ಮೆಕ್ಕೆ ಹಣ್ಣಿನ (ಇಬ್ಬಡ್ಲ ಹಣ್ಣು) ಪಾಯಸ/ ರಸಾಯನ :

ಸಾಮಗ್ರಿಗಳು:
ಸಣ್ಣಗೆ ಹೆಚ್ಚಿದ ಮೆಕ್ಕೆ ಹಣ್ಣು - 1 ಕಪ್,
ಸಕ್ಕರೆ (ಬೆಲ್ಲ ಕೂಡ ಹಾಕಬಹುದು) - 2 ಟೇ. ಚಮಚ,
ಹಾಲು - 1/2 ಕಪ್, 
ಏಲಕ್ಕಿ ಪುಡಿ & ಉಪ್ಪು - ತಲಾ ಒ೦ದು ಚಿಟಿಕೆ.

ವಿಧಾನ : ಸಣ್ಣಗೆ ಹೆಚ್ಚಿಟ್ಟ ಮೆಕ್ಕೆ ಹಣ್ಣು, ಸಕ್ಕರೆ, ಹಾಲು, ಎಲಕ್ಕಿ ಪುಡಿ, ಉಪ್ಪು ಎಲ್ಲಾ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಘಂಟೆ ಫ್ರಿಡ್ಜ್ ನಲ್ಲಿ ಇಟ್ಟು ಆಮೇಲೆ ಸರ್ವ ಮಾಡಿ.

(ಬೆಲ್ಲ & ಸಕ್ಕರೆ ಎರಡನ್ನು ಬಳಸಿ ಮಾಡಿದರೂ ಚೆನ್ನಾಗಿರುತ್ತದೆ.) 

ಸೂಚನೆ:ಹಾಲಿನ ಬದಲು ತೆ೦ಗಿನತುರಿಯನ್ನು ನುಣ್ಣಗೆ ರುಬ್ಬಿ ಹಾಕಿದರೆ ದೋಸೆ /ಗರಿ ಗರಿ ತೆಳ್ಳೆವಿನ ಜೊತೆ ತಿನ್ನಲು ತು೦ಬಾ ಚೆನ್ನಾಗಿರುತ್ತದೆ.

ರಸ್ಮಲಾಯಿ :

ಸಾಮಗ್ರಿಗಳು :

ಬಾಸುಂದಿಗೆ (ರಸ)-

ಹಾಲು : 1.5 ಲೀಟರ್

ಸಕ್ಕರೆ : 1/2 ಕೆಜಿ

ಪಿಸ್ತಾ - ಬಾದಾಮ್ ಚೂರುಗಳು : 1/4 ಕಪ್

ರಸಗುಲ್ಲ (ಪನೀರ್ ಉಂಡೆ) ಗೆ :

ಹಾಲು : 2 ಲೀಟರ್

ವಿನೆಗರ್ : 1.5 ಚಮಚ (ಅಥವಾ ನಿಂಬೆ ರಸ : ೩-೪ ಚಮಚ)

ಸಕ್ಕರೆ : 1 ಕಪ್

ನೀರು : 3 ಕಪ್

ವಿಧಾನ :

ಮೊದಲು 2 ಲೀಟರ್ ಹಾಲನ್ನು ಚೆನ್ನಾಗಿ ಕಾಯಿಸಿ ಅದಕ್ಕೆ ವಿನೆಗರ್ ಹಾಕಿ ಚೆನ್ನಾಗಿ ಕಲಕಿ. ಹಾಲು ಪೂರ್ತಿಯಾಗಿ ಒಡೆಯದಿದ್ದಲ್ಲಿ ಇನ್ನು ಸ್ವಲ್ಪ ವಿನೆಗರ್ ಸೇರಿಸಿ ಕಲಕಿ. ವಿನೆಗರ್ ಬದಲು ಲಿಂಬುರಸ ಬಳಸಬಹುದು. ಒಂದು ಪಾತ್ರೆಯ ಮೇಲೆ ಜರಡಿ ಇಟ್ಟು ಅದರ ಮೇಲೆ ತೆಳ್ಳನೆಯ ಹತ್ತಿ ಬಟ್ಟೆ ಹಾಕಿ, ಒಡೆದ ಹಾಲನ್ನು ಬಟ್ಟೆಯ ಮೇಲೆ ಹಾಕಿ ಮೇಲಿನಿಂದ ನೀರನ್ನು ಹಾಕುತ್ತಾ ಚಮಚದಿಂದ ಕಲಕಿ. 

ಹಾಲಿಗೆ ಹುಳಿ ಹಾಕಿದ್ದರಿಂದ ನೀರನ್ನು ಹಾಕಿ ಹುಳಿ ಅಂಶ ತೆಗೆಯಬೇಕು. ನಂತರ ಬಟ್ಟೆಯನ್ನು ಗಂಟು ಕಟ್ಟಿ ಅದರ ಮೇಲೆ ಏನಾದರೂ ಭಾರ ಹೇರಿಟ್ಟು ಸ್ವಲ್ಪ ಹೊತ್ತು ಬಿಡಿ. ನೀರಿನಂಶ ಪೂರ್ತಿ ಇಳಿದು ಬರಿಯ ಪನೀರ್ ಉಳಿದ ಮೇಲೆ ಅದನ್ನು ಒಂದು ಪಾತ್ರೆಗೆ ಹಾಕಿ ಚೆನ್ನಾಗಿ ನಾದಬೇಕು. 

ನಂತರ ಇದರಿಂದ ದೊಡ್ಡ ನೆಲ್ಲಿಕಾಯಿ ಗಾತ್ರದ ಉಂಡೆ ಮಾಡಿ ಅದನ್ನು ತಟ್ಟಿ ಚಪ್ಪಟೆ ಮಾಡಿ ಇಟ್ಟುಕೊಳ್ಳಿ.

 3-4 ಚಮಚ ಹಾಲಿನಲ್ಲಿ ಕುಂಕುಮ ಕೇಸರಿ ಹಾಕಿ ನೆನೆಸಿಡಿ.

ಈಗ ಒಂದು ಕಡೆ 1.5 ಲೀಟರ್ ಹಾಲಿಗೆ 1/2 ಕೆಜಿ ಯಷ್ಟು ಸಕ್ಕರೆ (ನಿಮಗೆ ಬೇಕಾದ  ಸಿಹಿ ಪ್ರಮಾಣಕ್ಕೆ ಅನುಸಾರ) ಹಾಕಿ ಹಾಲು ಸುಮಾರು ಅರ್ಧದಷ್ಟು ಕಮ್ಮಿ ಆಗುವವರೆಗೆ ಕುದಿಸಿ. ಉರಿ ಆರಿಸಿ ಕೇಸರಿ ಹಾಲನ್ನು ಹಾಕಿ ತಣ್ಣಗಾಗಲು ಬಿಡಿ.

ಇತ್ತ  1 ಕಪ್ ಸಕ್ಕರೆಗೆ 3 ಕಪ್ ನಷ್ಟು ನೀರು ಹಾಕಿ ಕುದಿಸಿ, ಮಾಡಿಟ್ಟುಕೊಂಡ ಪನೀರ್ ಉಂಡೆಯನ್ನು ಹಾಕಿ 8-10 ನಿಮಿಷ ಕುದಿಸಿ. ಉಂಡೆಯ ಗಾತ್ರ ದೊಡ್ಡದಾಗುತ್ತದೆ ಆಗ ಉರಿ ಆರಿಸಿ ಉಂಡೆಗಳನ್ನು ಪಾಕದಿಂದ ತೆಗೆದು ಬಿಸಿ ಆರಿದ ಒಂದೊಂದೇ ಉಂಡೆ ತೆಗೆದುಕೊಂಡು ಕೈ ಇಂದ ಒತ್ತಿ ಸಕ್ಕರೆ ನೀರು ತೆಗೆದು ಇಟ್ಟುಕೊಳ್ಳಿ.

ಈಗ ತಣ್ಣಗಾದ ಹಾಲಿನ ಮಿಶ್ರಣಕ್ಕೆ ಮಾಡಿಟ್ಟ ಉಂಡೆಗಳನ್ನು ಹಾಕಿ, ಸಣ್ಣಗೆ ಹೆಚ್ಚಿಟ್ಟುಕೊಂಡ ಬಾದಾಮ್ - ಪಿಸ್ತಾ ಚೂರುಗಳನ್ನು ಹಾಕಿ 1-2 ಘಂಟೆ ಫ್ರಿಡ್ಜ್ ಅಲ್ಲಿ ಇಟ್ಟು , ತಣ್ಣನೆಯ ರಸ್ಮಲಾಯಿ ಸವಿಯಿರಿ. 

ಶ್ರೀಖಂಡ :

ಸಾಮಗ್ರಿಗಳು :

ಗಟ್ಟಿ ಮೊಸರು :1.5 - 2 ಲೀಟರ್

ಸಕ್ಕರೆ: 2 ಕಪ್

ಗೋಡಂಬಿ : 8-10

ಬಾದಾಮಿ:6-7

ಒಣ ದ್ರಾಕ್ಷಿ: 1-2 ಚಮಚ

ಜಾಯಿಕಾಯಿ : 1

ಯಾಲಕ್ಕಿ ಪುಡಿ : 2 ಚಿಟಿಕೆ 

ಉಪ್ಪು : 2 ಚಿಟಿಕೆ

ವಿಧಾನ:

ಒಂದು ತೆಳುವಾದ ಶುಭ್ರ ಬಿಳಿ ಬಟ್ಟೆಯಲ್ಲಿ ಮೊಸರನ್ನು ಹಾಕಿ ಗಂಟು ಕಟ್ಟಿ 3-4 ಘಂಟೆಗಳ ಕಾಲ ಸ್ವಲ್ಪ ಎತ್ತರಕ್ಕೆ ತೂಗುಹಾಕಿ ಕೆಳಗೆ ನೀರು ಬೀಳಲು ಒಂದು ಪಾತ್ರೆ ಇಡಿ. ಮೊಸರಿನಲ್ಲಿರುವ ನೀರಿನಂಶ ಹೋಗಿ ಗಟ್ಟಿ ಮೊಸರನ್ನು ತೆಗೆಯಲು ಈ ವಿಧಾನ. ನಂತರ ಒಂದು ಪಾತ್ರೆಯ ಮೇಲೆ ರವೆ ಜರಡಿ ಹಿಡಿಯುವ ಜರಡಿ ಇಟ್ಟು ಮೊಸರನ್ನು ಹಾಕಿ ಸೌಟಿನಿಂದ ಅರೆಯುತ್ತಾ ಬಂದರೆ ಗಂಟಿಲ್ಲದ ಗಟ್ಟಿ ಮೊಸರು ಕೆಳಗೆ ಪಾತ್ರೆಗೆ ಬೀಳುತ್ತದೆ. 

ಈಗ ಮೊಸರು ಎಷ್ಟಿದೆ ಎಂದು ನೋಡಿಕೊಳ್ಳಿ. 2 ಕಪ್ ಮೊಸರು ಇದ್ದರೆ ಅಷ್ಟೇ ಪ್ರಮಾಣದ ಅಥವಾ 1.5 ಕಪ್ ಸಕ್ಕರೆ ಬೇಕಾಗುತ್ತದೆ. ಸಕ್ಕರೆ ಹಾಕಿ ಚೆನ್ನಾಗಿ ಕಲಕಿ. ಬಾದಾಮಿಯನ್ನು ನೀರಿನಲ್ಲಿ ನೆನೆಸಿ ಸಿಪ್ಪೆ ತೆಗೆದು ಚೂರುಗಳಾಗಿ ಮಾಡಿ. ಗೋಡಂಬಿಯನ್ನೂ ಚೂರು ಮಾಡಿಕೊಳ್ಳಿ. ಜಾಯಿಕಾಯಿಯನ್ನು ಸಾಣೆಕಲ್ಲಿನ ಮೇಲೆ ತೇಯ್ದು ತಯಾರಿಸಿಟ್ಟ ಮೊಸರು - ಸಕ್ಕರೆ ಮಿಶ್ರಣಕ್ಕೆ ಹಾಕಿ, ಜೊತೆಗೆ ಗೋಡಂಬಿ - ಬಾದಾಮಿ ಚೂರುಗಳು, ಒಣ ದ್ರಾಕ್ಷಿ, ಯಾಲಕ್ಕಿ ಪುಡಿ, ಉಪ್ಪು ಹಾಕಿ ಚೆನ್ನಾಗಿ  ಕಲಕಿ. ಇದಕ್ಕೆ ಕೇಸರಿ ಅಥವಾ ಹಳದಿ ರಂಗನ್ನು (ಬಣ್ಣ / food color) ಹಾಕಿ ಕಲಕಿ. ಇದರ ಬದಲು ಹಾಲಿನಲ್ಲಿ ಅರ್ಧ ಘಂಟೆ ನೆನೆಸಿಟ್ಟ ಕುಂಕುಮ ಕೇಸರಿಯನ್ನು ಹಾಕಿದರೆ ಇನ್ನೂ ಚೆನ್ನಾಗಿರುತ್ತದೆ. 

ಈ ಶ್ರೀಖಂಡವನ್ನು ಹಾಗೆಯೇ ತಿನ್ನಬಹುದು. ಅಲ್ಲದೇ ಪೂರಿ ಮತ್ತು ದೋಸೆಯ ಜೊತೆ ಕೂಡ ತುಂಬಾ ಚೆನ್ನಾಗಿರುತ್ತದೆ. 

ಸಲಹೆ :

ಸಾಣೆಕಲ್ಲು ಇಲ್ಲದಿದ್ದರೆ ಜಾಯಿಕಾಯನ್ನು ನೆನೆಸಿಟ್ಟು ಕುಟ್ಟುವ ಕಲ್ಲಿನಲ್ಲಿ ಹಾಕಿ ನುಣ್ಣಗೆ ಅರೆಯಬೇಕು.

ಸಿಹಿ ಕು೦ಬಳಹಲ್ವ:

ಸಾಮಗ್ರಿಗಳು :ಸಿಹಿ ಕು೦ಬಳ ಕಾಯಿ 1 ಚಿಕ್ಕದು, ಸಕ್ಕರೆ ¾ ಕಪ್,ಗೋಡ೦ಬಿ 10-12, ತುಪ್ಪ ¼ ಕಪ್. (ಪ್ರಮಾಣ : 1 ಕಪ್ ಸಿಹಿಕು೦ಬಳದ ತುರಿಗೆ ¾ ಕಪ್ ಸಕ್ಕರೆ)

ವಿಧಾನ : ಸಿಹಿಕು೦ಬಳದ ಸಿಪ್ಪೆ & ಬೀಜ ತೆಗೆದು ತುರಿದುಕೊಳ್ಳಿ. ದೊಡ್ಡ ಬೌಲ್ ಸಿಹಿಗು೦ಬಳದ ತುರಿಗೆ 3/4 ಬೌಲ್ ಸಕ್ಕರೆ ಬೇಕು. ದಪ್ಪ ತಳದ ಬಾಣಲೆಗೆ ತುಪ್ಪ,ತುರಿದ ಸಿಹಿ ಕು೦ಬಳ, ಸಕ್ಕರೆ ಹಾಕಿ 10 ನಿಮಿಷ ಸ್ವಲ್ಪ ದೊಡ್ಡ ಉರಿಯಲ್ಲಿ ಬೇಯಿಸಿ ನ೦ತರ ಉರಿ ಕಡಿಮೆ ಮಾಡಿ ಆಗಾಗ ಕೈ ಆಡಿಸಬೇಕು. ಇಲ್ಲವಾದಲ್ಲಿ ಸೀದುಹೋಗುತ್ತದೆ.ಗಟ್ಟಿಯಾಗುವವರೆಗೂ ತೊಳೆಸುತ್ತಿರಬೇಕು. ಗಟ್ಟಿಯಾದ ಮೇಲೆ ತುಪ್ಪದಲ್ಲಿ ಹುರಿದ ಗೋಡ೦ಬಿ ಹಾಕಿ ಮಿಕ್ಸ್ ಮಾಡಿ. ಬಿಸಿ ಬಿಸಿ ಸಿಹಿ ಕು೦ಬಳ ಹಲ್ವ ಸರ್ವ ಮಾಡಿ.

ಸಿಹಿ ಕು೦ಬಳದ ಬರ್ಫಿ: ಹಲ್ವವನ್ನು ಪೂರ್ತಿ ಗಟ್ಟಿಮಾಡಿ ಒ೦ದು ಪ್ಲೇಟ್ ಗೆ ತುಪ್ಪ ಸವರಿ ಗಟ್ಟಿಯಾದ ಕು೦ಬಳಹಾಯಿ ಹಲ್ವವನ್ನು ಸಮ ಪ್ರಮಾಣದಲ್ಲಿ ಹರಡಿ, ಅದು ತಣ್ಣಗಾದ ಮೇಲೆ ಚೌಕಾಕಾರದಲ್ಲಿ ಕತ್ತರಿಸಿ.

ಸೂಚನೆ: ನಾನಿಲ್ಲಿ ಏಲಕ್ಕಿ ಬಳಸಿಲ್ಲ. ಏಕೆ೦ದರೆ ಏಲಕ್ಕಿ ಹಾಕಿದರೆ ಸಿಹಿ ಕು೦ಬಳದ ಸುವಾಸನೆಯ ಬದಲು ಏಲಕ್ಕಿ ಸುವಾಸನೆ ಬರುತ್ತದೆ.

ಮಾವಿನಹಣ್ಣಿನ ರಸಾಯನ :

ಸಾಮಗ್ರಿಗಳು : ಮಾವಿನಹಣ್ಣು -4, ಸಕ್ಕರೆ  - 5 ಟೀ ಚಮಚ, ಏಲಕ್ಕಿ ಚಿಟಿಕೆ, ತೆ೦ಗಿನಕಾಯಿತುರಿ 1/2 ಕಪ್, ಹಾಲು 1 ಲೋಟ, ಉಪ್ಪು ಚಿಟಿಕೆ.

ವಿಧಾನ : ಮಾವಿನಹಣ್ಣನ್ನು ಸಣ್ಣದಾಗಿ ಹೆಚ್ಚಿಕೊ೦ಡು, ಅದಕ್ಕೆ ಸಕ್ಕರೆ ಏಲಕ್ಕಿ ಪುಡಿ ತೆ೦ಗಿನಕಾಯಿತುರಿಯನ್ನು ನುಣ್ಣಗೆ ರುಬ್ಬಿಕೊ೦ಡು ಅದನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಸ್ವಲ್ಪ ಹಾಲು ಉಪ್ಪು ಹಾಕಿದರೆ ಮಾವಿನಹಣ್ಣಿನ ರಸಾಯನ ಸವಿಯಲು ಸಿದ್ದ. (ಸಕ್ಕರೆಯ ಬದಲು ಬೆಲ್ಲ ಕೂಡಾ ಹಾಕಬಹುದು ಅಥವ ಎರಡನ್ನು ಮಿಕ್ಸ್ ಮಾಡಿ ಹಾಕಬಹುದು.)

ಇದನ್ನು ಹಾಗೆ ತಿನ್ನಬಹುದು ಅಥವಾ ಪೂರಿ/ತೆಳ್ಳಗಿನ ಗರಿ ಗರಿ ದೋಸೆ ಜೊತೆ ತಿನ್ನಬಹುದು.

ಸೂಚನೆ : ಮಾವಿನ ಹಣ್ಣಿನ ರುಚಿಗೆ ತಕ್ಕಹಾಗೆ ಸಕ್ಕರೆ/ಬೆಲ್ಲ ಬಳಸಿ. ಮಾವಿನ ಹಣ್ಣು ತು೦ಬಾ ಸಿಹಿಯಾಗಿದ್ದರೆ ಸಕ್ಕರೆ/ಬೆಲ್ಲ ಸ್ವಲ್ಪ ಸಾಕು. ಹುಳಿ  ಜಾಸ್ತಿ ಇದ್ದರೆ ಸಕ್ಕರೆ/ಬೆಲ್ಲ ಹಾಕಿ.

ಬಾಳೇಹಣ್ಣಿನ ಪಾಯಸ (ರಸಾಯನ) :

ಸಾಮಗ್ರಿಗಳು : 
ಚೆನ್ನಾಗಿ ಕಳಿತ ಬಾಳೇಹಣ್ಣು 5, 
ಸಕ್ಕರೆ 4 ಟೇಬಲ್ ಚಮಚ,
 ಏಲಕ್ಕಿ 2,
ತೆ೦ಗಿನಕಾಯಿತುರಿ 1/4 ಕಪ್
ಹಾಲು 1/4  ಕಪ್
ಉಪ್ಪು ಚಿಟಿಕೆ

ವಿಧಾನ : ಬಾಳೇಹಣ್ಣನ್ನು ಸಣ್ಣದಾಗಿ ಹೆಚ್ಚಿಕೊಳ್ಳಿ. ಅದಕ್ಕೆ ಸಕ್ಕರೆ, ಏಲಕ್ಕಿ ಪುಡಿ ಮತ್ತು  ನುಣ್ಣಗೆ ರುಬ್ಬಿಕೊ೦ಡ ತೆ೦ಗಿನಕಾಯಿತುರಿಯನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಸ್ವಲ್ಪ ಹಾಲು ಚಿಟಿಕೆ ಉಪ್ಪು ಹಾಕಿದರೆ ಬಾಳೇಹಣ್ಣಿನ ಪಾಯಸ ಸವಿಯಲು ಸಿದ್ದ.

ಸೂಚನೆ: ಸಕ್ಕರೆಯ ಬದಲು ಬೆಲ್ಲ ಕೂಡ ಹಾಕಿ ಮಾಡಬಹುದು.

ಕರಬೂಜ ರಸಾಯನ :

ಸಾಮಗ್ರಿಗಳು:

ಸಣ್ಣಗೆ ಹೆಚ್ಚಿದ ಕರಬೂಜ ಹಣ್ಣು - ೧ ಕಪ್

ದಪ್ಪ ತೆಂಗಿನ ಹಾಲು - ೨ ಕಪ್

ಸಕ್ಕರೆ - ೧/೪ ಕಪ್

ಪೇಪರ್ ಅವಲಕ್ಕಿ - ೧ ಕಪ್

ಏಲಕ್ಕಿ ಪುಡಿ - ೧/೪ ಟೀ ಚಮಚ

ವಿಧಾನ : 

ತೆಂಗಿನ ಹಾಲನ್ನು ಒಂದು ಪಾತ್ರೆಗೆ ಹಾಕಿ, ಸಕ್ಕರೆ ಹಾಕಿ ಕಲಕಿ. ಸಕ್ಕರೆ ಕರಗಿದ

ಮೇಲೆ ಅದಕ್ಕೆ ಹೆಚ್ಚಿದ ಕರಬೂಜ ಹಣ್ಣು, ಏಲಕ್ಕಿ ಪುಡಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ.

ನಂತರ ಇದನ್ನು ಒಂದೆರಡು ಘಂಟೆ ಫ್ರಿಡ್ಜ್ ನಲ್ಲಿ ಇಡಿ. ತಣ್ಣಗಾದ ಮೇಲೆ ಇದಕ್ಕೆ ಅವಲಕ್ಕಿಸೇರಿಸಿ ಕಲಸಿ ಸರ್ವ್ ಮಾಡಿ.

ಸೂಚನೆ :

೧) ಅವಲಕ್ಕಿ ಹಾಕಿದ ಐದು ನಿಮಿಷಗಳಲ್ಲಿ ಸರ್ವ್ ಮಾಡಬೇಕು, ತುಂಬಾ ಹೊತ್ತು ಹಾಗೆಯೇ ಇಡಲು ಹೋಗಬೇಡಿ. ಜಾಸ್ತಿ ಎನಿಸಿದರೆ ಎಷ್ಟು ಬೇಕೋ ಅಷ್ಟು ರಸಾಯನಕ್ಕೆ ಅವಲಕ್ಕಿ ಸೇರಿಸಿಕೊಳ್ಳಿ.

೨) ತೆಂಗಿನ ತುರಿಯನ್ನು ಒಂದು ಸುತ್ತು ರುಬ್ಬಿ ಅದರ ಹಾಲನ್ನು ಹಿಂಡಿಕೊಳ್ಳಬೇಕು. ನಂತರ ಹಿಂಡಿಟ್ಟ ಗಸಟನ್ನು ಸಾಂಬಾರ್ ಮಾಡಲು ಬಳಸಬಹುದು. ಇಲ್ಲವಾದಲ್ಲಿ ತೆಂಗಿನ ಕಾಯನ್ನು ಅತ್ಯಂತ ನುಣ್ಣಗೆ ರುಬ್ಬಿ ಸ್ವಲ್ಪ ತೆಳ್ಳಗಾಗುವಷ್ಟು ನೀರು ಸೇರಿಸಿ ಕೂಡ ರಸಾಯನಕ್ಕೆ ಹಾಕಬಹುದು. 

ಫ್ರೂಟ್ ಸಲಾಡ್ (Fruits Salad) :

             ನಮ್ಮ ಪಾಕಶಾಲೆ ಓದುಗರಿಗೆಲ್ಲಾ ಹೊಸ ವರ್ಷದ ಶುಭಾಶಯಗಳು. ಈ ವರ್ಷ ನಿಮ್ಮೆಲ್ಲರ ಬಾಳು ವರ್ಣಮಯವಾಗಿರಲೆಂದು ನಾವು ಗೆಳತಿಯರೆಲ್ಲಾ ಹಾರೈಸುತ್ತೇವೆ. ವರ್ಣಮಯ ಹೊಸ ವರ್ಷಕ್ಕಾಗಿ ವರ್ಣರಂಜಿತ ಫ್ರೂಟ್ ಸಲಾಡ್ ಮಾಡುವ ವಿಧಾನವನ್ನು ನಿಮಗೆ ನಾನಿಲ್ಲಿ ತಿಳಿಸಿಕೊಡುತ್ತೇನೆ. ಮಳೆ ಅಥವಾ ಚಳಿಯಲ್ಲಿ ಐಸ್ ಕ್ರೀಂ ತಿನ್ನುವ craze ಕೆಲವರಿಗಿದೆ, ಅದರಲ್ಲಿ ನಾನೂ ಒಬ್ಬಳು...!! ಈ ಚಳಿಯಲ್ಲಿ ಐಸ್ ಕ್ರೀಂ ಬದಲು ತಣ್ಣನೆಯ Fruits Salad ಅನ್ನು ಮನೆಯಲ್ಲೇ ಮಾಡಿ ಸವಿಯಬಹುದು...!  

ಸಾಮಗ್ರಿಗಳು :

ಸ್ವಲ್ಪ ಸಣ್ಣಗೆ ಹೆಚ್ಚಿದ ಹಣ್ಣುಗಳು (ಸೇಬು, ಕಿತ್ತಳೆ, ಸಪೋಟ, ಬಾಳೆಹಣ್ಣು ಇತ್ಯಾದಿ) - 2-3 ಕಪ್,

ಬಿಡಿಸಿದ ದಾಳಿಂಬೆ - 1/2 ಕಪ್,

ಗೋಡಂಬಿ - 7-8,

ಒಣ ದ್ರಾಕ್ಷಿ - 3-4 ಚಮಚ, 

ಬಾದಾಮಿ - 7-8 (optional),

ಕಸ್ಟರ್ಡ್ ಪೌಡರ್ (Custard Powder) - 2 ಟೇಬಲ್ ಚಮಚ,

ಹಾಲು - 1/2 ಲೀಟರ್,

ಸಕ್ಕರೆ - 1 - 1.5 ಕಪ್ 

ವಿಧಾನ : 

ಸ್ವಲ್ಪ ಬಿಸಿ ನೀರಿನಲ್ಲಿ ಬಾದಾಮಿಯನ್ನು 1-2 ಘಂಟೆ ನೆನೆಸಿಟ್ಟು, ಸಿಪ್ಪೆ ಸುಲಿದು ಕತ್ತರಿಸಿಕೊಳ್ಳಿ. ಗೋಡಂಬಿಯನ್ನು ಕತ್ತರಿಸಿಕೊಳ್ಳಿ. 

ದಪ್ಪ ತಳದ ಪಾತ್ರೆಯಲ್ಲಿ ಸ್ವಲ್ಪ ಹಾಲಿಗೆ ಕಸ್ಟರ್ಡ್ ಪೌಡರ್ ಹಾಕಿ ಗಂಟಾಗದಂತೆ ಕಲಸಿ, ಉಳಿದ ಹಾಲನ್ನು ಹಾಕಿ, ಸಕ್ಕರೆ ಹಾಕಿ ಒಲೆಯ ಮೇಲಿಡಿ. 

ಮೊದಲ ಐದು ನಿಮಿಷ ಮಧ್ಯಮ ಉರಿಯಲ್ಲಿ ಕಲಕುತ್ತಿರಿ. ನಂತರ ಸಣ್ಣ ಉರಿಯಲ್ಲಿ ಕೈ ಬಿಡದೇ  ಕಲಕುತ್ತಿರಿ. (ಸಕ್ಕರೆ ಪೂರ್ತಿ ಕರಗಿದ ಮೇಲೆ ರುಚಿ ನೋಡಿಕೊಂಡು ಬೇಕಿದ್ದಲ್ಲಿ ಸಕ್ಕರೆ ಸೇರಿಸಿ. ಮಿಶ್ರಣ ತಣ್ಣಗಾದ ಮೇಲೆ ಸಕ್ಕರೆ ಸರಿಯಾಗಿ ಕರಗುವುದಿಲ್ಲ). ಮುಂದಿನ 10-15 ನಿಮಿಷಗಳಲ್ಲಿ ಮಿಶ್ರಣ ಸ್ವಲ್ಪ ದಪ್ಪಗಾಗುತ್ತದೆ. ಆಗ ಉರಿ ಆರಿಸಿ ತಣ್ಣಗಾಗಲು ಬಿಡಿ. ಪೂರ್ತಿ ತಣ್ಣಗಾದ ಮೇಲೆ ಕಾತರಿಸಿದ ಹಣ್ಣುಗಳು, ಬಿಡಿಸಿದ ದಾಳಿಂಬೆ, ಗೊದಮ್ನಿ, ಬಾದಾಮಿ, ಒಣದ್ರಾಕ್ಷಿ ಎಲ್ಲ ಹಾಕಿ ಚೆನ್ನಾಗಿ ಕಲಕಿ, ತಟ್ಟೆ ಮುಚ್ಚಿ 2-3 ಘಂಟೆಗಳ ಕಾಲ ಫ್ರಿಡ್ಜ್ ನಲ್ಲಿಡಿ. ಬೇಗನೆ ತಣ್ಣಗಾಗಬೇಕೆಂದರೆ ಫ್ರೀಜರ್ ನಲ್ಲಿತ್ತಾರೆ ಒಂದು ಘಂಟೆಯೊಳಗೆ ಪೂರ್ತಿ ತಂಪಾಗುತ್ತದೆ. ತಣ್ಣಗಿನ ಫ್ರೂಟ್ ಸಲಾಡ್ ಅನ್ನು ಕಪ್ ಗೆ ಹಾಕಿ ಸರ್ವ್ ಮಾಡಿ.   

ಸಲಹೆಗಳು :

1) ಕಾಯಿಸುವಾಗ ತಳ ಬೇಗನೆ ಸೀದುವುದರಿಂದ ಕೈ ಬಿಡದೇ ಚೆನ್ನಾಗಿ ಕಲಕುತ್ತಲೇ ಇರಬೇಕು. 

2) ಹಣ್ಣುಗಳಲ್ಲಿ ನಿಮಗಿಷ್ಟವಾದ ಯಾವುದೇ ಹಣ್ಣುಗಳನ್ನು ಬಳಸಬಹುದು, ನಾನು ಹಾಕಿರುವ ಹಣ್ಣುಗಳನ್ನೇ ಹಾಕಬೇಕೆಂದೇನಿಲ್ಲ. ದ್ರಾಕ್ಷಿ, ಅನಾನಸ್ ಇತ್ಯಾದಿ ಬಳಸಬಹುದು. ಕಿತ್ತಳೆ ಹಣ್ಣು ಹುಳಿ ಇದ್ದರೆ ಹಾಕಲೇಬೇಡಿ. 

3) ಇದು  ಶಕ್ತಿದಾಯಕ ಮತ್ತು ರುಚಿಕರ ರೆಸಿಪಿ. ದೊಡ್ಡ ದೊಡ್ಡ Provision Store ಗಳಲ್ಲಿ ಕಸ್ಟರ್ಡ್ ಪೌಡರ್ ದೊರೆಯುತ್ತದೆ. ನಾನು ಬೇಕರಿ ಅಂಗಡಿಯಿಂದ ಕೊಂಡು ತಂದೆ....!!