ಶುಕ್ರವಾರ, ಸೆಪ್ಟೆಂಬರ್ 1, 2017

ಕ್ಯಾರಟ್ - ಪಾಲಕ್ ಸೂಪ್ :

 ಸಾಮಗ್ರಿಗಳು :
ಕ್ಯಾರಟ್ : ಚಿಕ್ಕದು 1
ಆಲೂಗಡ್ಡೆ : ಚಿಕ್ಕದು 1 
ಈರುಳ್ಳಿ : ಚಿಕ್ಕದು 1
ಪಾಲಕ್ : 2-3 ಎಲೆಗಳು 
ಬೆಣ್ಣೆ : 1 ಚಮಚ 
ಪೆಪ್ಪರ್ ಪುಡಿ : 1/4 ಚಮಚ 
ಲಿಂಬು ರಸ : 1/4 ಚಮಚ 
ಉಪ್ಪು : ರುಚಿಗೆ ತಕ್ಕಷ್ಟು 

ವಿಧಾನ :
ಕ್ಯಾರಟ್ ಮತ್ತು ಆಲೂಗಡ್ಡೆ ಸಿಪ್ಪೆ ತೆಗೆದು ದೊಡ್ಡ ಹೋಳು ಮಾಡಿಕೊಳ್ಳಿ. ಮುಕ್ಕಾಲು ಭಾಗ ಈರುಳ್ಳಿಯನ್ನು ದೊಡ್ಡದಾಗಿ ಹೆಚ್ಚಿಕೊಳ್ಳಿ. ಹೆಚ್ಚಿದ ಕ್ಯಾರಟ್, ಆಲೂ, ಈರುಳ್ಳಿಯನ್ನು ಕುಕ್ಕರ್ ನಲ್ಲಿ ಬೇಯಿಸಿಕೊಳ್ಳಿ (ಮಧ್ಯಾಹ್ನ ಅನ್ನ ಮಾಡುವಾಗ ಇದನ್ನೂ ಬೇಯಿಸಿಟ್ಟುಕೊಂಡು ಸಾಯಂಕಾಲ ಮಗುವಿಗೆ ಸೂಪ್ ಮಾಡಿಕೊಡಬಹುದು). ಉಳಿದ ಈರುಳ್ಳಿ ಯನ್ನು ತುಂಬಾ ಸಣ್ಣಗೆ ಹೆಚ್ಚಿಕೊಳ್ಳಿ ಮತ್ತು ಪಾಲಕ್ ಎಲೆಗಳನ್ನು ಚೆನ್ನಾಗಿ ತೊಳೆದು ಸಣ್ಣಗೆ ಹೆಚ್ಚಿಕೊಳ್ಳಿ. ಬೇಯಿಸಿದ ತರಕಾರಿಗಳನ್ನು ಮಿಕ್ಸಿಗೆ ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ದಪ್ಪ ತಳದ ಪಾತ್ರೆಯಲ್ಲಿ ಬೆಣ್ಣೆ ಕಾಯಿಸಿ ಅದಕ್ಕೆ ಪೆಪ್ಪರ್ ಪುಡಿ ಹಾಕಿ ತಕ್ಷಣ ಹೆಚ್ಚಿದ ಈರುಳ್ಳಿ ಹಾಕಿ ಸ್ವಲ್ಪ ಫ್ರೈ ಮಾಡಿ. ನಂತರ ಹೆಚ್ಚಿದ ಪಾಲಕ್ ಹಾಕಿ ಫ್ರೈ ಮಾಡಿ. ಈಗ ರುಬ್ಬಿದ ಮಿಶ್ರಣ ಹಾಕಿ, ಎಷ್ಟು ದಪ್ಪ ಬೇಕು ನೋಡಿಕೊಂಡು ನೀರು ಹಾಕಿ. ಉಪ್ಪು ಹಾಕಿ ಒಂದು ಕುದಿ  ಕುದಿಸಿ. ಲಿಂಬು ರಸ ಹಾಕಿ ಉರಿ ಆರಿಸಿ. ಮಕ್ಕಳ ವಯಸ್ಸಿಗನುಗುಣವಾಗಿ ಬೆಚ್ಚಗಿನ ಸೂಪ್ ಅನ್ನು ಸವಿಯಲು ಕೊಡಿ. 


ಸಲಹೆಗಳು :
1) ಒಂದೂವರೆ  ವರ್ಷ ಮೇಲ್ಪಟ್ಟ ಅಥವಾ ಹಲ್ಲು ಬಂದ ಎಲ್ಲ ಶಿಶು / ಮಕ್ಕಳಿಗೆ ಕೊಡಬಹುದು. ಮಕ್ಕಳಷ್ಟೇ ಅಲ್ಲದೇ ದೊಡ್ಡವರೂ ಇಷ್ಟ ಪಡುವಂಥ ಸೂಪ್ ಇದು. ಅಲ್ಲದೇ ಗರ್ಭಿಣಿಯರಿಗೂ ಆರೋಗ್ಯಕರ. 
2) ಮಕ್ಕಳಿಗೆ ಮಾಡುವಾಗ ಹಿಂದಿನ ದಿನ ಬೇಯಿಸಿ ಫ್ರಿಡ್ಜ್ ನಲ್ಲಿಟ್ಟ ತರಕಾರಿಗಳನ್ನು ಬಳಸಬೇಡಿ. 

ಶುಕ್ರವಾರ, ಆಗಸ್ಟ್ 18, 2017

ವೆಜ್ ಪೊಂಗಲ್ / ವೆಜ್ ಕಿಚಡಿ :

ಒಂದು ವರ್ಷ ಮೇಲ್ಪಟ್ಟ ಮಕ್ಕಳಿಗೆ ಆರೋಗ್ಯಕರ ಆಹಾರ ಇದು. ಮಾಡಿಕೊಡುವುದೂ ಸುಲಭ ಜೊತೆಗೆ ಮಕ್ಕಳ ಹೊಟ್ಟೆಯನ್ನೂ ತಂಪಾಗಿರಿಸುತ್ತದೆ.  ಸಾಯಂಕಾಲ ಮಕ್ಕಳು ನಿದ್ದೆಯಿಂದ ಎದ್ದ ಮೇಲೆ ಮಾಡಿಕೊಡಲು ಒಳ್ಳೆಯ ಆಹಾರ. ಆದ್ದರಿಂದ ಮಧ್ಯಾಹ್ನದ ಊಟಕ್ಕೆ ಕುಕ್ಕರ್ ಇಡುವಾಗಲೇ ಅಕ್ಕಿ ಬೇಳೆಯನ್ನು ಬೇಯಿಸಿಟ್ಟುಕೊಂಡುಬಿಟ್ಟರೆ ಮಗು ಎದ್ದ ಕೂಡಲೇ ಬಿಸಿ ಬಿಸಿಯಾಗಿ ಮಾಡಿಕೊಡಬಹುದು. ಅಥವಾ ಪುಟ್ಟ ಕುಕ್ಕರ್ ನಲ್ಲಿ ಸಾಯಂಕಾಲವೇ ಮಾಡಬಹುದು.  ಆದರೆ ನೆನಪಿಡಿ ಮಕ್ಕಳಿಗೆ ಮಾಡುವಾಗ ಹಿಂದಿನ ದಿನ ಬೇಯಿಸಿಟ್ಟ ಆಹಾರಗಳನ್ನು ಮತ್ತು ದಿನಗಟ್ಟಲೇ ಫ್ರಿಡ್ಜ್ ನಲ್ಲಿಟ್ಟ ಆಹಾರಗಳನ್ನು ಹಾಕಬೇಡಿ ತಾಜಾ ಮಾಡಿಕೊಟ್ಟರೆ ಒಳ್ಳೆಯದು.

ಸಾಮಗ್ರಿಗಳು :
ಅಕ್ಕಿ : 1/4 ಕಪ್
ಹೆಸರು ಬೇಳೆ : 1/4 ಕಪ್ ಅಥವಾ ಅದಕ್ಕಿಂತ 1-2 ಚಮಚ ಜಾಸ್ತಿ
ತುಂಬಾ ಸಣ್ಣಗೆ ಹೆಚ್ಚಿದ ಬೀನ್ಸ್ : 1-2 ಚಮಚ
ತುರಿದ ಕ್ಯಾರಟ್ : 2 ಚಮಚ
ತುಂಬಾ ಸಣ್ಣಗೆ ಹೆಚ್ಚಿದ ಈರುಳ್ಳಿ : 1 ಚಮಚ
ತೆಂಗಿನ ತುರಿ : 1 ಚಮಚ
ಪೆಪ್ಪರ್ ಪುಡಿ : 2-3 ಚಿಟಿಕೆ
ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು : 1 ಚಮಚ
ಕರಿಬೇವು : 4-5 ಎಲೆ
ತುಪ್ಪ : 3 ಚಮಚ
ಒಣ ಮೆಣಸಿನ ಕಾಯಿ : 1 ಚೂರು
ಸಾಸಿವೆ : 1/6 ಚಮಚ
ಜೀರಿಗೆ : 1/6 ಚಮಚ
ಉಪ್ಪು : ರುಚಿಗೆ

ವಿಧಾನ :
ಅಕ್ಕಿ ಮತ್ತು ಬೇಳೆಯನ್ನು ಒಟ್ಟಿಗೇ ಸೇರಿಸಿ ತೊಳೆದು, ನೀರು ಹಾಕಿ ಅನ್ನ ಮಾಡುವಾಗಲೇ ಕುಕ್ಕರ್ ನಲ್ಲಿಟ್ಟು ಬೇಯಿಸಿಕೊಂಡುಬಿಡಿ. ಪ್ಯಾನ್ ಗೆ ತುಪ್ಪ ಹಾಕಿ ಕರಗಿಸಿ, ಅದಕ್ಕೆ ಸಾಸಿವೆ, ಜೀರಿಗೆ ಹಾಕಿ ಚಟಪಟಾಯಿಸಿ.  ಅದಕ್ಕೆ ಒಣ ಮೆಣಸಿನ ಚೂರು ಹಾಕಿ, ಪೆಪ್ಪರ್ ಪುಡಿ, ಚೂರು ಮಾಡಿದ ಕರಿಬೇವಿನ ಎಲೆ, ಈರುಳ್ಳಿ ಹಾಕಿ ಫ್ರೈ ಮಾಡಿ. ನಂತರ ಹೆಚ್ಚಿದ ಬೀನ್ಸ್ ಮತ್ತು ತುರಿದ ಕ್ಯಾರಟ್ ಹಾಕಿ ಸ್ವಲ್ಪ ನೀರು, ಚಿಟಿಕೆ ಉಪ್ಪು ಹಾಕಿ ಬೇಯಿಸಿ.  ತರಕಾರಿಗಳು ಚೆನ್ನಾಗಿ ಬೆಂದ ನಂತರ ಇದಕ್ಕೆ ಬೇಯಿಸಿಕೊಂಡ ಅನ್ನ ಮತ್ತು ಬೇಳೆ ಮಿಶ್ರಣವನ್ನು ಸೌಟಿನಲ್ಲಿ ಸ್ವಲ್ಪ ಮಸೆದು ಹಾಕಿ. ಸ್ವಲ್ಪ ಉಪ್ಪು, ತೆಂಗಿನ ತುರಿ ಕೊತ್ತಂಬರಿ ಸೊಪ್ಪು, ಬೇಕಿದ್ದಲ್ಲಿ ಸ್ವಲ್ಪ ನೀರು ಎಲ್ಲವನ್ನೂ ಹಾಕಿ ಕುದಿಸಿದರೆ ವೆಜ್ ಪೊಂಗಲ್ ಅಥವಾ ವೆಜ್ ಕಿಚಡಿ ನಿಮ್ಮ ಮಗುವಿಗೆ ತಿನ್ನಿಸಲು ತಯಾರು. ಬಿಸಿ ಆರಿಸಿ ತಿನ್ನಿಸಿ.


ಸಲಹೆಗಳು :
1) ಈರುಳ್ಳಿ ಹಾಕುವುದರಿಂದ ಒಳ್ಳೆಯ ಘಮ ಬರುವುದರಿಂದ ಮಕ್ಕಳು ಇಷ್ಟ ಪಟ್ಟು ತಿನ್ನುತ್ತಾರೆ. 
2) ಡೈರೆಕ್ಟ್ ಕುಕ್ಕರ್ ನಲ್ಲಿ ಮಾಡುವುದಾದರೆ ಕುಕ್ಕರ್ ಪ್ಯಾನ್ ಗೆ ಮೇಲೆ ಹೇಳಿದಂತೆ ಒಗ್ಗರಣೆ ಮಾಡಿ ತರಕಾರಿ, ಬೇಳೆ, ಅಕ್ಕಿ ಎಲ್ಲಾ ಹಾಕಿ 3 ವಿಶಲ್ ಕೂಗಿಸಿ. 

ಶುಕ್ರವಾರ, ಆಗಸ್ಟ್ 4, 2017

ಗೋಧಿ ಹಾಲುಬಾಯಿ :

ನೋಡಲು ಸರಳ ತಿನಿಸು ಎನಿಸಿದರೂ, ಮಾಡುವಾಗ ತುಸು ಕಷ್ಟ ಈ ಹಾಲುಬಾಯಿ. ಸ್ವಲ್ಪ ಬೇಗನೆ ಒಲೆಯಿಂದ ಇಳಿಸಿದರೂ ಬಾಯಿಗೆ ಅಂಟುತ್ತದೆ. ನಾನಗಂತೂ ಮೊದಲ ಪ್ರಯತ್ನ ಫೇಲ್ ಆಗಲಿಲ್ಲ. ಅತ್ತೆ ಮತ್ತು ಅಮ್ಮನಿಗೆ ಫೋನಾಯಿಸುತ್ತಾ ಮಾಡಿ ಮುಗಿಸಿದೆ....  ಕೈ ಬಿಡದೇ ಕಲಕುತ್ತಾ ಬಂದ ಕೈ ನೋವನ್ನು ಹಾಲುಬಾಯಿ ತಿಂದ ಬಾಯಿ ಮರೆಸಿಬಿಡುತ್ತದೆ! ಅಷ್ಟು ಒಳ್ಳೆಯ, ಸವಿಯಾದ, ಹಳೆಯ ಕಾಲದ ತಿನಿಸಿದು. ಮಾಡಿ ನೋಡಿ ಸವಿ ಸವಿ ಹಾಲುಬಾಯಿ. ಇದೇ  ರೀತಿಯಲ್ಲಿ ರಾಗಿ ಹಾಲುಬಾಯಿ ಕೂಡ ಬಲು ರುಚಿ.. ಅದನ್ನೂ ಮಾಡಿ ನೋಡಿ...!! 

ಸಾಮಗ್ರಿಗಳು :
ಗೋಧಿ : 1/2 ಕೆಜಿ
ಬೆಲ್ಲ : 2.5-3 ಕಪ್
ಏಲಕ್ಕಿ ಪುಡಿ : 1/2 ಚಮಚ
ತೆಂಗಿನ ತುರಿ : 4-5 ಟೇಬಲ್ ಚಮಚ
ಉಪ್ಪು: 1/4 ಚಮಚ
ತುಪ್ಪ : 1 ಚಮಚ 

ವಿಧಾನ : 
ಗೋಧಿಯನ್ನು ತೊಳೆದು 6-7 ಘಂಟೆಗಳ ಕಾಲ ನೆನೆಸಿಡಿ. ನಂತರ ನೀರು ಬಸಿದು ಮಿಕ್ಸಿಗೆ ಹಾಕಿ ಸ್ವಲ್ಪ ಸ್ವಲ್ಪ ನೀರು ಹಾಕುತ್ತಾ ರುಬ್ಬಿಕೊಂಡು ಶುಭ್ರ ಬಟ್ಟೆ ಅಥವಾ ಹಿಟ್ಟಿನ ಜರಡಿಯಲ್ಲಿ ಹಾಕಿ ಹಿಂಡಿ ಹಾಲು ತೆಗೆದುಕೊಳ್ಳಿ. ಉಳಿದ ಗಸಟನ್ನು (ಚರಟ) ಮತ್ತೊಮ್ಮೆ ಮಿಕ್ಸಿಗೆ ಹಾಕಿ ನೀರು ಹಾಕಿ ರುಬ್ಬಿ ಹಾಲು ತೆಗೆದುಕೊಳ್ಳಿ. ದಪ್ಪ ಮತ್ತು ದೊಡ್ಡ ಪಾತ್ರೆಗೆ ಈ ಹಾಲನ್ನು ಹಾಕಿ, ಅದಕ್ಕೆ ಬೆಲ್ಲ, ಏಲಕ್ಕಿ ಪುಡಿ, ತೆಂಗಿನ ತುರಿ, ಉಪ್ಪು ಹಾಕಿ ಮಾಧ್ಯಮ ಉರಿಯಲ್ಲಿ ಕಲಕುತ್ತಿರಿ. ( ಸಿಹಿ ಸರಿಯಾಗಿದೆಯೇ ಎಂದು ನೋಡಿಕೊಂಡು ಬೇಕಿದ್ದಲ್ಲಿ ಬೆಲ್ಲ ಸೇರಿಸಿಕೊಳ್ಳಬಹುದು). ಗಂಟಾಗದಂತೆ ಆಗಾಗ ಕಲಕುತ್ತಲೇ ಇರಬೇಕು. ಮಿಶ್ರಣ ಗಟ್ಟಿಯಾಗುತ್ತಾ ಬಂದಂತೆಸಣ್ಣ ಉರಿಯಲ್ಲಿ ಕೈ ಬಿಡದೇ ಕಲಕುತ್ತಿರಬೇಕು. ಸುಮಾರು ಅರ್ಧ ಗಂಟೆ ಬೇಕಾಗಬಹುದು. ಬರ್ಫಿ ಮಿಶ್ರಣದಷ್ಟು ಗಟ್ಟಿಯಾಗಬೇಕು. ಕೈಗೆ ಸ್ವಲ್ಪ ನೀರು ಮುಟ್ಟಿಕೊಂಡು ಮಿಶ್ರಣವನ್ನು ಮುಟ್ಟಿದರೆ ಅದು ಕೈಗೆ ಅಂಟದಿದ್ದರೆ ತಯಾರಾಗಿದೆ ಎಂದರ್ಥ. ಒಂದು ಅಗಲವಾದ ಪ್ಲೇಟ್ ಗೆ ತುಪ್ಪ ಸವರಿಕೊಂಡು ಗಟ್ಟಿಯಾದ ಹಾಲುಬಾಯಿ ಮಿಶ್ರಣ ಹಾಕಿ ಬಿಸಿ ಇರುವಾಗಲೇ  ಬರ್ಫಿಗಿಂತ ಸ್ವಲ್ಪ ತೆಳ್ಳಗೆ ಹರವಿ. ಬಾಳೆಲೆಯ ಹಿಂಭಾಗಕ್ಕೆ ತುಪ್ಪ ಸವರಿಕೊಂಡು ಮಿಶ್ರಣವನ್ನು ನಯವಾಗಿ ಹರವಲು ಬಳಸಬಹುದು. ಸ್ವಲ್ಪ ತಣ್ಣಗಾದ ಮೇಲೆ ಚಾಕು ತುದಿಗೆ ಸ್ವಲ್ಪ ತುಪ್ಪ ಸವರಿಕೊಂಡು ಬೇಕಾದ ಆಕಾರಕ್ಕೆ ಕತ್ತರಿಸಿ. ತಣ್ಣಗಾದ ಮೇಲೆ ಹಾಲುಬಾಯಿ ಜೊತೆ ತುಪ್ಪ ಹಾಕಿಕೊಂಡು ಸವಿಯಿರಿ.  
    

ಸಲಹೆಗಳು :
1) ಕಾಯಿಸಿದ್ದು ಸಾಕಾಗದೇ ಬೇಗ ಉರಿ ಆರಿಸಿದರೆ ತಿನ್ನುವಾಗ ಬಾಯಿಗೆ ಅಂಟುತ್ತದೆ. ಗೊತ್ತಾಗದಿದ್ದರೆ ಕೈಗೆ ಸ್ವಲ್ಪ ನೀರು ಮುಟ್ಟಿಕೊಂಡು, ಸಣ್ಣ ಕಡಲೆ ಕಾಳಿನಷ್ಟು ಮಿಶ್ರಣ ತೆಗೆದುಕೊಂಡು ಆರಿಸಿ ಅದನ್ನು ಒದ್ದೆ ಬೆರಳಿನಿಂದ ಉಂಡೆ ಮಾಡಿ ನೋಡಿ. ಕೈಗೆ ಅಂಟದಿದ್ದರೆ ಸರಿ  ಆಗಿದೆ ಎಂದರ್ಥ. 
2) ಉರಿ ಆರಿಸಿದ ತಕ್ಷಣ ತಟ್ಟೆಗೆ ಹರವಿಬಿಡಬೇಕು, ಪಾತ್ರೆಯಲ್ಲೇ ತಣ್ಣಗಾದರೆ ನಯವಾಗಿ ಹರವಿ ಕತ್ತರಿಸಲು ಬರುವುದಿಲ್ಲ. 
3) ಇದನ್ನು 2 ದಿನ ಕೆಡದಂತೆ ಇಟ್ಟುಕೊಳ್ಳಬಹುದು. ತೆಂಗಿನ ಕಾಯಿಯನ್ನು ಗೋಧಿಯ ಜೊತೆಯೇ ರುಬ್ಬಿಕೊಳ್ಳಲು ಕೂಡ ಹಾಕಬಹುದು, ಆಗ ಇನ್ನೆರಡು ದಿನ ಇಡಬಹುದು.
4) ಮಲೆನಾಡಿನ ಕೆಂಪು ಬೆಲ್ಲ ಹಾಕಿರುವುದರಿಂದ ಸ್ವಲ್ಪ ಕಪ್ಪಗಾಗಿದೆ. ಅಚ್ಚು / ಉಂಡೆ ಬೆಲ್ಲ ಹಾಕಿದರೆ ಇಷ್ಟು ಕಪ್ಪಗಾಗುವುದಿಲ್ಲ ಮತ್ತು ಪ್ರಮಾಣವೂ ಸ್ವಲ್ಪ ಹೆಚ್ಚು ಬೇಕಾಗಬಹುದು.   

ಶುಕ್ರವಾರ, ಜುಲೈ 21, 2017

ಮಾವಿನಕಾಯಿ - ಕ್ಯಾಪ್ಸಿಕಂ ಬಾತ್ :

ಸಾಮಗ್ರಿಗಳು : 
ಅಕ್ಕಿ : 1 ಕಪ್ 
ತುರಿದ ಮಾವಿನಕಾಯಿ : 2 ಟೇಬಲ್ ಚಮಚ (ತೋತಾಪುರಿ ಆದರೆ ಒಳ್ಳೆಯದು, ಬೇರೆ ಹುಳಿ ಮಾವಿನಕಾಯದರೆ 1 ಚಮಚ ಸಾಕು)
ಕ್ಯಾಪ್ಸಿಕಂ :1
ಕರಿಬೇವು : 6-8 ಎಲೆಗಳು 
ಹೆಚ್ಚಿದ ಕೊತ್ತಂಬರಿಸೊಪ್ಪು : 1 ಟೇಬಲ್ ಚಮಚ 
ಶುಂಠಿ : 1/2 ಇಂಚು 
ಮೆಂತ್ಯ ಕಾಳು : 6-8
ತೆಂಗಿನ ತುರಿ : 2 ಟೇಬಲ್ ಚಮಚ 
ಎಣ್ಣೆ : 4 ಟೇಬಲ್ ಚಮಚ 
ಸಾಸಿವೆ: 1/2 ಚಮಚ 
ಒಣಮೆಣಸು : 1 
ಹಸಿಮೆಣಸು : 2 
ಅರಿಶಿನ ಪುಡಿ : 1/4 ಚಮಚ 
ಸಕ್ಕರೆ / ಬೆಲ್ಲ : 1/2 ಚಮಚ 
ಉಪ್ಪು: ರುಚಿಗೆ 

ವಿಧಾನ : 
ಕ್ಯಾಪ್ಸಿಕಂ ಅನ್ನು ಒಂದಿಂಚು ದೊಡ್ಡದಾಗಿ ಚೌಕಾಕಾರಕ್ಕೆ ಕತ್ತರಿಸಿಕೊಳ್ಳಿ. ಬಾಣಲೆಗೆ ಮೆಂತ್ಯ ಕಾಳು ಹಾಕಿ ಸ್ವಲ್ಪ ಹುರಿದುಕೊಂಡು, ಅದಕ್ಕೆ ಹಸಿಮೆಣಸು, ಕರಿಬೇವು, ಕೊತ್ತಂಬರಿ ಸೊಪ್ಪು, ತೆಂಗಿನ ತುರಿ ಮತ್ತು ಶುಂಠಿ ಎಲ್ಲವನ್ನೂ ಹಾಕಿ ಹುರಿಯಿರಿ (ಎಣ್ಣೆ ಹಾಕದೇ ಹುರಿಯಬೇಕು). ನಂತರ ಇದನ್ನು ಮಿಕ್ಸಿ ಗೆ ಹಾಕಿ ಸ್ವಲ್ಪ ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ಕುಕ್ಕರ್ ಗೆ ಎಣ್ಣೆ, ಸಾಸಿವೆ ಹಾಕಿ ಚಿಟಪಟಾಯಿಸಿ. ಅದಕ್ಕೆ ಒಣ ಮೆಣಸು, ಅರಿಶಿನ ಪುಡಿ ಹಾಕಿ. ಈಗ ಹೆಚ್ಚಿದ ಕ್ಯಾಪ್ಸಿಕಂ ಹಾಕಿ ಒಮ್ಮೆ ಫ್ರೈ ಮಾಡಿ, ಇದಕ್ಕೆ ತುರಿದ ಮಾವಿನಕಾಯಿ, ಉಪ್ಪು ಹಾಕಿ ಸ್ವಲ್ಪ ಫ್ರೈ ಮಾಡಿ. ನಂತರ ರುಬ್ಬಿದ ಮಿಶ್ರಣ ಹಾಕಿ ಹಸಿವಾಸನೆ ಹೋಗುವತನಕ ಹುರಿದು ತೊಳೆದ ಅಕ್ಕಿ, ನೀರು ಮತ್ತು ಸಕ್ಕರೆ/ಬೆಲ್ಲ ಹಾಕಿ ಚೆನ್ನಾಗಿ ಕಲಕಿ ಮುಚ್ಚಳ ಮುಚ್ಚಿ 3 ವಿಷಲ್ ಕೂಗಿಸಿದರೆ ಮಾವಿನಕಾಯಿ ಬಾತ್ ಸಿದ್ಧ. 




ಶುಕ್ರವಾರ, ಜುಲೈ 14, 2017

ಬನ್ ಮಸಾಲಾ :

ಸಾಮಗ್ರಿಗಳು: 
ಬನ್ - 4,
ಈರುಳ್ಳಿ  - 2, 
ಟೊಮ್ಯಾಟೊ - 2,
ಸವತೆಕಾಯಿ - 1,
ಕ್ಯಾರೇಟ್ - 1, 
ಕ್ಯಾಬೇಜ್ - 2 ಎಲೆಗಳು, 
ಕೆ೦ಪು ಮೆಣಸಿನ ಪುಡಿ - 1 ಟೇ. ಚಮಚ (ನಿಮ್ಮ ರುಚಿಗೆ ಅನುಗುಣವಾಗಿ)
ಗರ೦ ಮಸಾಲಾ ಪೌಡರ್ - 1/2 ಟೀ.ಚಮಚ
ಉಪ್ಪು - ರುಚಿಗೆ ಅನುಗುಣವಾಗಿ
ಎಣ್ಣೆ  - 1 ಟೇ. ಚಮಚ, ಬೆಣ್ಣೆ 







ವಿಧಾನ :ಈರುಳ್ಳಿ, ಕ್ಯಾಬೇಜ್ & ಟೊಮ್ಯಾಟೊವನ್ನು ಉದ್ದುದ್ದಕ್ಕೆ ತೆಳ್ಳಗೆ ಹೆಚ್ಚಿಕೊಳ್ಳಿ. ಕ್ಯಾರೇಟ್ ತುರಿದಿಟ್ಟುಕೊಳ್ಳಬೇಕು, ಸವತೆಕಾಯಿಯನ್ನು ತೆಳ್ಳಗೆ ಗಾಲಿ ಗಾಲಿ ಯಾಗಿ ಕತ್ತರಿಸ ಬೇಕು.  ಒ೦ದು ಬಾಣಲೆಗೆ ಎಣ್ಣೆ ಹಾಕಿ ಅದು ಕಾದ ಮೇಲೆ ಹೆಚ್ಚಿಟ್ಟ ಈರುಳ್ಳಿ ಹಾಕಿ ಫ್ರೈ ಮಾಡಿ ಹಾಗೆ ಟೊಮ್ಯಾಟೊ ಹಾಕಿ ಈಗ ಉಪ್ಪು, ಕೆ೦ಪು ಮೆಣಸಿನ ಪುಡಿ, ಗರ೦ ಮಸಾಲಾ ಪೌಡರ್ ಹಾಕಿ ೫ ನಿಮಿಷ  ಫ್ರೈ ಮಾಡಿ ಬದಿಗಿರಿಸಿ. ಸಣ್ಣ ಉರಿಯಲ್ಲಿ ಕಾವಲಿ ಇಟ್ಟು ಅದಕ್ಕೆ ಬೆಣ್ಣೆ ಸವರಿ ಬನ್ ಮಧ್ಯದಲ್ಲಿ ಕತ್ತರಿಸಿ (ಚಿತ್ರದಲ್ಲಿ ತೋರಿಸಿದ೦ತೆ)ಎರಡು ಕಡೆ ಸ್ವಲ್ಪ ರೋಸ್ಟ ಮಾಡಿ ನ೦ತರ ಮಧ್ಯದಲ್ಲಿ ಈರುಳ್ಳಿ ಟೊಮ್ಯಾಟೊ ಮಸಾಲೆ ಹಾಕಿ ಹೆಚ್ಚಿಟ್ಟ ಸವತೆಕಾಯಿ, ಕ್ಯಾರೇಟ್, ಕ್ಯಾಬೇಜ್ ಹಾಕಿ ಮತ್ತೊ೦ದು ಬನ್ ಭಾಗವನ್ನು ಮುಚ್ಚಿಟ್ಟರೆ ಮಸಾಲ ಬನ್ ಸವಿಯಲು ಸಿದ್ಧ.

(ಸೂಚನೆ: ಆಲು ಕಟ್ಲೆಟ್ ಮಾಡಿಕೊ೦ಡು ಇದರ ಮಧ್ಯ ಇಟ್ಟಲ್ಲಿ ಅದೆ ಬರ್ಗರ್, ವಿಧಾನ ಇನ್ನೊಮ್ಮೆ ಹೇಳುವೆ)

ಶುಕ್ರವಾರ, ಜುಲೈ 7, 2017

ಬೇಬಿ ಕಾರ್ನ್ ಮಂಚೂರಿಯನ್ ವಿಥ್ ಗ್ರೇವಿ :

ಸಾಮಗ್ರಿಗಳು :
ಅರ್ಧ ಇಂಚು ಉದ್ದ ಹೆಚ್ಚಿದ ಬೇಬಿ ಕಾರ್ನ್ : 3 ಕಪ್ 
ಉದ್ದ ಹೆಚ್ಚಿದ ಕ್ಯಾಪ್ಸಿಕಂ : 1 ಕಪ್ 
ಸಣ್ಣ ಹೆಚ್ಚಿದ ಸ್ಪ್ರಿಂಗ್ ಆನಿಯನ್ : 2 ಕಪ್ (ಅಥವಾ ಉದ್ದ ಹೆಚ್ಚಿದ ಈರುಳ್ಳಿ: 2 ಕಪ್)
ತುಂಬಾ ಸಣ್ಣಗೆ ಹೆಚ್ಚಿದ ಬೆಳ್ಳುಳ್ಳಿ : 1 ಟೇಬಲ್ ಚಮಚ 
ತುಂಬಾ ಸಣ್ಣಗೆ ಹೆಚ್ಚಿದ ಶುಂಠಿ : 1/2 ಟೇಬಲ್ ಚಮಚ 
ತುಂಬಾ ಸಣ್ಣಗೆ ಹೆಚ್ಚಿದ ಹಸಿಮೆಣಸಿನಕಾಯಿ : 1 ಟೇಬಲ್ ಚಮಚ 
ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು : 2 ಟೇಬಲ್ ಚಮಚ 
ಮೈದಾ ಹಿಟ್ಟು : 1 ಕಪ್ 
ಕಾರ್ನ್ ಫ್ಲೋರ್ : 3/4 ಕಪ್ 
ಅಚ್ಚ ಮೆಣಸಿನ ಪುಡಿ : 1 ಚಮಚ 
ಟೊಮೇಟೊ ಸಾಸ್ : 2 ಟೇಬಲ್ ಚಮಚ 
ಸೋಯಾ ಸಾಸ್ : 1 ಟೇಬಲ್ ಚಮಚ  
ಗ್ರೀನ್ ಚಿಲ್ಲಿ ಸಾಸ್ : 3 ಟೇಬಲ್ ಚಮಚ 
ಸಕ್ಕರೆ : 1/4 ಚಮಚ 
ಲಿಂಬು ರಸ : 1/2 ಚಮಚ (ಅಥವಾ ವಿನೆಗರ್ ಸ್ವಲ್ಪ) 
ಉಪ್ಪು : ರುಚಿಗೆ 
ಕರಿಯಲು ಮತ್ತು ಹುರಿಯಲು : ಎಣ್ಣೆ 

ವಿಧಾನ :
ಒಂದು ಚಮಚ ಕಾರ್ನ್ ಫ್ಲೋರ್ ಅನ್ನು ಒಂದು ಕಪ್ ಗೆ ಹಾಕಿ ಕಾಲು ಕಪ್ ನೀರು ಹಾಕಿ ಕಲಕಿಡಿ. ಕರಿಯಲು ಎಣ್ಣೆ ಕಾಯಲು ಇಟ್ಟುಕೊಳ್ಳಿ. ಉಳಿದ ಕಾರ್ನ್ ಫ್ಲೋರ್ ಮತ್ತು ಮೈದಾ ಸೇರಿಸಿ ಅದಕ್ಕೆ ಉಪ್ಪು, ಮೆಣಸಿನ ಪುಡಿ, ನೀರು ಹಾಕಿ ಗಂಟಿಲ್ಲದಂತೆ ಕಲಸಿ. ಕಲಸಿದ ಹಿಟ್ಟು ಬಜ್ಜಿ ಹಿಟ್ಟಿನಕಿಂತ ತೆಳ್ಳಗಿರಲಿ. ಇದಕ್ಕೆ ಹೆಚ್ಚಿಟ್ಟ ಬೇಬಿ ಕಾರ್ನ್ ಹಾಕಿ ಕಲಸಿಕೊಂಡು ಕಾದ ಎಣ್ಣೆಯಲ್ಲಿ ಬಿಡಿ ಬಿಡಿಯಾಗುವಂತೆ ಬಿಟ್ಟು ಗರಿ ಗರಿಯಾಗಿ ಕರಿದುಕೊಳ್ಳಿ. ಅಗಲವಾದ ಪ್ಯಾನ್ ಗೆ 3-4 ಟೇಬಲ್ ಚಮಚ ಎಣ್ಣೆ ಹಾಕಿ ಅದಕ್ಕೆ ಸಣ್ಣಗೆ ಹೆಚ್ಚಿಕೊಂಡ ಶುಂಠಿ ಮತ್ತು ಬೆಳ್ಳುಳ್ಳಿ ಹಾಕಿ ಫ್ರೈ ಮಾಡಿ. ಇದಕ್ಕೆ ಹೆಚ್ಚಿಕೊಂಡ ಕ್ಯಾಪ್ಸಿಕಂ ಹಾಕಿ ಸ್ವಲ್ಪ ಫ್ರೈ ಮಾಡಿಕೊಳ್ಳಿ. ನಂತರ ಹೆಚ್ಚಿದ ಸ್ಪ್ರಿಂಗ್ ಆನಿಯನ್ ಅಲ್ಲಿ 2 ಚಮಚ ತೆಗೆದಿಟ್ಟು ಉಳಿದದ್ದನ್ನು ಹಾಕಿ ಒಮ್ಮೆ ಫ್ರೈ ಮಾಡಿ. ಇದಕ್ಕೆ ಸೋಯಾ ಸಾಸ್, ಟೊಮೇಟೊ ಸಾಸ್, ಗ್ರೀನ್ ಚಿಲ್ಲಿ ಸಾಸ್, ಸ್ವಲ್ಪ ಉಪ್ಪು, ಸಕ್ಕರೆ, ಲಿಂಬು ರಸ / ವಿನೆಗರ್ ಎಲ್ಲವನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಇದಕ್ಕೆ ಮೊದಲೇ ಕಲಕಿಟ್ಟ ಕಾರ್ನ್ ಫ್ಲೋರ್ ನೀರನ್ನು ಹಾಕಿ ಕೈ ಬಿಡದೆ ಕಲಕುತ್ತಿರಿ ಗ್ರೇವಿ ತುಂಬಾ ದಪ್ಪಗಾದರೆ ಇನ್ನು ಸ್ವಲ್ಪ ನೀರು ಹಾಕಿಕೊಂಡು ಒಂದೆರಡು ಕುದಿ ಬರುವವರೆಗೆ ಕಲಕುತ್ತಿರಿ. ನಂತರ ಕರಿದಿಟ್ಟುಕೊಂಡ ಬೇಬಿ ಕಾರ್ನ್ ಹಾಕಿ ಮಿಕ್ಸ್ ಮಾಡಿ ಉರಿ ಆರಿಸಿ. ಈಗ ಕೊತ್ತಂಬರಿ ಸೊಪ್ಪು ಮತ್ತು ಉಳಿದ ಸ್ಪ್ರಿಂಗ್ ಆನಿಯನ್ ಹಾಕಿ ಸರ್ವ್ ಮಾಡಿ. 

ಸಲಹೆ :  ಸ್ಪ್ರಿಂಗ್ ಆನಿಯನ್ ಇಲ್ಲದಿದ್ದಲ್ಲಿ ಈರುಳ್ಳಿ ಉದ್ದುದ್ದ ಹೆಚ್ಚಿ, ಬೆಳ್ಳುಳ್ಳಿ ಫ್ರೈ ಆದಮೇಲೆ ಹಾಕಿಕೊಂಡು ಫ್ರೈ ಮಾಡಿಕೊಳ್ಳಬೇಕು. 

ಶುಕ್ರವಾರ, ಜೂನ್ 30, 2017

ಕಳಲೆ ಪಲ್ಯ (bamboo shoot):

ಸಾಮಗ್ರಿಗಳು:
ಸಣ್ಣಗೆ ಹೆಚ್ಚಿಟ್ಟ ಕಳಲೆ - 1 ಬೌಲ್,
ಹಸಿಮೆಣಸು - 4
ಎಣ್ಣೆ - 2 ಟೇ.ಚಮಚ,
ಸಾಸಿವೆ - 1/2 ಟೀ. ಚಮಚ
ಉದ್ದಿನಬೇಳೆ - 1 ಟೀ. ಚಮಚ
ಅರಿಶಿನಪುಡಿ - 1/4 ಟೀ. ಚಮಚ
ಕರಿಬೇವು - 5-6 ಎಲೆಗಳು
ಉಪ್ಪು & ಲಿ೦ಬುರಸ.




ವಿಧಾನ: ಬಾಣಲೆಗೆ ಎಣ್ಣೆಹಾಕಿಕೊ೦ಡು ಎಣ್ಣೆ ಸ್ವಲ್ಪ ಬಿಸಿಯಾದ ಮೇಲೆ ಉದ್ದಿನಬೇಳೆ, ಸಾಸಿವೆ, ಹಸಿಮೆಣಸು ಕರಿಬೇವು ನ೦ತರ ಅರಿಶಿನಪುಡಿ ಹಾಕಿ. ಈಗ ಹೆಚ್ಚಿಟ್ಟ ಕಳಲೆಯನ್ನು ಹಾಕಿ ಉಪ್ಪು ಲಿ೦ಬುರಸ ಹಾಕಿ 15- 20 ನಿಮಿಷ ಸಣ್ಣ ಉರಿಯಲ್ಲಿ ಚೆನ್ನಾಗಿ ಹುರಿದರೆ ರುಚಿಯಾದ ಕಳಕೆ ಪಲ್ಯ ಸವಿಯಲು ಸಿದ್ಧ.

(ಕಳಲೆಯನ್ನು ಹೆಚ್ಚಿ ೨ ದಿನ ನೀರಲ್ಲಿ ನೆನೆಸಿಡಬೇಕು. ದಿನಾಲೂ ನೀರು ಬದಲಿಸಬೇಕು)

ಶುಕ್ರವಾರ, ಜೂನ್ 23, 2017

ರಸ್ಮಲಾಯಿ :

ಸಾಮಗ್ರಿಗಳು :
ಬಾಸುಂದಿಗೆ (ರಸ)-
ಹಾಲು : 1.5 ಲೀಟರ್
ಸಕ್ಕರೆ : 1/2 ಕೆಜಿ
ಪಿಸ್ತಾ - ಬಾದಾಮ್ ಚೂರುಗಳು : 1/4 ಕಪ್

ರಸಗುಲ್ಲ (ಪನೀರ್ ಉಂಡೆ) ಗೆ :
ಹಾಲು : 2 ಲೀಟರ್
ವಿನೆಗರ್ : 1.5 ಚಮಚ (ಅಥವಾ ನಿಂಬೆ ರಸ : ೩-೪ ಚಮಚ)
ಸಕ್ಕರೆ : 1 ಕಪ್
ನೀರು : 3 ಕಪ್

ವಿಧಾನ :
ಮೊದಲು 2 ಲೀಟರ್ ಹಾಲನ್ನು ಚೆನ್ನಾಗಿ ಕಾಯಿಸಿ ಅದಕ್ಕೆ ವಿನೆಗರ್ ಹಾಕಿ ಚೆನ್ನಾಗಿ ಕಲಕಿ. ಹಾಲು ಪೂರ್ತಿಯಾಗಿ ಒಡೆಯದಿದ್ದಲ್ಲಿ ಇನ್ನು ಸ್ವಲ್ಪ ವಿನೆಗರ್ ಸೇರಿಸಿ ಕಲಕಿ. ವಿನೆಗರ್ ಬದಲು ಲಿಂಬುರಸ ಬಳಸಬಹುದು. ಒಂದು ಪಾತ್ರೆಯ ಮೇಲೆ ಜರಡಿ ಇಟ್ಟು ಅದರ ಮೇಲೆ ತೆಳ್ಳನೆಯ ಹತ್ತಿ ಬಟ್ಟೆ ಹಾಕಿ, ಒಡೆದ ಹಾಲನ್ನು ಬಟ್ಟೆಯ ಮೇಲೆ ಹಾಕಿ ಮೇಲಿನಿಂದ ನೀರನ್ನು ಹಾಕುತ್ತಾ ಚಮಚದಿಂದ ಕಲಕಿ. 

ಹಾಲಿಗೆ ಹುಳಿ ಹಾಕಿದ್ದರಿಂದ ನೀರನ್ನು ಹಾಕಿ ಹುಳಿ ಅಂಶ ತೆಗೆಯಬೇಕು. ನಂತರ ಬಟ್ಟೆಯನ್ನು ಗಂಟು ಕಟ್ಟಿ ಅದರ ಮೇಲೆ ಏನಾದರೂ ಭಾರ ಹೇರಿಟ್ಟು ಸ್ವಲ್ಪ ಹೊತ್ತು ಬಿಡಿ. ನೀರಿನಂಶ ಪೂರ್ತಿ ಇಳಿದು ಬರಿಯ ಪನೀರ್ ಉಳಿದ ಮೇಲೆ ಅದನ್ನು ಒಂದು ಪಾತ್ರೆಗೆ ಹಾಕಿ ಚೆನ್ನಾಗಿ ನಾದಬೇಕು. 

ನಂತರ ಇದರಿಂದ ದೊಡ್ಡ ನೆಲ್ಲಿಕಾಯಿ ಗಾತ್ರದ ಉಂಡೆ ಮಾಡಿ ಅದನ್ನು ತಟ್ಟಿ ಚಪ್ಪಟೆ ಮಾಡಿ ಇಟ್ಟುಕೊಳ್ಳಿ.

 3-4 ಚಮಚ ಹಾಲಿನಲ್ಲಿ ಕುಂಕುಮ ಕೇಸರಿ ಹಾಕಿ ನೆನೆಸಿಡಿ.

ಈಗ ಒಂದು ಕಡೆ 1.5 ಲೀಟರ್ ಹಾಲಿಗೆ 1/2 ಕೆಜಿ ಯಷ್ಟು ಸಕ್ಕರೆ (ನಿಮಗೆ ಬೇಕಾದ  ಸಿಹಿ ಪ್ರಮಾಣಕ್ಕೆ ಅನುಸಾರ) ಹಾಕಿ ಹಾಲು ಸುಮಾರು ಅರ್ಧದಷ್ಟು ಕಮ್ಮಿ ಆಗುವವರೆಗೆ ಕುದಿಸಿ. ಉರಿ ಆರಿಸಿ ಕೇಸರಿ ಹಾಲನ್ನು ಹಾಕಿ ತಣ್ಣಗಾಗಲು ಬಿಡಿ.

ಇತ್ತ  1 ಕಪ್ ಸಕ್ಕರೆಗೆ 3 ಕಪ್ ನಷ್ಟು ನೀರು ಹಾಕಿ ಕುದಿಸಿ, ಮಾಡಿಟ್ಟುಕೊಂಡ ಪನೀರ್ ಉಂಡೆಯನ್ನು ಹಾಕಿ 8-10 ನಿಮಿಷ ಕುದಿಸಿ. ಉಂಡೆಯ ಗಾತ್ರ ದೊಡ್ಡದಾಗುತ್ತದೆ ಆಗ ಉರಿ ಆರಿಸಿ ಉಂಡೆಗಳನ್ನು ಪಾಕದಿಂದ ತೆಗೆದು ಬಿಸಿ ಆರಿದ ಒಂದೊಂದೇ ಉಂಡೆ ತೆಗೆದುಕೊಂಡು ಕೈ ಇಂದ ಒತ್ತಿ ಸಕ್ಕರೆ ನೀರು ತೆಗೆದು ಇಟ್ಟುಕೊಳ್ಳಿ.

ಈಗ ತಣ್ಣಗಾದ ಹಾಲಿನ ಮಿಶ್ರಣಕ್ಕೆ ಮಾಡಿಟ್ಟ ಉಂಡೆಗಳನ್ನು ಹಾಕಿ, ಸಣ್ಣಗೆ ಹೆಚ್ಚಿಟ್ಟುಕೊಂಡ ಬಾದಾಮ್ - ಪಿಸ್ತಾ ಚೂರುಗಳನ್ನು ಹಾಕಿ 1-2 ಘಂಟೆ ಫ್ರಿಡ್ಜ್ ಅಲ್ಲಿ ಇಟ್ಟು , ತಣ್ಣನೆಯ ರಸ್ಮಲಾಯಿ ಸವಿಯಿರಿ. 



ಶುಕ್ರವಾರ, ಜೂನ್ 16, 2017

ಕ೦ಚುಳಿ :

ಸಾಮಗ್ರಿಗಳು : 
ಹುಳಿಕ೦ಚಿಕಾಯಿ (ಹೇರಳೇಕಾಯಿ)- 3,
ಸೂಜಿಮೆಣಸು / ಹಸಿಮೆಣಸು - 6-7
ಬೆಲ್ಲ - 2 ಟೇ.ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು
ಎಣ್ಣೆ - 1ಟೀ. ಚಮಚ
ಸಾಸಿವೆ - 1/2 ಚಮಚ
ಬೆಳ್ಳುಳ್ಳಿ - 5 ಎಸಳು

 

ವಿಧಾನ : ಕ೦ಚಿಕಾಯಿಯ ಸಿಪ್ಪೆ ತೆಗೆದು ಅರ್ಧ ಮಾಡಿ ಒ೦ದು ಪಾತ್ರೆಯಲ್ಲಿ ಸಲ್ಪ ಉಪ್ಪು ಹಾಕಿ ಅದಕ್ಕೆ ಕ೦ಚಿಕಾಯಿ ರಸವನ್ನು ಹಿ೦ಡಿ, ಅದಕ್ಕೆ ಬೆಲ್ಲ ಹಾಕಿ ರುಚಿನೋಡಿಕೊಳ್ಳಿ. ಸೂಜಿಮೆಣಸು & ಬೆಳ್ಳುಳ್ಳಿಯನ್ನು ಜಜ್ಜಿಟ್ಟುಕೊಳ್ಳಿ. ಒಗ್ಗರಣೆ ಸೌಟಿಗೆ ಎಣ್ಣೆ ಹಾಕಿ ಅದು ಸ್ವಲ್ಪ ಕಾದಮೇಲೆ ಸಾಸಿವೆ ಜಜ್ಜಿಟ್ಟ ಸೂಜಿಮೆಣಸು & ಬೆಳ್ಳುಳ್ಳಿಯನ್ನು ಹಾಕಿ ಫ್ರೈ ಮಾಡಿ ಇದನ್ನು ಕ೦ಚಿಕಾಯಿರಸಕ್ಕೆ ಸೇರಿಸಿ. ಇದನ್ನು ಅನ್ನದ ಜೊತೆ ಸವಿಯಿರಿ.

(ಸೂಚನೆ: ಕ೦ಚಿಕಾಯಿರಸಕ್ಕೆ ನೀರು ಸೇರಿಸುವ ಅಗತ್ಯವಿಲ್ಲ, ಹುಳಿಗೆ ತಕ್ಕಷ್ಟು ಖಾರ & ಬೆಲ್ಲ ಬೇಕು)

ಶುಕ್ರವಾರ, ಜೂನ್ 9, 2017

ಕ್ಯಾರಟ್ - ಸೇಬಿನ ಸೂಪ್ (carrot - apple soup):

ಆರೋಗ್ಯಕರವಾಗಿ ಮಕ್ಕಳನ್ನು ಬೆಳೆಸುವುದು ಪ್ರತಿ ತಾಯಂದಿರ ಕರ್ತವ್ಯ. ಇದಕ್ಕಾಗಿ ರೆಡಿಮೇಡ್ ಆಹಾರಗಳಿಗಿಂತ ಮನೆಯಲ್ಲಿಯೇ ಸರಳವಾಗಿ ಮಾಡಿಕೊಡಬಹುದಾದ ಆಹಾರಗಳನ್ನು ತಿಳಿಸಿಕೊಡಲು 'ಶಿಶು / ಮಕ್ಕಳ ಆಹಾರ' ಎಂಬ ಹೊಸ ಅಂಕಣ ಆರಂಭಿಸಿದ್ದೇವೆ. ನಮಗೆ ತಿಳಿದಷ್ಟನ್ನು ನಿಮ್ಮೊಡನೆ ಹಂಚಿಕೊಳ್ಳುತ್ತಿದ್ದೇವೆ. 

ಸಾಮಗ್ರಿಗಳು :

ಹೆಚ್ಚಿದ ಕ್ಯಾರಟ್- 1/4 ಕಪ್ 
ಹೆಚ್ಚಿದ ಸೇಬು - 1/4 ಕಪ್
ಹೆಚ್ಚಿದ ಆಲೂ - 1/4 ಕಪ್
ಹೆಚ್ಚಿದ ಈರುಳ್ಳಿ - 1/4 ಕಪ್
ಬೆಣ್ಣೆ - 1/2 ಟೀ ಚಮಚ 
ಪೆಪ್ಪರ್ ಪೌಡರ್ - 2 ಚಿಟಿಕೆ 
ಲಿಂಬೆ ರಸ - 5-6 ಹನಿ 
ಉಪ್ಪು - 3-4 ಚಿಟಿಕೆ 

ವಿಧಾನ :
ಹೆಚ್ಚಿದ  ಸೇಬು-ತರಕಾರಿಗಳೆಲ್ಲವನ್ನೂ ಒಟ್ಟಿಗೇ ಕುಕ್ಕರ್ ನಲ್ಲಿ ಮೂರು ವಿಷಲ್ ಕೂಗಿಸಿ ಬೇಯಿಸಿಕೊಳ್ಳಿ. ಬೆಂದು ತಣ್ಣಗಾದ ಮೇಲೆ  ಮಿಕ್ಸಿಗೆ ಹಾಕಿ  ನುಣ್ಣಗೆ ರುಬ್ಬಿಕೊಳ್ಳಿ. ಪ್ಯಾನ್ ಗೆ ಬೆಣ್ಣೆ ಹಾಕಿ, ಪೆಪ್ಪರ್ ಪುಡಿ ಹಾಕಿ ಒಮ್ಮೆ ಕಲಕಿ, ರುಬ್ಬಿದ ಮಿಶ್ರಣ ಹಾಕಿ  ಕಾಲು ಕಪ್ ನಷ್ಟು ನೀರು ಹಾಕಿ ಕಲಕಿ. ಬೇಕಿದ್ದಲ್ಲಿ ಇನ್ನು ಸ್ವಲ್ಪ ನೀರು ಸೇರಿಸಿ. ಉಪ್ಪು ಹಾಕಿ ಒಂದು ಕುದಿ ಕುದಿಸಿ (ಮುಂಚೆಯೇ ಬೇಯಿಸಿಕೊಂಡ ಸೇಬು / ತರಕಾರಿ ಆದ್ದರಿಂದ ಸಣ್ಣ ಕುದಿ ಬಂದರೆ ಸಾಕು). ಕೊನೆಯಲ್ಲಿ ಲಿಂಬು ರಸ ಹಾಕಿದರೆ ರುಚಿಯಾದ ಸೂಪ್ ಸಿದ್ಧ. ಸ್ವಲ್ಪ ಬೆಚ್ಚಗಿರುವಾಗಲೇ ಮಕ್ಕಳಿಗೆ ಕುಡಿಸಿ. 


ಸಲಹೆಗಳು :
1) 7-8 ತಿಂಗಳು ಮೇಲ್ಪಟ್ಟ ಮಗುವಿಗೆ ಒಳ್ಳೆಯ ಆರೋಗ್ಯಕರ ಆಹಾರ. ಶಾಲೆಗೆ ಹೋಗುವ ಮಕ್ಕಳಿಗೂ ಇಷ್ಟವಾಗುವುದಲ್ಲದೇ ದೊಡ್ಡವರೂ ಸವಿಯಬಹುದು. 
2) ತೀರಾ ತೆಳ್ಳಗಾಗುವಷ್ಟು ನೀರು ಹಾಕಬೇಡಿ, ರುಚಿಯಿರುವುದಿಲ್ಲ. 
3) ಮಗುವಿಗೆ  ಕೊಡುವಾಗ ಉಪ್ಪು, ಹುಳಿ, ಖಾರ ಎಲ್ಲವೂ ಕಡಿಮೆ ಇರುವಂತೆ ಎಚ್ಚರ ವಹಿಸಿ. ಅದಕ್ಕೆ ಎಲ್ಲವನ್ನೂ  ಕಡಿಮೆ ಪ್ರಮಾಣದಲ್ಲೇ ಹೇಳಿದ್ದೇನೆ. ದೊಡ್ಡ ಮಕ್ಕಳಿಗಾದರೆ ಅವರ ಇಷ್ಟಕ್ಕನುಸಾರ  ಜಾಸ್ತಿ ಮಾಡಿಕೊಳ್ಳಿ.  
4) ಎಲ್ಲಾ ತರಕಾರಿಗಳು ಸಮಪ್ರಮಾಣದಲ್ಲಿದ್ದರೆ ರುಚಿ ಚೆನ್ನಾಗಿರುತ್ತದೆ. ಪ್ರಮಾಣದಲ್ಲಿ ಸ್ವಲ್ಪ ಹೆಚ್ಚು ಕಮ್ಮಿ ಆದರೂ ಯಾವುದೇ ತೊಂದರೆಯಿಲ್ಲ 

ಶುಕ್ರವಾರ, ಜೂನ್ 2, 2017

ಮುರುಗಲು ಸಿಪ್ಪೆಯ ತ೦ಬುಳಿ:

ಸಾಮಗ್ರಿಗಳು : 
ಮುರುಗಲು ಸಿಪ್ಪೆ - 6-7
 ಕಾಯಿತುರಿ - 2 ಟೇ.ಚಮಚ
ಎಣ್ಣೆ - 1ಟೀ. ಚಮಚ
ಸಾಸಿವೆ - 1/2 ಚಮಚ
ಜೀರಿಗೆ  - 1/2 ಚಮಚ
ಒಣಮೆಣಸು -1
ಕರಿಬೇವು - 4-5 ಎಲೆಗಳು
ಉಪ್ಪು, ಸಕ್ಕರೆ - ರುಚಿಗೆ ತಕ್ಕಷ್ಟು






ವಿಧಾನ:ಒಣಗಿಸಿಟ್ಟ ಮುರುಗಲು ಸಿಪ್ಪೆಯನ್ನು 15-20 ನಿಮಿಷ ನೀರಿನಲ್ಲಿ ನೆನೆಸಿಡಿ. ತೆ೦ಗಿನಕಾಯಿಯನ್ನು ತುರಿದುಕೊ೦ಡು, ಸ್ವಲ್ಪ ನೀರು ಹಾಕಿ ರುಬ್ಬಿ ಅದರಿ೦ದ ತೆ೦ಗಿನ ಹಾಲನ್ನು ತೆಗೆದು ಮುರುಗಲು ಸಿಪ್ಪೆ ನೆನೆಸಿದ ನೀರಿಗೆ ಸೇರಿಸಿ. ಈಗ ಇದಕ್ಕೆ ಸ್ವಲ್ಪ ಉಪ್ಪು ಮತ್ತು ಸಕ್ಕರೆಹಾಕಿ. ಒಗ್ಗರಣೆ ಸೌಟಿಗೆ ಎಣ್ಣೆ ಹಾಕಿ ಅದು ಕಾದ ಮೇಲೆ ಅದಕ್ಕೆ ಜೀರಿಗೆ, ಸಾಸಿವೆ,ಒಣಮೆಣಸು, ಕರಿಬೇವು ಹಾಕಿ, ಚಿಟಪಟಿಸಿದ ಮೇಲೆ ಈ ಒಗ್ಗರಣೆ ಹಾಕಿದರೆ ಮುರುಗಲು ಸಿಪ್ಪೆಯ ತ೦ಬುಳಿ ಸಿದ್ಧ. ಇದನ್ನು ಅನ್ನದ ಜೊತೆ ತಿನ್ನಬಹುದು ಹಾಗೆ ಕುಡಿಯಲು ರುಚಿಕಟ್ಟಾಗಿರುತ್ತದೆ.

(ಮುಗುಗಲು (ಪುನರ್ಪುಳಿ) ಸಿಪ್ಪೆಯು ಪಿತ್ತ ಶಮನಕಾರಿಯು ಹೌದು)

ಶುಕ್ರವಾರ, ಮೇ 26, 2017

ಮ್ಯಾಂಗೋ ಶಿರಾ (ಮ್ಯಾಂಗೋ ಕೇಸರಿಭಾತ್) :

ಸಾಮಗ್ರಿಗಳು :
ರವೆ / ಸೂಜಿ : 1 ಕಪ್ 
ನೀರು : 2 ಕಪ್
ಹಾಲು : 1 ಕಪ್  
ಸಕ್ಕರೆ : 1 1/4 ಕಪ್ 
ತುಪ್ಪ : 1/3 ಕಪ್ 
ಸಣ್ಣಗೆ ಹೆಚ್ಚಿದ ಮಾವಿನಹಣ್ಣು : 1/2 ಕಪ್ 
ಗೋಡಂಬಿ : 8-10 
ಕುಂಕುಮ ಕೇಸರಿ : 10-12 ದಳಗಳು  
ಉಪ್ಪು : 2 ಚಿಟಿಕೆ 

ವಿಧಾನ : 
ಕೇಸರಿಯನ್ನು ಎರಡು ಚಮಚ ಬಿಸಿ ಹಾಲಿನಲ್ಲಿ ನೆನೆಸಿಡಿ. ಬಾಣಲೆಗೆ ತುಪ್ಪ ಹಾಕಿ ರವೆ ಹಾಕಿ ಚೆನ್ನಾಗಿ ಹುರಿಯಿರಿ. ರವೆ ಸ್ವಲ್ಪ ಕೆಂಪಗಾಗಿ, ಘಮ್ಮನೆ ಸುವಾಸನೆ ಬಂದರೆ ರವೆ ಹುರಿದಿದೆ ಎಂದರ್ಥ. ರವೆ ಹುರಿಯಿತ್ತುರುವಾಗಲೇ ನೀರು ಮತ್ತು ಹಾಲನ್ನು ಸೇರಿಸಿ ಕುದಿಯಲು ಇಡಿ. ಹುರಿದ ರವೆಗೆ ಕುದಿಯುತ್ತಿರುವ ನೀರು ಮತ್ತು ಹಾಲನ್ನು ಹಾಕಿ ಕಲಕುತ್ತಾ ಬನ್ನಿ. ರವೆ ಹುರಿಯುತ್ತಿರುವ ಒಲೆಯನ್ನು ಸಣ್ಣ ಉರಿಯಲ್ಲಿಟ್ಟು ನೀರು ಹಾಕಿ, ಬಿಸಿ ನೀರು ಸಿಡಿಯುತ್ತದೆ. ಮೊದಲ ಸಲ ಮಾಡುತ್ತಿರುವವರಾದರೆ ನೀರು ಹಾಕಿ ಮಿಕ್ಸ್ ಮಾಡುವವರೆಗೆ ಒಮ್ಮೆ ಉರಿ ಆರಿಸಿಕೊಳ್ಳುವುದು ಉತ್ತಮ. ನಂತರ ನೆನೆಸಿಟ್ಟ ಕೇಸರಿ ದಳಗಳು, ಹೆಚ್ಚಿದ ಮಾವಿನಹಣ್ಣು, ಗೋಡಂಬಿ ಚೂರುಗಳನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ, ಮುಚ್ಚಳ ಮುಚ್ಚಿ ಒಂದೆರಡು ನಿಮಿಷ ಬೇಯಲು ಬಿಡಿ. ರವೆ ಬೆಂದ ಮೇಲೆ ಸಕ್ಕರೆ, ಉಪ್ಪು ಹಾಕಿ ಕಲಕುತ್ತಾ ಬನ್ನಿ. ಸಕ್ಕರೆ ಹಾಕಿದ ಮೇಲೆ ಮತ್ತೆ ಸ್ವಲ್ಪ ನೀರು ಬಿಟ್ಟುಕೊಳ್ಳುತ್ತದೆ. ಮಿಶ್ರಣ ಬಾಣಲೆಗೆ ಅಂಟಿಕೊಳ್ಳದಂತೆ ಸೌಟು ಮತ್ತು ಬಾಣಲೆಯನ್ನು ಬಿಡುವವರೆಗೂ ಚೆನ್ನಾಗಿ ಮಿಕ್ಸ್ ಮಾಡುತ್ತಿರಿ. ಮಿಶ್ರಣ ಬಾಣಲೆ ಅಂಚನ್ನು ಬಿಟ್ಟುಕೊಂಡ ಮೇಲೆ ಉರಿ ಆರಿಸಿ. ಈಗ ಮಾವಿನಹಣ್ಣಿನ ಶಿರಾವನ್ನು ಬಿಸಿ ಬಿಸಿಯಾಗಿ ಸವಿಯಿರಿ. 



ಸಲಹೆಗಳು :
1) ಒಂದು ವರ್ಷ ಮೇಲ್ಪಟ್ಟ ಮಕ್ಕಳಿಗೆ ಇದನ್ನು ಸಾಯಂಕಾಲದ ತಿಂಡಿಗೆ ಮಾಡಿಕೊಡಬಹುದು. ದೊಡ್ಡವರಿಗೂ ಇಷ್ಟವಾಗುವ ಸಿಹಿ ತಿನಿಸಿದು. ಮಕ್ಕಳಿಗೆ ಮಾಡುವಾಗ ಅಗಿದು ತಿನ್ನುವಷ್ಟು ಹಲ್ಲು ಬರದಿದ್ದರೆ ಗೋಡಂಬಿಯನ್ನು ಹಾಕಬೇಡಿ ಮತ್ತು ನೀರಿನ ಪ್ರಮಾಣಕ್ಕಿಂತ ಹಾಲಿನ ಪ್ರಮಾಣ ಜಾಸ್ತಿ ಹಾಕಿ. 

2) ಮಾವಿನಹಣ್ಣಿನ ಬದಲು ಕಿತ್ತಳೆ ಹಣ್ಣು, ಬಾಳೆಹಣ್ಣು ಅಥವಾ ಅನಾನಸ್ ಹಣ್ಣು ಹಾಕಿ ಮಾಡಿದರೂ ಚೆನ್ನಾಗಿರುತ್ತದೆ. 

3) ಗೋಡಂಬಿಯನ್ನು ತುಪ್ಪದಲ್ಲಿ ಹುರಿದು ಕೊನೆಯಲ್ಲಿ ಕೂಡ ಸೇರಿಸಬಹುದು. ಜೊತೆಗೆ ಒಣ ದ್ರಾಕ್ಷಿ ಹಾಕಬಹುದು ಆದರೆ ಮಾವಿನಹಣ್ಣಿನ ಜೊತೆ ಚೆನ್ನಾಗಿರುವುದಿಲ್ಲ. ಬೇರೆ ಹಣ್ಣನ್ನು ಹಾಕಿ ಮಾಡಿದಾಗ ಹಾಕಿಕೊಳ್ಳಿ. 

4) ಸೂಜಿ ರವೆಯ ಬದಲು ಚಿರೋಟಿ ರವೆಯಿಂದ ಮಾಡಿದರೂ ತುಂಬಾ ಚೆನ್ನಾಗಿ ಆಗುತ್ತದೆ.  

ಶುಕ್ರವಾರ, ಮೇ 19, 2017

ಅವಲಕ್ಕಿ ಪಕೋಡ

ಸಾಮಗ್ರಿಗಳು: 
ದಪ್ಪ ಅವಲಕ್ಕಿ - 1/4 ಕೆ.ಜಿ
ಕಡಲೆಹಿಟ್ಟು,  - 2 ಟೇ. ಚಮಚ
ಈರುಳ್ಳಿ,  - 2
ಕೊತ್ತ೦ಬರಿ ಸೊಪ್ಪು
ಒಣಮೆಣಸಿನ ಪುಡಿ  - 1 ಚಮಚ
ಜೀರಿಗೆ, ಓಮು,  - ತಲಾ1 ಟೀ
ಉಪ್ಪು - ರುಚಿಗೆ ತಕ್ಕಷ್ಟು
ಎಣ್ಣೆ- ಕರಿಯಲು.




ವಿಧಾನ : ದಪ್ಪ ಅವಲಕ್ಕಿಯನ್ನು ನೀರಿನಲ್ಲಿ ತೊಳೆದು ಸ್ವಲ್ಪ ನೀರು ಹಾಕಿ ನಿಮಿಶ ನೆನೆಸಿಡಿ.ಅವಲಕ್ಕಿ ಮೆತ್ತಗಾದಮೇಲೆ ಅದಕ್ಕೆ ಕಡಲೆಹಿಟ್ಟು, ಉದ್ದುದ್ದ ಹೆಚ್ಚಿದ ಈರುಳ್ಳಿ, ಒಣಮೆಣಸಿನ ಪುಡಿ, ಜೀರಿಗೆ, ಓಮು, ಸಣ್ಣಗೆ ಹೆಚ್ಚಿದ ಕೊತ್ತ೦ಬರಿ ಸೊಪ್ಪು, ಉಪ್ಪು ಹಾಕಿ ಸ್ವಲ್ಪ ನೀರು ಹಾಕಿ ಕಲೆಸಿಕೊಳ್ಳಿ. ಈಗ ಕಲೆಸಿಟ್ಟ ಹಿಟ್ಟಿನ ರುಚಿ ನೋಡಿಕೊ೦ಡು ಬೇಕಾದಲ್ಲಿ ಉಪ್ಪು/ಖಾರ ಸೇರಿಸಿ. (ಬಜ್ಜಿ ಹಿಟ್ಟಿಗಿ೦ತ ಸ್ವಲ್ಪ ಗಟ್ಟಿ ಇರಲಿ). ಬಾಣಲೆಯಲ್ಲಿ ಎಣ್ಣೆ ಹಾಕಿ ಕಾದ ನ೦ತರ ಈ ಹಿಟ್ಟನ್ನು ಬಜ್ಜಿ ಥರ ಎಣ್ಣೆಯಲ್ಲಿ ಹೊ೦ಬಣ್ಣ ಬರುವವರೆಗೆ ಕರಿದರೆ ಗರಿ ಗರಿಯಾದ ಅವಲಕ್ಕಿ ಪಕೋಡ ಸವಿಯಲು ಸಿದ್ದ.

ಶುಕ್ರವಾರ, ಮೇ 12, 2017

ರವೆ ಸಂಡಿಗೆ :

ಸಾಮಗ್ರಿಗಳು:
ಉಪ್ಪಿಟ್ಟಿನ ರವೆ / ಸೂಜಿ ರವೆ : 1ಕಪ್ 
ನೀರು : 8 ಕಪ್ 
ಉಪ್ಪು : 1 ಚಮಚ 
ಹಸಿಮೆಣಸಿನ ಕಾಯಿ : 7-8
ಜೀರಿಗೆ : 1/2  ಚಮಚ
ಇಂಗು :1/2 ಚಮಚ 

ವಿಧಾನ :
ದೊಡ್ಡ ಪಾತ್ರೆಯಲ್ಲಿ 8 ಕಪ್ ನೀರು ಹಾಕಿ ಕುದಿಯಲು ಇಡಿ. ಹಸಿಮೆಣಸು ಮತ್ತು ಜೀರಿಗೆ ಪೇಸ್ಟ್ ಮಾಡಿಕೊಳ್ಳಿ. ಜೀರಿಗೆ ತರಿ ತರಿ ಇದ್ದರೂ ಆಯಿತು.

 ನೀರು ಕುದಿಯಲು ಶುರು ಆದ ಮೇಲೆ ರವೆ, ಉಪ್ಪು, ಇಂಗು ಹಾಕಿ ರವೆ ಗಂಟಾಗದಂತೆ ಮಧ್ಯಮ ಉರಿಯಲ್ಲಿ ಚೆನ್ನಾಗಿ ಕಲಕುತ್ತಿರಿ. ಸ್ವಲ್ಪ ದಪ್ಪ ಗಂಜಿಯಷ್ಟು ಗಟ್ಟಿಯಾದ ಮೇಲೆ ಉರಿ ಆರಿಸಬೇಕು.

 ಒಂದು ಚಮಚದಲ್ಲಿ ಮಿಶ್ರಣವನ್ನು ತೆಗೆದುಕೊಂಡು ತಟ್ಟೆಗೆ ಹಾಕಿದರೆ ಅದು ಹರಿದುಕೊಂಡು ಹೋಗದಷ್ಟು ಗಟ್ಟಿ ಇದ್ದರೆ ಸಾಕು. ತುಂಬಾ ದಪ್ಪಗಾದರೂ ಚೆನ್ನಾಗಿರುವುದಿಲ್ಲ. ತಣ್ಣಗಾದಂತೆ ಇನ್ನೂ ಗಟ್ಟಿಯಾಗುತ್ತಾ ಬರುತ್ತದೆ. ಒಂದು ಪ್ಲಾಸ್ಟಿಕ್ ಶೀಟ್ ಅನ್ನು ಬಿಸಿಲಿನಲ್ಲಿ ಹರವಿಕೊಂಡು ಹಾರಿ ಹೋಗದಂತೆ ಸುತ್ತಲೂ ಕಲ್ಲು ಇಡಿ. ಈಗ ಒಂದು ಬೌಲ್ ನಲ್ಲಿ ರವೆ  ಮಿಶ್ರಣವನ್ನು ತೆಗೆದುಕೊಂಡು ಒಂದು ಚಮಚದಿಂದ ಸಂಡಿಗೆ ಹಾಕುತ್ತಾ ಬನ್ನಿ.

 ಒಂದು ಅಥವಾ ಎರಡು ದಿನಕ್ಕೆ ಪೂರ್ತಿ ಒಣಗಿ ಪ್ಲಾಸ್ಟಿಕ್ ಬಿಡುತ್ತದೆ. ನಂತರ ಸಂಡಿಗೆಯನ್ನು ಪ್ಲಾಸ್ಟಿಕ್ ನಿಂದ ಬಿಡಿಸಿ ಒಂದು ಅಗಲವಾದ ತಟ್ಟೆಗೆ ಹಾಕಿ ಇನ್ನೊಂದು ದಿನ ಬಿಸಿಲಿನಲ್ಲಿ ಇಡಿ.

 ಗರಿ ಗರಿಯಾಗಿ ಒಣಗಿದ ಸಂಡಿಗೆಯನ್ನು ವರ್ಷದವರೆಗೆ ಗಾಳಿಯಾಡದ ಡಬ್ಬಿಯಲ್ಲಿ ಶೇಖರಿಸಿಡಬಹುದು. ಬೇಕಾದಾಗ ಕಾದ ಎಣ್ಣೆಯಲ್ಲಿ ಕರಿದು, ಬಿಸಿ ಬಿಸಿ ಅನ್ನ - ಸಾರು / ತೊವ್ವೆ ಜೊತೆ ಸವಿಯಬಹುದು.  
 

ಸಲಹೆ : ಹಸಿಮೆಣಸಿನ ಪೇಸ್ಟ್ ಬದಲು ಅಚ್ಚ ಖಾರದ ಪುಡಿಯನ್ನೂ ಬಳಸಬಹುದು ಮತ್ತು ಇಂಗು ಹಾಕುವ ಬದಲು ಬೆಳ್ಳುಳ್ಳಿ ಪೇಸ್ಟ್ ಕೂಡ ಹಾಕಬಹುದು. 

ಶುಕ್ರವಾರ, ಮೇ 5, 2017

ಮಜ್ಜಿಗೆ ಪಳದ್ಯ: ( 2 ವಿಧಾನಗಳು )

ವಿಧಾನ -1 :

ಸಾಮಗ್ರಿಗಳು:
ಮಜ್ಜಿಗೆ (ಸ್ವಲ್ಪ ದಪ್ಪ ಇರಬೇಕು, ಆದರೆ ಮೊಸರಲ್ಲ) - 2 ಲೋಟ,
ಉಪ್ಪು - ರುಚಿಗೆ, ಹಸಿಮೆಣಸು - 2,
ಜೀರಿಗೆ -  1/4 ಚಮಚ,
ಸಾಸಿವೆ - 1/4 ಚಮಚ,
ಕರಿಬೇವು - 4-5 ಎಲೆಗಳು,
ಬೆಳ್ಳುಳ್ಳಿ - 2 ಎಸಳು,
ಅರಿಶಿನಪುಡಿ - ಚಿಟಿಕೆ.ಎಣ್ಣೆ - 1 ಟೇ.ಚಮಚ


ವಿಧಾನ : ಮಜ್ಜಿಗೆಗೆ ಬೇಕಷ್ಟು ಉಪ್ಪು ಹಾಕಿ ಕದಡಿಟ್ಟುಕೊಳ್ಳಿ. ಒಗ್ಗರಣೆ ಸೌಟಿಗೆ ಸ್ವಲ್ಪ ಎಣ್ಣೆ ಹಾಕಿಕೊ೦ಡು ಬಿಸಿಯಾದ ಮೇಲೆ ಸಾಸಿವೆ, ಜೀರಿಗೆ, ಹಸಿಮೆಣಸಿನ ಚೂರುಗಳು, ಜಜ್ಜಿದ ಬೆಳ್ಳುಳ್ಳಿ, ಕರಿಬೇವು ಅರಿಶಿನ ಪುಡಿ ಹಾಕಿ ಈ ಒಗ್ಗರಣೆಯನ್ನು ಮಜ್ಜಿಗೆಗೆ ಹಾಕಿದರೆ ಮಜ್ಜಿಗೆ ಪಳದ್ಯ ರೆಡಿ.

ವಿಧಾನ -2 :

(2 ನೇ ವಿಧಾನದಲ್ಲಿ ಅರಿಶಿನ & ಜೀರಿಗೆ ಹಾಕುವುದಿಲ್ಲ. ಉದ್ದಿನಬೇಳೆ & ನೀರು ಒಗ್ಗರಣೆಗೆ ಹಾಕಬೇಕು. - ಮತ್ತೆಲ್ಲ ಅದೆ ಸಾಮಗ್ರಿಗಳು)

ಬಾಣಲೆಗೆ ಎಣ್ಣೆ ಹಾಕಿ ಅದು ಕಾದ ಮೇಲೆ ಉದ್ದಿನಬೇಳೆ, ಸಾಸಿವೆ, ಕರಿಬೇವು,ಹಸಿಮೆಣಸು, ಬೆಳ್ಳುಳ್ಳಿ ಹಾಕಿ ಹಾಗೆ 1 ನಿಮಿಷ ಬಿಟ್ಟು ನೀರು ಹಾಕಿ ಉಪ್ಪು ಹಾಕಿ ನೀರು ಕುದಿಬ೦ದ ಮೇಲೆ ಉರಿ ಆರಿಸಿ,, 3 ನಿಮಿಷ ಬಿಟ್ಟು ಮಜ್ಜಿಗೆ ಸೇರಿಸಿ.,, ಈಗ ಬಿಸಿ ಬಿಸಿ ಮಜ್ಜಿಗೆ ಪಳದ್ಯ ರೆಡಿ

ಸೂಚನೆ : ಮಜ್ಜಿಗೆ ಸ್ವಲ್ಪ ಹುಳಿ ಇದ್ದರೆ ಚೆನ್ನಾಗಿರುತ್ತದೆ.












ಶುಕ್ರವಾರ, ಏಪ್ರಿಲ್ 28, 2017

ದ್ರಾಕ್ಷಿ ಹಣ್ಣಿನ ಸಾಸಿವೆ:

ಈಗ ದ್ರಾಕ್ಷಿ ಹಣ್ಣಿನ ಸೀಸನ್. ತಿನ್ನಲು ತಂದ ದ್ರಾಕ್ಷಿ ಸಿಹಿಯ ಜೊತೆ ಸ್ವಲ್ಪ ಹುಳಿ ಇದ್ದರೆ ಈ ಸಾಸಿವೆ ಮಾಡಿ ನೋಡಿ. 
ಸಾಮಗ್ರಿಗಳು :
ಹಸಿ ದ್ರಾಕ್ಷಿ : 18-20 
ತೆಂಗಿನ ತುರಿ : 1/4 ಕಪ್ 
ಮೊಸರು : 1/4 ಕಪ್ (ಹುಳಿ ಇರಬಾರದು) 
ಸಾಸಿವೆ : 1/2 ಚಮಚ 
ಹಸಿಮೆಣಸಿನ ಕಾಯಿ : 1
ಅರಿಶಿನ ಪುಡಿ : 1/4 ಚಮಚ
ತುಪ್ಪ : 1-2 ಚಮಚ  
ಉಪ್ಪು : ರುಚಿಗೆ ತಕ್ಕಷ್ಟು 

ಒಗ್ಗರಣೆಗೆ : 
ಎಣ್ಣೆ : 1 ಚಮಚ 
ಸಾಸಿವೆ : 1/4 ಚಮಚ 

ವಿಧಾನ :
ದ್ರಾಕ್ಷಿ ಹಣ್ಣನ್ನು ಸಣ್ಣದಾಗಿ ಹೆಚ್ಚಿ.  ಅಂದರೆ  ಅಡ್ಡವಾಗಿ ಎರಡು ಭಾಗ ಮಾಡಿದರೆ ಸಾಕು, ತುಂಬಾ ದೊಡ್ಡ ದ್ರಾಕ್ಷಿಯಾದರೆ ನಾಲ್ಕು ಭಾಗ ಮಾಡಿ. ದಪ್ಪ ತಳದ ಪಾತ್ರೆಗೆ ತುಪ್ಪ ಹಾಕಿ, ಹೆಚ್ಚಿದ ದ್ರಾಕ್ಷಿ ಹಾಕಿ ಮೆತ್ತಗಾಗುವ ತನಕ ಹುರಿಯಿರಿ. ಮಿಕ್ಸಿ ಜಾರ್ ಗೆ ತೆಂಗಿನ ತುರಿ, ಹಸಿಮೆಣಸಿನ ಕಾಯಿ, ಸಾಸಿವೆ ಹಾಕಿ ಸ್ವಲ್ಪ ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ಹುರಿದಿಟ್ಟ ಮಿಶ್ರಣ ತಣ್ಣಗಾದ ಮೇಲೆ ಮೊಸರು, ರುಬ್ಬಿದ ಮಿಶ್ರಣ, ಉಪ್ಪು, ಬೇಕಿದ್ದಲ್ಲಿ ಸ್ವಲ್ಪ ನೀರು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಇದಕ್ಕೆ ಎಣ್ಣೆ, ಸಾಸಿವೆ ಒಗ್ಗರಣೆ ಮಾಡಿದರೆ ದ್ರಾಕ್ಷಿ ಸಾಸಿವೆ ಅನ್ನದ ಜೊತೆ ಸವಿಯಲು ಸಿದ್ಧ. 

ಶುಕ್ರವಾರ, ಏಪ್ರಿಲ್ 21, 2017

ಕೋಕ೦ (ಮುರುಗಲು ಸಿಪ್ಪೆಯ ಪಾನಕ):

ಸಾಮಗ್ರಿಗಳು : 
ಮುರುಗಲು ಹಣ್ಣು - 30,
 ಸಕ್ಕರೆ - 400 ಗ್ರಾ೦


ವಿಧಾನ : ಮುರುಗಲು ಹಣ್ಣನ್ನು ತೊಳೆದು ಒ೦ದು ಬಟ್ಟೆಯಲ್ಲಿ ನೀರು ಒರೆಸಿ. ಹಣ್ಣನ್ನು ಒಡೆದು ಬೀಜ ತೆಗಿಯಿರಿ. ಸಿಪ್ಪೆಯನ್ನು ಒ೦ದು ಪಾತ್ರೆಯಲ್ಲಿ ಹಾಕಿ ಅದಕ್ಕೆ ಸಕ್ಕರೆ ಸೇರಿಸಿ 3-4 ದಿನ ತೆಳುವಾದ ಬಟ್ಟೆ ಮುಚ್ಚಿ ಬಿಸಿಲಿಗೆ ಒಣಗಿಸಿ. ನ೦ತರ ಸಕ್ಕರೆಯು ಕರಗಿ ನೀರಾಗಿರುತ್ತದೆ. ಈಗ ಸಿಪ್ಪೆಯನ್ನು ಕೈಯಲ್ಲಿ ಗಟ್ಟಿಯಾಗಿ ಹಿ೦ಡಿ. ರಸವನ್ನು ಸೋಸಿ ಮತ್ತೆ ಬಿಸಿಲಿನಲ್ಲಿ 3-4 ದಿನ ತೆಳುವಾದ ಬಟ್ಟೆ ಮುಚ್ಚಿ ಇಡಿ. ಇದನ್ನು ಒ೦ದು ಗಾಜಿನ ಬಾಟಲಿಯಲ್ಲಿ ಶೇಖರಿಸಿ ಇಡಿ. ಬೇಕಾದಾಗ ಒ೦ದು ಚಮಚ ಕೋಕ೦ ನೀರಿಗೆ ಸೇರಿಸಿ ಸ್ವಲ್ಪ ಸಕ್ಕರೆ ಹಾಕಿದರೆ ರುಚಿಯಾದ ಹಾಗೆ ಆರೋಗ್ಯಕ್ಕು ಒಳ್ಳೆಯದಾದ ಪಾನಕ ಕುಡಿಯಬಹುದು.

ಶನಿವಾರ, ಏಪ್ರಿಲ್ 15, 2017

ಕಲ್ಲಂಗಡಿ ಸಿಪ್ಪೆಯ ದೋಸೆ :

ಕಲ್ಲಂಗಡಿ ಹಣ್ಣಿನ ಕೆಂಪು ಭಾಗವನ್ನು ಮಾತ್ರ  ತಿಂದು ಅದರ ಸಿಪ್ಪೆಯ ಜೊತೆ ಇರುವ ಬಿಳಿಯ ಭಾಗವನ್ನು ಹಾಗೆಯೇ ಬಿಸಾಡುವುದು ರೂಢಿ.... ಅದರ ಬದಲು ಸಿಹಿಯಾದ ಕೆಂಪು ಭಾಗವನ್ನು ಕತ್ತರಿಸಿ ತಿಂದು, ಸಪ್ಪೆಯಾಗಿರುವ ಬಿಳಿಯ ಭಾಗವನ್ನು ಹಾಕಿ ಗರಿ ಗರಿ ದೋಸೆ ಮಾಡಿಕೊಳ್ಳಬಹುದು.... ಇಲ್ಲಿದೆ ಮಾಡುವ ವಿಧಾನ... 

ಸಾಮಗ್ರಿಗಳು :
ಹೆಚ್ಚಿದ ಕಲ್ಲಂಗಡಿ ಸಿಪ್ಪೆ : 2 ಕಪ್ (ಸಿಪ್ಪೆಯ ಹಸಿರು ಭಾಗ ತೆಗೆದು ಒಳಗಿನ ಬಿಳಿಯ ಭಾಗವನ್ನು ಹೆಚ್ಚಿಕೊಳ್ಳಿ) 
ಅಕ್ಕಿ : 2 ಕಪ್ 
ಅವಲಕ್ಕಿ : 1 ಟೇಬಲ್ ಚಮಚ 
ಮೆಂತ್ಯ : 1/4 ಚಮಚ 
ಉದ್ದಿನ ಬೇಳೆ : 1/2 ಚಮಚ 
ಉಪ್ಪು : ರುಚಿಗೆ 
ಎಣ್ಣೆ : ದೋಸೆ ತವಾಗೆ ಸವರಲು 

ವಿಧಾನ :
ಅಕ್ಕಿ, ಅವಲಕ್ಕಿ, ಉದ್ದಿನ ಬೇಳೆ, ಮೆಂತ್ಯ ಕಾಳು  ಎಲ್ಲವನ್ನೂ ತೊಳೆದು ಒಟ್ಟಿಗೆ ಸೇರಿಸಿ 4-5 ಘಂಟೆಗಳ ಕಾಲ ನೆನೆಸಿಡಿ. 

ನಂತರ ನೀರು ಬಸಿದಿಟ್ಟುಕೊಂಡು  ಹೆಚ್ಚಿದ ಕಲ್ಲಂಗಡಿ ಜೊತೆ ಸೇರಿಸಿ ರುಬ್ಬಿ. ಬೇಕಿದ್ದಲ್ಲಿ ಬಸಿದಿಟ್ಟುಕೊಂಡ ನೀರನ್ನೇ ಸ್ವಲ್ಪ ಸೇರಿಸಿಕೊಂಡು ನುಣ್ಣಗೆ ರುಬ್ಬಿಕೊಳ್ಳಿ. ಈ ಹಿಟ್ಟನ್ನು 7-8 ಘಂಟೆಗಳ ಕಾಲ ಹುದುಗಲು ಬಿಡಿ. ರಾತ್ರಿ ರುಬ್ಬಿಟ್ಟರೆ ಬೆಳಿಗ್ಗೆ ತಿಂಡಿಗೆ ಮಾಡಬಹುದು. ಇದಕ್ಕೆ ಉಪ್ಪು, ಬೇಕಿದ್ದಲ್ಲಿ ಸ್ವಲ್ಪ ನೀರು ಸೇರಿಸಿ ದೋಸೆ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. 

ದೋಸೆ ತವಾಗೆ  ಎಣ್ಣೆ ಸವರಿ ಚೆನ್ನಾಗಿ ಕಾಯಿಸಿ ತೆಳ್ಳಗೆ ದೋಸೆ ಮಾಡಿ ಮುಚ್ಚಿ ಬೇಯಿಸಿ. 

ಗರಿಗರಿಯಾದ ಕಲ್ಲಂಗಡಿ ದೋಸೆಯನ್ನು ಕಾಯಿ ಚಟ್ನಿ ಜೊತೆ ಸವಿಯಿರಿ.
ಸಲಹೆಗಳು : 
1) ಇದೇ ಹಿಟ್ಟಿನಿಂದ ದೋಸೆಯ ಬದಲು ತೆಳ್ಳೇವು ಕೂಡ ಮಾಡಬಹುದು.
2) ನಿಮಗೆ ಇಷ್ಟವಿದ್ದರೆ ದೋಸೆ ಮಾಡುವಾಗ ಎಣ್ಣೆ / ತುಪ್ಪ ಹಾಕಿಕೊಳ್ಳಬಹುದು.

ಶುಕ್ರವಾರ, ಏಪ್ರಿಲ್ 7, 2017

ಕಾಯಿ ಉ೦ಡೆ :

ಸಾಮಗ್ರಿಗಳು : 
ತೆ೦ಗಿನತುರಿ - 2 ಕಪ್ 
ಬೆಲ್ಲ - 1 ಕಪ್,
ಏಲಕ್ಕಿ ಪುಡಿ - 1/2 ಟೀ ಚಮಚ, 
ಗೋಡ೦ಬಿ - 15



ವಿಧಾನ : ಒ೦ದು ದಪ್ಪ ತಳದ ಪಾತ್ರೆ/ಬಾಣಲೆಗೆ ತೆ೦ಗಿನತುರಿ, ಬೆಲ್ಲ ಸೇರಿಸಿ ೧೫-೨೦ ನಿಮಿಷ ಸಣ್ಣ ಉರಿಯಲ್ಲಿ ಕುದಿಸಿ ಸೌಟಿನಲ್ಲಿ ಆಗಾಗ ತೊಳೆಸುತ್ತಿರಿ. ಇಲ್ಲವಾದಲ್ಲಿ ಬೆಲ್ಲ ತಳಕ್ಕೆ ಹಿಡಿಯುತ್ತದೆ. ಈ ತೆ೦ಗಿನತುರಿ ಬೆಲ್ಲದ ಮಿಶ್ರಣವು ಬದಿ & ಸೌಟು ಬಿಡುವವರೆಗು ತೊಳೆಸುತ್ತಲೆ ಇರಬೇಕು. ನ೦ತರ ಒಲೆಯಿ೦ದ ಇಳಿಸಿ ಏಲಕ್ಕಿ ಪುಡಿ ಗೋಡ೦ಬಿ ಚೂರುಗಳನ್ನು ಸೇರಿಸಿ ಸರಿಯಾಗಿ ಕಲೆಸಿ. ಸ್ವಲ್ಪ ಬಿಸಿ ಆರಿದ ಮೇಲೆ ಉ೦ಡೆಯನ್ನು ಮಾಡಿದರೆ ಕಾಯಿ ಉ೦ಡೆ ಸಿದ್ಧ.

(ಗೋಡ೦ಬಿಯ ಬದಲು ಶೇ೦ಗಾ ಕೂಡ ಹಾಕಬಹುದು. ಶೇ೦ಗಾ ಹಾಕುವಿರಾದರೆ ಅದನ್ನು ಹುರಿದು ಹಾಕಿ ಇಲ್ಲವಾದರೆ ಹಸಿ ವಾಸನೆ ಬರುತ್ತದೆ.)

ಗುರುವಾರ, ಮಾರ್ಚ್ 30, 2017

ಅವಲಕ್ಕಿ ಬಾತ್ :

ಸಾಮಗ್ರಿಗಳು :
ದಪ್ಪ ಅವಲಕ್ಕಿ- 1 ಕಪ್,
ಹಸಿ ಬಟಾಣಿ - 1/4 ಕಪ್,
ಈರುಳ್ಳಿ - 1,
ಟೊಮೇಟೊ - 1 (ಬೇಕಿದ್ದಲ್ಲಿ ಮಾತ್ರ) 
ಹಸಿಮೆಣಸಿನಕಾಯಿ - 1,
ತೆಂಗಿನ ತುರಿ - 4 ಚಮಚ,
ರಸಂ ಪುಡಿ - 1/2 ಚಮಚ,
ಅರಿಶಿನ ಪುಡಿ - 1/4 ಚಮಚ,
ಎಣ್ಣೆ - 4-5 ಚಮಚ,
ಉದ್ದಿನ ಬೇಳೆ - 1/2 ಚಮಚ,
ಸಾಸಿವೆ - 1/4 ಚಮಚ,
ಕರಿಬೇವು - 6-8 ಎಲೆಗಳು,
ಸಕ್ಕರೆ- 1 ಚಮಚ,
ಉಪ್ಪು - ರುಚಿಗೆ 

ವಿಧಾನ :
ಮೊದಲು ಅವಲಕ್ಕಿಯನ್ನು ತೊಳೆದು, ನೀರು ಹಾಕಿ 15-20 ನಿಮಿಷ ನೆನೆಸಿಡಿ. ಮೆತ್ತಗಾಗಬೇಕು, ಆದರೆ ತುಂಬಾ ಗಂಜಿಯಾಗುವಷ್ಟು ಮೆತ್ತಗಾಗಬಾರದು. ಈರುಳ್ಳಿ ಮತ್ತು ಟೊಮ್ಯಾಟೊವನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಹಸಿಮೆಣಸಿನಕಾಯಿಯನ್ನು ಉದ್ದ ಸೀಳಿಕೊಳ್ಳಿ.  ಹಸಿಬಟಾಣಿಗೆ ನೀರು ಮತ್ತು ಚಿಟಿಕೆ ಉಪ್ಪು ಹಾಕಿ ಬೇಯಿಸಿಕೊಳ್ಳಿ. ನೆಂದ ಅವಲಕ್ಕಿಯ ನೀರನ್ನು ಪೂರ್ತಿಯಾಗಿ ಬಸಿದುಕೊಂಡು ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಸಕ್ಕರೆ ಹಾಕಿ ಕಲಸಿಟ್ಟುಕೊಳ್ಳಿ. ಬಾಣಲೆಯನ್ನು ಒಲೆಯ ಮೇಲಿಟ್ಟು ಎಣ್ಣೆ ಹಾಕಿ ಕಾದ ಮೇಲೆ ಉದ್ದಿನ ಬೇಳೆ ಹಾಕಿ, ಅದು ಹೊಂಬಣ್ಣ ಬಂದ ಮೇಲೆ ಸಾಸಿವೆ ಹಾಕಿ ಚಿಟಪಟಾಯಿಸಿ. ಇದಕ್ಕೆ ಹಸಿಮೆಣಸಿನಕಾಯಿ, ಕರಿಬೇವು ಹಾಕಿ ಒಮ್ಮೆ ಹುರಿದು, ಹೆಚ್ಚಿದ ಈರುಳ್ಳಿ ಹಾಕಿ ಫ್ರೈ ಮಾಡಿ. ನಂತರ ಹೆಚ್ಚಿದ ಟೊಮೇಟೊ ಹಾಕಿ ಮೆತ್ತಗಾಗುವವರೆಗೆ ಹುರಿಯಿರಿ. ಇದಕ್ಕೆ ಬೇಯಿಸಿಕೊಂಡ ಬಟಾಣಿ, ತೆಂಗಿನತುರಿ, ಅರಿಶಿನ ಪುಡಿ, ರಸಂ ಪುಡಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಅವಲಕ್ಕಿ ಹಾಕಿ ಕಲಸಿ. ಬೇಕಿದ್ದಲ್ಲಿ ಸ್ವಲ್ಪ ಕೊತ್ತಂಬರಿ ಸೊಪ್ಪು ಹಾಕಿ ಮಿಕ್ಸ್ ಮಾಡಿದರೆ ಬಿಸಿ ಬಿಸಿ ಅವಲಕ್ಕಿ ರೆಡಿ. ಸರ್ವ್ ಮಾಡುವಾಗ ಗರಿ ಗರಿ ಸೇವ್ ಅಥವಾ mixture ಅನ್ನು ಮೇಲಿಂದ ಉದುರಿಸಿ ಕೊಡಿ. ಇದು ಬೆಳಗ್ಗಿನ ಉಪಹಾರಕ್ಕೆ ಅಥವಾ ಸಂಜೆಯ ಟೀ / ಕಾಫೀ ಜೊತೆ ಕೂಡ ಮಾಡಿಕೊಳ್ಳಬಹುದು. 

ಶುಕ್ರವಾರ, ಮಾರ್ಚ್ 24, 2017

ಶಾಬಕ್ಕಿ/ಸಬ್ಬಕ್ಕಿ ಸ೦ಡಿಗೆ:

ಸಾಮಗ್ರಿಗಳು: ಶಾಬಕ್ಕಿ/ಸಬ್ಬಕ್ಕಿ - 100 ಗ್ರಾ೦, ಉಪ್ಪು, ಜೀರಿಗೆ - 1/2 ಚಮಚ.



ವಿಧಾನ : ಶಾಬಕ್ಕಿಯನ್ನು ತೊಳೆದು 5-6 ತಾಸು ನೀರಿನಲ್ಲಿ ನೆನೆಸಿಡಿ. ನೆನೆಸಿದ ಶಾಬಕ್ಕಿಯನ್ನು ಕುಕ್ಕರ್ ಗೆ ಹಾಕಿ 3-4 ವಿಶಲ್ ಕೂಗಿಸಿ, ಬಿಸಿ ಆರಿದ ಮೇಲೆ ಉಪ್ಪು, ಜೀರಿಗೆ ಸೇರಿಸಿ. ಒ೦ದು ಪ್ಲಾಸ್ಟಿಕ್ ಶೀಟ್ ನಲ್ಲಿ ಈ ಮಿಶ್ರಣವನ್ನು ಸಣ್ಣ ಸಣ್ಣದಾಗಿ ಹಾಕಿ ಸಲ್ಪ ಹರಡಿ 2-3 ದಿನ ಬಿಸಿಲಿನಲ್ಲಿ ಒಣಗಿಸಿ. ಇದನ್ನು ಗಾಳಿಯಾಡದ ಡಬ್ಬಿಯಲ್ಲಿ ತು೦ಬಿಡಿ. ಬೇಕಾದಾಗ ಎಣ್ಣೆಯಲ್ಲಿ ಕರಿಯಿರಿ.

ಸೂಚನೆ: ಬೇಯಿಸಿದ ಶಾಬಕ್ಕಿಯನ್ನು ರುಬ್ಬಿ ಕೂಡ ಮಾಡಬಹುದು. (ಬೇಕಾದರೆ ಹಿಟ್ಟಿಗೆ 2 ಹಸಿಮೆಣಸನ್ನು ರುಬ್ಬಿ ಹಾಕಬಹುದು)

ಶುಕ್ರವಾರ, ಮಾರ್ಚ್ 17, 2017

ಹಲಸಿನ ಕಾಯಿ ಮಂಚೂರಿ :

ಸಾಮಗ್ರಿಗಳು:
ಹಲಸಿನ ಕಾಯಿ (ಸಿಪ್ಪೆ, ಮಧ್ಯದ ಗಟ್ಟಿ ಭಾಗ ತೆಗೆದು ಹೆಚ್ಚಿದ್ದು) - 4 ಕಪ್
ಕಾರ್ನ್ ಫ್ಲೋರ್ : 6-7 ಟೇಬಲ್ ಚಮಚ ಮತ್ತು ಅರ್ಧ ಚಮಚ ಫ್ರೈ ಮಾಡಲು
ಮೈದಾ : 2 ಟೇಬಲ್ ಚಮಚ
ಅಚ್ಚ ಖಾರದ ಪುಡಿ : 1 ಟೀ ಚಮಚ
ಮೊಸರು : 2 ಟೇಬಲ್ ಚಮಚ
ಶುಂಠಿ ಬೆಳ್ಳುಳ್ಳಿ ಪೇಸ್ಟ್: 1 ಟೀ ಚಮಚ
ಕ್ಯಾಪ್ಸಿಕಂ : 1
ಈರುಳ್ಳಿ : 1
ಈರುಳ್ಳಿ ಗಿಡ (sprin onion) : 1/2 ಕಪ್ ಹೆಚ್ಚಿದ್ದು
ಸಣ್ಣದಾಗಿ ಹೆಚ್ಚಿದ ಶುಂಠಿ : 1 ಟೀ ಚಮಚ
ಸಣ್ಣದಾಗಿ ಹೆಚ್ಚಿದ ಬೆಳ್ಳುಳ್ಳಿ : 1 ಟೀ ಚಮಚ
ಸಣ್ಣದಾಗಿ ಹೆಚ್ಚಿದ ಹಸಿಮೆಣಸಿನ ಕಾಯಿ : 1 ಟೀ ಚಮಚ
ಸಣ್ಣದಾಗಿ ಹೆಚ್ಚಿದ ಕೊತ್ತಂಬರಿ ಸೊಪ್ಪು : 1 ಟೇಬಲ್ ಚಮಚ
ಸೋಯಾ ಸಾಸ್ :1  ಟೀ ಚಮಚ
ಟೊಮೇಟೊ ಸಾಸ್ : 1 ಟೇಬಲ್ ಚಮಚ
ರೆಡ್ ಚಿಲ್ಲಿ ಸಾಸ್ / ಗ್ರೀನ್ ಚಿಲ್ಲಿ ಸಾಸ್ : 1 ಟೇಬಲ್ ಚಮಚ
ಸಕ್ಕರೆ : 1/4 ಚಮಚ
ಲಿಂಬು ರಸ : 1/2 ಚಮಚ
ಉಪ್ಪು : ರುಚಿಗೆ
ಎಣ್ಣೆ : ಕರಿಯಲು ಮತ್ತು ಫ್ರೈ ಮಾಡಲು

ವಿಧಾನ :
ಹಲಸಿನಕಾಯಿ ಸಿಪ್ಪೆ ಮತ್ತು ಮಧ್ಯದ ಗಟ್ಟಿ ಭಾಗ (ಮೂಗು ಎನ್ನುತ್ತಾರೆ ಅದನ್ನು) ತೆಗೆದು ಮಂಚೂರಿ ಗಾತ್ರಕ್ಕೆ ಹೆಚ್ಚಿಕೊಳ್ಳಿ ಮತ್ತು ಇದನ್ನು ಕುಕ್ಕರ್ ನಲ್ಲಿ ಇಟ್ಟು 2-3 ವಿಶಲ್ ಕೂಗಿಸಿ ಬೇಯಿಸಿಟ್ಟುಕೊಳ್ಳಿ. 

ಮೊಸರಿಗೆ ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಸ್ವಲ್ಪ ಉಪ್ಪು  ಹಾಕಿ ಕಲಸಿ ಹೆಚ್ಚಿದ ಹಲಸಿನಕಾಯಿಗೆ ಹಾಕಿ ಚೆನ್ನಾಗಿ ಕಲಸಿ ಅರ್ಧ ಗಂಟೆ ಫ್ರಿಡ್ಜ್ ನಲ್ಲಿಡಿ. 


ಈರುಳ್ಳಿ ಮತ್ತು ಕ್ಯಾಪ್ಸಿಕಂ ಅನ್ನು ಉದ್ದುದ್ದ ಹೆಚ್ಚಿಕೊಳ್ಳಿ. ಒಂದು ಕಡೆ ಎಣ್ಣೆ ಕಾಯಲು ಇಟ್ಟುಕೊಂಡು, ಇತ್ತ  ಕಾರ್ನ್ ಫ್ಲೋರ್ ಗೆ ಮೈದಾ, ಸ್ವಲ್ಪ ಉಪ್ಪು, ಅಚ್ಚ ಖಾರದ ಪುಡಿ, ನೀರು ಸೇರಿಸಿ ಗಂಟಿಲ್ಲದೇ ಕಲಸಿಕೊಳ್ಳಿ. ಹಿಟ್ಟಿನ ಮಿಶ್ರಣ ಮಂಚೂರಿ ಕರಿಯುವಷ್ಟು ತೆಳ್ಳಗಿರಲಿ. 

ಇದಕ್ಕೆ ತಯಾರಿಸಿಟ್ಟುಕೊಂಡ ಹಲಸಿನ ಕಾಯಿ ಹೋಳುಗಳನ್ನು ಹಾಕಿ ಅದ್ದಿ  ಕಾದ ಎಣ್ಣೆಯಲ್ಲಿ, ಸಣ್ಣ ಉರಿಯಲ್ಲಿ ಗರಿಗರಿಯಾಗಿ ಕರಿಯಿರಿ.

 ಈಗ ಒಂದು ಬಾಣಲೆಗೆ ೪-೫ ಚಮಚ ಎಣ್ಣೆ ಹಾಕಿ ಕಾದ ನಂತರ ಹೆಚ್ಚಿದ ಬೆಳ್ಳುಳ್ಳಿ, ಶುಂಠಿ ಮತ್ತು ಹಸಿಮೆಣಸಿನ ಕಾಯಿ ಹಾಕಿ ಸ್ವಲ್ಪ ಫ್ರೈ ಮಾಡಿ, ಇದಕ್ಕೆ ಈರುಳ್ಳಿ ಮತ್ತು ಕ್ಯಾಪ್ಸಿಕಂ ಹಾಕಿ ಒಂದು ನಿಮಿಷ ಫ್ರೈ ಮಾಡಿ. ನಂತರ ಒನ್ನೊಂದಾಗಿ ಸೋಯಾ ಸಾಸ್, ಟೊಮೇಟೊ ಮತ್ತು ಚಿಲ್ಲಿ ಸಾಸ್ ಹಾಕಿ ಒಮ್ಮೆ ಮಿಕ್ಸ್ ಮಾಡಿ. ಅರ್ಧ ಚಮಚ ಕಾರ್ನ್ ಫ್ಲೋರ್ ಅನ್ನು ಕಾಲು ಕಪ್ ನೀರಿಗೆ ಹಾಕಿ ಗಂಟಿಲ್ಲದಂತೆ ಕಲಸಿಕೊಂಡು ಬಾಣಲೆಯಲ್ಲಿರುವ ಮಿಶ್ರಣಕ್ಕೆ ಹಾಕಿ ಚೆನ್ನಾಗಿ ಕಲಕುತ್ತಾ ಸಕ್ಕರೆ ಸ್ವಲ್ಪ ಉಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಮಿಶ್ರಣ ಸ್ವಲ್ಪ ದಪ್ಪಗಾದಾಗ ಕರಿದಿಟ್ಟ ಹಲಸಿನಕಾಯಿ, ಕೊತ್ತಂಬರಿ ಸೊಪ್ಪು, ಹೆಚ್ಚಿದ ಈರುಳ್ಳಿ ಗಿಡ (spring onion) ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಉರಿ ಆರಿಸಿ. ಬಿಸಿ ಬಿಸಿ ಹಲಸಿನಕಾಯಿ ಮಂಚೂರಿ ಸವಿದು ನೋಡಿ. 

ಸಲಹೆ :
ಪ್ರತಿ ಹಂತದಲ್ಲೂ ಉಪ್ಪು ಹಾಕುವುದರಿಂದ ಸರಿಯಾಗಿ ನೋಡಿಕೊಂಡು ಹಾಕಿ.