ಶುಕ್ರವಾರ, ಮೇ 26, 2017

ಮ್ಯಾಂಗೋ ಶಿರಾ (ಮ್ಯಾಂಗೋ ಕೇಸರಿಭಾತ್) :

ಸಾಮಗ್ರಿಗಳು :
ರವೆ / ಸೂಜಿ : 1 ಕಪ್ 
ನೀರು : 2 ಕಪ್
ಹಾಲು : 1 ಕಪ್  
ಸಕ್ಕರೆ : 1 1/4 ಕಪ್ 
ತುಪ್ಪ : 1/3 ಕಪ್ 
ಸಣ್ಣಗೆ ಹೆಚ್ಚಿದ ಮಾವಿನಹಣ್ಣು : 1/2 ಕಪ್ 
ಗೋಡಂಬಿ : 8-10 
ಕುಂಕುಮ ಕೇಸರಿ : 10-12 ದಳಗಳು  
ಉಪ್ಪು : 2 ಚಿಟಿಕೆ 

ವಿಧಾನ : 
ಕೇಸರಿಯನ್ನು ಎರಡು ಚಮಚ ಬಿಸಿ ಹಾಲಿನಲ್ಲಿ ನೆನೆಸಿಡಿ. ಬಾಣಲೆಗೆ ತುಪ್ಪ ಹಾಕಿ ರವೆ ಹಾಕಿ ಚೆನ್ನಾಗಿ ಹುರಿಯಿರಿ. ರವೆ ಸ್ವಲ್ಪ ಕೆಂಪಗಾಗಿ, ಘಮ್ಮನೆ ಸುವಾಸನೆ ಬಂದರೆ ರವೆ ಹುರಿದಿದೆ ಎಂದರ್ಥ. ರವೆ ಹುರಿಯಿತ್ತುರುವಾಗಲೇ ನೀರು ಮತ್ತು ಹಾಲನ್ನು ಸೇರಿಸಿ ಕುದಿಯಲು ಇಡಿ. ಹುರಿದ ರವೆಗೆ ಕುದಿಯುತ್ತಿರುವ ನೀರು ಮತ್ತು ಹಾಲನ್ನು ಹಾಕಿ ಕಲಕುತ್ತಾ ಬನ್ನಿ. ರವೆ ಹುರಿಯುತ್ತಿರುವ ಒಲೆಯನ್ನು ಸಣ್ಣ ಉರಿಯಲ್ಲಿಟ್ಟು ನೀರು ಹಾಕಿ, ಬಿಸಿ ನೀರು ಸಿಡಿಯುತ್ತದೆ. ಮೊದಲ ಸಲ ಮಾಡುತ್ತಿರುವವರಾದರೆ ನೀರು ಹಾಕಿ ಮಿಕ್ಸ್ ಮಾಡುವವರೆಗೆ ಒಮ್ಮೆ ಉರಿ ಆರಿಸಿಕೊಳ್ಳುವುದು ಉತ್ತಮ. ನಂತರ ನೆನೆಸಿಟ್ಟ ಕೇಸರಿ ದಳಗಳು, ಹೆಚ್ಚಿದ ಮಾವಿನಹಣ್ಣು, ಗೋಡಂಬಿ ಚೂರುಗಳನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ, ಮುಚ್ಚಳ ಮುಚ್ಚಿ ಒಂದೆರಡು ನಿಮಿಷ ಬೇಯಲು ಬಿಡಿ. ರವೆ ಬೆಂದ ಮೇಲೆ ಸಕ್ಕರೆ, ಉಪ್ಪು ಹಾಕಿ ಕಲಕುತ್ತಾ ಬನ್ನಿ. ಸಕ್ಕರೆ ಹಾಕಿದ ಮೇಲೆ ಮತ್ತೆ ಸ್ವಲ್ಪ ನೀರು ಬಿಟ್ಟುಕೊಳ್ಳುತ್ತದೆ. ಮಿಶ್ರಣ ಬಾಣಲೆಗೆ ಅಂಟಿಕೊಳ್ಳದಂತೆ ಸೌಟು ಮತ್ತು ಬಾಣಲೆಯನ್ನು ಬಿಡುವವರೆಗೂ ಚೆನ್ನಾಗಿ ಮಿಕ್ಸ್ ಮಾಡುತ್ತಿರಿ. ಮಿಶ್ರಣ ಬಾಣಲೆ ಅಂಚನ್ನು ಬಿಟ್ಟುಕೊಂಡ ಮೇಲೆ ಉರಿ ಆರಿಸಿ. ಈಗ ಮಾವಿನಹಣ್ಣಿನ ಶಿರಾವನ್ನು ಬಿಸಿ ಬಿಸಿಯಾಗಿ ಸವಿಯಿರಿ. 



ಸಲಹೆಗಳು :
1) ಒಂದು ವರ್ಷ ಮೇಲ್ಪಟ್ಟ ಮಕ್ಕಳಿಗೆ ಇದನ್ನು ಸಾಯಂಕಾಲದ ತಿಂಡಿಗೆ ಮಾಡಿಕೊಡಬಹುದು. ದೊಡ್ಡವರಿಗೂ ಇಷ್ಟವಾಗುವ ಸಿಹಿ ತಿನಿಸಿದು. ಮಕ್ಕಳಿಗೆ ಮಾಡುವಾಗ ಅಗಿದು ತಿನ್ನುವಷ್ಟು ಹಲ್ಲು ಬರದಿದ್ದರೆ ಗೋಡಂಬಿಯನ್ನು ಹಾಕಬೇಡಿ ಮತ್ತು ನೀರಿನ ಪ್ರಮಾಣಕ್ಕಿಂತ ಹಾಲಿನ ಪ್ರಮಾಣ ಜಾಸ್ತಿ ಹಾಕಿ. 

2) ಮಾವಿನಹಣ್ಣಿನ ಬದಲು ಕಿತ್ತಳೆ ಹಣ್ಣು, ಬಾಳೆಹಣ್ಣು ಅಥವಾ ಅನಾನಸ್ ಹಣ್ಣು ಹಾಕಿ ಮಾಡಿದರೂ ಚೆನ್ನಾಗಿರುತ್ತದೆ. 

3) ಗೋಡಂಬಿಯನ್ನು ತುಪ್ಪದಲ್ಲಿ ಹುರಿದು ಕೊನೆಯಲ್ಲಿ ಕೂಡ ಸೇರಿಸಬಹುದು. ಜೊತೆಗೆ ಒಣ ದ್ರಾಕ್ಷಿ ಹಾಕಬಹುದು ಆದರೆ ಮಾವಿನಹಣ್ಣಿನ ಜೊತೆ ಚೆನ್ನಾಗಿರುವುದಿಲ್ಲ. ಬೇರೆ ಹಣ್ಣನ್ನು ಹಾಕಿ ಮಾಡಿದಾಗ ಹಾಕಿಕೊಳ್ಳಿ. 

4) ಸೂಜಿ ರವೆಯ ಬದಲು ಚಿರೋಟಿ ರವೆಯಿಂದ ಮಾಡಿದರೂ ತುಂಬಾ ಚೆನ್ನಾಗಿ ಆಗುತ್ತದೆ.  

ಶುಕ್ರವಾರ, ಮೇ 12, 2017

ರವೆ ಸಂಡಿಗೆ :

ಸಾಮಗ್ರಿಗಳು:
ಉಪ್ಪಿಟ್ಟಿನ ರವೆ / ಸೂಜಿ ರವೆ : 1ಕಪ್ 
ನೀರು : 8 ಕಪ್ 
ಉಪ್ಪು : 1 ಚಮಚ 
ಹಸಿಮೆಣಸಿನ ಕಾಯಿ : 7-8
ಜೀರಿಗೆ : 1/2  ಚಮಚ
ಇಂಗು :1/2 ಚಮಚ 

ವಿಧಾನ :
ದೊಡ್ಡ ಪಾತ್ರೆಯಲ್ಲಿ 8 ಕಪ್ ನೀರು ಹಾಕಿ ಕುದಿಯಲು ಇಡಿ. ಹಸಿಮೆಣಸು ಮತ್ತು ಜೀರಿಗೆ ಪೇಸ್ಟ್ ಮಾಡಿಕೊಳ್ಳಿ. ಜೀರಿಗೆ ತರಿ ತರಿ ಇದ್ದರೂ ಆಯಿತು.

 ನೀರು ಕುದಿಯಲು ಶುರು ಆದ ಮೇಲೆ ರವೆ, ಉಪ್ಪು, ಇಂಗು ಹಾಕಿ ರವೆ ಗಂಟಾಗದಂತೆ ಮಧ್ಯಮ ಉರಿಯಲ್ಲಿ ಚೆನ್ನಾಗಿ ಕಲಕುತ್ತಿರಿ. ಸ್ವಲ್ಪ ದಪ್ಪ ಗಂಜಿಯಷ್ಟು ಗಟ್ಟಿಯಾದ ಮೇಲೆ ಉರಿ ಆರಿಸಬೇಕು.

 ಒಂದು ಚಮಚದಲ್ಲಿ ಮಿಶ್ರಣವನ್ನು ತೆಗೆದುಕೊಂಡು ತಟ್ಟೆಗೆ ಹಾಕಿದರೆ ಅದು ಹರಿದುಕೊಂಡು ಹೋಗದಷ್ಟು ಗಟ್ಟಿ ಇದ್ದರೆ ಸಾಕು. ತುಂಬಾ ದಪ್ಪಗಾದರೂ ಚೆನ್ನಾಗಿರುವುದಿಲ್ಲ. ತಣ್ಣಗಾದಂತೆ ಇನ್ನೂ ಗಟ್ಟಿಯಾಗುತ್ತಾ ಬರುತ್ತದೆ. ಒಂದು ಪ್ಲಾಸ್ಟಿಕ್ ಶೀಟ್ ಅನ್ನು ಬಿಸಿಲಿನಲ್ಲಿ ಹರವಿಕೊಂಡು ಹಾರಿ ಹೋಗದಂತೆ ಸುತ್ತಲೂ ಕಲ್ಲು ಇಡಿ. ಈಗ ಒಂದು ಬೌಲ್ ನಲ್ಲಿ ರವೆ  ಮಿಶ್ರಣವನ್ನು ತೆಗೆದುಕೊಂಡು ಒಂದು ಚಮಚದಿಂದ ಸಂಡಿಗೆ ಹಾಕುತ್ತಾ ಬನ್ನಿ.

 ಒಂದು ಅಥವಾ ಎರಡು ದಿನಕ್ಕೆ ಪೂರ್ತಿ ಒಣಗಿ ಪ್ಲಾಸ್ಟಿಕ್ ಬಿಡುತ್ತದೆ. ನಂತರ ಸಂಡಿಗೆಯನ್ನು ಪ್ಲಾಸ್ಟಿಕ್ ನಿಂದ ಬಿಡಿಸಿ ಒಂದು ಅಗಲವಾದ ತಟ್ಟೆಗೆ ಹಾಕಿ ಇನ್ನೊಂದು ದಿನ ಬಿಸಿಲಿನಲ್ಲಿ ಇಡಿ.

 ಗರಿ ಗರಿಯಾಗಿ ಒಣಗಿದ ಸಂಡಿಗೆಯನ್ನು ವರ್ಷದವರೆಗೆ ಗಾಳಿಯಾಡದ ಡಬ್ಬಿಯಲ್ಲಿ ಶೇಖರಿಸಿಡಬಹುದು. ಬೇಕಾದಾಗ ಕಾದ ಎಣ್ಣೆಯಲ್ಲಿ ಕರಿದು, ಬಿಸಿ ಬಿಸಿ ಅನ್ನ - ಸಾರು / ತೊವ್ವೆ ಜೊತೆ ಸವಿಯಬಹುದು.  
 

ಸಲಹೆ : ಹಸಿಮೆಣಸಿನ ಪೇಸ್ಟ್ ಬದಲು ಅಚ್ಚ ಖಾರದ ಪುಡಿಯನ್ನೂ ಬಳಸಬಹುದು ಮತ್ತು ಇಂಗು ಹಾಕುವ ಬದಲು ಬೆಳ್ಳುಳ್ಳಿ ಪೇಸ್ಟ್ ಕೂಡ ಹಾಕಬಹುದು. 

ಶುಕ್ರವಾರ, ಮೇ 5, 2017

ಮಜ್ಜಿಗೆ ಪಳದ್ಯ: ( 2 ವಿಧಾನಗಳು )

ವಿಧಾನ -1 :

ಸಾಮಗ್ರಿಗಳು:
ಮಜ್ಜಿಗೆ (ಸ್ವಲ್ಪ ದಪ್ಪ ಇರಬೇಕು, ಆದರೆ ಮೊಸರಲ್ಲ) - 2 ಲೋಟ,
ಉಪ್ಪು - ರುಚಿಗೆ, ಹಸಿಮೆಣಸು - 2,
ಜೀರಿಗೆ -  1/4 ಚಮಚ,
ಸಾಸಿವೆ - 1/4 ಚಮಚ,
ಕರಿಬೇವು - 4-5 ಎಲೆಗಳು,
ಬೆಳ್ಳುಳ್ಳಿ - 2 ಎಸಳು,
ಅರಿಶಿನಪುಡಿ - ಚಿಟಿಕೆ.ಎಣ್ಣೆ - 1 ಟೇ.ಚಮಚ


ವಿಧಾನ : ಮಜ್ಜಿಗೆಗೆ ಬೇಕಷ್ಟು ಉಪ್ಪು ಹಾಕಿ ಕದಡಿಟ್ಟುಕೊಳ್ಳಿ. ಒಗ್ಗರಣೆ ಸೌಟಿಗೆ ಸ್ವಲ್ಪ ಎಣ್ಣೆ ಹಾಕಿಕೊ೦ಡು ಬಿಸಿಯಾದ ಮೇಲೆ ಸಾಸಿವೆ, ಜೀರಿಗೆ, ಹಸಿಮೆಣಸಿನ ಚೂರುಗಳು, ಜಜ್ಜಿದ ಬೆಳ್ಳುಳ್ಳಿ, ಕರಿಬೇವು ಅರಿಶಿನ ಪುಡಿ ಹಾಕಿ ಈ ಒಗ್ಗರಣೆಯನ್ನು ಮಜ್ಜಿಗೆಗೆ ಹಾಕಿದರೆ ಮಜ್ಜಿಗೆ ಪಳದ್ಯ ರೆಡಿ.

ವಿಧಾನ -2 :

(2 ನೇ ವಿಧಾನದಲ್ಲಿ ಅರಿಶಿನ & ಜೀರಿಗೆ ಹಾಕುವುದಿಲ್ಲ. ಉದ್ದಿನಬೇಳೆ & ನೀರು ಒಗ್ಗರಣೆಗೆ ಹಾಕಬೇಕು. - ಮತ್ತೆಲ್ಲ ಅದೆ ಸಾಮಗ್ರಿಗಳು)

ಬಾಣಲೆಗೆ ಎಣ್ಣೆ ಹಾಕಿ ಅದು ಕಾದ ಮೇಲೆ ಉದ್ದಿನಬೇಳೆ, ಸಾಸಿವೆ, ಕರಿಬೇವು,ಹಸಿಮೆಣಸು, ಬೆಳ್ಳುಳ್ಳಿ ಹಾಕಿ ಹಾಗೆ 1 ನಿಮಿಷ ಬಿಟ್ಟು ನೀರು ಹಾಕಿ ಉಪ್ಪು ಹಾಕಿ ನೀರು ಕುದಿಬ೦ದ ಮೇಲೆ ಉರಿ ಆರಿಸಿ,, 3 ನಿಮಿಷ ಬಿಟ್ಟು ಮಜ್ಜಿಗೆ ಸೇರಿಸಿ.,, ಈಗ ಬಿಸಿ ಬಿಸಿ ಮಜ್ಜಿಗೆ ಪಳದ್ಯ ರೆಡಿ

ಸೂಚನೆ : ಮಜ್ಜಿಗೆ ಸ್ವಲ್ಪ ಹುಳಿ ಇದ್ದರೆ ಚೆನ್ನಾಗಿರುತ್ತದೆ.












ಶುಕ್ರವಾರ, ಏಪ್ರಿಲ್ 28, 2017

ದ್ರಾಕ್ಷಿ ಹಣ್ಣಿನ ಸಾಸಿವೆ:

ಈಗ ದ್ರಾಕ್ಷಿ ಹಣ್ಣಿನ ಸೀಸನ್. ತಿನ್ನಲು ತಂದ ದ್ರಾಕ್ಷಿ ಸಿಹಿಯ ಜೊತೆ ಸ್ವಲ್ಪ ಹುಳಿ ಇದ್ದರೆ ಈ ಸಾಸಿವೆ ಮಾಡಿ ನೋಡಿ. 
ಸಾಮಗ್ರಿಗಳು :
ಹಸಿ ದ್ರಾಕ್ಷಿ : 18-20 
ತೆಂಗಿನ ತುರಿ : 1/4 ಕಪ್ 
ಮೊಸರು : 1/4 ಕಪ್ (ಹುಳಿ ಇರಬಾರದು) 
ಸಾಸಿವೆ : 1/2 ಚಮಚ 
ಹಸಿಮೆಣಸಿನ ಕಾಯಿ : 1
ಅರಿಶಿನ ಪುಡಿ : 1/4 ಚಮಚ
ತುಪ್ಪ : 1-2 ಚಮಚ  
ಉಪ್ಪು : ರುಚಿಗೆ ತಕ್ಕಷ್ಟು 

ಒಗ್ಗರಣೆಗೆ : 
ಎಣ್ಣೆ : 1 ಚಮಚ 
ಸಾಸಿವೆ : 1/4 ಚಮಚ 

ವಿಧಾನ :
ದ್ರಾಕ್ಷಿ ಹಣ್ಣನ್ನು ಸಣ್ಣದಾಗಿ ಹೆಚ್ಚಿ.  ಅಂದರೆ  ಅಡ್ಡವಾಗಿ ಎರಡು ಭಾಗ ಮಾಡಿದರೆ ಸಾಕು, ತುಂಬಾ ದೊಡ್ಡ ದ್ರಾಕ್ಷಿಯಾದರೆ ನಾಲ್ಕು ಭಾಗ ಮಾಡಿ. ದಪ್ಪ ತಳದ ಪಾತ್ರೆಗೆ ತುಪ್ಪ ಹಾಕಿ, ಹೆಚ್ಚಿದ ದ್ರಾಕ್ಷಿ ಹಾಕಿ ಮೆತ್ತಗಾಗುವ ತನಕ ಹುರಿಯಿರಿ. ಮಿಕ್ಸಿ ಜಾರ್ ಗೆ ತೆಂಗಿನ ತುರಿ, ಹಸಿಮೆಣಸಿನ ಕಾಯಿ, ಸಾಸಿವೆ ಹಾಕಿ ಸ್ವಲ್ಪ ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ಹುರಿದಿಟ್ಟ ಮಿಶ್ರಣ ತಣ್ಣಗಾದ ಮೇಲೆ ಮೊಸರು, ರುಬ್ಬಿದ ಮಿಶ್ರಣ, ಉಪ್ಪು, ಬೇಕಿದ್ದಲ್ಲಿ ಸ್ವಲ್ಪ ನೀರು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಇದಕ್ಕೆ ಎಣ್ಣೆ, ಸಾಸಿವೆ ಒಗ್ಗರಣೆ ಮಾಡಿದರೆ ದ್ರಾಕ್ಷಿ ಸಾಸಿವೆ ಅನ್ನದ ಜೊತೆ ಸವಿಯಲು ಸಿದ್ಧ. 

ಶುಕ್ರವಾರ, ಏಪ್ರಿಲ್ 21, 2017

ಕೋಕ೦ (ಮುರುಗಲು ಸಿಪ್ಪೆಯ ಪಾನಕ):

ಸಾಮಗ್ರಿಗಳು : 
ಮುರುಗಲು ಹಣ್ಣು - 30,
 ಸಕ್ಕರೆ - 400 ಗ್ರಾ೦


ವಿಧಾನ : ಮುರುಗಲು ಹಣ್ಣನ್ನು ತೊಳೆದು ಒ೦ದು ಬಟ್ಟೆಯಲ್ಲಿ ನೀರು ಒರೆಸಿ. ಹಣ್ಣನ್ನು ಒಡೆದು ಬೀಜ ತೆಗಿಯಿರಿ. ಸಿಪ್ಪೆಯನ್ನು ಒ೦ದು ಪಾತ್ರೆಯಲ್ಲಿ ಹಾಕಿ ಅದಕ್ಕೆ ಸಕ್ಕರೆ ಸೇರಿಸಿ 3-4 ದಿನ ತೆಳುವಾದ ಬಟ್ಟೆ ಮುಚ್ಚಿ ಬಿಸಿಲಿಗೆ ಒಣಗಿಸಿ. ನ೦ತರ ಸಕ್ಕರೆಯು ಕರಗಿ ನೀರಾಗಿರುತ್ತದೆ. ಈಗ ಸಿಪ್ಪೆಯನ್ನು ಕೈಯಲ್ಲಿ ಗಟ್ಟಿಯಾಗಿ ಹಿ೦ಡಿ. ರಸವನ್ನು ಸೋಸಿ ಮತ್ತೆ ಬಿಸಿಲಿನಲ್ಲಿ 3-4 ದಿನ ತೆಳುವಾದ ಬಟ್ಟೆ ಮುಚ್ಚಿ ಇಡಿ. ಇದನ್ನು ಒ೦ದು ಗಾಜಿನ ಬಾಟಲಿಯಲ್ಲಿ ಶೇಖರಿಸಿ ಇಡಿ. ಬೇಕಾದಾಗ ಒ೦ದು ಚಮಚ ಕೋಕ೦ ನೀರಿಗೆ ಸೇರಿಸಿ ಸ್ವಲ್ಪ ಸಕ್ಕರೆ ಹಾಕಿದರೆ ರುಚಿಯಾದ ಹಾಗೆ ಆರೋಗ್ಯಕ್ಕು ಒಳ್ಳೆಯದಾದ ಪಾನಕ ಕುಡಿಯಬಹುದು.

ಶನಿವಾರ, ಏಪ್ರಿಲ್ 15, 2017

ಕಲ್ಲಂಗಡಿ ಸಿಪ್ಪೆಯ ದೋಸೆ :

ಕಲ್ಲಂಗಡಿ ಹಣ್ಣಿನ ಕೆಂಪು ಭಾಗವನ್ನು ಮಾತ್ರ  ತಿಂದು ಅದರ ಸಿಪ್ಪೆಯ ಜೊತೆ ಇರುವ ಬಿಳಿಯ ಭಾಗವನ್ನು ಹಾಗೆಯೇ ಬಿಸಾಡುವುದು ರೂಢಿ.... ಅದರ ಬದಲು ಸಿಹಿಯಾದ ಕೆಂಪು ಭಾಗವನ್ನು ಕತ್ತರಿಸಿ ತಿಂದು, ಸಪ್ಪೆಯಾಗಿರುವ ಬಿಳಿಯ ಭಾಗವನ್ನು ಹಾಕಿ ಗರಿ ಗರಿ ದೋಸೆ ಮಾಡಿಕೊಳ್ಳಬಹುದು.... ಇಲ್ಲಿದೆ ಮಾಡುವ ವಿಧಾನ... 

ಸಾಮಗ್ರಿಗಳು :
ಹೆಚ್ಚಿದ ಕಲ್ಲಂಗಡಿ ಸಿಪ್ಪೆ : 2 ಕಪ್ (ಸಿಪ್ಪೆಯ ಹಸಿರು ಭಾಗ ತೆಗೆದು ಒಳಗಿನ ಬಿಳಿಯ ಭಾಗವನ್ನು ಹೆಚ್ಚಿಕೊಳ್ಳಿ) 
ಅಕ್ಕಿ : 2 ಕಪ್ 
ಅವಲಕ್ಕಿ : 1 ಟೇಬಲ್ ಚಮಚ 
ಮೆಂತ್ಯ : 1/4 ಚಮಚ 
ಉದ್ದಿನ ಬೇಳೆ : 1/2 ಚಮಚ 
ಉಪ್ಪು : ರುಚಿಗೆ 
ಎಣ್ಣೆ : ದೋಸೆ ತವಾಗೆ ಸವರಲು 

ವಿಧಾನ :
ಅಕ್ಕಿ, ಅವಲಕ್ಕಿ, ಉದ್ದಿನ ಬೇಳೆ, ಮೆಂತ್ಯ ಕಾಳು  ಎಲ್ಲವನ್ನೂ ತೊಳೆದು ಒಟ್ಟಿಗೆ ಸೇರಿಸಿ 4-5 ಘಂಟೆಗಳ ಕಾಲ ನೆನೆಸಿಡಿ. 

ನಂತರ ನೀರು ಬಸಿದಿಟ್ಟುಕೊಂಡು  ಹೆಚ್ಚಿದ ಕಲ್ಲಂಗಡಿ ಜೊತೆ ಸೇರಿಸಿ ರುಬ್ಬಿ. ಬೇಕಿದ್ದಲ್ಲಿ ಬಸಿದಿಟ್ಟುಕೊಂಡ ನೀರನ್ನೇ ಸ್ವಲ್ಪ ಸೇರಿಸಿಕೊಂಡು ನುಣ್ಣಗೆ ರುಬ್ಬಿಕೊಳ್ಳಿ. ಈ ಹಿಟ್ಟನ್ನು 7-8 ಘಂಟೆಗಳ ಕಾಲ ಹುದುಗಲು ಬಿಡಿ. ರಾತ್ರಿ ರುಬ್ಬಿಟ್ಟರೆ ಬೆಳಿಗ್ಗೆ ತಿಂಡಿಗೆ ಮಾಡಬಹುದು. ಇದಕ್ಕೆ ಉಪ್ಪು, ಬೇಕಿದ್ದಲ್ಲಿ ಸ್ವಲ್ಪ ನೀರು ಸೇರಿಸಿ ದೋಸೆ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. 

ದೋಸೆ ತವಾಗೆ  ಎಣ್ಣೆ ಸವರಿ ಚೆನ್ನಾಗಿ ಕಾಯಿಸಿ ತೆಳ್ಳಗೆ ದೋಸೆ ಮಾಡಿ ಮುಚ್ಚಿ ಬೇಯಿಸಿ. 

ಗರಿಗರಿಯಾದ ಕಲ್ಲಂಗಡಿ ದೋಸೆಯನ್ನು ಕಾಯಿ ಚಟ್ನಿ ಜೊತೆ ಸವಿಯಿರಿ.
ಸಲಹೆಗಳು : 
1) ಇದೇ ಹಿಟ್ಟಿನಿಂದ ದೋಸೆಯ ಬದಲು ತೆಳ್ಳೇವು ಕೂಡ ಮಾಡಬಹುದು.
2) ನಿಮಗೆ ಇಷ್ಟವಿದ್ದರೆ ದೋಸೆ ಮಾಡುವಾಗ ಎಣ್ಣೆ / ತುಪ್ಪ ಹಾಕಿಕೊಳ್ಳಬಹುದು.

ಶುಕ್ರವಾರ, ಏಪ್ರಿಲ್ 7, 2017

ಕಾಯಿ ಉ೦ಡೆ :

ಸಾಮಗ್ರಿಗಳು : 
ತೆ೦ಗಿನತುರಿ - 2 ಕಪ್ 
ಬೆಲ್ಲ - 1 ಕಪ್,
ಏಲಕ್ಕಿ ಪುಡಿ - 1/2 ಟೀ ಚಮಚ, 
ಗೋಡ೦ಬಿ - 15



ವಿಧಾನ : ಒ೦ದು ದಪ್ಪ ತಳದ ಪಾತ್ರೆ/ಬಾಣಲೆಗೆ ತೆ೦ಗಿನತುರಿ, ಬೆಲ್ಲ ಸೇರಿಸಿ ೧೫-೨೦ ನಿಮಿಷ ಸಣ್ಣ ಉರಿಯಲ್ಲಿ ಕುದಿಸಿ ಸೌಟಿನಲ್ಲಿ ಆಗಾಗ ತೊಳೆಸುತ್ತಿರಿ. ಇಲ್ಲವಾದಲ್ಲಿ ಬೆಲ್ಲ ತಳಕ್ಕೆ ಹಿಡಿಯುತ್ತದೆ. ಈ ತೆ೦ಗಿನತುರಿ ಬೆಲ್ಲದ ಮಿಶ್ರಣವು ಬದಿ & ಸೌಟು ಬಿಡುವವರೆಗು ತೊಳೆಸುತ್ತಲೆ ಇರಬೇಕು. ನ೦ತರ ಒಲೆಯಿ೦ದ ಇಳಿಸಿ ಏಲಕ್ಕಿ ಪುಡಿ ಗೋಡ೦ಬಿ ಚೂರುಗಳನ್ನು ಸೇರಿಸಿ ಸರಿಯಾಗಿ ಕಲೆಸಿ. ಸ್ವಲ್ಪ ಬಿಸಿ ಆರಿದ ಮೇಲೆ ಉ೦ಡೆಯನ್ನು ಮಾಡಿದರೆ ಕಾಯಿ ಉ೦ಡೆ ಸಿದ್ಧ.

(ಗೋಡ೦ಬಿಯ ಬದಲು ಶೇ೦ಗಾ ಕೂಡ ಹಾಕಬಹುದು. ಶೇ೦ಗಾ ಹಾಕುವಿರಾದರೆ ಅದನ್ನು ಹುರಿದು ಹಾಕಿ ಇಲ್ಲವಾದರೆ ಹಸಿ ವಾಸನೆ ಬರುತ್ತದೆ.)

ಗುರುವಾರ, ಮಾರ್ಚ್ 30, 2017

ಅವಲಕ್ಕಿ ಬಾತ್ :

ಸಾಮಗ್ರಿಗಳು :
ದಪ್ಪ ಅವಲಕ್ಕಿ- 1 ಕಪ್,
ಹಸಿ ಬಟಾಣಿ - 1/4 ಕಪ್,
ಈರುಳ್ಳಿ - 1,
ಟೊಮೇಟೊ - 1 (ಬೇಕಿದ್ದಲ್ಲಿ ಮಾತ್ರ) 
ಹಸಿಮೆಣಸಿನಕಾಯಿ - 1,
ತೆಂಗಿನ ತುರಿ - 4 ಚಮಚ,
ರಸಂ ಪುಡಿ - 1/2 ಚಮಚ,
ಅರಿಶಿನ ಪುಡಿ - 1/4 ಚಮಚ,
ಎಣ್ಣೆ - 4-5 ಚಮಚ,
ಉದ್ದಿನ ಬೇಳೆ - 1/2 ಚಮಚ,
ಸಾಸಿವೆ - 1/4 ಚಮಚ,
ಕರಿಬೇವು - 6-8 ಎಲೆಗಳು,
ಸಕ್ಕರೆ- 1 ಚಮಚ,
ಉಪ್ಪು - ರುಚಿಗೆ 

ವಿಧಾನ :
ಮೊದಲು ಅವಲಕ್ಕಿಯನ್ನು ತೊಳೆದು, ನೀರು ಹಾಕಿ 15-20 ನಿಮಿಷ ನೆನೆಸಿಡಿ. ಮೆತ್ತಗಾಗಬೇಕು, ಆದರೆ ತುಂಬಾ ಗಂಜಿಯಾಗುವಷ್ಟು ಮೆತ್ತಗಾಗಬಾರದು. ಈರುಳ್ಳಿ ಮತ್ತು ಟೊಮ್ಯಾಟೊವನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಹಸಿಮೆಣಸಿನಕಾಯಿಯನ್ನು ಉದ್ದ ಸೀಳಿಕೊಳ್ಳಿ.  ಹಸಿಬಟಾಣಿಗೆ ನೀರು ಮತ್ತು ಚಿಟಿಕೆ ಉಪ್ಪು ಹಾಕಿ ಬೇಯಿಸಿಕೊಳ್ಳಿ. ನೆಂದ ಅವಲಕ್ಕಿಯ ನೀರನ್ನು ಪೂರ್ತಿಯಾಗಿ ಬಸಿದುಕೊಂಡು ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಸಕ್ಕರೆ ಹಾಕಿ ಕಲಸಿಟ್ಟುಕೊಳ್ಳಿ. ಬಾಣಲೆಯನ್ನು ಒಲೆಯ ಮೇಲಿಟ್ಟು ಎಣ್ಣೆ ಹಾಕಿ ಕಾದ ಮೇಲೆ ಉದ್ದಿನ ಬೇಳೆ ಹಾಕಿ, ಅದು ಹೊಂಬಣ್ಣ ಬಂದ ಮೇಲೆ ಸಾಸಿವೆ ಹಾಕಿ ಚಿಟಪಟಾಯಿಸಿ. ಇದಕ್ಕೆ ಹಸಿಮೆಣಸಿನಕಾಯಿ, ಕರಿಬೇವು ಹಾಕಿ ಒಮ್ಮೆ ಹುರಿದು, ಹೆಚ್ಚಿದ ಈರುಳ್ಳಿ ಹಾಕಿ ಫ್ರೈ ಮಾಡಿ. ನಂತರ ಹೆಚ್ಚಿದ ಟೊಮೇಟೊ ಹಾಕಿ ಮೆತ್ತಗಾಗುವವರೆಗೆ ಹುರಿಯಿರಿ. ಇದಕ್ಕೆ ಬೇಯಿಸಿಕೊಂಡ ಬಟಾಣಿ, ತೆಂಗಿನತುರಿ, ಅರಿಶಿನ ಪುಡಿ, ರಸಂ ಪುಡಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಅವಲಕ್ಕಿ ಹಾಕಿ ಕಲಸಿ. ಬೇಕಿದ್ದಲ್ಲಿ ಸ್ವಲ್ಪ ಕೊತ್ತಂಬರಿ ಸೊಪ್ಪು ಹಾಕಿ ಮಿಕ್ಸ್ ಮಾಡಿದರೆ ಬಿಸಿ ಬಿಸಿ ಅವಲಕ್ಕಿ ರೆಡಿ. ಸರ್ವ್ ಮಾಡುವಾಗ ಗರಿ ಗರಿ ಸೇವ್ ಅಥವಾ mixture ಅನ್ನು ಮೇಲಿಂದ ಉದುರಿಸಿ ಕೊಡಿ. ಇದು ಬೆಳಗ್ಗಿನ ಉಪಹಾರಕ್ಕೆ ಅಥವಾ ಸಂಜೆಯ ಟೀ / ಕಾಫೀ ಜೊತೆ ಕೂಡ ಮಾಡಿಕೊಳ್ಳಬಹುದು. 

ಶುಕ್ರವಾರ, ಮಾರ್ಚ್ 24, 2017

ಶಾಬಕ್ಕಿ/ಸಬ್ಬಕ್ಕಿ ಸ೦ಡಿಗೆ:

ಸಾಮಗ್ರಿಗಳು: ಶಾಬಕ್ಕಿ/ಸಬ್ಬಕ್ಕಿ - 100 ಗ್ರಾ೦, ಉಪ್ಪು, ಜೀರಿಗೆ - 1/2 ಚಮಚ.



ವಿಧಾನ : ಶಾಬಕ್ಕಿಯನ್ನು ತೊಳೆದು 5-6 ತಾಸು ನೀರಿನಲ್ಲಿ ನೆನೆಸಿಡಿ. ನೆನೆಸಿದ ಶಾಬಕ್ಕಿಯನ್ನು ಕುಕ್ಕರ್ ಗೆ ಹಾಕಿ 3-4 ವಿಶಲ್ ಕೂಗಿಸಿ, ಬಿಸಿ ಆರಿದ ಮೇಲೆ ಉಪ್ಪು, ಜೀರಿಗೆ ಸೇರಿಸಿ. ಒ೦ದು ಪ್ಲಾಸ್ಟಿಕ್ ಶೀಟ್ ನಲ್ಲಿ ಈ ಮಿಶ್ರಣವನ್ನು ಸಣ್ಣ ಸಣ್ಣದಾಗಿ ಹಾಕಿ ಸಲ್ಪ ಹರಡಿ 2-3 ದಿನ ಬಿಸಿಲಿನಲ್ಲಿ ಒಣಗಿಸಿ. ಇದನ್ನು ಗಾಳಿಯಾಡದ ಡಬ್ಬಿಯಲ್ಲಿ ತು೦ಬಿಡಿ. ಬೇಕಾದಾಗ ಎಣ್ಣೆಯಲ್ಲಿ ಕರಿಯಿರಿ.

ಸೂಚನೆ: ಬೇಯಿಸಿದ ಶಾಬಕ್ಕಿಯನ್ನು ರುಬ್ಬಿ ಕೂಡ ಮಾಡಬಹುದು. (ಬೇಕಾದರೆ ಹಿಟ್ಟಿಗೆ 2 ಹಸಿಮೆಣಸನ್ನು ರುಬ್ಬಿ ಹಾಕಬಹುದು)

ಶುಕ್ರವಾರ, ಮಾರ್ಚ್ 17, 2017

ಹಲಸಿನ ಕಾಯಿ ಮಂಚೂರಿ :

ಸಾಮಗ್ರಿಗಳು:
ಹಲಸಿನ ಕಾಯಿ (ಸಿಪ್ಪೆ, ಮಧ್ಯದ ಗಟ್ಟಿ ಭಾಗ ತೆಗೆದು ಹೆಚ್ಚಿದ್ದು) - 4 ಕಪ್
ಕಾರ್ನ್ ಫ್ಲೋರ್ : 6-7 ಟೇಬಲ್ ಚಮಚ ಮತ್ತು ಅರ್ಧ ಚಮಚ ಫ್ರೈ ಮಾಡಲು
ಮೈದಾ : 2 ಟೇಬಲ್ ಚಮಚ
ಅಚ್ಚ ಖಾರದ ಪುಡಿ : 1 ಟೀ ಚಮಚ
ಮೊಸರು : 2 ಟೇಬಲ್ ಚಮಚ
ಶುಂಠಿ ಬೆಳ್ಳುಳ್ಳಿ ಪೇಸ್ಟ್: 1 ಟೀ ಚಮಚ
ಕ್ಯಾಪ್ಸಿಕಂ : 1
ಈರುಳ್ಳಿ : 1
ಈರುಳ್ಳಿ ಗಿಡ (sprin onion) : 1/2 ಕಪ್ ಹೆಚ್ಚಿದ್ದು
ಸಣ್ಣದಾಗಿ ಹೆಚ್ಚಿದ ಶುಂಠಿ : 1 ಟೀ ಚಮಚ
ಸಣ್ಣದಾಗಿ ಹೆಚ್ಚಿದ ಬೆಳ್ಳುಳ್ಳಿ : 1 ಟೀ ಚಮಚ
ಸಣ್ಣದಾಗಿ ಹೆಚ್ಚಿದ ಹಸಿಮೆಣಸಿನ ಕಾಯಿ : 1 ಟೀ ಚಮಚ
ಸಣ್ಣದಾಗಿ ಹೆಚ್ಚಿದ ಕೊತ್ತಂಬರಿ ಸೊಪ್ಪು : 1 ಟೇಬಲ್ ಚಮಚ
ಸೋಯಾ ಸಾಸ್ :1  ಟೀ ಚಮಚ
ಟೊಮೇಟೊ ಸಾಸ್ : 1 ಟೇಬಲ್ ಚಮಚ
ರೆಡ್ ಚಿಲ್ಲಿ ಸಾಸ್ / ಗ್ರೀನ್ ಚಿಲ್ಲಿ ಸಾಸ್ : 1 ಟೇಬಲ್ ಚಮಚ
ಸಕ್ಕರೆ : 1/4 ಚಮಚ
ಲಿಂಬು ರಸ : 1/2 ಚಮಚ
ಉಪ್ಪು : ರುಚಿಗೆ
ಎಣ್ಣೆ : ಕರಿಯಲು ಮತ್ತು ಫ್ರೈ ಮಾಡಲು

ವಿಧಾನ :
ಹಲಸಿನಕಾಯಿ ಸಿಪ್ಪೆ ಮತ್ತು ಮಧ್ಯದ ಗಟ್ಟಿ ಭಾಗ (ಮೂಗು ಎನ್ನುತ್ತಾರೆ ಅದನ್ನು) ತೆಗೆದು ಮಂಚೂರಿ ಗಾತ್ರಕ್ಕೆ ಹೆಚ್ಚಿಕೊಳ್ಳಿ ಮತ್ತು ಇದನ್ನು ಕುಕ್ಕರ್ ನಲ್ಲಿ ಇಟ್ಟು 2-3 ವಿಶಲ್ ಕೂಗಿಸಿ ಬೇಯಿಸಿಟ್ಟುಕೊಳ್ಳಿ. 

ಮೊಸರಿಗೆ ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಸ್ವಲ್ಪ ಉಪ್ಪು  ಹಾಕಿ ಕಲಸಿ ಹೆಚ್ಚಿದ ಹಲಸಿನಕಾಯಿಗೆ ಹಾಕಿ ಚೆನ್ನಾಗಿ ಕಲಸಿ ಅರ್ಧ ಗಂಟೆ ಫ್ರಿಡ್ಜ್ ನಲ್ಲಿಡಿ. 


ಈರುಳ್ಳಿ ಮತ್ತು ಕ್ಯಾಪ್ಸಿಕಂ ಅನ್ನು ಉದ್ದುದ್ದ ಹೆಚ್ಚಿಕೊಳ್ಳಿ. ಒಂದು ಕಡೆ ಎಣ್ಣೆ ಕಾಯಲು ಇಟ್ಟುಕೊಂಡು, ಇತ್ತ  ಕಾರ್ನ್ ಫ್ಲೋರ್ ಗೆ ಮೈದಾ, ಸ್ವಲ್ಪ ಉಪ್ಪು, ಅಚ್ಚ ಖಾರದ ಪುಡಿ, ನೀರು ಸೇರಿಸಿ ಗಂಟಿಲ್ಲದೇ ಕಲಸಿಕೊಳ್ಳಿ. ಹಿಟ್ಟಿನ ಮಿಶ್ರಣ ಮಂಚೂರಿ ಕರಿಯುವಷ್ಟು ತೆಳ್ಳಗಿರಲಿ. 

ಇದಕ್ಕೆ ತಯಾರಿಸಿಟ್ಟುಕೊಂಡ ಹಲಸಿನ ಕಾಯಿ ಹೋಳುಗಳನ್ನು ಹಾಕಿ ಅದ್ದಿ  ಕಾದ ಎಣ್ಣೆಯಲ್ಲಿ, ಸಣ್ಣ ಉರಿಯಲ್ಲಿ ಗರಿಗರಿಯಾಗಿ ಕರಿಯಿರಿ.

 ಈಗ ಒಂದು ಬಾಣಲೆಗೆ ೪-೫ ಚಮಚ ಎಣ್ಣೆ ಹಾಕಿ ಕಾದ ನಂತರ ಹೆಚ್ಚಿದ ಬೆಳ್ಳುಳ್ಳಿ, ಶುಂಠಿ ಮತ್ತು ಹಸಿಮೆಣಸಿನ ಕಾಯಿ ಹಾಕಿ ಸ್ವಲ್ಪ ಫ್ರೈ ಮಾಡಿ, ಇದಕ್ಕೆ ಈರುಳ್ಳಿ ಮತ್ತು ಕ್ಯಾಪ್ಸಿಕಂ ಹಾಕಿ ಒಂದು ನಿಮಿಷ ಫ್ರೈ ಮಾಡಿ. ನಂತರ ಒನ್ನೊಂದಾಗಿ ಸೋಯಾ ಸಾಸ್, ಟೊಮೇಟೊ ಮತ್ತು ಚಿಲ್ಲಿ ಸಾಸ್ ಹಾಕಿ ಒಮ್ಮೆ ಮಿಕ್ಸ್ ಮಾಡಿ. ಅರ್ಧ ಚಮಚ ಕಾರ್ನ್ ಫ್ಲೋರ್ ಅನ್ನು ಕಾಲು ಕಪ್ ನೀರಿಗೆ ಹಾಕಿ ಗಂಟಿಲ್ಲದಂತೆ ಕಲಸಿಕೊಂಡು ಬಾಣಲೆಯಲ್ಲಿರುವ ಮಿಶ್ರಣಕ್ಕೆ ಹಾಕಿ ಚೆನ್ನಾಗಿ ಕಲಕುತ್ತಾ ಸಕ್ಕರೆ ಸ್ವಲ್ಪ ಉಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಮಿಶ್ರಣ ಸ್ವಲ್ಪ ದಪ್ಪಗಾದಾಗ ಕರಿದಿಟ್ಟ ಹಲಸಿನಕಾಯಿ, ಕೊತ್ತಂಬರಿ ಸೊಪ್ಪು, ಹೆಚ್ಚಿದ ಈರುಳ್ಳಿ ಗಿಡ (spring onion) ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಉರಿ ಆರಿಸಿ. ಬಿಸಿ ಬಿಸಿ ಹಲಸಿನಕಾಯಿ ಮಂಚೂರಿ ಸವಿದು ನೋಡಿ. 

ಸಲಹೆ :
ಪ್ರತಿ ಹಂತದಲ್ಲೂ ಉಪ್ಪು ಹಾಕುವುದರಿಂದ ಸರಿಯಾಗಿ ನೋಡಿಕೊಂಡು ಹಾಕಿ. 






ಶುಕ್ರವಾರ, ಮಾರ್ಚ್ 10, 2017

ರಾಯಲ್ ರೈಸ್


ಬೇಕಾಗುವ ಸಾಮಾಗ್ರಿಗಳು: 
 ಅಕ್ಕಿ - 1 ಕಪ್,
 ಕ್ಯಾರೆಟ್ - 1”ಉದ್ದ ಕತ್ತರಿಸಿದ್ದು - ¼ ಕಪ್
 ಬೀನ್ಸ್ - 1” ಉದ್ದ ಕತ್ತರಿಸಿದ್ದು - ¼ ಕಪ್,
 ಬಾದಾಮಿ ಸಣ್ಣದಾಗಿ ಹೆಚ್ಚಿದ್ದು -  2 ಚಮಚ ,
 ಈರುಳ್ಳಿ ಉದ್ದುದ್ದಕ್ಕೆ ಸೀಳಿದ್ದು - 1,
 ಕ್ಯಾಪ್ಸಿಕಮ್ 1”ಉದ್ದ ಕತ್ತರಿಸಿದ್ದು -  ¼ ಕಪ್,
 ಕೊತ್ತ೦ಬರಿ ಸೊಪ್ಪು ಸಣ್ಣಗೆ ಹೆಚ್ಚಿದ್ದು - 2 ಚಮಚ ,
 ಚಕ್ಕೆ - 1”, ಧನಿಯಾ -  2 ಚಮಚ ,
 ಜೀರಿಗೆ - 2 ಚಮಚ,
 ಕೆ೦ಪು ಮೆಣಸು 5-6,
 ಚಿಲ್ಲಿ ಸಾಸ್ 1 ಚಮಚ,
ಸೋಯಾ ಸಾಸ್ 1 ಚಮಚ,
 ನಿ೦ಬೆ ರಸ 2 ಚಮಚ,
 ಗರ೦ ಮಸಾಲ ಪೌಡರ್ ½ ಚಮಚ ,
 ಎಣ್ಣೆ 3-4 ಚಮಚ, ಉಪ್ಪು ರುಚಿಗೆ ತಕ್ಕಷ್ಟು.




ವಿಧಾನ: ಅಕ್ಕಿಯನ್ನು ಉದುರುದುರಾಗಿ ಅನ್ನ ಮಾಡಿಕೊಳ್ಳಿ. ಧನಿಯಾ, ಜೀರಿಗೆ, ಕೆ೦ಪು ಮೆಣಸು, ಚಕ್ಕೆ ಇವನ್ನು ಸಣ್ಣ ಉರಿಯಲ್ಲಿ ಹುರಿದುಕೊ೦ಡು ಅದು ಬಿಸಿ ಆರಿದ ಮೇಲೆ ಮಿಕ್ಸಿಯಲ್ಲಿ ಪೌಡರ್ ಮಾಡಿ ಇಟ್ಟುಕೊಳ್ಳಿ. ಬಾಣಲೆಗೆ 2 ಚಮಚ ಎಣ್ಣೆ ಹಾಕಿ ಈರುಳ್ಳಿ, ಕ್ಯಾರೆಟ್, ಕ್ಯಾಪ್ಸಿಕಮ್, ಬೀನ್ಸ್ ಇವಲ್ಲ ಹಾಕಿ ಉಪ್ಪು ಹಾಕಿ ಅರ್ಧ ಬೇಯುವವರೆಗೆ ಕೈಯಾಡಿಸುತ್ತಿರಿ. ನ೦ತರ ಅದಕ್ಕೆ ಗರ೦ ಮಸಾಲ ಪೌಡರ್, ಸೊಯಾ ಸಾಸ್, ಚಿಲ್ಲಿ ಸಾಸ್, ಲಿ೦ಬು ರಸ, ಹಾಕಿ ಮತ್ತೆ 5 ನಿಮಿಷ ಫ್ರೈ ಮಾಡಿ. ಈಗ ಅನ್ನ ಹಾಕಿ ಸರಿಯಾಗಿ ಮಿಶ್ರಣ ಮಾಡಿ. ಉಪ್ಪು ನೋಡಿಕೊ೦ಡು ಬೇಕಾದಲ್ಲಿ ಸೇರಿಸಿ.ಮೇಲೆ ಬಾದಾಮಿ ಚೂರುಗಳು & ಹೆಚ್ಚಿದ ಕೊತ್ತ೦ಬರಿ ಸೊಪ್ಪನ್ನು ಉದುರಿಸಿ.

(ಬೊ೦ಬಾಟ್ ಭೋಜನ ನೋಡಿ ಕಲಿತಿದ್ದು)

ಶುಕ್ರವಾರ, ಮಾರ್ಚ್ 3, 2017

ತವಾ ಪುಲಾವ್ (ಬಾಂಬೆ ಸ್ಟೈಲ್):

ಸಾಮಗ್ರಿಗಳು:
ಅಕ್ಕಿ : 1.5 ಕಪ್1/2
ಸಣ್ಣ ಹೆಚ್ಚಿದ ಟೊಮೇಟೊ : 3/4 ಕಪ್
ಸಣ್ಣ ಹೆಚ್ಚಿದ ಈರುಳ್ಳಿ : 1/2 ಕಪ್ 
ಸಣ್ಣ ಹೆಚ್ಚಿದ ಕ್ಯಾಪ್ಸಿಕಂ : 1/2 ಕಪ್
ಉದ್ದುದ್ದ ಹೆಚ್ಚಿದ ಕ್ಯಾರೆಟ್ : 1/4 ಕಪ್
ಹಸಿ ಬಟಾಣಿ : 1/2 ಕಪ್
ಹೆಚ್ಚಿದ ಆಲೂಗಡ್ಡೆ : 1/4 ಕಪ್
ಉದ್ದ ಹೆಚ್ಚಿದ ಬೀನ್ಸ್ (ಬೇಕಿದ್ದಲ್ಲಿ ಮಾತ್ರ) : 1/4 ಕಪ್
ಪಾವ್ ಭಾಜಿ ಮಸಾಲಾ ಪೌಡರ್  (Everest) : 1 ಟೇಬಲ್ ಚಮಚ
ಅಚ್ಚ ಖಾರದ ಪುಡಿ : 1/2 ಚಮಚ
ಶುಂಠಿ ಬೆಳ್ಳುಳ್ಳಿ ಪೇಸ್ಟ್ : 1/2 ಚಮಚ
ಹೆಚ್ಚಿದ ಕೊತ್ತಂಬರಿ ಸೊಪ್ಪು : 1 ಚಮಚ
ಬೆಣ್ಣೆ : 3-4 ಟೇಬಲ್ ಚಮಚ
ಜೀರಿಗೆ : 1/2 ಚಮಚ
ಉಪ್ಪು : ರುಚಿಗೆ ತಕ್ಕಷ್ಟು

ವಿಧಾನ :
ಅಕ್ಕಿಯನ್ನು ತೊಳೆದು ಉದುರುದುರಾಗಿ ಅನ್ನ ಮಾಡಿಕೊಳ್ಳಿ. ಟೊಮೇಟೊ, ಈರುಳ್ಳಿ, ಕ್ಯಾಪ್ಸಿಕಂ ಹೊರತುಪಡಿಸಿ ಉಳಿದೆಲ್ಲಾ ತರಕಾರಿ ಮತ್ತು ಹಸಿ ಬಟಾಣಿಯನ್ನು ನೀರು ಸ್ವಲ್ಪವೇ ಉಪ್ಪು ಹಾಕಿ ಬೇಯಿಸಿ ನೀರು ಬಸಿದುಕೊಳ್ಳಿ. ಬಾಣಲೆಗೆ ಬೆಣ್ಣೆ ಹಾಕಿ ಕರಗಿದ ಮೇಲೆ ಜೀರಿಗೆ ಹಾಕಿ ಹುರಿದು ಅದಕ್ಕೆ ಈರುಳ್ಳಿ ಹಾಕಿ ಸ್ವಲ್ಪ ಫ್ರೈ ಮಾಡಿ ನಂತರ ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಹಾಕಿ ಫ್ರೈ ಮಾಡಿ. ಈಗ ಟೊಮೇಟೊ, ಸ್ವಲ್ಪ ಉಪ್ಪು ಹಾಕಿ ಚೆನ್ನಾಗಿ ಮೆತ್ತಗಾಗುವ ತನಕ ಫ್ರೈ ಮಾಡಿ. ಇದಕ್ಕೆ ಕ್ಯಾಪ್ಸಿಕಂ ಹಾಕಿ ಒಂದು ನಿಮಿಷ ಫ್ರೈ ಮಾಡಿಕೊಂಡು ಪಾವ್ ಭಾಜಿ ಮಸಾಲಾ ಪೌಡರ್, ಅಚ್ಚ ಖಾರದ ಪುಡಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ, ಬೇಯಿಸಿದ ತರಕಾರಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಸ್ವಲ್ಪ ಉಪ್ಪು ಬೇಕಿದ್ದಲ್ಲಿ ಹಾಕಿ, ಕೊತ್ತಂಬರಿ ಸೊಪ್ಪು ಹಾಕಿ ಮಿಕ್ಸ್ ಮಾಡಿ ಉರಿ ಆರಿಸಿ.

 ಇದಕ್ಕೆ ಉದುರುದುರಾಗಿ ಮಾಡಿಕೊಂಡ ಅನ್ನ ಹಾಕಿ ಚೆನ್ನಾಗಿ ಕಲಸಿದರೆ ಮುಂಬೈ ನ ಫೇಮಸ್ ತವಾ ಪುಲಾವ್ ಸಿದ್ಧ......


ಸಲಹೆಗಳು :
1.ಅನ್ನ ಮಾಡುವಾಗ ಸ್ವಲ್ಪ ಉಪ್ಪು ಹಾಕಿ ಬೇಯಿಸಬಹುದು. ಇದರಿಂದ ಅನ್ನಕ್ಕೆ ಉಪ್ಪು ಚೆನ್ನಾಗಿ ಅಂಟುತ್ತದೆ. 
2.ಪ್ರತಿ ಹಂತದಲ್ಲೂ ಉಪ್ಪು ಹಾಕುವುದರಿಂದ ಕೊನೆಯಲ್ಲಿ ಉಪ್ಪು ಹಾಕುವಾಗ ನೋಡಿಕೊಳ್ಳಿ.
3.ಟೊಮೇಟೊ, ಈರುಳ್ಳಿ, ಹಸಿಬಟಾಣಿ, ಆಲೂ, ಕಾಪ್ಸಿಕಂ ಬೇಕೇ ಬೇಕು. ಉಳಿದಂತೆ ನಿಮ್ಮಿಷ್ಟದ ತರಕಾರಿ ಹಾಕಬಹುದು 


ಶುಕ್ರವಾರ, ಫೆಬ್ರವರಿ 24, 2017

ಮೊಳಕೆ ಕಾಳಿನ ಮಸಾಲಾ ಸಾ೦ಬಾರ್:

ಸಾಮಗ್ರಿಗಳು : 
ಮೊಳಕೆ ಕಾಳು - 1 ಕಪ್(ಹೆಸರುಕಾಳು, ಹುರುಳಿ, ಕಡಲೆ),
ಈರುಳ್ಳಿ - 1, 
ಟೊಮ್ಯಾಟೊ - 1, 
ತೆ೦ಗಿನತುರಿ - 1/2 ಕಪ್, 
ಬೆಳ್ಳುಳ್ಳಿ - 5-6 ಎಸಳು,
ಶು೦ಟಿ - 1"
ಅಚ್ಚಖಾರದ ಪುಡಿ  - 2 ಚಮಚ (ಒಣಮೆಣಸು - 5)
ಕೊತ್ತ೦ಬರಿ ಸೊಪ್ಪು - 2 ಗಿಡ, 
ಚಕ್ಕೆ - 1", ಲವ೦ಗ - 2.
ಎಣ್ಣೆ - 3 ಚಮಚ
ಸಾಸಿವೆ - 1/2 ಚಮಚ , ಕರಿಬೇವು - 6-7, 
ಉಪ್ಪು ರುಚಿಗೆ ತಕ್ಕಷ್ಟು

ವಿಧಾನ: ಒ೦ದು ಬಾಣಲೆಗೆ ಸ್ವಲ್ಪ ಎಣ್ಣೆ ಹಾಕಿ ಒಣ ಮೆಣಸು (ಒಣಮೆಣಸಿನ ಬದಲು ಅಚ್ಚ ಖಾರದ ಪುಡಿ ಹಾಕಬಹುದು) ಹುರಿದುಕೊಳ್ಳಿ. ತೆ೦ಗಿನತುರಿ, ಬೆಳ್ಳುಳ್ಳಿ, ಶು೦ಟಿ, ಕೊತ್ತ೦ಬರಿ ಸೊಪ್ಪು, ಚಕ್ಕೆ, ಲವ೦ಗ, ಹುರಿದ ಒಣ ಮೆಣಸು ಹಾಕಿ ಸಲ್ಪ ನೀರು ಹಾಕಿ ರುಬ್ಬಿಕೊಳ್ಳಿ. ಈಗ ಕುಕ್ಕರ್ ಗೆ 2 ಚಮಚ ಎಣ್ಣೆ ಹಾಕಿ ಅದು ಕಾದ ಮೇಲೆ ಸಾಸಿವೆ, ಕರಿಬೇವು ಹಾಕಿ ನ೦ತರ ಹೆಚ್ಚಿಟ್ಟ ಈರುಳ್ಳಿ & ಟೊಮ್ಯಾಟೊ ಹಾಕಿ ಸ್ವಲ್ಪ ಬಾಡಿಸಿ ನ೦ತರ ರುಬ್ಬಿಟ್ಟ ಮಸಾಲೆ ಹಾಕಿ 5 ನಿಮಿಷ ಫ್ರೈ ಮಾಡಿ ಹಾಗೆ ಉಪ್ಪು ಮೊಳಕೆ ಕಾಳುಗಳನ್ನು ಹಾಕಿ ನೀರು ಹಾಕಿ ಕುಕ್ಕರ್ ಮುಚ್ಚಳ ಮುಚ್ಚಿ 2  ವಿಶಲ್ ಕೂಗಿಸಿ. ಈಗ ಬಿಸಿ ಬಿಸಿಯಾದ ಮೊಳಕೆಕಾಳಿನ ಮಸಾಲಾವನ್ನು ಚಪಾತಿ, ಪುಲ್ಕ, ಅನ್ನದ ಜೊತೆ ಸರ್ವ ಮಾಡಿ.

ಶುಕ್ರವಾರ, ಫೆಬ್ರವರಿ 17, 2017

ಹಸಿ ಬಟಾಣಿ ಖೀರು :

ಸಾಮಗ್ರಿಗಳು :
ಎಳೆಯ ಹಸಿಬಟಾಣಿ : 1 ಕಪ್
ಹಾಲು: 2.5 - 3 ಕಪ್
ಸಪ್ಪೆ ಖೋವಾ : 3-4 ಚಮಚ
ಸಕ್ಕರೆ : 3/4 ಕಪ್
ಏಲಕ್ಕಿ ಪುಡಿ : ಒಂದು ಚಿಟಿಕೆ (ಅಥವಾ ವೆನಿಲ್ಲಾ ಎಸೆನ್ಸ್ 3-4 ಹನಿ)

ವಿಧಾನ :
ಹಸಿ ಬಟಾಣಿಯನ್ನು ಕುಕ್ಕರ್ ನಲ್ಲಿ ಬೇಯಿಸಿ ಸ್ವಲ್ಪ ಮಸೆದುಕೊಳ್ಳಿ. ಹಾಲನ್ನು ಕಾಯಿಸಿ 10-15 ನಿಮಿಷ ಸಣ್ಣ ಉರಿಯಲ್ಲಿ ಕುದಿಸಿ. ಆಗ ಹಾಲು ಸ್ವಲ್ಪ ದಪ್ಪಗಾಗುತ್ತದೆ. ಅದಕ್ಕೆ ಖೋವಾ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಸಕ್ಕರೆ ಹಾಕಿ ಮಸೆದುಕೊಂಡ ಬಟಾಣಿ, ಏಲಕ್ಕಿ ಪುಡಿ / ವೆನಿಲ್ಲಾ ಎಸೆನ್ಸ್ ಹಾಕಿ ಚೆನ್ನಾಗಿ ಕುದಿಸಿ.

 ಸಿಹಿ ಸವಿ ಖೀರು ಮಕ್ಕಳಿಗೆ ಒಳ್ಳೆಯ ಆಹಾರ. ದೊಡ್ಡವರೂ ಇಷ್ಟ ಪಡುತ್ತಾರೆ .......


ಸಲಹೆ :
1) ಇದಕ್ಕೆ condensed milk ಕೂಡ ಹಾಕಬಹುದು.
2) ಇದೇ ರೀತಿ ಸ್ವೀಟ್ ಕಾರ್ನ್ ಖೀರು ಕೂಡ ಚೆನ್ನಾಗಿರುತ್ತದೆ. 

ಭಾನುವಾರ, ಫೆಬ್ರವರಿ 12, 2017

ಸಿಹಿ ಕು೦ಬಳ (ಗೋವೆಕಾಯಿ) ಕಡುಬು:

ಸಾಮಗ್ರಿಗಳು: 
ಅಕ್ಕಿ - 1 ಕಪ್, 
ಬೆಲ್ಲ - 1/2 ಕಪ್, 
ಸಿಹಿ ಕು೦ಬಳ ಸಿಪ್ಪೆ ತೆಗೆದು ಹೆಚ್ಚಿದ್ದು - 1 ಕಪ್,
ಉಪ್ಪು - 1/2 ಚಮಚ.
ತೆ೦ಗಿನ ತುರಿ - 2-3 ಚಮಚ





ವಿಧಾನ: ಅಕ್ಕಿಯನ್ನು 3 ಗ೦ಟೆ ನೆನೆಸಿಟ್ಟುಕೊಳ್ಳಿ. ನ೦ತರ ಇದನ್ನು ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ಹೆಚ್ಚಿಟ್ಟುಕೊ೦ಡ ಸಿಹಿ ಕು೦ಬಳಕ್ಕೆ ಉಪ್ಪು, ಬೆಲ್ಲ ಸ್ವಲ್ಪ ನೀರು ಹಾಕಿ 10-15 ನಿಮಿಷ ಬೇಯಿಸಿ. ನ೦ತರ ಉರಿ ಸಣ್ಣ ಮಾಡಿ ರುಬ್ಬಿಟ್ಟ ಅಕ್ಕಿ ಹಿಟ್ಟನ್ನು ಹಾಕಿ ಗ೦ಟಾಗದ೦ತೆ ಕಲೆಸುತ್ತಾ ಇರಬೇಕು. 10 ನಿಮಿಷ ಬಿಡದೆ ಕಲಸಿ, ಉರಿ ಆರಿಸಿ. ಬಿಸಿ ಆರಿದ ಮೇಲೆ ಬಾಳೆ ಎಲೆಗೆ ಸ್ವಲ್ಪ ನೀರು ಹಾಕಿ ವರೆಸಿಕೊ೦ಡು ಹಿಟ್ಟನ್ನು ತೆಳ್ಳಗೆ ತಟ್ಟಿ ಅದರ ಮೇಲೆ ತೆ೦ಗಿನ ತುರಿ ಉದುರಿಸಿ. ನ೦ತರ ಬಾಳೆ ಎಲೆಯನ್ನು ಮಡಿಸಿ ಇಡ್ಲಿ ಪಾತ್ರೆಯಲ್ಲಿ ಹಾಕಿ 45 ನಿಮಿಷ  ಬೇಯಿಸಿ. ಈಗ ಬಿಸಿ ಬಿಸಿ ಸಿಹಿಕು೦ಬಳದ ಕಡುಬು ತಿನ್ನಲು ಸಿದ್ಧ. ಇದಕ್ಕೆ ತುಪ್ಪ ಅಥವಾ ಗಟ್ಟಿ ಮೊಸರು ಹಾಕಿಕೊ೦ಡು ತಿನ್ನಲು ಚೆನ್ನಾಗಿರುತ್ತದೆ.


ಇದು ದೀಪಾವಳಿ ಹಬ್ಬದ ವಿಶೇಷ ಸಿಹಿ.

ಸೋಮವಾರ, ಫೆಬ್ರವರಿ 6, 2017

ಹಸಿ ಬಟಾಣಿ ರೊಟ್ಟಿ :

ಸಾಮಗ್ರಿಗಳು :
ಹಸಿ ಬಟಾಣಿ (green peas) : 1 ಕಪ್
ಅಕ್ಕಿ ಹಿಟ್ಟು : 2 ಕಪ್
ಜೀರಿಗೆ :1೧ ಚಮಚ
ಕೊತ್ತಂಬರಿ ಸೊಪ್ಪು : 2-3 ಚಮಚ (ಸಣ್ಣಗೆ ಹೆಚ್ಚಿದ್ದು)
ತೆಂಗಿನ ತುರಿ : 3-4 ಚಮಚ
ಹಸಿಮೆಣಸಿನ ಕಾಯಿ ಸಣ್ಣಗೆ ಹೆಚ್ಚಿದ್ದು : 1 ಚಮಚ (ಅಥವಾ ಅಚ್ಚ ಮೆಣಸಿನ ಪುಡಿ - 1 ಚಮಚ) 
ಉಪ್ಪು : ರುಚಿಗೆ 
ಎಣ್ಣೆ : ಬೇಯಿಸಲು 
ಬಾಳೆ ಎಲೆ  ಅಥವಾ ಒಬ್ಬಟ್ಟಿನ ಶೀಟ್ ರೊಟ್ಟಿ ತಟ್ಟಲು 

ವಿಧಾನ :
ಹಸಿ ಬಟಾಣಿ ತೊಳೆದು,  ನೀರು ಹಾಕಿ ಬೇಯಿಸಿಕೊಂಡು, ನೀರು ಬಸಿದುಕೊಳ್ಳಿ.  ದಪ್ಪ ತಳದ ಪಾತ್ರೆ ಅಥವಾ ಬಾಣಲೆಗೆ 2 ಕಪ್ ನೀರು ಹಾಕಿ ಅದಕ್ಕೆ ಉಪ್ಪು, ಜೀರಿಗೆ ಹಾಕಿ ಕುದಿಯಲು ಬಿಡಿ. ನಂತರ ಒಂದು ಸೌಟಿನಷ್ಟು ಅಕ್ಕಿಹಿಟ್ಟು ಹಾಕಿ ಗಂಟಿಲ್ಲದೆ ಕಲಕಿ ಉಳಿದ ಅಕ್ಕಿಹಿಟ್ಟನ್ನು ಹಾಕಿ ಚೆನ್ನಾಗಿ ಕಲಕಿ ಉರಿ ಆರಿಸಿ. ಸ್ವಲ್ಪ ತಣ್ಣಗಾದ ಮೇಲೆ (ಕೈ ಇಂದ ಹಿಟ್ಟನ್ನು ಕಲೆಸಲು ಆಗುವಷ್ಟು) ಇದಕ್ಕೆ ಬೇಯಿಸಿದ ಬಟಾಣಿ, ತೆಂಗಿನ ತುರಿ, ಹಸಿಮೆಣಸು/ ಅಚ್ಚ ಖಾರದ ಪುಡಿ, ಕೊತ್ತಂಬರಿ ಸೊಪ್ಪು ಹಾಕಿ ಚೆನ್ನಾಗಿ ಕಲಸಿ. ಹಿಟ್ಟು ರೊಟ್ಟಿ ತಟ್ಟುವಷ್ಟು ಮೆತ್ತಗಿರಬೇಕು. ಗಟ್ಟಿ ಎನಿಸಿದರೆ ಸ್ವಲ್ಪ ಬಿಸಿ ನೀರು ಹಾಕಿ ಕಲಸಿಕೊಳ್ಳಿ. ನಂತರ ಒಬ್ಬಟ್ಟಿನ ಶೀಟ್ ಗೆ ಎಣ್ಣೆ ಸವರಿ, ಕಲಸಿದ ಹಿಟ್ಟಿನಿಂದ  ಚಪಾತಿ ಉಂಡೆ ಗಾತ್ರದ ಉಂಡೆ ಮಾಡಿ ಶೀಟ್ ಮೇಲೆ ತಟ್ಟಿ. ಬಾಳೆ ಎಲೆ ಇದ್ದರೆ ಅದನ್ನು ಸೀಳಿಕೊಂಡು ಸ್ವಲ್ಪ ಬೆಂಕಿಯಲ್ಲಿ ಬಾಡಿಸಿ ಎಣ್ಣೆ ಸವರಿ ರೊಟ್ಟಿ ತಟ್ಟಬಹುದು. ಈಗ ಕಾದ ತವಾ ಮೇಲೆ ತಟ್ಟಿದ ರೊಟ್ಟಿ ಹಾಕಿ ಎಣ್ಣೆ ಹಾಕಿ ಮುಚ್ಚಳ ಮುಚ್ಚಿ ಎರಡೂ ಕಡೆ ಬೇಯಿಸಿ.



ಸೂಚನೆಗಳು :
೧) ಬಟಾಣಿ ತುಂಬಾ ಬಲಿತಿದ್ದರೆ ಚೆನ್ನಾಗಿರುವುದಿಲ್ಲ. ಸ್ವಲ್ಪ ಎಳೆಯದಾಗೇ  ಇರಲಿ.
೨) ಇದೇ ರೀತಿ ಹಿತುಕಿದ ಅವರೇಕಾಳು ಹಾಕಿ ರೊಟ್ಟಿ ಮಾಡಬಹುದು. 


ಶುಕ್ರವಾರ, ಜನವರಿ 27, 2017

ಸಬ್ಬಸಿಗೆ ಸೊಪ್ಪಿನ ಅನ್ನ:

ಸಾಮಗ್ರಿಗಳು:  
ಅನ್ನ - 1 ದೊಡ್ಡ ಕಪ್, 
ಹೆಚ್ಚಿಟ್ಟ ಸಬ್ಬಸಿಗೆ ಸೊಪ್ಪು - 1/2 ಕಪ್, 
ಲಿ೦ಬು ರಸ - 2 ಚಮಚ, 
ಹಸಿ ಮೆಣಸು - 3, 
ಈರುಳ್ಳಿ - 1 (ಚಿಕ್ಕದು),
ಸಾಸಿವೆ, ಜೀರಿಗೆ-  ತಲಾ 1/2 ಟೀ ಚಮಚ,
ಅರಿಶಿನ ಪುಡಿ - 1/4 ಟೀ ಚಮಚ,
ಎಣ್ಣೆ - 2-3 ಚಮಚ, 
ಸಕ್ಕರೆ- 1/2 ಚಮಚ, ಉಪ್ಪು ರುಚಿಗೆ ತಕ್ಕಷ್ಟು.



ವಿಧಾನ : ಉದುರುದುರಾಗಿ ಅನ್ನ ಮಾಡಿಟ್ಟುಕೊಳ್ಳಿ. ಸಬ್ಬಸಿಗೆ ಸೊಪ್ಪನ್ನು ತೊಳೆದುಕೊ೦ಡು ಸಣ್ಣಗೆ ಹೆಚ್ಚಿಟ್ಟುಕೊಳ್ಳಿ. ಈರುಳ್ಳಿಯನ್ನು ಹೆಚ್ಚಿಟ್ಟುಕೊಳ್ಳಬೇಕು. ಬಾಣಲೆಗೆ ಎಣ್ಣೆ ಹಾಕಿ ಅದು ಕಾದ ಮೇಲೆ ಸಾಸಿವೆ, ಜೀರಿಗೆ, ಕರಿಬೇವು, ಹಸಿ ಮೆಣಸು ಹಾಕಿ ಅಮೇಲೆ ಹೆಚ್ಚಿಟ್ಟ ಈರುಳ್ಳಿ ಹಾಕಿ ಫ್ರೈ ಮಾಡಿ ನ೦ತರ ಹೆಚ್ಚಿಟ್ಟ ಸಬ್ಬಸಿಗೆ ಸೊಪ್ಪು ಉಪ್ಪು ಹಾಕಿ 7-8 ನಿಮಿಷ ಬೇಯಿಸಿ ಕೊನೆಯಲ್ಲಿ ಲಿ೦ಬು ರಸ ಹಾಕಿ ಉರಿ ಆರಿಸಿ. ಈಗ ಅನ್ನವನ್ನು ಸೇರಿಸಿ. ರುಚಿ ನೋಡಿಕೊ೦ಡು ಬೇಕಾದಲ್ಲಿ ಉಪ್ಪು ಹುಳಿ ಸೇರಿಸಬಹುದು.

ಶುಕ್ರವಾರ, ಜನವರಿ 20, 2017

ಸಾಂಬಾರ್ ಭಾಜಿ : (Using leftover Sambar)

ಊಟಕ್ಕೆಂದು ಮಾಡಿದ ಸಾಂಬಾರ್ ಹೆಚ್ಚು ಉಳಿದು ಬಿಟ್ಟರೆ ಮತ್ತೆ ಅದನ್ನೇ ಮರುದಿನ ಊಟಕ್ಕೆ ತಿನ್ನಲು ಬೇಜಾರು, ಚೆಲ್ಲಲೂ ಮನಸ್ಸು ಬಾರದು.... ಅಂಥ ಸಮಯದಲ್ಲಿ ಅದನ್ನೇ ಸ್ವಲ್ಪ ರುಚಿ ಬದಲಿಸಿ ಮರುದಿನ ಬೆಳಿಗ್ಗೆಯ ಉಪಹಾರದ ದೋಸೆ ಅಥವಾ ಚಪಾತಿ ಜೊತೆ ತಿನ್ನಬಹುದು.... 
ಸಾಮಗ್ರಿಗಳು:
ಉಳಿದ ಸಾಂಬಾರ್ : 2 ಕಪ್ 
ಈರುಳ್ಳಿ : 2
ಬೆಳ್ಳುಳ್ಳಿ : 4-5 ಎಸಳು 
ತೆಂಗಿನ ತುರಿ : 2-3 ಚಮಚ 
ಸಕ್ಕರೆ: 1/2 ಚಮಚ 
ಹಸಿಮೆಣಸಿನ ಕಾಯಿ : 1-2
ತುಪ್ಪ : 2 ಚಮಚ 
ಎಣ್ಣೆ :1 ಚಮಚ (Optional) 
ಸಾಸಿವೆ : 1/2 ಚಮಚ 

ವಿಧಾನ :
ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಬೆಳ್ಳುಳ್ಳಿ ಸಿಪ್ಪೆ ತೆಗೆದು ಜಜ್ಜಿಕೊಳ್ಳಿ ಮತ್ತು ಹಸಿಮೆಣಸಿನ ಕಾಯಿಯನ್ನು ಉದ್ದುದ್ದ ಸೀಳಿಕೊಳ್ಳಿ. ಬಾಣಲೆಗೆ ತುಪ್ಪ ಮತ್ತು ಎಣ್ಣೆ ಹಾಕಿ ಕಾಯಿಸಿ ಅದಕ್ಕೆ ಸಾಸಿವೆ ಹಾಕಿ ಚಿಟಪಟಾಯಿಸಿ, ಹಸಿಮೆಣಸಿನ ಕಾಯಿ ಹಾಕಿ ಫ್ರೈ ಮಾಡಿ. ಜಜ್ಜಿದ ಬೆಳ್ಳುಳ್ಳಿ ಹಾಕಿ ಸ್ವಲ್ಪ ಹುರಿದು, ಹೆಚ್ಚಿದ ಈರುಳ್ಳಿ ಹಾಕಿ ಚೆನ್ನಾಗಿ ಹುರಿಯಿರಿ. ನಂತರ ಸಾಂಬಾರ್, ಸಕ್ಕರೆ, ತೆಂಗಿನ ತುರಿ ಬೇಕಿದ್ದಲ್ಲಿ ಸ್ವಲ್ಪ ಕೊತ್ತಂಬರಿ ಸೊಪ್ಪು ಹಾಕಿ ಕುದಿಸಿ. ಬಿಸಿ ಬಿಸಿ ಸಾಂಬಾರ್ ಭಾಜಿ ದೋಸೆಯ ಜೊತೆ ಬಲು ರುಚಿ. ಚಪಾತಿಯ ಜೊತೆಯೂ ತಿನ್ನಬಹುದು.