ಅವಲಕ್ಕಿ ಬಾತ್ :

ಸಾಮಗ್ರಿಗಳು :

ದಪ್ಪ ಅವಲಕ್ಕಿ- 1 ಕಪ್,

ಹಸಿ ಬಟಾಣಿ - 1/4 ಕಪ್,

ಈರುಳ್ಳಿ - 1,

ಟೊಮೇಟೊ - 1 (ಬೇಕಿದ್ದಲ್ಲಿ ಮಾತ್ರ) 

ಹಸಿಮೆಣಸಿನಕಾಯಿ - 1,

ತೆಂಗಿನ ತುರಿ - 4 ಚಮಚ,

ರಸಂ ಪುಡಿ - 1/2 ಚಮಚ,

ಅರಿಶಿನ ಪುಡಿ - 1/4 ಚಮಚ,

ಎಣ್ಣೆ - 4-5 ಚಮಚ,

ಉದ್ದಿನ ಬೇಳೆ - 1/2 ಚಮಚ,

ಸಾಸಿವೆ - 1/4 ಚಮಚ,

ಕರಿಬೇವು - 6-8 ಎಲೆಗಳು,

ಸಕ್ಕರೆ- 1 ಚಮಚ,

ಉಪ್ಪು - ರುಚಿಗೆ 

ವಿಧಾನ :

ಮೊದಲು ಅವಲಕ್ಕಿಯನ್ನು ತೊಳೆದು, ನೀರು ಹಾಕಿ 15-20 ನಿಮಿಷ ನೆನೆಸಿಡಿ. ಮೆತ್ತಗಾಗಬೇಕು, ಆದರೆ ತುಂಬಾ ಗಂಜಿಯಾಗುವಷ್ಟು ಮೆತ್ತಗಾಗಬಾರದು. ಈರುಳ್ಳಿ ಮತ್ತು ಟೊಮ್ಯಾಟೊವನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಹಸಿಮೆಣಸಿನಕಾಯಿಯನ್ನು ಉದ್ದ ಸೀಳಿಕೊಳ್ಳಿ.  ಹಸಿಬಟಾಣಿಗೆ ನೀರು ಮತ್ತು ಚಿಟಿಕೆ ಉಪ್ಪು ಹಾಕಿ ಬೇಯಿಸಿಕೊಳ್ಳಿ. ನೆಂದ ಅವಲಕ್ಕಿಯ ನೀರನ್ನು ಪೂರ್ತಿಯಾಗಿ ಬಸಿದುಕೊಂಡು ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಸಕ್ಕರೆ ಹಾಕಿ ಕಲಸಿಟ್ಟುಕೊಳ್ಳಿ. ಬಾಣಲೆಯನ್ನು ಒಲೆಯ ಮೇಲಿಟ್ಟು ಎಣ್ಣೆ ಹಾಕಿ ಕಾದ ಮೇಲೆ ಉದ್ದಿನ ಬೇಳೆ ಹಾಕಿ, ಅದು ಹೊಂಬಣ್ಣ ಬಂದ ಮೇಲೆ ಸಾಸಿವೆ ಹಾಕಿ ಚಿಟಪಟಾಯಿಸಿ. ಇದಕ್ಕೆ ಹಸಿಮೆಣಸಿನಕಾಯಿ, ಕರಿಬೇವು ಹಾಕಿ ಒಮ್ಮೆ ಹುರಿದು, ಹೆಚ್ಚಿದ ಈರುಳ್ಳಿ ಹಾಕಿ ಫ್ರೈ ಮಾಡಿ. ನಂತರ ಹೆಚ್ಚಿದ ಟೊಮೇಟೊ ಹಾಕಿ ಮೆತ್ತಗಾಗುವವರೆಗೆ ಹುರಿಯಿರಿ. ಇದಕ್ಕೆ ಬೇಯಿಸಿಕೊಂಡ ಬಟಾಣಿ, ತೆಂಗಿನತುರಿ, ಅರಿಶಿನ ಪುಡಿ, ರಸಂ ಪುಡಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಅವಲಕ್ಕಿ ಹಾಕಿ ಕಲಸಿ. ಬೇಕಿದ್ದಲ್ಲಿ ಸ್ವಲ್ಪ ಕೊತ್ತಂಬರಿ ಸೊಪ್ಪು ಹಾಕಿ ಮಿಕ್ಸ್ ಮಾಡಿದರೆ ಬಿಸಿ ಬಿಸಿ ಅವಲಕ್ಕಿ ರೆಡಿ. ಸರ್ವ್ ಮಾಡುವಾಗ ಗರಿ ಗರಿ ಸೇವ್ ಅಥವಾ mixture ಅನ್ನು ಮೇಲಿಂದ ಉದುರಿಸಿ ಕೊಡಿ. ಇದು ಬೆಳಗ್ಗಿನ ಉಪಹಾರಕ್ಕೆ ಅಥವಾ ಸಂಜೆಯ ಟೀ / ಕಾಫೀ ಜೊತೆ ಕೂಡ ಮಾಡಿಕೊಳ್ಳಬಹುದು. 

ಸಾಂಬಾರ್ ಭಾಜಿ : (Using leftover Sambar)

ಊಟಕ್ಕೆಂದು ಮಾಡಿದ ಸಾಂಬಾರ್ ಹೆಚ್ಚು ಉಳಿದು ಬಿಟ್ಟರೆ ಮತ್ತೆ ಅದನ್ನೇ ಮರುದಿನ ಊಟಕ್ಕೆ ತಿನ್ನಲು ಬೇಜಾರು, ಚೆಲ್ಲಲೂ ಮನಸ್ಸು ಬಾರದು.... ಅಂಥ ಸಮಯದಲ್ಲಿ ಅದನ್ನೇ ಸ್ವಲ್ಪ ರುಚಿ ಬದಲಿಸಿ ಮರುದಿನ ಬೆಳಿಗ್ಗೆಯ ಉಪಹಾರದ ದೋಸೆ ಅಥವಾ ಚಪಾತಿ ಜೊತೆ ತಿನ್ನಬಹುದು.... 

ಸಾಮಗ್ರಿಗಳು:

ಉಳಿದ ಸಾಂಬಾರ್ : 2 ಕಪ್ 

ಈರುಳ್ಳಿ : 2

ಬೆಳ್ಳುಳ್ಳಿ : 4-5 ಎಸಳು 

ತೆಂಗಿನ ತುರಿ : 2-3 ಚಮಚ 

ಸಕ್ಕರೆ: 1/2 ಚಮಚ 

ಹಸಿಮೆಣಸಿನ ಕಾಯಿ : 1-2

ತುಪ್ಪ : 2 ಚಮಚ 

ಎಣ್ಣೆ :1 ಚಮಚ (Optional) 

ಸಾಸಿವೆ : 1/2 ಚಮಚ 

ವಿಧಾನ :

ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಬೆಳ್ಳುಳ್ಳಿ ಸಿಪ್ಪೆ ತೆಗೆದು ಜಜ್ಜಿಕೊಳ್ಳಿ ಮತ್ತು ಹಸಿಮೆಣಸಿನ ಕಾಯಿಯನ್ನು ಉದ್ದುದ್ದ ಸೀಳಿಕೊಳ್ಳಿ. ಬಾಣಲೆಗೆ ತುಪ್ಪ ಮತ್ತು ಎಣ್ಣೆ ಹಾಕಿ ಕಾಯಿಸಿ ಅದಕ್ಕೆ ಸಾಸಿವೆ ಹಾಕಿ ಚಿಟಪಟಾಯಿಸಿ, ಹಸಿಮೆಣಸಿನ ಕಾಯಿ ಹಾಕಿ ಫ್ರೈ ಮಾಡಿ. ಜಜ್ಜಿದ ಬೆಳ್ಳುಳ್ಳಿ ಹಾಕಿ ಸ್ವಲ್ಪ ಹುರಿದು, ಹೆಚ್ಚಿದ ಈರುಳ್ಳಿ ಹಾಕಿ ಚೆನ್ನಾಗಿ ಹುರಿಯಿರಿ. ನಂತರ ಸಾಂಬಾರ್, ಸಕ್ಕರೆ, ತೆಂಗಿನ ತುರಿ ಬೇಕಿದ್ದಲ್ಲಿ ಸ್ವಲ್ಪ ಕೊತ್ತಂಬರಿ ಸೊಪ್ಪು ಹಾಕಿ ಕುದಿಸಿ. ಬಿಸಿ ಬಿಸಿ ಸಾಂಬಾರ್ ಭಾಜಿ ದೋಸೆಯ ಜೊತೆ ಬಲು ರುಚಿ. ಚಪಾತಿಯ ಜೊತೆಯೂ ತಿನ್ನಬಹುದು. 

ಸ್ವೀಟ್ ಕಾರ್ನ್ ಚಿತ್ರಾನ್ನ :

ಸಾಮಗ್ರಿಗಳು :

ಅಕ್ಕಿ : 1 1/4 ಕಪ್ 

ಸ್ವೀಟ್ ಕಾರ್ನ್ : 1 ಕಪ್ 

ನಿಂಬೆ ರಸ : 1-2 ಚಮಚ 

ಎಣ್ಣೆ : 3-4 ಚಮಚ 

ಹಸಿಮೆಣಸಿನ ಕಾಯಿ : 2-3 

ಕರಿಬೇವು : 1 ಎಸಳು 

ಉದ್ದಿನ ಬೇಳೆ : 1/2 ಚಮಚ 

ಸಾಸಿವೆ : 1/2 ಚಮಚ 

ಅರಿಶಿನ ಪುಡಿ : 1/4 ಚಮಚ 

ಸಕ್ಕರೆ : 1/2 ಚಮಚ 

ತೆಂಗಿನ ತುರಿ : 3 ಚಮಚ 

ಕೊತ್ತಂಬರಿ ಸೊಪ್ಪು : 1/2 ಚಮಚ 

ಉಪ್ಪು : ರುಚಿಗೆ 

ವಿಧಾನ : 

ಅಕ್ಕಿಯಿಂದ ಉದುರಾದ ಅನ್ನ ಮಾಡಿಕೊಳ್ಳಿ. ಸ್ವೀಟ್ ಕಾರ್ನ್ ಗೆ ಸ್ವಲ್ಪವೇ ಉಪ್ಪು ಹಾಕಿ ಬೇಯಿಸಿ ಬಸಿದುಕೊಳ್ಳಿ. ಇತ್ತ ಬಾಣಲೆಗೆ ಎಣ್ಣೆ ಹಾಕಿ ಕಾದ ಮೇಲೆ ಉದ್ದಿನ ಬೇಳೆ ಹಾಕಿ ಹೊಂಬಣ್ಣ ಬಂದ ಮೇಲೆ ಸಾಸಿವೆ ಹಾಕಿ ಚಿಟಪಟಾಯಿಸಿ. ಇದಕ್ಕೆ ಹೆಚ್ಚಿದ ಹಸಿಮೆಣಸಿನಕಾಯಿ, ಕರಿಬೇವು, ಅರಿಶಿನ ಪುಡಿ ಹಾಕಿ, ಬೇಯಿಸಿದ ಕಾರ್ನ್ ಹಾಕಿ ಸ್ವಲ್ಪ ಫ್ರೈ ಮಾಡಿ. ಇದಕ್ಕೆ ತೆಂಗಿನ ತುರಿ ಹಾಕಿ ಅರ್ಧ ನಿಮಷ ಫ್ರೈ ಮಾಡಿಕೊಂಡು ನಿಂಬೆ ರಸ, ಉಪ್ಪು ಹಾಕಿ ಮಿಕ್ಸ್ ಮಾಡಿ ಉರಿ ಆರಿಸಿ. ಈಗ ಕೊತ್ತಂಬರಿ ಸೊಪ್ಪು, ಅನ್ನ ಹಾಕಿ ಕಲಸಿದರೆ ಸ್ವೀಟ್ ಕಾರ್ನ್ ರೈಸ್ ಸವಿಯಲು ಸಿದ್ಧ. 

ಘೀ ರೈಸ್ (ತುಪ್ಪದ ಅನ್ನ):

ಸಾಮಗ್ರಿಗಳು : ಅನ್ನ - 1 ಕಪ್,  ಈರುಳ್ಳಿ - 1, ಹಸಿಮೆಣಸು - 2, ಜೀರಿಗೆ - 1ಟೀ. ಚಮಚ,  ತುಪ್ಪ - 2.5 ಟೇ. ಚಮಚ,  ಚಕ್ಕೆ- 1", ಲವ೦ಗ - 2,ಗೋಡ೦ಬಿ - 5-6, ಉಪ್ಪು.

 

ವಿಧಾನ : ಅನ್ನವನ್ನು ಉದುರುದುರಾಗಿ ಮಾಡಿಟ್ಟುಕೊಳ್ಳಿ. ಬಾಣಲೆಯನ್ನು ಒಲೆಯಮೇಲೆ ಇಟ್ಟು ಸಣ್ಣ ಉರಿ ಮಾಡಿ ಅದಕ್ಕೆ ತುಪ್ಪ, ಚಕ್ಕೆ, ಲವ೦ಗ ಹಾಕಿ 2 ನಿಮಿಷ ಹುರಿಯಿರಿ ಹಾಗೆ ಗೋಡ೦ಬಿ ಚೂರುಗಳನ್ನು ಹಾಕಿ ಹೊ೦ಬಣ್ಣ ಬ೦ದ ಮೇಲೆ ಹಸಿಮೆಣಸು ಜೀರಿಗೆ ಈರುಳ್ಳಿ ಹಾಕಿ 5 ನಿಮಿಷ ಫ್ರೈ ಮಾಡಿ ಕೊನೆಯಲ್ಲಿ ಉಪ್ಪು ಹಾಕಿ ಅನ್ನ ಸೇರಿಸಿ ಸರಿಯಾಗಿ ಮಿಕ್ಸ್ ಮಾಡಿದರೆ ಬಿಸಿ ಬಿಸಿ ಘೀ ರೈಸ್ ಸವಿಯಲು ಸಿದ್ಧ.

ಸೂಚನೆ :ಯಾವುದಾದರು ಗ್ರೇವಿಯ ಜೊತೆ ಘೀ ರೈಸ್ ತಿನ್ನುವುದಾದರೆ ಹಸಿ ಮೆಣಸು ಹಾಕುವ ಅಗತ್ಯವಿಲ್ಲ.

ಹುಣಸೆ ಹಣ್ಣಿನ ಅಪ್ಪೆಹುಳಿ (ಹುಳಸೆ ಹುಳಿ):

ಸಾಮಗ್ರಿಗಳು : ಹುಣಸೆಹಣ್ಣು - ಚಿಕ್ಕ ನಿ೦ಬೆ ಹಣ್ಣಿನ ಗಾತ್ರ, ಈರುಳ್ಳಿ -1 , ಎಣ್ಣೆ 1/2
ಚಮಚ, ಒಣಮೆಣಸು - 1, ಸಾಸಿವೆ - 1/2 ಚಮಚ, ಬೆಲ್ಲ  -2 ಚಮಚ , ಉಪ್ಪು.

ವಿಧಾನ : ಹುಣಸೆಹಣ್ಣನ್ನು 15 ನಿಮಿಷ ನೀರಲ್ಲಿ ನೆನೆಸಿಡಿ. ಈಗ ಹುಣಸೆ ರಸ ತೆಗೆದು ಅದಕ್ಕೆ 2 ಲೋಟ ನೀರು ಹಾಕಿ. ಈಗ ಉಪ್ಪು ಬೆಲ್ಲ ಹಾಕಿ ಕಲಕಿ. ಒಗ್ಗರಣೆ ಸೌಟನ್ನು ಒಲೆಯ ಮೇಲಿಟ್ಟು ಸಣ್ಣ ಉರಿ ಇಟ್ಟುಕೊಳ್ಳಿ ಅದಕ್ಕೆ ಎಣ್ಣೆ ಹಾಕಿ ಬಿಸಿ ಆದ ಮೇಲೆ ಸಾಸಿವೆ ಹಾಗೂ ಒಣಮೆಣಸು ಹಾಕಿ ಚಿಟಪಟ ಆದ ಮೇಲೆ ಈ ಒಗ್ಗರಣೆಯನ್ನು ಹುಣಸೇನೀರಿಗೆ ಹಾಕಿ ನ೦ತರ ಇದಕ್ಕೆ ಈರುಳ್ಳಿಯನ್ನು ಸಣ್ಣದಾಗಿ ಹೆಚ್ಚಿ ಹಾಕಿದರೆ ಹುಣಸೆ ಹಣ್ಣಿನ ಅಪ್ಪೆಹುಳಿ (ಹುಳಸೆ ಹುಳಿ) ಅನ್ನದ ಜೊತೆ ಸವಿಯಲು ಸಿದ್ದ.

ಸೋರೆಕಾಯಿ ತಿರುಳಿನ ಗೊಜ್ಜು :

ಸೋರೆಕಾಯಿ ಸಾಂಬಾರ್, ಪಲ್ಯ, ಪಾಯಸ ಮಾಡುವಾಗ ತಿರುಳು ಹಾಕಿದರೆ ಚೆನ್ನಾಗಿರರುವುದಿಲ್ಲ. ಆದ್ದರಿಂದ ಎಳೆಯ ಅಥವಾ ತುಂಬಾ ಬಲಿತು ಬೀಜ ಗಟ್ಟಿಯಾಗದ ತಿರುಳನ್ನು ತೆಗೆದು ಈ ಗೊಜ್ಜು ಮಾಡಿ ನೋಡಿ. 

ಸಾಮಗ್ರಿಗಳು: 
ಹೆಚ್ಚಿಕೊಂಡ ಸೋರೆಕಾಯಿ (ಹಾಲುಗುಂಬಳ) ತಿರುಳು : 1 ಕಪ್
ತೆಂಗಿನ ತುರಿ : 1/2 ಕಪ್
ಹುಣಸೆ ಹಣ್ಣು : ನೆಲ್ಲಿಕಾಯಿ ಗಾತ್ರ 
ಬೆಲ್ಲ : 1 ಟೇಬಲ್ ಚಮಚ 
ಹಸಿಮೆಣಸಿನ ಕಾಯಿ : 2-3 (ನಿಮ್ಮ ಖಾರಕ್ಕೆ ತಕ್ಕಷ್ಟು)
ಉಪ್ಪು : ರುಚಿಗೆ 

ಒಗ್ಗರಣೆಗೆ :
ಎಣ್ಣೆ : 1 ಚಮಚ 
ಉದ್ದಿನ ಬೇಳೆ : 1/2 ಚಮಚ
ಸಾಸಿವೆ : 1/2 ಚಮಚ 

ವಿಧಾನ : 

ಸೋರೆಕಾಯಿ ತಿರುಳನ್ನು ನೀರು, ಹುಣಸೆಹಣ್ಣು, ಬೆಲ್ಲ ಹಸಿಮೆಣಸಿನ ಕಾಯಿ ಹಾಕಿ ಬೇಯಿಸಿಕೊಳ್ಳಿ. ಮಿಕ್ಸಿ ಜಾರ್ ಗೆ ತೆಂಗಿನ ತುರಿ, ಉಪ್ಪು, ಸ್ವಲ್ಪ ನೀರು (ಬೇಯಿಸಿದ ನೀರಿದ್ದರೆ ಅದನ್ನೇ ಹಾಕಿ) ಹಾಕಿ ಎರಡು ಸುತ್ತು ರುಬ್ಬಿ. ನಂತರ ಬೇಯಿಸಿಕೊಂಡ ಮಿಶ್ರಣ ಹಾಕಿ ತರಿ ತರಿಯಾಗಿ ರುಬ್ಬಿಕೊಂಡು ಎಣ್ಣೆ, ಉದ್ದಿನ ಬೇಳೆ, ಸಾಸಿವೆ ಒಗ್ಗರಣೆ ಮಾಡಿದರೆ ಸರಳ ಹಾಗೂ ರುಚಿಕರವಾದ, ಹುಳಿ - ಸಿಹಿ ಗೊಜ್ಜು ಸಿದ್ಧ. ಇದನ್ನು ಅನ್ನದ ಜೊತೆ ಸವಿದು ನೋಡಿ. ದೋಸೆಯ ಜೊತೆ ಸಹ ಚೆನ್ನಾಗಿರುತ್ತದೆ. 

ಸಲಹೆ: ನಾಟಿ ಸೋರೆಕಾಯಿ (ಮನೆಯಲ್ಲೇ ಬೆಳೆದಿದ್ದು) ಆದರೆ ಇನ್ನೂ ಚೆನ್ನಾಗಿರುತ್ತದೆ. 

ಮೊಳಕೆ ಹೆಸರುಕಾಳು ಸಾರು:

ಸಾಮಗ್ರಿಗಳು:

ಮೊಳಕೆ ಕಟ್ಟಿದ ಹೆಸರುಕಾಳು (sprouts) : 2.5 ಕಪ್

ಈರುಳ್ಳಿ : 1 (ಮಧ್ಯಮ ಗಾತ್ರ)

ಬೆಳ್ಳುಳ್ಳಿ : 8-10 ಎಸಳು

ಕರಿಬೇವು : 8-10 ಎಲೆಗಳು

ಎಣ್ಣೆ : 4 ಚಮಚ

ಜೀರಿಗೆ : 1/2 ಚಮಚ

ಸಾಸಿವೆ : 1/2 ಚಮಚ

ಹಸಿಮೆಣಸಿನ ಕಾಯಿ : 2
ಅರಿಶಿನ ಪುಡಿ :1/4 ಚಮಚ 

ಗರಂ ಮಸಾಲ ಪುಡಿ : 1/2 ಚಮಚ

ಅಚ್ಚ ಮೆಣಸಿನ ಪುಡಿ : 1/2 ಚಮಚ (ನಿಮ್ಮ ಖಾರಕ್ಕೆ ಅನುಗುಣವಾಗಿ)

ಲಿಂಬೆ ರಸ : 2-3 ಚಮಚ

ಉಪ್ಪು : ರುಚಿಗೆ ತಕ್ಕಷ್ಟು

ವಿಧಾನ :

ಮೊಳಕೆ ಕಾಳನ್ನು ಕುಕ್ಕರ್ ನಲ್ಲಿ ತುಂಬಾ ಮೆತ್ತಗಾಗದಂತೆ (ಕರಗದಂತೆ) ಬೇಯಿಸಿಕೊಳ್ಳಿ. ಅರ್ಧ ಕಪ್ ನಷ್ಟು ಬೆಂದ ಕಾಳನ್ನು ಮಿಕ್ಸಿಗೆ ಹಾಕಿ ರುಬ್ಬಿಕೊಳ್ಳಿ. ಈರುಳ್ಳಿಯನ್ನು ತೆಳ್ಳಗೆ, ಉದ್ದುದ್ದ ಹೆಚ್ಚಿಕೊಳ್ಳಿ. ಬೆಳ್ಳುಳ್ಳಿ ಸಿಪ್ಪೆ ತೆಗೆದು ಜಜ್ಜಿಕೊಳ್ಳಿ. ಹಸಿಮೆಣಸನ್ನು ಉದ್ದಕ್ಕೆ ಸೀಳಿಕೊಳ್ಳಿ. ನಂತರ ಒಂದು ಬಾಣಲೆಯನ್ನು ಒಲೆಯ ಮೇಲಿಟ್ಟು ಅದಕ್ಕೆ ಎಣ್ಣೆ ಹಾಕಿ ಕಾಯಿಸಿ, ಜೀರಿಗೆ ಸಾಸಿವೆ ಹಾಕಿ ಸಿಡಿಸಿ. ಇದಕ್ಕೆ ಹಸಿಮೆಣಸಿನ ಕಾಯಿ, ಕರಿಬೇವು, ಜಜ್ಜಿದ ಬೆಳ್ಳುಳ್ಳಿ ಹಾಕಿ ಸ್ವಲ್ಪ ಬಾಡಿಸಿ. ನಂತರ ಈರುಳ್ಳಿ ಹಾಕಿ ಫ್ರೈ ಮಾಡಿ. ಇದಕ್ಕೆ ಅರಿಶಿನ ಪುಡಿ, ಗರಂ ಮಸಾಲಾ ಪುಡಿ, ಅಚ್ಚ ಖಾರದ ಪುಡಿ ಹಾಕಿ ಮಿಕ್ಸ್ ಮಾಡಿಕೊಂಡು ಬೇಯಿಸಿಟ್ಟ ಹೆಸರು ಕಾಳು ಮತ್ತು ರುಬ್ಬಿದ ಕಾಳನ್ನು ಹಾಕಿ, ೨ ಕಪ್ ನಷ್ಟು ನೀರು, ಉಪ್ಪು ಹಾಕಿ ಕುದಿಸಿ. ಕೊನೆಯಲ್ಲಿ ಲಿಂಬೆ ರಸ ಹಾಕಿ ಉರಿ ಆರಿಸಿ. ಬಿಸಿ ಬಿಸಿಯಾದ ಹೆಸರುಕಾಳು ಸಾರು ಅನ್ನದ ಜೊತೆ ಸವಿಯಲು ಸಿದ್ಧ. 

ಟೊಮೇಟೊ ಸಾರು 3:

ಸಾಮಗ್ರಿಗಳು: 

ಚೆನ್ನಾಗಿ ಹಣ್ಣಾದ ಟೊಮೇಟೊ 5-6, ಹಸಿಮೆಣಸಿನ ಕಾಯಿ 3-4, ಬೆಳ್ಳುಳ್ಳಿ 6-7ಎಸಳು (ಜಜ್ಜಿಕೊಳ್ಳಿ), ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು 1 ಚಮಚ, ತುಪ್ಪ 1 ಚಮಚ, ಹಸಿಮೆಣಸಿನ ಕಾಯಿ 4-5, ಜೀರಿಗೆ 1/4 ಚಮಚ, ಸಾಸಿವೆ 1/4 ಚಮಚ, ಸಕ್ಕರೆ 1 ಚಮಚ, ಉಪ್ಪು ರುಚಿಗೆ ತಕ್ಕಷ್ಟು

ವಿಧಾನ: 

ಟೊಮೇಟೊಗಳನ್ನೂ ಸೀಳಿಕೊಂಡು ಬೀಜ ತೆಗೆದುಕೊಳ್ಳಿ.  ಮಿಕ್ಸಿಗೆ ಹಾಕಿ ಜೊತೆಗೆ ಹಸಿಮೆಣಸಿನ ಕಾಯಿ ಹಾಕಿ ನುಣ್ಣಗೆ ರುಬ್ಬಿ. ಬಾಣಲೆಗೆ ತುಪ್ಪ  (ತುಪ್ಪದ ಬದಲು ಎಣ್ಣೆ ಬಳಸಬಹುದು), ಜೀರಿಗೆ, ಸಾಸಿವೆ ಒಗ್ಗರಣೆ ಮಾಡಿಕೊಂಡು ಅದಕ್ಕೆ ಜಜ್ಜಿದ ಬೆಳ್ಳುಳ್ಳಿ ಹಾಕಿ ಸ್ವಲ್ಪ ಬಾಡಿಸಿಕೊಂಡು ರುಬ್ಬಿದ ಟೊಮೇಟೊ ಪ್ಯೂರಿ ಹಾಕಿ ಸ್ವಲ್ಪ ನೀರು ಹಾಕಿ ( ಸಾಂಬಾರ್ ಕಿಂತ ಸ್ವಲ್ಪ ತೆಳ್ಳಗಾದರೆ ಸಾಕು), ಹೆಚ್ಚಿದ ಕೊತ್ತಂಬರಿ ಸೊಪ್ಪು, ಸಕ್ಕರೆ, ಉಪ್ಪು ಹಾಕಿ ಕುದಿಸಿದರೆ ಹುಳಿ - ಸಿಹಿ ಟೊಮೇಟೊ ಸಾರು ಬಿಸಿ ಬಿಸಿ ಅನ್ನದ ಜೊತೆ ಸವಿಯಲು ಸಿದ್ಧ.  

(ವಿಜಯವಾಣಿ ಪತ್ರಿಕೆಗೆ ಕಳಿಸಿ ಪ್ರಕಟವಾದ ಅಡುಗೆ)

ಟೊಮೇಟೊ ಸಾರು 2:

ಸಾಮಗ್ರಿಗಳು: 

ಸಣ್ಣಗೆ ಹೆಚ್ಚಿದ ಟೊಮೇಟೊ 1 ಕಪ್, ಉದ್ದುದ್ದ ಹೆಚ್ಚಿದ ಈರುಳ್ಳಿ 1 ಕಪ್, ಬೆಳ್ಳುಳ್ಳಿ 5-6 ಎಸಳು, ರಸಂ ಪುಡಿ 1/2 ಚಮಚ, ಉದ್ದ ಸೀಳಿದ ಹಸಿಮೆಣಸಿನ ಕಾಯಿ 1, ಅಚ್ಚ ಖಾರದ ಪುಡಿ 1/4 ಚಮಚ, ಕರಿಬೇವು 8-10 ಎಲೆಗಳು, ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು ಸ್ವಲ್ಪ, ಎಣ್ಣೆ 2-3 ಚಮಚ, ಜೀರಿಗೆ - ಸಾಸಿವೆ  ತಲಾ 1/2 ಚಮಚ, ಉಪ್ಪು ರುಚಿಗೆ

ವಿಧಾನ : 

ಬಾಣಲೆಗೆ ಎಣ್ಣೆ, ಸಾಸಿವೆ, ಜೀರಿಗೆ ಹಾಕಿ ಸಿಡಿದ ಮೇಲೆ ಹಸಿಮೆಣಸಿನ ಕಾಯಿ, ಜಜ್ಜಿದ ಬೆಳ್ಳುಳ್ಳಿ ಹಾಕಿ ಸ್ವಲ್ಪ ಬಾಡಿಸಿ. ನಂತರ ಈರುಳ್ಳಿ ಹಾಕಿ 1 ನಿಮಿಷ ಹುರಿದು, ಸಣ್ಣ ಹೆಚ್ಚಿದ ಟೊಮೇಟೊ ಹಾಕಿ ಸ್ವಲ್ಪ ಉಪ್ಪು ಹಾಕಿ ಅದು ಮೆತ್ತಗಾಗುವ ತನಕ ಹುರಿಯಿರಿ. ಇದಕ್ಕೆ ರಸಂ ಪುಡಿ, ಅಚ್ಚ ಖಾರದ ಪುಡಿ (ರಸಂ ಪುಡಿ ಖಾರವಿದ್ದರೆ ಖಾರದ ಪುಡಿ ಹಾಕಬೇಕಾಗಿಲ್ಲ) ಹಾಕಿ ಕಲಕಿ ನಂತರ ಕರಿಬೇವು, ಕೊತ್ತಂಬರಿ ಸೊಪ್ಪು ೨-೩ ಕಪ್ ನೀರು ಹಾಕಿ. ಬೇಕಿದ್ದರೆ ಸ್ವಲ್ಪ ಉಪ್ಪು ಹಾಕಿ ಕುದಿಸಿ ದಿಡೀರ್ ಸಾರು ಸವಿಯಲು ಸಿದ್ಧ. 

 

(ವಿಜಯವಾಣಿ ಪತ್ರಿಕೆಗೆ ಕಳಿಸಿ ಪ್ರಕಟವಾದ ಅಡುಗೆ)

ತೊಂಡೆಕಾಯಿ ಗೊಜ್ಜು :

ಸಾಮಗ್ರಿಗಳು :

ತೊಂಡೆಕಾಯಿ - 6-8,

ಹಸಿಮೆಣಸಿನ ಕಾಯಿ - 2-3, (ನಿಮ್ಮ ಖಾರಕ್ಕೆ ತಕ್ಕಷ್ಟು)

ಹುಣಸೆ ಹಣ್ಣು - ಸಣ್ಣ ನೆಲ್ಲಿಕಾಯಿ ಗಾತ್ರ,

ತೆಂಗಿನ ತುರಿ - 1 ಕಪ್,

ಉಪ್ಪು - ರುಚಿಗೆ 

ಒಗ್ಗರಣೆಗೆ :

ಎಣ್ಣೆ - 2 ಚಮಚ,

ಉದ್ದಿನಬೇಳೆ - 1/2 ಚಮಚ,

ಜೀರಿಗೆ - ಸಾಸಿವೆ - 1/4 ಚಮಚ 

ವಿಧಾನ :

ತೊಂಡೆಕಾಯಿಯನ್ನು ಹೆಚ್ಚಿಕೊಂಡು ನೀರು, ಹುಣಸೆಹಣ್ಣು, ಹಸಿಮೆಣಸಿನ ಕಾಯಿ ಹಾಕಿ ಬೇಯಿಸಿ. ಇದು ತಣ್ಣಗಾದ ಮೇಲೆ ತೆಂಗಿನ ತುರಿ, ಉಪ್ಪು ಹಾಕಿ ಸ್ವಲ್ಪ ತರಿ ತರಿಯಾಗಿ ರುಬ್ಬಿ. ಇದಕ್ಕೆ ಎಣ್ಣೆ, ಉದ್ದಿನಬೇಳೆ, ಜೀರಿಗೆ, ಸಾಸಿವೆ ಒಗ್ಗರಣೆ ಮಾಡಿದರೆ  ತೊಂಡೆಕಾಯಿ ಗೊಜ್ಜು ಬಿಸಿ ಬಿಸಿ ಅನ್ನದ ಜೊತೆ ಸವಿಯಲು ಸಿದ್ಧ. 

ಸಲಹೆ :

ಇದೇ ರೀತಿ ಬದನೇಕಾಯಿ ಗೊಜ್ಜನ್ನು ಮಾಡಬಹುದು. 

ಮರಿಗೆ ಗೊಜ್ಜು :

ಹಿ೦ದಿನ ಕಾಲದಲ್ಲಿ ಈಗಿನ೦ತೆ ಸ್ಟೀಲ್, ಆಲ್ಯೂಮಿನಿಯಮ್, ಪಾತ್ರೆಗಳು ಇರಲಿಲ್ಲ. ಯಾವುದೆ ಅಡಿಗೆಯನ್ನಾದರೂ ಮಡಿಕೆ ಅಥವಾ ಮರದಿ೦ದ ಮಾಡಿದ ಪಾತ್ರೆಯಲ್ಲಿ ಮಾಡಬೇಕಾಗಿತ್ತು. ಈ ಮರಿಗೆ ಎನ್ನುವುದು ಮರದಿ೦ದ ಮಾಡಿದ ಪಾತ್ರೆ. (ಹಸಿಮೆಣಸು, ಎಳ್ಳು, ಸಾಸಿವೆ ಹುರಿದುಕೊ೦ಡು ಮರಿಗೆಯಲ್ಲಿ ಹಾಕಿ ಸೌಟಿನಿ೦ದ ಅರೆದು ಅದಕ್ಕೆ ಮೊಸರು ಸೇರಿಸುತ್ತಿದ್ದರು) ಈ ಗೊಜ್ಜನ್ನು ಯಾವಾಗಲೂ ಮರಿಗೆಯಲ್ಲೆ ಮಾಡುತ್ತಿದ್ದವಾದ್ದರಿ೦ದ ಮರಿಗೆ ಗೊಜ್ಜು ಅ೦ತ ಹೆಸರು ಬ೦ದಿದೆ.

ಬೇಕಾಗುವ ಸಾಮಗ್ರಿಗಳು :
ಗಟ್ಟಿ ಮೊಸರು 1ಕಪ್, 
ಹಸಿಮೆಣಸು/ಸೂಜಿಮೆಣಸು 5-6
ಸಾಸಿವೆ 1ಟೀ ಚಮಚ, 
ಎಳ್ಳು 1ಟೀ ಚಮಚ,
ಬೆಳ್ಳುಳ್ಳಿ 4ಎಸಳು, 
ಉಪ್ಪುರುಚಿಗೆ ತಕ್ಕಷ್ಟು, 
ಎಣ್ಣೆ 1/2 ಚಮಚ .

ವಿಧಾನ:
ಒ೦ದು ಬಾಣಲೆಗೆ ಸ್ವಲ್ಪ ಎಣ್ಣೆ ಹಾಕಿ ಸಾಸಿವೆ, ಹಸಿಮೆಣಸು ಹಾಕಿ ಹುರಿದುಕೊಳ್ಳಿ. ಕೊನೆಯಲ್ಲಿ ಎಳ್ಳು ಹಾಕಿ. ಬಿಸಿ ಆರಿದಮೇಲೆ ಬೆಳ್ಳುಳ್ಳಿ ಉಪ್ಪು ಸೇರಿಸಿ ನುಣ್ಣಗೆ ರುಬ್ಬಿ. ಬೇಕಾದಲ್ಲಿ ರುಬ್ಬುವಾಗ ೨ ಚಮಚ ಮೊಸರು ಸೇರಿಸಬಹುದು. ಈ ರುಬ್ಬಿದ ಮಿಶ್ರಣವನ್ನು ಮೊಸರಿಗೆ ಸೇರಿಸಿದರೆ ಖಾರವಾದ ಮರಿಗೆ ಗೊಜ್ಜು ಅನ್ನದ ಜೊತೆ ಸವಿಯಲು ಸಿದ್ಧ.

(ಸೂಚನೆ: ನಿಮ್ಮ ಖಾರಕ್ಕೆ ಅನುಗುಣವಾಗಿ ಹಸಿಮೆಣಸು ಸೇರಿಸಿ.

ಮೊಸರು ಸ್ವಲ್ಪ ಹುಳಿ ಇದ್ದರೂ ಮರಿಗೆ ಗೊಜ್ಜು ರುಚಿ ಬರುತ್ತದೆ.)

ಕ್ಯಾರಟ್ ಹಶಿ / ಮೊಸರು ಬಜ್ಜಿ :

ಸಾಮಗ್ರಿಗಳು:

ಕ್ಯಾರಟ್ : 1 ,

ಈರುಳ್ಳಿ : 1/2,

ತೆಂಗಿನ ತುರಿ : 1/2 ಕಪ್,

ಮೊಸರು : 1/2 ಕಪ್,

ಸಕ್ಕರೆ : 1/4 ಚಮಚ, 

ಉಪ್ಪು: ರುಚಿಗೆ 

ಒಗ್ಗರಣೆಗೆ: 

ಎಣ್ಣೆ: 1 ಚಮಚ,

ಉದ್ದಿನ ಬೇಳೆ : 1/2 ಚಮಚ,

ಸಾಸಿವೆ: 1/4 ಚಮಚ,

ಹಸಿಮೆಣಸಿನ ಕಾಯಿ: 1,

ಒಣಮೆಣಸಿನ ಕಾಯಿ : 2 ಚೂರು

ವಿಧಾನ:

ಕ್ಯಾರಟ್  ತೆಗೆದು ತುರಿದು ಒಂದು ಪಾತ್ರೆಗೆ ಹಾಕಿ,  ಇದಕ್ಕೆ ಸಣ್ಣಗೆ ಹೆಚ್ಚಿದ ಈರುಳ್ಳಿ ಮತ್ತು ಮತ್ತು ಮೊಸರು ಹಾಕಿ. ತೆಂಗಿನ ತುರಿಗೆ  ನೀರು ಹಾಕಿ ನುಣ್ಣಗೆ ರುಬ್ಬಿಕೊಂಡು ಇದಕ್ಕೆ ಸೇರಿಸಿಕೊಳ್ಳಿ. ನಂತರ ಉಪ್ಪು, ಸಕ್ಕರೆ, ಬೇಕಿದ್ದಲ್ಲಿ ಸ್ವಲ್ಪ ನೀರು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಒಗ್ಗರಣೆ ಸೌಟಿಗೆ ಎಣ್ಣೆ, ಉದ್ದಿನ ಬೇಳೆ ಹಾಕಿ ಸ್ವಲ್ಪ ಕಂದು ಬಣ್ಣವಾದಾಗ ಒಣಮೆಣಸಿನ ಚೂರು, ಸಾಸಿವೆ ಹಾಕಿ ಸಿಡಿಸಿ.  ಇದಕ್ಕೆ ಹೆಚ್ಚಿದ ಹಸಿಮೆಣಸಿನ ಕಾಯಿ ಹಾಕಿ ಸ್ವಲ್ಪ ಹುರಿದು ಮೊಸರು ಬಜ್ಜಿಗೆ ಹಾಕಿ ಚೆನ್ನಾಗಿ  ಕಲಕಿ. ಇದನ್ನು ಅನ್ನದ ಜೊತೆ ಅಥವಾ ಪಲಾವ್ ಇತ್ಯಾದಿ ರೈಸ್ ಬಾತ್ ಜೊತೆ ಸವಿಯಬಹುದು.   

ಗೋಧಿ ಹಿಟ್ಟಿನ ದೋಸೆ :

ಸಾಮಗ್ರಿಗಳು:

ಗೋಧಿ ಹಿಟ್ಟು : 1 ಕಪ್,

ಅಕ್ಕಿ ಹಿಟ್ಟು : 1 ಟೇಬಲ್ ಚಮಚ,

ಬೆಲ್ಲ : 3-4 ಚಮಚ,

ತೆಂಗಿನ ತುರಿ : 2 ಚಮಚ,

ಉಪ್ಪು : ರುಚಿಗೆ 

ವಿಧಾನ :

ಮಿಕ್ಸಿಗೆ ಗೋಧಿ ಹಿಟ್ಟು, ಅಕ್ಕಿ ಹಿಟ್ಟು, ನೀರು ಹಾಕಿ ಗಂಟಿಲ್ಲದೇ ರುಬ್ಬಿ. ಅಥವಾ ಪಾತ್ರೆಗೆ ಹಾಕಿ ಸೌಟಿನಲ್ಲೇ ಗಂಟಿಲ್ಲದಂತೆ ಕಲಕಬಹುದು.

ಬೇರೆ ದೋಸೆ ಹಿಟ್ಟಿನಕಿಂತ ಸ್ವಲ್ಪ ತೆಳ್ಳಗೆ ಮಾಡಿಕೊಳ್ಳಿ. ಇದಕ್ಕೆ ಬೆಲ್ಲ, ಉಪ್ಪು, ತೆಂಗಿನ ತುರಿ ಹಾಕಿ ಚೆನ್ನಾಗಿ ಕಲಕಿ. ನಂತರ ಕಾದ ತವಾಗೆ ಎಣ್ಣೆ ಸವರಿ ತೆಳ್ಳಗೆ ದೋಸೆ ಮಾಡಿ ಎರಡೂ  ಕಡೆ ಬೇಯಿಸಿ.  

ಚಿತ್ರದಲ್ಲಿ ಇರುವುದಕ್ಕಿಂತ ಸ್ವಲ್ಪ ದಪ್ಪಗೆ ಕೂಡ ದೋಸೆ ಮಾಡಬಹುದು. ಬಿಸಿ ಬಿಸಿ, ಸಿಹಿ ದೋಸೆಯನ್ನು ತುಪ್ಪ ಮತ್ತು ಚಟ್ನಿಪುಡಿ ಜೊತೆ ಸರ್ವ್ ಮಾಡಿ. 

ಸಾಂಬಾರ್ ಸೊಪ್ಪಿನ ಹಶಿ (ದೊಡ್ಡ ಪತ್ರೆ ಮೊಸರು ಬಜ್ಜಿ) :

ಸಾಮಗ್ರಿಗಳು:

ಸಾಂಬಾರ್ ಸೊಪ್ಪು (ದೊಡ್ಡ ಪತ್ರೆ) - 10-12 ಎಲೆಗಳು 

ಮೊಸರು - 1 ಕಪ್ 

ಈರುಳ್ಳಿ - 1 (ಸಣ್ಣದು)

ಎಣ್ಣೆ - 2 ಚಮಚ 

ಉದ್ದಿನ ಬೇಳೆ - 1/2 ಚಮಚ

ಸಾಸಿವೆ - 1/4 ಚಮಚ

ಹಸಿಮೆಣಸಿನ ಕಾಯಿ - 1

ಉಪ್ಪು - ರುಚಿಗೆ 

ವಿಧಾನ :

ದೊಡ್ಡ ಪತ್ರೆ ಎಲೆಗಳನ್ನು ಚೆನ್ನಾಗಿ ತೊಳೆದು ಸಣ್ಣಗೆ ಹೆಚ್ಚಿಕೊಳ್ಳಿ. ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಒಂದು ಬಾಣಲೆಗೆ ಎಣ್ಣೆ, ಉದ್ದಿನಬೇಳೆ ಹಾಕಿ ಸ್ವಲ್ಪ ಕೆಂಪಗಾದ ಮೇಲೆ ಸಾಸಿವೆ ಹಾಕಿ ಸಿಡಿಸಿ, ಹೆಚ್ಚಿಕೊಂಡ ಹಸಿಮೆಣಸು ಹಾಕಿ. ನಂತರ ಇದಕ್ಕೆ ಹೆಚ್ಚಿಕೊಂಡ ಸೊಪ್ಪು ಹಾಕಿ ಸಣ್ಣ ಉರಿಯಲ್ಲಿ 2-3 ನಿಮಿಷ ಹುರಿಯಿರಿ. ನಂತರ ಹೆಚ್ಚಿಕೊಂಡ ಈರುಳ್ಳಿ ಹಾಕಿ ಅರ್ಧ ನಿಮಿಷ ಹುರಿದು (ಈರುಳ್ಳಿ ಪೂರ್ತಿ ಹುರಿಯದೇ ಸ್ವಲ್ಪ ಹಸಿಯಾಗೇ ಇರಲಿ), ಉರಿ ಆರಿಸಿ. ತಣ್ಣಗಾದ ಮೇಲೆ ಮೊಸರು, ಉಪ್ಪು ಹಾಕಿ ಕಲಕಿ. ಈಗ ದೊಡ್ಡ ಪತ್ರೆ ಹಶಿ / ಮೊಸರು ಬಜ್ಜಿ ಅನ್ನ ಅಥವಾ ಪಲಾವ್ ಜೊತೆ ಸವಿಯಲು ಸಿಧ್ಧ.  

ಸಲಹೆ:
ಇದೇ ರೀತಿ ಮೆಂತ್ಯ ಸೊಪ್ಪನ್ನು ಸಣ್ಣಗೆ ಹೆಚ್ಚಿ ಮೇಲೆ ಹೇಳಿದಂತೆ ಒಗ್ಗರಣೆ ಮಾಡಿ ಸೊಪ್ಪು ಹಾಕಿ, ಸ್ವಲ್ಪ ಉಪ್ಪು, ಚಿಟಿಕೆ ಸಕ್ಕರೆ ಹಾಕಿ ಹುರಿದು ಹಶಿ ಮಾಡಬಹುದು. ಇದಕ್ಕೆ ಹೆಚ್ಚಿದ ಹಸಿ ಈರುಳ್ಳಿಯನ್ನು ಹಾಕಬೇಕು. 

ನಿ೦ಬೆ ಹಣ್ಣಿನ ತ೦ಬುಳಿ:

ಸಾಮಗ್ರಿಗಳು : 

ನಿ೦ಬೆಹಣ್ಣು ೧

ತೆ೦ಗಿನತುರಿ ೧/೨ ಕಪ್

ಉಪ್ಪು ರುಚಿಗೆ ತಕ್ಕಷ್ಟು

ಸಕ್ಕರೆ ೧ ಟೇ ಚಮಚ

ಒಗ್ಗರಣೆಗೆ : ಎಣ್ಣೆ ೧/೨ ಚಮಚ, ಸಾಸಿವೆ ೧/೪ ಚಮಚ, ಒಣಮೆಣಸು 1.

ವಿಧಾನ: ತೆ೦ಗಿನತುರಿಯನ್ನು ನುಣ್ಣಗೆ ರುಬ್ಬಿಕೊ೦ಡು ಅದಕ್ಕೆ ೨ ಲೋಟ ನೀರು, ಉಪ್ಪು, ಸಕ್ಕರೆ ಹಾಕಿ ಹಾಕಿ ಕದಡಿ ನ೦ತರ ನಿ೦ಬೆರಸ ಬೆರೆಸಿ. ರುಚಿ ನೋಡಿಕೊ೦ಡು ಉಪ್ಪು ಹಾಕಿ. ನ೦ತರ ಒಗ್ಗರಣೆ ಸೌಟಿನಲ್ಲಿ ಸ್ವಲ್ಪ ಎಣ್ಣೆ ಬಿಸಿ ಮಾಡಿಕೊ೦ಡು  ಅದಕ್ಕೆ ಸಾಸಿವೆ ಒಣ ಮೆಣಸು ಹಾಕಿ ೧ ನಿಮಿಷ ಫ್ರೈ ಮಾಡಿ ಒಗ್ಗರಣೆ ಹಾಕಿದರೆ ಸಿಹಿ ಹುಳಿ ನಿ೦ಬೆಹಣ್ಣನ ತ೦ಬುಳಿ ಅನ್ನದ ಜೊತೆ ಸವಿಯಲು ಸಿದ್ಧ.

ಮಾವಿನ ಕಾಯಿ ತಂಬುಳಿ:

ಸಾಮಗ್ರಿಗಳು :

ತೋತಾಪುರಿ ಮಾವಿನಕಾಯಿ : 1/2,

ಹಸಿ ಮೆಣಸಿನಕಾಯಿ : ೧-೨,

ಸಕ್ಕರೆ : ೧/೨ ಚಮಚ,

ಉಪ್ಪು : ರುಚಿಗೆ 

ಒಗ್ಗರಣೆಗೆ :

ಎಣ್ಣೆ : ೨ ಚಮಚ, 

ಸಾಸಿವೆ: ೧/೨ ಚಮಚ,

ಕರಿಬೇವು : ೫-೬ ಎಲೆಗಳು

ವಿಧಾನ :

ಮಾವಿನಕಾಯಿ ಸಿಪ್ಪೆ ತೆಗೆದು ಹೆಚ್ಚಿಕೊಳ್ಳಿ. ಅದನ್ನು ಮಿಕ್ಸಿಗೆ ಹಾಕಿ ಹಸಿ ಮೆಣಸು ಸೇರಿಸಿ ನುಣ್ಣಗೆ ರುಬ್ಬಿ. ನಂತರ ಇದನ್ನು ಒಂದು ಪಾತ್ರೆಗೆ ಹಾಕಿ ಎರಡು ಕಪ್ ನಷ್ಟು ನೀರು ಹಾಕಿ ಸಕ್ಕರೆ, ಉಪ್ಪು ಹಾಕಿ ಕಲಕಿ. ರುಚಿ ನೋಡಿಕೊಂಡು ಉಪ್ಪು ಸಿಹಿ ಸರಿಪಡಿಸಿ. ಹುಳಿ ಜಾಸ್ತಿ ಇದ್ದರೆ ಸ್ವಲ್ಪ ನೀರು ಸೇರಿಸಿ. ನಂತರ ಎಣ್ಣೆ, ಸಾಸಿವೆ ಒಗ್ಗರಣೆ ಮಾಡಿ ಅದಕ್ಕೆ ಕೊನೆಯಲ್ಲಿ ಕರಿಬೇವು ಹಾಕಿ ತಂಬುಳಿಗೆ ಒಗ್ಗರಣೆ ಹಾಕಿ, ತಕ್ಷಣ ಕರಿಬೇವನ್ನು ಕೈಯಲ್ಲಿ ಅರೆಯಿರಿ. (ಒಗ್ಗರಣೆಗೆ ಸ್ವಲ್ಪ ಇಂಗು ಬೇಕಾದರೂ ಸೇರಿಸಿಕೊಳ್ಳಬಹುದು). ಈಗ ತಂಬುಳಿ / ಹಸಿ ಮಾವಿನಕಾಯಿ ಅಪ್ಪೆಹುಳಿ ಸ್ವಲ್ಪ ಮೆತ್ತಗಿನ ಅನ್ನದ ಜೊತೆ ಸವಿಯಲು ಸಿದ್ಧ. 

ಸೂಚನೆ:

ಹುಳಿ, ಖಾರ, ಉಪ್ಪು ಎಲ್ಲಾ ಹದವಾಗಿದ್ದರೆ ರುಚಿಯಾಗಿರುತ್ತದೆ. 

ಟೊಮೇಟೊ ಸಾರು 1 (ತಿಳಿ ಸಾರು) :

ಸಾಮಗ್ರಿಗಳು : 
ತೊಗರಿ ಬೇಳೆ 1/4 ಕಪ್, ಟೊಮೇಟೊ 1, ರಸಂ ಪುಡಿ 1-1.5 ಟೇಬಲ್ ಚಮಚ (MTR ಅಥವಾ ಮನೆಯಲ್ಲೇ ಮಾಡಿದ ಪುಡಿ), ಹುಣಸೆ ಹಣ್ಣು ನೆಲ್ಲಿಕಾಯಿ ಗಾತ್ರ, ಬೆಲ್ಲ 1 ಟೇಬಲ್ ಚಮಚ, ಕೊತ್ತಂಬರಿ ಸೊಪ್ಪು 1 ಚಮಚ, ಕರಿಬೇವಿನ ಸೊಪ್ಪು ಸ್ವಲ್ಪ, ಹಸಿಮೆಣಸಿನ ಕಾಯಿ 1-2, ಒಣಮೆಣಸಿನ ಕಾಯಿ 2 ಚೂರು, ಎಣ್ಣೆ 3-4 ಚಮಚ, ಜೀರಿಗೆ -ಸಾಸಿವೆ ತಲಾ 1/2 ಚಮಚ, ತೆಂಗಿನ ತುರಿ (ಬೇಕಿದ್ದಲ್ಲಿ ಮಾತ್ರ) 1 ಚಮಚ, ಉಪ್ಪು ರುಚಿಗೆ. 

ವಿಧಾನ : 
ಹುಣಸೆ ಹಣ್ಣನ್ನು ನೀರಿನಲ್ಲಿ ಅರ್ಧ ಗಂಟೆ ನೆನೆಸಿ, ಕಿವುಚಿ ರಸ ತೆಗೆದಿಟ್ಟುಕೊಳ್ಳಿ. ತೊಗರಿಬೇಳೆ ಮತ್ತು ಟೊಮೇಟೊವನ್ನು ತೊಳೆದುಕೊಂಡು, ಬೇಳೆಗೆ ನೀರು, ಚಿಟಿಕೆ ಅರಿಶಿನ ಪುಡಿ, 1/4 ಚಮಚ ಎಣ್ಣೆ, 4 ಹೋಳುಗಳಾಗಿ ಸೀಳಿದ ಟೊಮೇಟೊ ಹಾಕಿ ಕುಕ್ಕರ್ ನಲ್ಲಿಟ್ಟು ಮೆತ್ತಗೆ ಬೇಯಿಸಿಕೊಳ್ಳಿ.  ಒಂದು ದಪ್ಪ ತಳದ ಪಾತ್ರೆ ಅಥವಾ ಬಾಣಲೆಗೆ ಎಣ್ಣೆ, ಒಣ ಮೆಣಸಿನ ಚೂರು, ಜೀರಿಗೆ, ಸಾಸಿವೆ ಹಾಕಿ ಸಿಡಿದ ಮೇಲೆ ಸೀಳಿಕೊಂಡ ಹಸಿಮೆಣಸಿನ ಕಾಯಿ, ಹುಣಸೆ ರಸ ಮತ್ತು ಅರ್ಧ ಕಪ್ ನೀರು ಹಾಕಿ.  ನಂತರ ಇದಕ್ಕೆ ಉಪ್ಪು, ರಸಂ ಪುಡಿ, ಬೆಲ್ಲ, ಕರಿಬೇವು ಹಾಕಿ ಕುದಿಸಿ. ಬೆಂದ ಬೇಳೆ ಮತ್ತು ಟೊಮೇಟೊವನ್ನು ಚೆನ್ನಾಗಿ ಸೌಟಿನಲ್ಲಿ ಅರೆದುಕೊಂಡು ಕುದಿಯುತ್ತಿರುವ ಮಿಶ್ರಣಕ್ಕೆ ಹಾಕಿ, ಕೊತ್ತಂಬರಿ ಸೊಪ್ಪು,  ತೆಂಗಿನ ತುರಿ ಮತ್ತು ನೀರು ಎಷ್ಟು ಬೇಕು ನೋಡಿಕೊಂಡು ಹಾಕಿ ಚೆನ್ನಾಗಿ ಕುದಿಸಿದರೆ ಬಿಸಿ ಬಿಸಿ ಸಾರು ಸಿಧ್ಧ. (ಇದೇ ಸಾರನ್ನು ಇನ್ನೊಮ್ಮೆ ಮಾಡುವಾಗ ಒಗ್ಗರಣೆಯ ಜೊತೆ ಬೆಳ್ಳುಳ್ಳಿ, ಈರುಳ್ಳಿ ಹಾಕಿಕೊಂಡು ಟ್ರೈ ಮಾಡಿ...!)

(ಈ ರೆಸಿಪಿ ವಿಜಯವಾಣಿ ಪತ್ರಿಕೆಯಲ್ಲಿ ಪ್ರಕಟವಾಗಿತ್ತು.)

ರವೆ - ಉದ್ದಿನ ದೋಸೆ :

ನನ್ನ ಅಜ್ಜಿ ಈ ದೋಸೆಯನ್ನು ಒಪ್ಪತ್ತು (ವ್ರತ), ಹಬ್ಬ-ಹರಿದಿನಗಳ ಬೆಳಿಗ್ಗೆ ತಿಂಡಿಗೆ ಮಾಡುತ್ತಿದ್ದರು. ಅಕ್ಕಿ ಉಪಯೋಗಿಸದ ಇದು ಮುಸರೆಯಲ್ಲ ಎಂಬ ಕಾರಣಕ್ಕೆ..! ಅವಲಕ್ಕಿ ಮಾಡಿದರೆ ನಾವೆಲ್ಲಾ ತಿನ್ನುತ್ತಿರಲಿಲ್ಲವಲ್ಲ..... :) ಜೊತೆಗೆ ಸುಲಭದ ತಿಂಡಿ ಆದ್ದರಿಂದ ಅಡುಗೆ ಕಲಿಯುತ್ತಿರುವವರು / ಬ್ರಹ್ಮಚಾರಿ ಹುಡುಗರು ಮಾಡಿಕೊಳ್ಳಬಹುದು. :) 

ಸಾಮಗ್ರಿಗಳು: 

ಗೋಧಿ ರವೆ (ಉಪ್ಪಿಟ್ಟಿನ ರವೆ) : 1 1/4 ಕಪ್,

ಉದ್ದಿನ ಬೇಳೆ : 1/2 ಕಪ್,

ಉಪ್ಪು : ರುಚಿಗೆ 

ವಿಧಾನ : 

ಉದ್ದಿನ ಬೇಳೆಯನ್ನು ತೊಳೆದು  3-4 ಘಂಟೆಗಳ ಕಾಲ ನೀರಿನಲ್ಲಿ ನೆನೆಸಿಡಿ ಅಥವಾ ಬೆಳಿಗ್ಗೆ ನೆನೆಸಿಡಿ. ರಾತ್ರಿ ಇದನ್ನು ನುಣ್ಣಗೆ ರುಬ್ಬಿ ಮುಚ್ಚಿಡಿ. ಬೆಳಿಗ್ಗೆ ಎನ್ನುವಷ್ಟರಲ್ಲಿ ಸ್ವಲ್ಪ  ಹುದುಗು ಬಂದಿರುತ್ತದೆ. ಬೆಳಿಗ್ಗೆ ರವೆ ಮುಳುಗುವಷ್ಟು ನೀರು ಹಾಕಿ ಅರ್ಧ ಗಂಟೆಗಳ ಕಾಲ ನೆನೆಸಿಡಿ. ನಂತರ ರುಬ್ಬಿದ ಉದ್ದಿನ ಬೇಳೆಗೆ ನೆಂದ ರವೆ ಸೇರಿಸಿ, ಉಪ್ಪು ಸೇರಿಸಿ ಚೆನ್ನಾಗಿ ಕಲಸಿ 15-20 ನಿಮಿಷ ಬಿಟ್ಟು ಕಾದ ತವಾ ಮೇಲೆ ದೋಸೆ ಎರೆದು ಎರಡೂ ಕಡೆ ಚೆನ್ನಾಗಿ ಬೇಯಿಸಿ. 

ಬಿಸಿ ಬಿಸಿ ದೋಸೆಯನ್ನು ತುಪ್ಪ ಮತ್ತು ಚಟ್ನಿಯ ಜೊತೆ ಸವಿಯಿರಿ. 

ಸೂಚನೆ : 

೧) ರವೆ ನೆಂದ ಮೇಲೆ ನೀರು ಜಾಸ್ತಿ ಇದ್ದಲ್ಲಿ ಬಸಿದುಕೊಳ್ಳಿ. 

೨) ಈ ಮಿಶ್ರಣ ಉಳಿದ ದೋಸೆ ಹಿಟ್ಟಿನ ಮಿಶ್ರಣಕ್ಕಿಂತ ಗಟ್ಟಿ ಇರಲಿ. ಇಡ್ಲಿ ಹಿಟ್ಟಿನಕಿಂತ ಸ್ವಲ್ಪ ತೆಳ್ಳಗಿರಲಿ.    

ಚಟ್ನಿ :

ಸಾಮಗ್ರಿಗಳು :

ತೆಂಗಿನ ತುರಿ : 1 ಕಪ್,

ಒಣ ಮೆಣಸಿನ ಕಾಯಿ : 4-5, 

ಉದ್ದಿನ ಬೇಳೆ : 1/2 ಚಮಚ,

ಬಿಳಿ ಎಳ್ಳು: 1/4 ಚಮಚ,  

ಹುಣಸೆಹಣ್ಣು : ಸಣ್ಣ ಚೂರು, (ನೀರಿನಲ್ಲಿ ನೆನೆಸಿಕೊಳ್ಳಿ) 

ಬೆಲ್ಲ : 1.5 ಚಮಚ,

ಎಣ್ಣೆ : 1/4 ಚಮಚ, 

ಉಪ್ಪು : ರುಚಿಗೆ  

ವಿಧಾನ : 

ಉದ್ದಿನ ಬೇಳೆ, ಒಣ ಮೆಣಸಿನ ಕಾಯಿಗೆ ಎಣ್ಣೆ ಹಾಕಿ ಹುರಿದು ಕೊನೆಯಲ್ಲಿ ಎಳ್ಳು ಹಾಕಿ ಹುರಿದುಕೊಳ್ಳಿ. ಮಿಕ್ಸಿ ಜಾರ್ ಗೆ ಹುರಿದ ಮಿಶ್ರಣದ ಜೊತೆ ಉಳಿದೆಲ್ಲಾ ಸಾಮಗ್ರಿ ಸೇರಿಸಿ ರುಬ್ಬಿದರೆ ಚಟ್ನಿ ಸಿದ್ಧ. 

ಮಾವಿನಕಾಯಿ ಅಪ್ಪೇಹುಳಿ:

ಈ ಅಪ್ಪೇಹುಳಿಯನ್ನು ಎರಡು ಥರದಲ್ಲಿ ಮಾಡಬಹುದು. ಆ ಎರಡೂ ವಿಧಾನವನ್ನು ತಿಳಿಸುತ್ತೇನೆ.

ಸಾಮಾಗ್ರಿಗಳು: ಹುಳಿ ಮಾವಿನಕಾಯಿ - ಮಧ್ಯಮ ಗಾತ್ರದ್ದು - 1, ಹಸಿಮೆಣಸು- 2, ಒಣಮೆಣಸು - 1, ಬೆಳ್ಳುಳ್ಳಿ-4 ಎಸಳು, ಕರಿಬೇವು 3-4 ಎಲೆ, ಎಣ್ಣೆ – 2 ಚಮಚ, ಸಾಸಿವೆ ½ ಚಮಚ .

ವಿಧಾನ 1: ಮಾವಿನಕಾಯಿಗೆ ನೀರು ಹಾಕಿ 15-20 ನಿಮಿಷ ಬೇಯಿಸಿ ಅದನ್ನು ನೀರಿನಿ೦ದ ತೆಗೆದು ಬದಿಯಲ್ಲಿ ಇಡಿ. ಅದು ತಣ್ಣಗಾದ ನ೦ತರ ಅದಕ್ಕೆ ಸ್ವಲ್ಪ ನೀರು ಸೇರಿಸಿ ರಸ ತೆಗೆಯಬೇಕು. ಸಿಪ್ಪೆ & ಗೊರಟೆಯನ್ನು ಎಸೆದುಬಿಡಿ. ನ೦ತರ 2 ಲೋಟ ನೀರು ಸೇರಿಸಬೇಕು. ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ. ಬೆಳ್ಳುಳ್ಳು ಜಜ್ಜಿಕೊಳ್ಳಿ. ಒಗ್ಗರಣೆ ಸೌಟಿನಲ್ಲಿ ಎಣ್ಣೆ ಹಾಕಿ, ಸ್ವಲ್ಪ ಬಿಸಿಯಾದ ನ೦ತರ ಹಸಿಮೆಣಸು, ಒಣಮೆಣಸನ್ನು ಚಿಕ್ಕ ಚಿಕ್ಕ ಚೂರುಗಳನ್ನು ಮಾಡಿ ಹಾಕಬೇಕು, ನ೦ತರ ಸಾಸಿವೆ ಹಾಕಿ ಅದು ಸಿಡಿದ ಮೇಲೆ ಕರಿಬೇವು, ಬೆಳ್ಳುಳ್ಳಿ ಹಾಕಿ, ಮಾವಿನಕಾಯಿ ನೀರಿಗೆ ಒಗ್ಗರಣೆ ಕೊಡಿ.

ವಿಧಾನ 2 : ಮಾವಿನ ಕಾಯಿಯನ್ನು ಚಿಕ್ಕ ಚಿಕ್ಕ ಹೋಳುಗಳನ್ನಾಗಿ ಹೆಚ್ಚಿಕೊ೦ಡು ಹಸಿ ಮೆಣಸು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ, ರುಬ್ಬಿದ ಮಾವಿನಕಾಯಿಯನ್ನು ಒ೦ದು ಪಾತ್ರೆಗೆ ಹಾಕಿ 3 ಲೋಟ ನೀರನ್ನು ಹಾಕಬೇಕು. ಇದಕ್ಕೆ ಉಪ್ಪು, ಸಕ್ಕರೆ, ಹಾಕಿ ಚೆನ್ನಾಗಿ ಕಲಕಿ. ಇದಕ್ಕೆ ಮೊದಲು ಹೇಳಿದ೦ತೆ ಒಗ್ಗರಣೆ ಕೊಡಿ.
ಇದು ಹಾಗೆ ಕುಡಿಯಲು ತು೦ಬಾ ಚೆನ್ನಾಗಿ ಇರುತ್ತದೆ.
ಜೀರ್ಣಕ್ಕೆ ಸಹಕಾರಿಯು ಹೌದು. ಅದಕ್ಕೆ ಮಲೆನಾಡ ಕಡೆ ಏನಾದರು ಹಬ್ಬ/ಮದುವೆ/ಮು೦ಜಿಯಲ್ಲಿ ಇದನ್ನು ಕಡ್ಡಾಯವಾಗಿ ಮಾಡಿರುತ್ತಾರೆ ;) :)