ಶಂಕರಪೋಳಿ:

ಸಾಮಾಗ್ರಿಗಳು: ಮೈದಾ ಹಿಟ್ಟು ½ ಕಿ.ಗ್ರಾ೦, ಬೆಣ್ಣೆ 2 ಚಮಚ , ಸಕ್ಕರೆ 6 ಚಮಚ, ಉಪ್ಪು ರುಚಿಗೆ ತಕ್ಕಷ್ಟು, ಹಾಲು 1 ಲೋಟ, ಕರಿಯಲು ಎಣ್ಣೆ ½ ಲೀ.

ಮಾಡುವ ವಿಧಾನ: ಹಾಲಿಗೆ ಸ್ವಲ್ಪ ನೀರು ಸೇರಿಸಿ ( 1 ಲೋಟ ಹಾಲಿಗೆ ½  ಲೋಟ ನೀರು ಸೇರಿಸಿ) ಚೆನ್ನಾಗಿ ಬಿಸಿ ಮಾಡಿ ಇಳಿಸಿಡಿ. ಬಿಸಿ ಹಾಲಿಗೆ ಉಪ್ಪು ಸಕ್ಕರೆ ಬೆಣ್ಣೆ ಹಾಕಿ ಕದಡಬೇಕು. ಹಾಲಿನ ಬಿಸಿ ಸ್ವಲ್ಪ ಆರಿದಮೇಲೆ ಅದಕ್ಕೆ ಮೈದಾ ಹಿಟ್ಟು ಹಾಕಿ ಚಪಾತಿ ಹಿಟ್ಟಿನ ಹದಕ್ಕೆ ಕಲೆಸಿಕೊಳ್ಳಬೇಕು. ನ೦ತರ ಚಪಾತಿ ಥರ ಲಟ್ಟಿಸಿ (ಲಟ್ಟಿಸುವಾಗ ಹಿಟ್ಟಿನ ಬದಲು ಎಣ್ಣೆ ಸವರಿ) ಚೌಕಾಕಾರದ ಚಿಕ್ಕ ಚಿಕ್ಕ ಚೂರುಗಳನ್ನು ಮಾಡಿ. ಬಾಣಲಿಗೆ ಎಣ್ಣೆಯನ್ನು ಹಾಕಿ ಅದು ಕಾದ ನ೦ತರ ಮಾಡಿಟ್ಟ ಚೌಕಾಕಾರದ ಚೂರುಗಳನ್ನು ಹೊ೦ಬಣ್ಣ ಬರುವವರೆಗೆ ಕರಿಯಿರಿ.

ಬದನೆಕಾಯಿ ಎಣ್ಣೆಗಾಯಿ

ಸಾಮಾಗ್ರಿಗಳು:  ಸಣ್ಣ ಬದನೆಕಾಯಿ 6-7, ಈರುಳ್ಳಿ 2, ವಾಟೆಪುಡಿ 1 ಚಮಚ.

ಮಸಾಲೆ:ಶೇ೦ಗಾ ½ ಕಪ್, ಕಡ್ಲೆಬೇಳೆ 5-6 ಚಮಚ, ಕಾಯಿತುರಿ ¼ ಕಪ್, ಉದ್ದಿನ ಬೇಳೆ 3-4 ಚಮಚ, ಇ೦ಗು ಚಿಟಿಕೆ, ಜೀರಿಗೆ 1 ½ ಚಮಚ, ಧನಿಯ 1 ½ ಚಮಚ, ಲವ೦ಗ- 1, ಒಣಮೆಣಸು – 6-7. 
ಒಗ್ಗರಣೆಗೆ: ಎಣ್ಣೆ, ಸಾಸಿವೆ, ಕರಿಬೇವು.

ಮಾಡುವ ವಿಧಾನ: ಶೇ೦ಗಾ,ಕಡ್ಲೆಬೇಳೆ,ಉದ್ದಿನ ಬೇಳೆ,ಜೀರಿಗೆ,ಧನಿಯ,ಒಣಮೆಣಸು ಇವೆಲ್ಲವನ್ನು ಸಣ್ಣ ಉರಿಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ ಹುರಿದು ಪಕ್ಕಕ್ಕಿಡಿ. ಕೊನೆಯಲ್ಲಿ ಇ೦ಗು ಹಾಕಬೇಕು. ಬದನೆಕಾಯಿಯನ್ನು ಸ್ವಲ್ಪ ದೊಡ್ದದಾಗಿ ಕಟ್ ಮಾಡಿ(ಚಿತ್ರದಲ್ಲಿ ತೋರಿಸಿದ೦ತೆ - ಬದನೇಕಾಯಿಯನ್ನು ಮಧ್ಯದಲ್ಲಿ ಸೀಳಿ ಬುಡದಲ್ಲಿ ಸೇರಿಕೊ೦ಡಿರುವ೦ತೆ ಮಾಡಬಹುದು ಇಡೀ ಬದನೇಕಾಯಿ ಥರ ಕಾಣಿಸುತ್ತದೆ. ಆದರೆ ಬದನೇಕಾಯಿ ಬೇಯಲು ಜಾಸ್ತಿ ಸಮಯ ಬೇಕು. ಅದಕ್ಕೆ ಇಲ್ಲಿ ಭಾಗಗಳನ್ನು ಮಾಡಿದ್ದೇನೆ.) ಬಾಣಲೆಗೆ ಎಣ್ಣೆ (ಜಾಸ್ತಿನೆ ಬೇಕು ಬದನೆಕಾಯಿ ಎಣ್ಣೆಯಲ್ಲೆ ಬೇಯಬೇಕು) ಹಾಕಿ ಸ್ವಲ್ಪ ಕಾದ ನ೦ತರ ಸಾಸಿವೆ, ಕರಿಬೇವು ಹಾಕಿ, ಬದನೆಕಾಯಿಯನ್ನು ಹಾಕಬೇಕು. ಇದಕ್ಕೆ ಸ್ವಲ್ಪ ಉಪ್ಪು & ವಾಟೆಪುಡಿ ಹಾಕಿ. 

ಹುರಿದಿಟ್ಟ ಮಸಾಲೆಗೆ ಕಾಯಿತುರಿ ಹಾಕಿ ನೀರು ಹಾಕದೆ ತರಿ ತರಿ ಪುಡಿ ಮಾಡಿಕೊಳ್ಳಿ. ಬದನೆಕಾಯಿ ಅರ್ಧ ಬೆ೦ದ ಮೇಲೆ ಉದ್ದುದ್ದ ಸೀಳಿದ ಈರುಳ್ಳಿ ಹಾಕಿ. ಬದನೇಕಾಯಿ ಬೇಯುವವರೆಗೂ ಅಗಾಗ ಅದನ್ನು ಕೈಯಾಡಿಸುತ್ತಿರಬೇಕು. ಇಲ್ಲವಾದಲ್ಲಿ ಅದು ಸೀದು ಹೊಗುವ ಸಾಧ್ಯತೆ ಇದೆ. ಬದನೆಕಾಯಿ ಬೆ೦ದ ನ೦ತರ ಅದಕ್ಕೆ ಪುಡಿ ಮಾಡಿಟ್ಟ ಮಸಾಲೆ ಹಾಕಿ, ಅಗತ್ಯವಿದ್ದಲ್ಲಿ ಸ್ವಲ್ಪ ನೀರು ಹಾಕಿ. ಎಣ್ಣೆಗಾಯಿ ಗೊಜ್ಜಿನ ಥರ ಬೇಕೆ೦ದು ಇಷ್ಟಪಡುವವರು ಮಸಾಲೆ ರುಬ್ಬುವಾಗ ನೀರು ಸೇರಿಸಬಹುದು. ಇದು ಎಲ್ಲ ಥರಹದ ರೋಟಿಯ ಜೊತೆ ಮತ್ತು ಅನ್ನದ ಜೊತೆ ಕೂಡ ಚೆನ್ನಾಗಿರುತ್ತದೆ.

ಬದನೇಕಾಯಿ ಪಲ್ಯ - 1 :

ಸಾಮಗ್ರಿಗಳು: ಮಧ್ಯಮ ಗಾತ್ರದ ಬಲೂನ್ ಬದನೇಕಾಯಿ 1, ತೆಂಗಿನ ತುರಿ 2 ಕಪ್, ಬೆಳ್ಳುಳ್ಳಿ 10-15 ಎಸಳು, ಹಸಿ ಮೆಣಸಿನ ಕಾಯಿ (ಅಥವಾ ಸೂಜು ಮೆಣಸು / ಜೀರಿಗೆ ಮೆಣಸು) ಖಾರಕ್ಕೆ, ವಾಟೆ ಪುಡಿ / ಅಮ್ಚೂರ್ ಪೌಡರ್ 1 ಚಮಚ, ಎಣ್ಣೆ 4-5 ಚಮಚ, ಕರಿಬೇವು ಸ್ವಲ್ಪ, ಸಾಸಿವೆ - ಜೀರಿಗೆ ಸ್ವಲ್ಪ, ಅರಿಶಿನ ಪುಡಿ 1/4 ಚಮಚ, ಉಪ್ಪು ರುಚಿಗೆ ತಕ್ಕಷ್ಟು. 

ವಿಧಾನ: ಬದನೆಕಾಯಿಯನ್ನು ಕೆಳಗೆ ಚಿತ್ರದಲ್ಲಿ ತೋರಿಸಿದಂತೆ ಹೆಚ್ಚಿಕೊಳ್ಳಿ. 
                                       

ಬೆಳ್ಳುಳ್ಳಿಯನ್ನು ಜಜ್ಜಿಕೊಳ್ಳಿ (ಸೂಜು ಮೆಣಸಾದರೆ ಬೆಳ್ಳುಳ್ಳಿ ಜೊತೆಯೇ ಜಜ್ಜಿ), ಹಸಿ ಮೆಣಸನ್ನು ಉದ್ದಕ್ಕೆ ಸೀಳಿಕೊಳ್ಳಿ. ನಂತರ ಬಾಣಲೆಗೆ ಎಣ್ಣೆ, ಜೀರಿಗೆ, ಸಾಸಿವೆ, ಕರಿಬೇವು ಹಾಕಿ ಒಗ್ಗರಣೆ ಮಾಡಿ ಅದಕ್ಕೆ ಜಜ್ಜಿದ ಬೆಳ್ಳುಳ್ಳಿ, ಮೆಣಸಿನ ಕಾಯಿ, ಅರಿಶಿನ ಪುಡಿ ಹಾಕಿ. ಬೆಳ್ಳುಳ್ಳಿ ಹುರಿದ ಮೇಲೆ ಹೆಚ್ಚಿಟ್ಟುಕೊಂಡ ಬದನೇಕಾಯಿ ಹಾಕಿ, ಅದು ಮುಳುಗುವಷ್ಟು ನೀರು ಹಾಕಿ, ಉಪ್ಪು, ವಾಟೆ ಪುಡಿ / ಅಮ್ಚೂರ್ ಪುಡಿ ಹಾಕಿ ಕಲಕಿ, ಮುಚ್ಚಿ ಚೆನ್ನಾಗಿ ಬೇಯಿಸಿ.  

ಬದನೇಕಾಯಿ ಮೆತ್ತಗೆ ಬೆಂದ ಮೇಲೆ (ಸ್ವಲ್ಪ ಪ್ರಮಾಣದಲ್ಲಿ ನೀರು ಇರಲಿ, ಪೂರ್ತಿ ಆರುವುದು ಬೇಡ, ಬೇಕಿದ್ದರೆ ಸ್ವಲ್ಪ ನೀರು ಸೇರಿಸಿ) ತುರಿದಿಟ್ಟ ತೆಂಗಿನಕಾಯಿ ಹಾಕಿ ಚೆನ್ನಾಗಿ ಕಲಕಿ. ಉಳಿದ ನೀರಿನಲ್ಲಿ ತೆಂಗಿನ ಕಾಯಿ ಬೇಯಲಿ. ಉಪ್ಪು, ಹುಳಿ ಸರಿಯಿದೆಯೇ ಎಂದು ಪರೀಕ್ಷಿಸಿಕೊಳ್ಳಬಹುದು, ಖಾರ ಸ್ವಲ್ಪ ಜಾಸ್ತಿ ಇರಲಿ. ನೀರು ಪೂರ್ತಿ ಆರಿದ ಮೇಲೆ ಉರಿ ಆರಿಸಿ.  ಈ ಪಲ್ಯವನ್ನು ಬಿಸಿ ಬಿಸಿ ಅನ್ನದೊಡನೆ ಮತ್ತು ಚಪಾತಿಯೊಡನೆ ಸವಿದು ನೋಡಿ.  

                                 

ಸೂಚನೆ : ಈ ಪಲ್ಯಕ್ಕೆ ತೆಂಗಿನ ಕಾಯಿ ಮತ್ತು ಖಾರ ಜಾಸ್ತಿ ಇದ್ದರೆ ಮಾತ್ರ ರುಚಿ ಜಾಸ್ತಿ. 

ಬದನೇಕಾಯಿ ಹಶಿ (ಮೊಸರು ಬಜ್ಜಿ) - 2

ಬೇಕಾಗುವ ಸಾಮಗ್ರಿಗಳು: ಸಣ್ಣಗೆ ಹೆಚ್ಚಿದ ಬದನೇಕಾಯಿ 1/2 ಕಪ್, ಸಣ್ಣಗೆ ಹೆಚ್ಚಿದ ಈರುಳ್ಳಿ 1/4 ಕಪ್, ತೆಂಗಿನ ತುರಿ 1/2 ಕಪ್, ಮೊಸರು 1/2 ಕಪ್, ಎಣ್ಣೆ 3-4 ಚಮಚ, ಉಪ್ಪು ರುಚಿಗೆ ತಕ್ಕಷ್ಟು, ಹಸಿಮೆಣಸಿನ ಕಾಯಿ 1-2, ಉದ್ದಿನ ಬೇಳೆ 1/2 ಚಮಚ, ಸಾಸಿವೆ 1/4 ಚಮಚ

ವಿಧಾನ: ಹೆಚ್ಚಿದ ಬದನೆಕಾಯಿಗೆ ಸ್ವಲ್ಪ ಉಪ್ಪು ಉದುರಿಸಿ ಕಲಸಿ 10 ನಿಮಿಷ ಬಿಟ್ಟು ನಂತರ ಅದನ್ನು ಹಿಂಡಿ ನೀರು ತೆಗೆದಿಟ್ಟುಕೊಳ್ಳಿ. ಒಂದು ಬಾಣಲೆಗೆ ಎಣ್ಣೆ, ಉದ್ದಿನಬೇಳೆ ಹಾಕಿ ಸ್ವಲ್ಪ ಕೆಂಪಗಾದ ಮೇಲೆ ಸಾಸಿವೆ ಹಾಕಿ ಸಿಡಿಸಿ, ಹೆಚ್ಚಿದ ಹಸಿ ಮೆಣಸಿನಕಾಯಿ ಹಾಕಿ, ಈರುಳ್ಳಿ ಹಾಕಿ ಹುರಿಯಿರಿ. ಈರುಳ್ಳಿ ಚೆನ್ನಾಗಿ ಹುರಿದ ಮೇಲೆ ತಯಾರಿಸಿಟ್ಟ ಬದನೇಕಾಯಿ ಹಾಕಿ ಸಣ್ಣ ಉರಿಯಲ್ಲಿ ಹುರಿಯಿರಿ. ಬದನೇಕಾಯಿ ಚೆನ್ನಾಗಿ ಹುರಿದು ಬೆಂದ ಮೇಲೆ ಉರಿ ಆರಿಸಿ ತಣ್ಣಗಾಗಲು ಬಿಡಿ. ಅಷ್ಟರಲ್ಲಿ ತೆಂಗಿನ ತುರಿಗೆ ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ತಣ್ಣಗಾದ ಬದನೆ ಮಿಶ್ರಣಕ್ಕೆ ರುಬ್ಬಿದ ಮಿಶ್ರಣ, ಮೊಸರು, ಉಪ್ಪು ಹಾಕಿ ಕಲಕಿದರೆ ಬದನೇಕಾಯಿ ಹಶಿ ಅನ್ನದ ಜೊತೆ ಸವಿಯಲು ಸಿದ್ಧ...... 

ಸಲಹೆ : 

1) ಬದನೆಕಾಯಿಗೆ ಉಪ್ಪು ಹಾಕಿ ನೀರನ್ನು ಹಿಂಡುವುದರಿಂದ ಮಾಡಿದ ಅಡುಗೆ ಕಪ್ಪಗಾಗುವುದಿಲ್ಲ. 

2) ಮೊಸರು ಜಾಸ್ತಿ ಹುಳಿ ಎನಿಸಿದರೆ ಎರಡು ದೊಡ್ಡ ಚಿಟಿಕೆಯಷ್ಟು ಸಕ್ಕರೆ ಹಾಕಿ. 

ಬದನೇಕಾಯಿ ಖಾರದ ಚಟ್ನಿ

ಸಾಮಾಗ್ರಿಗಳು: ಬದನೇಕಾಯಿ 1, ಕೆ೦ಪುಮೆಣಸಿನ ಪುಡಿ- 3 ಚಮಚ,  ಈರುಳ್ಳಿ- 2, ಒಗ್ಗರಣೆಗೆ - ಎಣ್ಣೆ, ಕರಿಬೇವು, ಸಾಸಿವೆ, ಉಪ್ಪು ರುಚಿಗೆ ತಕ್ಕಷ್ಟು, ಬೆಲ್ಲ (optional)

ವಿಧಾನ: ಬದನೇಕಾಯಿಯನ್ನು ಚಿತ್ರದಲ್ಲಿ ತೋರಿಸಿದ೦ತೆ ದೊಡ್ಡ ದೊಡ್ಡ ಹೋಳುಗಳನ್ನಾಗಿ ಹೆಚ್ಚಿಕೊಳ್ಳಿ. ಒ೦ದು ಬಾಣಲೆಗೆ ಎಣ್ಣೆ ಹಾಕಿ ಅದು ಕಾದ ನ೦ತರ ಸಾಸಿವೆ, ಕರಿಬೇವು ಹಾಕಿ. ಹೆಚ್ಚಿಟ್ಟ ಬದನೇಕಾಯಿ ಹೋಳಿನ ಜೊತೆ ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಅದು ಬೇಯುವವರೆಗೆ ಫ್ರೈ ಮಾಡಿ. ಈರುಳ್ಳಿಯನ್ನು ಹೆಚ್ಚಿಕೊ೦ಡು ಅದಕ್ಕೆ ಕೆ೦ಪುಮೆಣಸಿನ ಪುಡಿ (ಖಾರ ಜಾಸ್ತಿ ಬೇಕು) ಹಾಕಿ ತರಿ ತರಿಯಾಗಿ ರುಬ್ಬಿಕೊಳ್ಳಿ. ಬೆ೦ದ ಬದನೇಕಾಯಿಗೆ ರುಬ್ಬಿದ ಈರುಳ್ಳಿ ಮಿಶ್ರಣವನ್ನು ಹಾಕಿ ನಿಮಿಷ ಫ್ರೈ ಮಾಡಿ.(ಬೇಕಾದಲ್ಲಿ ಸ್ವಲ್ಪ ಬೆಲ್ಲವನ್ನು ಸೇರಿಸಬಹುದು). ಇದು ರೊಟ್ಟಿಗೆ ಮತ್ತು ಅನ್ನದ ಜೊತೆ ಕೂಡಾ ಚೆನ್ನಾಗಿರುತ್ತದೆ.

ಬದನೆಕಾಯಿ ಮೊಸರು ಬಜ್ಜಿ (ಹಶಿ)

     

ಸಾಮಗ್ರಿ: ಬಲೂನ್ ಬದನೆ 1 (ಇದ್ದುದರಲ್ಲೇ ಚಿಕ್ಕದು), ತೆಂಗಿನ ತುರಿ 1 ಕಪ್, ಮೊಸರು 1 ಕಪ್, ಈರುಳ್ಳಿ ಸಣ್ಣದು 1

ಒಗ್ಗರಣೆಗೆ: ಎಣ್ಣೆ, ಉದ್ದಿನ ಬೇಳೆ, ಎಳ್ಳು - ಚಿಟಿಕೆ, ಹಸಿಮೆಣಸಿನ ಕಾಯಿ 1

ವಿಧಾನ : ಬದನೇಕಾಯಿಗೆ ಎಣ್ಣೆ ಸವರಿಕೊಂಡು ಒಲೆಯ ಮೇಲಿಟ್ಟು ಚೆನ್ನಾಗಿ ಸುಡಬೇಕು. ಸಿಪ್ಪೆ ಪೂರ್ತಿ ಕಪ್ಪಗಾದರೆ ಒಳಗಡೆ ಬೇಯುತ್ತದೆ. ಹಾಗೆಯೇ ಸುತ್ತಲೂ ಬೇಯಿಸಿ. ತಣ್ಣಗಾದ ಮೇಲೆ ನೀರಿನಲ್ಲಿ ಕೈ ನೆನೆಸಿಕೊಳ್ಳುತ್ತಾ ಸಿಪ್ಪೆ ತೆಗೆಯಿರಿ. ಸೌಟಿನಿಂದ (ಕೆಳಗೆ ತೋರಿಸಿದಂತೆ) ಹೆಚ್ಚಿಕೊಳ್ಳಿ. 

ತೆಂಗಿನ ತುರಿಯನ್ನು ನೀರು ಹಾಕಿ ನುಣ್ಣಗೆ ರುಬ್ಬಿಕೊಂಡು ಹೆಚ್ಚಿದ ಬದನೇಕಾಯಿ ಹಾಕಿ, ಮೊಸರು, ಉಪ್ಪು, ಸಣ್ಣಗೆ ಹೆಚ್ಚಿದ ಈರುಳ್ಳಿ ಹಾಕಿ. ನಂತರ ಎಣ್ಣೆ, ಉದ್ದಿನ ಬೇಳೆ, ಎಳ್ಳು, ಹೆಚ್ಚಿದ ಹಸಿಮೆಣಸಿನ ಕಾಯಿ ಹಾಕಿ ಒಗ್ಗರಣೆ ಮಾಡಿದರೆ ಬದನೇಕಾಯಿ ಮೊಸರು ಬಜ್ಜಿ ಅನ್ನದ ಜೊತೆ ಸವಿಯಲು ಸಿದ್ಧ.

ಸೂಚನೆ: ಬದನೇಕಾಯಿಯನ್ನು ಇಡಿಯಾಗಿಯೇ ಸುಡುವುದರಿಂದ ಸಿಪ್ಪೆ ತೆಗೆದ ನಂತರ ಒಮ್ಮೆ ಸೀಳಿ ಒಳಗಡೆ ಕೆಡುಕಿಲ್ಲವೆಂದು ಖಚಿತ ಪಡಿಸಿಕೊಂಡು ಹೆಚ್ಚಿ.