ಶ್ರೀಖಂಡ :

ಸಾಮಗ್ರಿಗಳು :

ಗಟ್ಟಿ ಮೊಸರು :1.5 - 2 ಲೀಟರ್

ಸಕ್ಕರೆ: 2 ಕಪ್

ಗೋಡಂಬಿ : 8-10

ಬಾದಾಮಿ:6-7

ಒಣ ದ್ರಾಕ್ಷಿ: 1-2 ಚಮಚ

ಜಾಯಿಕಾಯಿ : 1

ಯಾಲಕ್ಕಿ ಪುಡಿ : 2 ಚಿಟಿಕೆ 

ಉಪ್ಪು : 2 ಚಿಟಿಕೆ

ವಿಧಾನ:

ಒಂದು ತೆಳುವಾದ ಶುಭ್ರ ಬಿಳಿ ಬಟ್ಟೆಯಲ್ಲಿ ಮೊಸರನ್ನು ಹಾಕಿ ಗಂಟು ಕಟ್ಟಿ 3-4 ಘಂಟೆಗಳ ಕಾಲ ಸ್ವಲ್ಪ ಎತ್ತರಕ್ಕೆ ತೂಗುಹಾಕಿ ಕೆಳಗೆ ನೀರು ಬೀಳಲು ಒಂದು ಪಾತ್ರೆ ಇಡಿ. ಮೊಸರಿನಲ್ಲಿರುವ ನೀರಿನಂಶ ಹೋಗಿ ಗಟ್ಟಿ ಮೊಸರನ್ನು ತೆಗೆಯಲು ಈ ವಿಧಾನ. ನಂತರ ಒಂದು ಪಾತ್ರೆಯ ಮೇಲೆ ರವೆ ಜರಡಿ ಹಿಡಿಯುವ ಜರಡಿ ಇಟ್ಟು ಮೊಸರನ್ನು ಹಾಕಿ ಸೌಟಿನಿಂದ ಅರೆಯುತ್ತಾ ಬಂದರೆ ಗಂಟಿಲ್ಲದ ಗಟ್ಟಿ ಮೊಸರು ಕೆಳಗೆ ಪಾತ್ರೆಗೆ ಬೀಳುತ್ತದೆ. 

ಈಗ ಮೊಸರು ಎಷ್ಟಿದೆ ಎಂದು ನೋಡಿಕೊಳ್ಳಿ. 2 ಕಪ್ ಮೊಸರು ಇದ್ದರೆ ಅಷ್ಟೇ ಪ್ರಮಾಣದ ಅಥವಾ 1.5 ಕಪ್ ಸಕ್ಕರೆ ಬೇಕಾಗುತ್ತದೆ. ಸಕ್ಕರೆ ಹಾಕಿ ಚೆನ್ನಾಗಿ ಕಲಕಿ. ಬಾದಾಮಿಯನ್ನು ನೀರಿನಲ್ಲಿ ನೆನೆಸಿ ಸಿಪ್ಪೆ ತೆಗೆದು ಚೂರುಗಳಾಗಿ ಮಾಡಿ. ಗೋಡಂಬಿಯನ್ನೂ ಚೂರು ಮಾಡಿಕೊಳ್ಳಿ. ಜಾಯಿಕಾಯಿಯನ್ನು ಸಾಣೆಕಲ್ಲಿನ ಮೇಲೆ ತೇಯ್ದು ತಯಾರಿಸಿಟ್ಟ ಮೊಸರು - ಸಕ್ಕರೆ ಮಿಶ್ರಣಕ್ಕೆ ಹಾಕಿ, ಜೊತೆಗೆ ಗೋಡಂಬಿ - ಬಾದಾಮಿ ಚೂರುಗಳು, ಒಣ ದ್ರಾಕ್ಷಿ, ಯಾಲಕ್ಕಿ ಪುಡಿ, ಉಪ್ಪು ಹಾಕಿ ಚೆನ್ನಾಗಿ  ಕಲಕಿ. ಇದಕ್ಕೆ ಕೇಸರಿ ಅಥವಾ ಹಳದಿ ರಂಗನ್ನು (ಬಣ್ಣ / food color) ಹಾಕಿ ಕಲಕಿ. ಇದರ ಬದಲು ಹಾಲಿನಲ್ಲಿ ಅರ್ಧ ಘಂಟೆ ನೆನೆಸಿಟ್ಟ ಕುಂಕುಮ ಕೇಸರಿಯನ್ನು ಹಾಕಿದರೆ ಇನ್ನೂ ಚೆನ್ನಾಗಿರುತ್ತದೆ. 

ಈ ಶ್ರೀಖಂಡವನ್ನು ಹಾಗೆಯೇ ತಿನ್ನಬಹುದು. ಅಲ್ಲದೇ ಪೂರಿ ಮತ್ತು ದೋಸೆಯ ಜೊತೆ ಕೂಡ ತುಂಬಾ ಚೆನ್ನಾಗಿರುತ್ತದೆ. 

ಸಲಹೆ :

ಸಾಣೆಕಲ್ಲು ಇಲ್ಲದಿದ್ದರೆ ಜಾಯಿಕಾಯನ್ನು ನೆನೆಸಿಟ್ಟು ಕುಟ್ಟುವ ಕಲ್ಲಿನಲ್ಲಿ ಹಾಕಿ ನುಣ್ಣಗೆ ಅರೆಯಬೇಕು.