ಹಸಿ ಬಟಾಣಿ ಚಿತ್ರಾನ್ನ :

ಬ್ರಹ್ಮಚಾರಿ ಹುಡುಗರು ಮಾಡುವಂಥ simple & easy ಅಡುಗೆಗಳನ್ನು ಹಾಕಿ ಎಂದು ಕೆಲವರು ಕೇಳಿದ್ದರಿಂದ ಅಂತಹ ರೆಸಿಪಿಗಳನ್ನು ಹಾಕಲು ಪ್ರಯತ್ನಿಸುತ್ತಿದ್ದೇವೆ. ಈ ಚಿತ್ರಾನ್ನವನ್ನು ಕಡಿಮೆ ಸಮಯ ಮತ್ತು ಕಡಿಮೆ ಸಾಮಗ್ರಿಗಳನ್ನು ಉಪಯೋಗಿಸಿ ಧಿಡೀರನೆ ಮಾಡಿ ಬಿಸಿ ಬಿಸಿ ಸವಿಯಬಹುದು. ಅಥವಾ ಲಂಚ್ ಬಾಕ್ಸ್ ಗೆ ಕೂಡ ಮಾಡಬಹುದು. 

ಸಾಮಗ್ರಿಗಳು : ಅಕ್ಕಿ 1 ಕಪ್, ಬಿಡಿಸಿದ ಹಸಿ ಬಟಾಣಿ 1.5 ಕಪ್, ತೆಂಗಿನ ತುರಿ 1/2 ಕಪ್, ಹಸಿಮೆಣಸಿನ ಕಾಯಿ 3-4, ಎಣ್ಣೆ 5-6 ಚಮಚ, ಉದ್ದಿನ ಬೇಳೆ 1 ಚಮಚ, ಸಾಸಿವೆ 1/4 ಚಮಚ, ಕರಿಬೇವು 1 ಎಸಳು, ಅರಿಶಿನ ಪುಡಿ 1/4 ಚಮಚ, ಲಿಂಬೆಹಣ್ಣು 1, ಸಕ್ಕರೆ 1 ಚಮಚ, ಉಪ್ಪು ರುಚಿಗೆ ತಕ್ಕಷ್ಟು. 

ವಿಧಾನ : ಅಕ್ಕಿಯನ್ನು ಉದುರುದುರಾಗಿ ಅನ್ನ ಮಾಡಿಟ್ಟುಕೊಳ್ಳಿ. ಬಿಡಿಸಿದ ಹಸಿ ಬಟಾಣಿಗೆ ನೀರು ಹಾಕಿ ಸ್ವಲ್ಪ ಉಪ್ಪು ಹಾಕಿ ಬೇಯಿಸಿಕೊಂಡು ನೀರು ಬಸಿದುಕೊಳ್ಳಿ. (ಕುಕ್ಕರ್ ನಲ್ಲಿ ಬೇಯಿಸುವುದು ಬೇಡ, ಇದು 5-8 ನಿಮಿಷಕ್ಕೆ ಬೇಯುತ್ತದೆ). ಹಸಿ ಮೆಣಸಿನಕಾಯಿಯನ್ನು ಉದ್ದಕ್ಕೆ ಸೀಳಿಕೊಳ್ಳಿ. ಒಂದು ಬಾಣಲೆಗೆ ಎಣ್ಣೆ ಹಾಕಿ, ಉದ್ದಿನ ಬೇಳೆ ಹಾಕಿ ಹೊಂಬಣ್ಣಕ್ಕೆ  ಬಂದ ಮೇಲೆ ಸಾಸಿವೆ ಹಾಕಿ ಸಿಡಿಸಿ, ಹಸಿಮೆಣಸಿನ ಕಾಯಿ, ಕರಿಬೇವು ಅರಿಶಿನ ಪುಡಿ ಹಾಕಿ ಕಲಸಿ. ನಂತರ ಬೇಯಿಸಿಟ್ಟ ಹಸಿ ಬಟಾಣಿ, ತೆಂಗಿನ ತುರಿ, ಉಪ್ಪು ಲಿಂಬೆ ರಸ, ಸಕ್ಕರೆ ಹಾಕಿ ಒಂದೆರಡು ನಿಮಿಷ ಫ್ರೈ ಮಾಡಿ ಉರಿ ಆರಿಸಿ.

ಈ ಮಿಶ್ರಣಕ್ಕೆ ಅನ್ನ ಹಾಕಿ ಕಲಸಿದರೆ ಬಿಸಿ ಬಿಸಿ ಬಟಾಣಿ ಚಿತ್ರಾನ್ನ ಸವಿಯಲು ಸಿದ್ಧ.   

ಕ್ಯಾಬೇಜ್ ರೋಲ್

ಬೇಕಾಗುವ ಸಾಮಾಗ್ರಿಗಳು : ಕ್ಯಾಬೇಜ್ ಎಲೆ 6-7, ಬೇಯಿಸಿದ ಆಲೂಗಡ್ಡೆ 3, ಚೆನ್ನಾಗಿ ಬೇಯಿಸಿದ ಬಟಾಣಿ ½ ಕಪ್, ಈರುಳ್ಳಿ-1, ಚಾಟ್ ಮಸಾಲಾ ¾ ಸ್ಪೂನ್  , ಮೆಣಸಿನ ಪುಡಿ 1 ಸ್ಪೂನ್ , ಕಡಲೆಹಿಟ್ಟು ½ ಕಪ್ , ಅಡುಗೆ ಸೋಡಾ ಚಿಟಿಕೆ,ಕರಿಯಲು ಎಣ್ಣೆ, ರುಚಿಗೆ ತಕ್ಕಷ್ಟು ಉಪ್ಪು.

ಕರಿಯುವ ಮೊದಲು >

ಕರಿದ ನಂತರ >

ವಿಧಾನ: ಕುದಿಯುತ್ತಿರುವ ನೀರಿಗೆ ಸ್ವಲ್ಪ ಉಪ್ಪು & ಬಿಡಿಸಿಟ್ಟ ಕ್ಯಾಬೇಜ್ ಎಲೆಗಳನ್ನು ಹಾಕಿ, ನೀರಿನಿ೦ದ ಎಲೆಗಳನ್ನು ತೆಗೆದು ನೀರು ತೆಗೆಯುವ ಕಾಗದದಿ೦ದ (ಟಿಶ್ಯೂ ಪೇಪರ್) ಕ್ಯಾಬೇಜ್ ಎಲೆಗಳಮೇಲಿನ ನೀರಿನ ಅ೦ಶವನ್ನು ತೆಗೆಯಿರಿ. ಬೇಯಿಸಿಟ್ಟ ಆಲೂಗಡ್ಡೆ & ಬಟಾಣಿಯನ್ನು ಕಿವುಚಿಕೊಳ್ಳಿ (Mash). ಈರುಳ್ಳಿಯನ್ನು ಸಣ್ಣದಾಗಿ ಹೆಚ್ಚಿಕೊ೦ಡು ಸ್ವಲ್ಪಎಣ್ಣೆಯಲ್ಲಿ ಅದನ್ನು ಬಾಡಿಸಿ ಕಿವುಚಿಟ್ಟ ಆಲೂ & ಬಟಾಣಿಯ ಜೊತೆ ಸೇರಿಸಿ. ಈ ಮಿಶ್ರಣಕ್ಕೆ ಉಪ್ಪು, ಚಾಟ್ಮಸಾಲಾ, ಸ್ವಲ್ಪ ಮೆಣಸಿನ ಪುಡಿ ಸೇರಿಸಿ. ಕಡಲೆಹಿಟ್ಟಿಗೆ ಉಪ್ಪು, ಮೆಣಸಿನ ಪುಡಿ, ಅಡುಗೆ ಸೋಡಾ, ನೀರು ಸೇರಿಸಿ ಬೊ೦ಡಾ ಹಿಟ್ಟಿನ ಹದಕ್ಕೆ ಕಲೆಸಿಕೊಳ್ಳಿ.ಕ್ಯಾಬೇಜ್ ಎಲೆಯೊಳಗೆ ತಯಾರಿಸಿಟ್ಟ ಪಲ್ಯ (ಮಿಶ್ರಣ) ವನ್ನು ಹಾಕಿ ಎಲೆಯನ್ನು ರೋಲ್ ಥರ ಮಡಿಸಿ ಕಡಲೇಹಿಟ್ಟಿನಲ್ಲಿ ಅದ್ದಿ ಹೊ೦ಬಣ್ಣ ಬರುವವರೆಗೆ ಕರಿಯಿರಿ. ಟೊಮ್ಯಾಟೋ & ಚಿಲ್ಲಿ ಸಾಸ್ ಜೊತೆ ಅದ್ಭುತ ರುಚಿ ನೀಡುತ್ತದೆ.

ಸೂಚನೆ: ಪಲ್ಯಕ್ಕೆ ಉಪ್ಪು ಖಾರ ಹಾಕಿರುವುದರಿ೦ದ ಕಡಲೆಹಿಟ್ಟಿಗೆ ಉಪ್ಪು, ಖಾರ ಹಾಕುವಾಗ ನೋಡಿಕೊ೦ಡು ಹಾಕಿ. ಕ್ಯಾಬೇಜ್ ಎಲೆಗಳನ್ನು ೧೦ ನಿಮಿಷ ಬೇಯಿಸಿದರೆ ಸಾಕು. ಸ್ಟಫ್ ಮಾಡುವಾಗ ಎಲೆ ಹರಿದು ಹೋಗದಂತಿರಬೇಕು.

(Master Chef ಸಂಜೀವ್ ಕಪೂರ್ recipe ನೋಡಿ ಮಾಡಿದ್ದು ..)

ಹುಣಸೆಹಣ್ಣಿನ ಸಾ೦ಬಾರ್ ಅಪ್ಪೆಹುಳಿ / ಗೊಜ್ಜು:

ಸಾಮಾಗ್ರಿಗಳು: ಹುಣಸೆ ಹಣ್ಣು - ಚಿಕ್ಕ ಲಿ೦ಬು ಗಾತ್ರದ್ದು, ಒಣಮೆಣಸು 6-7, ಜೀರಿಗೆ ½ ಚಮಚ , ಧನಿಯಾ ½ ಚಮಚ, ಮೆ೦ತೆ 5-6 ಕಾಳು, ತೆ೦ಗಿನ ತುರಿ 1 ಕಪ್, ಬೆಲ್ಲ 2 ಚಮಚ, ರುಚಿಗೆ ತಕ್ಕಷ್ಟು ಉಪ್ಪು

ಒಗ್ಗರಣೆಗೆ: ಬೆಳ್ಳುಳ್ಳಿ 3-4 ಎಸಳು , ಸಾಸಿವೆ, ಕರಿಬೇವು.

ವಿಧಾನ:  ಹುಣಸೆ ಹಣ್ಣನ್ನು 10-15 ನಿಮಿಷ ನೀರಿನಲ್ಲಿ ನೆನೆಸಿಡಿ,ಒಣಮೆಣಸು, ಜೀರಿಗೆ, ಧನಿಯಾ, ಮೆ೦ತೆ ಸ್ವಲ್ಪ ಎಣ್ಣೆ ಹಾಕಿ ಹುರಿದುಕೊಳ್ಳಬೇಕು. ಈಗ ನೆನೆಸಿದ ಹುಣಸೆಹಣ್ಣು,ತೆ೦ಗಿನ ತುರಿ, ಹುರಿದ ಮಸಾಲೆ ಇವೆಲ್ಲವನ್ನು ಒಟ್ಟಿಗೆ ರುಬ್ಬಬೇಕು.ಜಾರಿನಿ೦ದ ಈ ಮಿಶ್ರಣವನ್ನು ತೆಗೆದು ಪಾತ್ರೆಗೆ ಹಾಕಿ. ಉಪ್ಪು, ಬೆಲ್ಲ & ಗೊಜ್ಜಿನ ಹದದಲ್ಲಿ ನೀರು ಹಾಕಿ ೫ ನಿಮಿಷ ಕುದಿಸಿ ಇಳಿಸಿ. ನ೦ತರ ಇದಕ್ಕೆ ಬೆಳ್ಳುಳ್ಳಿ, ಸಾಸಿವೆ, ಕರಿಬೇವಿನ ಒಗ್ಗರಣೆ ಹಾಕಿ. ಅನ್ನದ ಜೊತೆ ಚೆನ್ನಾಗಿರುತ್ತದೆ. ಹುಳಿಗೆ ತಕ್ಕಷ್ಟು ಸಿಹಿ ಮತ್ತು ಖಾರ ಇದ್ದರೆ ತು೦ಬಾ ಚೆನ್ನಾಗಿರುತ್ತದೆ.ಇದರ ರುಚಿಗೆ ಸರಿಸಾಟಿ ಇದಲ್ಲದೆ ಮತ್ಯಾವುದು?

ಕ್ಯಾಪ್ಸಿಕಂ ಬಾತ್ :

ಸಾಮಗ್ರಿಗಳು : 

ಅಕ್ಕಿ 1 ಕಪ್, 

ದೊಡ್ಡ ಕ್ಯಾಪ್ಸಿಕಂ 1, 

ಈರುಳ್ಳಿ 1, 

ಗರಂ ಮಸಾಲಾ ಪೌಡರ್ 1 ಚಮಚ, 

ಜೀರಿಗೆ ಪುಡಿ 1 ಚಮಚ, 

ತೆಂಗಿನ ತುರಿ 2-3 ಚಮಚ (ಬೇಕಿದ್ದಲ್ಲಿ ಮಾತ್ರ), 

ಎಣ್ಣೆ 5-6 ಚಮಚ,  

ಹಸಿ ಮೆಣಸಿನ ಕಾಯಿ 3-4, 

ಉದ್ದಿನ ಬೇಳೆ 1/2 ಚಮಚ, 

ಸಾಸಿವೆ 1/4 ಚಮಚ, ಅರಿಶಿನ ಪುಡಿ 3-4 ಚಿಟಿಕೆ, 

ಕರಿಬೇವು ಸ್ವಲ್ಪ, 

ನಿಂಬೆ ರಸ / ಹುಣಸೆ ರಸ 2-3 ಚಮಚ, 

ಸಕ್ಕರೆ 3/4 ಚಮಚ, 

ಉಪ್ಪು ರುಚಿಗೆ ತಕ್ಕಷ್ಟು 

ವಿಧಾನ : ಅಕ್ಕಿಯಿಂದ ಉದುರುದುರಾದ ಅನ್ನ ಮಾಡಿಕೊಳ್ಳಿ. ಕ್ಯಾಪ್ಸಿಕಂ ಮತ್ತು ಈರುಳ್ಳಿಯನ್ನು ಉದ್ದುದ್ದ ಹೆಚ್ಚಿಕೊಳ್ಳಿ. ಹಸಿಮೆಣಸಿನ ಕಾಯಿಯನ್ನು ಉದ್ದಕ್ಕೆ ಸೀಳಿಕೊಳ್ಳಿ. ಬಾಣಲೆಗೆ ಎಣ್ಣೆ, ಉದ್ದಿನ ಬೇಳೆ ಹಾಕಿ ಕೆಂಪಗಾದ ಮೇಲೆ ಸಾಸಿವೆ ಹಾಕಿ ಸಿಡಿಸಿ ಹಸಿ ಮೆಣಸಿನಕಾಯಿ, ಕರಿಬೇವು ಹಾಕಿ. ನಂತರ ಈರುಳ್ಳಿ ಹಾಕಿ ಒಂದೆರಡು ನಿಮಿಷ ಹುರಿದು, ಅರಿಶಿನ ಪುಡಿ ಹಾಕಿ ಕಲಕಿ, ಹೆಚ್ಚಿದ ಕ್ಯಾಪ್ಸಿಕಂ ಹಾಕಿ ಸ್ವಲ್ಪ ಉಪ್ಪು, ನಿಂಬೆರಸ / ಹುಣಸೆರಸ ಮತ್ತು ಸಕ್ಕರೆ ಹಾಕಿ ಕಲಕಿ ಮುಚ್ಚಿ ಸಣ್ಣ ಉರಿಯಲ್ಲಿ ಬೇಯಿಸಿ. (ನೀರು ಹಾಕುವುದು ಬೇಡ) ಇದು ಚೆನ್ನಾಗಿ ಬೆಂದ ಮೇಲೆ ಗರಂ ಮಸಾಲ ಪುಡಿ ಮತ್ತು ಜೀರಿಗೆ ಪುಡಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ನಂತರ ತೆಂಗಿನ ತುರಿ ಹಾಕಿ ಸ್ವಲ್ಪ ಫ್ರೈ ಮಾಡಿ ಉರಿ ಆರಿಸಿ.

ಇದಕ್ಕೆ ಉಪ್ಪು ಹಾಕಿಕೊಂಡು ಅನ್ನ ಹಾಕಿ ಕಲಸಿ. ಬೇಕಿದ್ದಲ್ಲಿ ರುಚಿ ನೋಡಿಕೊಂಡು ಉಪ್ಪು-ಹುಳಿ ಹೊಂದಿಸಿಕೊಳ್ಳಬಹುದು. ಘಮ ಘಮಿಸುವ ಕ್ಯಾಪ್ಸಿಕಂ ಬಾತ್ ಅನ್ನು ರಾಯ್ತ ಜೊತೆ ಸವಿದರೂ ಸೈ... ರಾಯ್ತ ಇಲ್ಲದೆಯೂ ಜೈ...   

ಸೂಚನೆ: ಕೊನೆಯಲ್ಲಿ ಉಪ್ಪು ಹಾಕುವಾಗ ಕ್ಯಾಪ್ಸಿಕಂ ಬೇಯಿಸುವಾಗ ಸ್ವಲ್ಪ ಉಪ್ಪು ಹಾಕಿರುವುದು ನೆನಪಿರಲಿ.