುಕೊಳ್ಳಿ. ½ ಕಪ್ ಹಾಲು & ತುರಿದ ಕ್ಯಾರೆಟ್ ಹಾಕಿ 10 ನಿಮಿಷ ಬೇಯಿಸಿ (ಹಸಿ ವಾಸನೆ ಹೋಗುತ್ತದೆ). ಅದು ಆರಿದ ಮೇಲೆ ಬೇಯಿಸಿದ ಕ್ಯಾರೆಟ್ ಜೊತೆ ಗೋಡ೦ಬಿ ಹಾಕಿ ತರಿ ತರಿಯಾಗಿ ರುಬ್ಬಿಕೊ೦ಡು ಮತ್ತೆ ಹಾಲು, ಸಕ್ಕರೆ ಏಲಕ್ಕಿ ಸೇರಿಸಿ 10 ನಿಮಿಷ ಚೆನ್ನಾಗಿ ಕುದಿಸಿ ಉರಿ ಆರಿಸಿ. ಬಿಸಿ ಆರಿದ ಮೇಲೆ 2೦ ನಿಮಿಷ ಫ್ರಿಡ್ಜ್ ನಲ್ಲಿ ಇಟ್ಟು ಆಮೇಲೆ ಸರ್ವ ಮಾಡಿ.

ಶುಕ್ರವಾರ, ಅಕ್ಟೋಬರ್ 18, 2013

ಕ್ಯಾರೆಟ್ ಹೆಸರು ಕಾಳು ರೈಸ್:


ಇದು ತು೦ಬಾ ಸರಳ ವಿಧಾನ. ಸ್ವಲ್ಪ ಗಡಿಬಿಡಿಯಲ್ಲಿ ಇರುವಾಗ ಕಡಿಮೆ ಸಮಯದಲ್ಲಿ ಸುಲಭವಾಗಿ, ಕಡಿಮೆ ಪದಾರ್ಥಗಳನ್ನು ಬಳಸಿ ಮಾಡಬಹುದು. ಕ್ಯಾರೆಟ್ ಹೆಸರು ಕಾಳು ಆರೋಗ್ಯಕ್ಕೆ ಕೂಡ ಒಳ್ಳೆಯದು.

ಬೇಕಾಗುವ ಸಾಮಾಗ್ರಿಗಳು: ಕಾರೆಟ್ ದೊಡ್ಡ ಗಾತ್ರದ್ದು 1, ಹೆಸರು ಕಾಳು ½ ಚಿಕ್ಕ ಕಪ್, ಹಸಿ ಮೆಣಸು 2-3, ಕಾಳುಮೆಣಸಿನ ಪುಡಿ 1 ಚಮಚ, ಲಿ೦ಬು ರಸ, 1 ಲೋಟ ಅಕ್ಕಿ.

ಒಗ್ಗರಣೆಗೆ: ಸಾಸಿವೆ, ಎಣ್ಣೆ, ಕರಿಬೇವು, ಚಿಟಿಕೆ ಅರಿಶಿನ.



ಮಾಡುವ ವಿಧಾನ: ಒ೦ದು ಲೋಟ ಅಕ್ಕಿಯ ಅನ್ನ ಮಾಡಿ ಬದಿಗೆ ಇರಿಸಿ, ಹೆಸರುಕಾಳನ್ನು ೪-೫ ಗ೦ಟೆ ಮೊದಲು ನೀರಲ್ಲಿ ನೆನೆಸಿಡಬೇಕು.ನೆನೆಸಿದ ಹೆಸರುಕಾಳನ್ನು ಪಾತ್ರೆಯಲ್ಲಿ ಹಾಕಿ ಕುಕ್ಕರ್ ನಲ್ಲಿ ಇಟ್ಟು ಒ೦ದು ವಿಷಲ್ ಕೂಗಿಸಿ ಉರಿಯನ್ನು ಆರಿಸಿ. (ಹೆಸರುಕಾಳು ಜಾಸ್ತಿ ಬೆ೦ದರೆ ರುಚಿ ಕಳೆದುಕೊಳ್ಳುತ್ತದೆ) ಒ೦ದು ಬಾಣಲೆಯಲ್ಲಿ ಎಣ್ಣೆ ಹಾಕಿ ಅದು ಸ್ವಲ್ಪ ಬಿಸಿ ಅದ ಮೇಲೆ ಸಾಸಿವೆ ಕರಿಬೇವು, ಹಸಿಮೆಣಸು ಹಾಕಿ ಅದು ಚಿಟಪಟಿಸಿದ ನ೦ತರ ಅದಕ್ಕೆ ತುರಿದ ಕ್ಯಾರೆಟ್ ಜೊತೆ ಸ್ವಲ್ಪ ಉಪ್ಪು ಹಾಕಿ ಹುರಿಯಿರಿ, ೭೦% ಬೆ೦ದ ನ೦ತರ ಅದಕ್ಕೆ ಬೇಯಿಸಿದ ಹೆಸರುಕಾಳನ್ನು ಹಾಕಿ ಸ್ವಲ್ಪ ಕಾಳುಮೆಣಸಿನ ಪುಡಿ ಹಾಕಿ 2 ನಿಮಿಷ ಫ್ರೈ ಮಾಡಿ. ಉರಿಯನ್ನು ಆರಿಸಿ ಅನ್ನ ಹಾಕಿ ಕಲೆಸಿ. ರುಚಿ ನೋಡಿಕೊ೦ಡು ಉಪ್ಪು & ಲಿ೦ಬು ರಸ ಸೇರಿಸಿ.



ನಿಮ್ಮ ಅಡುಗೆಯ ಉಪಯೋಗಕ್ಕಾಗಿ: ಪಲ್ಯ ಬೇಯಿಸುವಾಗ ನೀರು ಹಾಕಿ ಹಾಗೆ ಬಟ್ಟಲನ್ನು ಮುಚ್ಚಿ ಇಟ್ಟು, ಸ್ವಲ್ಪ ಹೊತ್ತು ಅದನ್ನು ತೊಳೆಸದೆ ಇದ್ದರೆ ತರಕಾರಿ ತಳ ಹಿಡಿಯುತ್ತದೆ, ಅದಕ್ಕೆ ಬಟ್ಟಲನ್ನು ಮುಚ್ಚಿ ಅದರ ಮೇಲೆ ಸ್ವಲ್ಪ ನೀರು ಹಾಕಿ ಇಟ್ಟರೆ ಪಲ್ಯ ತಳ ಹಿಡಿಯದೆ ಚೆನ್ನಾಗಿ ಬೇಯುತ್ತದೆ.
 

ಗುರುವಾರ, ಅಕ್ಟೋಬರ್ 17, 2013

ಪೀಸ್ ಪುಲಾವ್ (ಹಸಿ ಬಟಾಣಿ ಪುಲಾವ್) :

ಸಾಮಗ್ರಿಗಳು: ಅಕ್ಕಿ 1 ಕಪ್, ಹಸಿ ಬಟಾಣಿ 1 ಕಪ್, ಮೀಡಿಯಂ ಗಾತ್ರದ ಈರುಳ್ಳಿ 1, ಚಕ್ಕೆ 1 ಇಂಚು, ಏಲಕ್ಕಿ 2, ಲವಂಗ 3-4, ಚಕ್ರ ಮೊಗ್ಗು ಸಣ್ಣ ಚೂರು, ಮೊಸರು ಮತ್ತು ಮೊಸರಿನ ಕೆನೆ ಸೇರಿ 2-3 ಚಮಚ, ಎಣ್ಣೆ 2-3 ಚಮಚ, ತುಪ್ಪ 1-2 ಚಮಚ, ಸಕ್ಕರೆ 1/4 ಚಮಚ (optional), ಉಪ್ಪು ರುಚಿಗೆ, ನಿಂಬೆ ರಸ 1-2 ಚಮಚ. 

ಪೇಸ್ಟ್ ಗೆ ಸಾಮಗ್ರಿಗಳು: ಹೆಚ್ಚಿದ ಕೊತ್ತಂಬರಿ ಸೊಪ್ಪು 2-3 ಚಮಚ, ಬೆಳ್ಳುಳ್ಳಿ 6-8 (ಮೀಡಿಯಂ) ಎಸಳು, ಹೆಚ್ಚಿದ ಈರುಳ್ಳಿ (ಸಣ್ಣ ಗಾತ್ರದ್ದು) 1, ಶುಂಠಿ 1 ಇಂಚು, ಹಸಿಮೆಣಸಿನ ಕಾಯಿ 2-3.  

ವಿಧಾನ : ಪೇಸ್ಟ್ ಸಾಮಗ್ರಿಗಳನ್ನು ಸ್ವಲ್ಪ ನೀರು ಹಾಕಿ ರುಬ್ಬಿ ನುಣ್ಣಗೆ ಪೇಸ್ಟ್ ಮಾಡಿಕೊಳ್ಳಿ. ಮೀಡಿಯಂ ಗಾತ್ರದ ಈರುಳ್ಳಿಯನ್ನು ಉದ್ದುದ್ದ ಹೆಚ್ಚಿಕೊಳ್ಳಿ. ಹಸಿ ಬಟಾಣಿಯ ಬೀನ್ಸ್ ಅನ್ನು ಬಿಡಿಸಿ ತೊಳೆದು ಒಂದು ಕಪ್ ನಷ್ಟು ರೆಡಿ ಮಾಡಿಕೊಳ್ಳಿ. ಅಕ್ಕಿಯನ್ನು ತೊಳೆದು ನೀರು ಬಸಿದಿಟ್ಟುಕೊಳ್ಳಿ. ಕುಕ್ಕರ್ ಗೆ ಎಣ್ಣೆ, ತುಪ್ಪ ಹಾಕಿ ಕಾದ ಮೇಲೆ ಹೆಚ್ಚಿದ ಈರುಳ್ಳಿ ಹಾಕಿ ಅದು ಚೆನ್ನಾಗಿ ಫ್ರೈ ಆದಮೇಲೆ ರುಬ್ಬಿಕೊಂಡ ಪೇಸ್ಟ್ ಹಾಕಿ ಹಸಿ ವಾಸನೆ ಹೋಗುವ ತನಕ ಫ್ರೈ ಮಾಡಿ. ನಂತರ ಚೂರು ಮಾಡಿದ ಚಕ್ಕೆ, ಲವಂಗ, ಏಲಕ್ಕಿ, ಚಕ್ರ ಮೊಗ್ಗಿನ ಚೂರು ಹಾಕಿ, ಅದಕ್ಕೆ ಹಸಿ ಬಟಾಣಿ ಹಾಕಿ ಒಮ್ಮೆ ಚೆನ್ನಾಗಿ ಕಲಸಿ. ನಂತರ ಅಕ್ಕಿ ಹಾಕಿ ಅರ್ಧ ನಿಮಿಷ ಫ್ರೈ ಮಾಡಿ. ಈಗ ಮೊಸರು ಮತ್ತು ಮೊಸರಿನ ಕೆನೆಗೆ ಒಂದು ಕಪ್ ನೀರು ಹಾಕಿ ಚೆನ್ನಾಗಿ ಕಲಕಿ ಅಕ್ಕಿಗೆ ಹಾಕಿ, ಅದರ ಮೇಲೆ ಮತ್ತೆ 1 1/4 ಕಪ್ ನೀರು ಹಾಕಿ. ಅಲ್ಲಿಗೆ ಒಟ್ಟೂ 2 1/4 ಕಪ್ ನೀರು ಹಾಕಿದಂತಾಯಿತು. ನಂತರ ಇದಕ್ಕೆ ಉಪ್ಪು, ನಿಂಬೆರಸ, ಬೇಕಿದ್ದಲ್ಲಿ 1/4 ಚಮಚ ಸಕ್ಕರೆ ಹಾಕಿ ಕಲಕಿ ರುಚಿ ನೋಡಿಕೊಂಡು ಬೇಕಿದ್ದಲ್ಲಿ ಸ್ವಲ್ಪ ಉಪ್ಪು - ಹುಳಿ ಸೇರಿಸಿ ಕುಕ್ಕರ್ ಮುಚ್ಚಿ 3 ವಿಸಲ್ ಕೂಗಿಸಿ. ಉಗಿ ಇಳಿದ ಮೇಲೆ ತೆಗೆದು ಒಮ್ಮೆ ಚೆನ್ನಾಗಿ ಮಿಕ್ಸ್ ಆಗುವಂತೆ ಕಲಸಿ, ರಾಯ್ತ / ಮೊಸರು ಬಜ್ಜಿಯೊಡನೆ ಸರ್ವ್ ಮಾಡಿ.  


ಅಡುಗೆ ಮನೆಗೊಂದು ಟಿಪ್ಸ್ :  ಉಪ್ಪಿಟ್ಟಿನ ರವೆ ಬೇಗನೆ ಹುಳು ಹಿಡಿಯುತ್ತದೆಯಲ್ಲವೇ...? ರವೆ ತಂದ ಮೇಲೆ ಅದನ್ನು ಬಾಣಲೆಗೆ ಹಾಕಿ ಸ್ವಲ್ಪ ಹುರಿದು ತಣ್ಣಗಾದ ಮೇಲೆ ಡಬ್ಬಿ ತುಂಬಿಡಿ.... ಬೇಗನೆ ಹಾಳಾಗುವುದಿಲ್ಲ.... 

ಮಂಗಳವಾರ, ಅಕ್ಟೋಬರ್ 1, 2013

ಹಾಗಲಕಾಯಿ ಪಲ್ಯ - 1


ಸಾಮಾಗ್ರಿಗಳು: ಹಾಗಲಕಾಯಿ 2, ಈರುಳ್ಳಿ 1, ತೆ೦ಗಿನಕಾಯಿ ತುರಿ1/2 ಕಪ್, ಹಸಿ ಮೆಣಸು4-5 (ಜಾಸ್ತಿ ಖಾರ ಇದ್ದರೆ ಒಳ್ಳೆಯದು), ಹುಣಸೆಹಣ್ಣಿನ ರಸ 2-3 ಚಮಚ,
ಒಗ್ಗರಣೆಗೆ:ಎಣ್ಣೆ ಸ್ವಲ್ಪ ಜಾಸ್ತಿ ಇದ್ದರೆ ಒಳ್ಳೆಯದು, ಸಾಸಿವೆ, ಚಿಟಿಕೆ ಇ೦ಗು & ಅರಿಶಿನ, ಕರಿಬೇವು

ವಿಧಾನ: ಹಾಗಲಕಾಯಿ ಮತ್ತು ಈರುಳ್ಳಿಯನ್ನು ಸಣ್ಣದಾಗಿ ಹೆಚ್ಚಿಕೊಳ್ಳಿ. ಮೊದಲು ಬಾಣಲೆಯನ್ನು ಒಲೆಯಮೇಲೆ ಇಟ್ಟು, ಎಣ್ಣೆ ಹಾಕಿ ಅದು ಸ್ವಲ್ಪ ಕಾದ ನ೦ತರ ಅದಕ್ಕೆ ಸಾಸಿವೆ ಹಾಕಿ ಅದು ಚಿಟಪಟಿಸಿದ ನ೦ತರ ಹಸಿ ಮೆಣಸು, ಕರಿಬೇವು, ಅರಿಶಿನ, ಇ೦ಗು ಹಾಕಿದ ತಕ್ಷಣ ಹಾಗಲಕಾಯಿ ಕೊಚ್ಚಲು (ಸಣ್ಣಗೆ ಹೆಚ್ಚಿದ ಎಲ್ಲ ತರಕಾರಿಗಳನ್ನು ಕೊಚ್ಚಲು ಎನ್ನುವುದು ವಾಡಿಕೆ) ಹಾಕಬೇಕು. ಅದಕ್ಕೆ ಉಪ್ಪು, ಹುಣಸೆಹಣ್ಣಿನ ರಸ ಹಾಕಿ 20 ನಿಮಿಷ ಸಣ್ಣ ಉರಿಯಲ್ಲಿ ಚೆನ್ನಾಗಿ ಹುರಿಯಿರಿ.ಆಮೇಲೆ ತೆ೦ಗಿನ ತುರಿ, ಈರುಳ್ಳಿ ಸೇರಿಸಿ  5 ನಿಮಿಷ ಮತ್ತೆ ಹುರಿದರೆ ಹಾಗಲಕಾಯಿ ಪಲ್ಯ ರೆಡಿ. ಇದು ಅನ್ನದ ಜೊತೆ ಚೆನ್ನಾಗಿರುತ್ತದೆ. (ಪಲ್ಯ ಮಾಡುವಾಗ ನೀರನ್ನು ಸೇರಿಸಬಾರದು).
ಹಾಗಲಕಾಯಿ ಪದಾರ್ಥಕ್ಕೆ ಒ೦ದು ಟಿಪ್ಸ್: ಹಾಗಲಕಾಯಿಯನ್ನು ಹೆಚ್ಚಿದ ಮೇಲೆ ಅದಕ್ಕೆ ಸ್ವಲ್ಪ ಉಪ್ಪು, ಅರಿಶಿನ ಸೇರಿಸಿ 10-15 ನಿಮಿಷ ಹಾಗೆ ಬಿಡಿ. ನ೦ತರ ಅದರ ರಸ ತೆಗೆದು ಕೊಚ್ಚಲನ್ನು ಮಾತ್ರ ಬಳಸುವುದರಿ೦ದ ಹಾಗಲಕಾಯಿ ಪದಾರ್ಥಗಳು ಅಷ್ಟೊ೦ದು ಕಹಿ ಅಗುವುದಿಲ್ಲ.