ಸ್ಟಫ್ಡ್ ಕ್ಯಾಪ್ಸಿಕಮ್ (ಕ್ಯಾಪ್ಸಿಕಮ್ ಎಣ್ಣೆಗಾಯಿ)

ಬೇಕಾಗುವ ಸಾಮಾಗ್ರಿಗಳು: ಚಿಕ್ಕ ಕ್ಯಾಪ್ಸಿಕಮ್ - 5-6 , ಎಣ್ಣೆ 1/2 ಕಪ್, ಮಸಾಲೆಗೆ : ಕಡಲೆ ಬೇಳೆ 5 ಚಮಚ, ಉದ್ದಿನಬೇಳೆ - 2 ಚಮಚ, ಧನಿಯಾ, ಜೀರಿಗೆ ತಲಾ 1 ಚಮಚ, ಇ೦ಗು ಚಿಟಿಕೆ, ಒಣ ಮೆಣಸು - 8-9 (ಖಾರಕ್ಕೆ ತಕ್ಕಷ್ಟು), ಉಪ್ಪು ರುಚಿಗೆ, ತೆ೦ಗಿನ ತುರಿ 1/2 ಕಪ್, ರುಚಿಗೆ 1/2 ಚಮಚ ಸಕ್ಕರೆ ಹಾಕಬಹುದು.

ಮಾಡುವ ವಿಧಾನ: ಮಸಾಲ ಪದಾರ್ಥಗಳನ್ನು ಹುರಿದು ತೆ೦ಗಿನ ತುರಿ ಜೊತೆ ತರಿ ತರಿ ಪುಡಿ ಮಾಡಿಕೊ೦ಡು ಅದಕ್ಕೆ ಸ್ವಲ್ಪ ಉಪ್ಪು ಸ್ವಲ್ಪ ನೀರು ಸೇರಿಸಿ, ಮಸಾಲವು ಗಟ್ಟಿ ಚಟ್ನಿಯ ಹದಕ್ಕೆ ಇರಬೇಕು. ಕ್ಯಾಪ್ಸಿಕಮ್ ತೊಟ್ಟನ್ನು ಬೀಜ ಸಹಿತ ತೆಗೆಯಬೇಕು (ಕ್ಯಾಪ್ಸಿಕಮ್ ಒಡೆಯದ೦ತೆ ತೊಟ್ಟು ತೆಗೆಯಿರಿ ಇಲ್ಲವಾದಲ್ಲಿ ಮಸಾಲಾವು ಹೊರಚೆಲ್ಲಬಹುದು) ಈಗ ಕ್ಯಾಪ್ಸಿಕಮ್ ಒಳಗೆ ತಯಾರಿಸಿದ ಮಸಾಲವನ್ನು ತು೦ಬಿ. ಬಾಣಲೆ ಸ್ವಲ್ಪ ಎಣ್ಣೆ ಹಾಕಿ ಅದು ಬಿಸಿ ಆದ ಮೇಲೆ ಕ್ಯಾಪ್ಸಿಕಮನ್ನು ಹಾಕಿ ಸಣ್ಣ ಉರಿಯಲ್ಲಿ ಫ್ರೈ ಮಾಡಿ, ಅಗತ್ಯವಿದ್ದಲ್ಲಿ ಆಗಾಗ ಸ್ವಲ್ಪ ಎಣ್ಣೆ ಸೇರಿಸಿ. ಮಸಾಲೆಯು ಜಾಸ್ತಿ ಉಳಿದಲ್ಲಿ ಎಲ್ಲ ಕ್ಯಾಪ್ಸಿಕಮ್ ಫ್ರೈ ಆದ ಮೇಲೆ ಉಳಿದ ಮಸಾಲೆ ಹಾಕಿ 2 ನಿಮಿಷ ಫ್ರೈ ಮಾಡಿದರೆ ಕ್ಯಾಪ್ಸಿಕಮ್ ಎಣ್ಣೆಗಾಯಿ ರೆಡಿ.

ಇದು ಅನ್ನ, ಚಪಾತಿ, ದೋಸೆ ಜೊತೆ ಚೆನ್ನಾಗಿರುತ್ತದೆ.

ತೊಂಡೆಕಾಯಿ ಫ್ರೈ

ಸಾಮಗ್ರಿಗಳು: ತೊಂಡೆಕಾಯಿ 200 ಗ್ರಾಂ, ಕಡ್ಲೆ ಕಾಯಿ ಎಣ್ಣೆ / ಶೇಂಗಾ ಎಣ್ಣೆ 5-6 ಚಮಚ, ಜೀರಿಗೆ - ಸಾಸಿವೆ 1/4 ಚಮಚ, ಇಂಗು ಚಿಟಿಕೆ, ಅರಿಶಿನ ಪುಡಿ 3-4 ಚಿಟಿಕೆ, ಕರಿಬೇವು 7-8 ಎಲೆ, ಅಚ್ಚ ಮೆಣಸಿನ ಪುಡಿ ಖಾರಕ್ಕೆ ತಕ್ಕಷ್ಟು, ಧನಿಯ ಪುಡಿ 1/2 ಚಮಚ, ಜೀರಿಗೆ ಪುಡಿ 1 ಚಮಚ, ವಾಟೆ ಪುಡಿ / amchroor powder 1/2 ಚಮಚ, ಬೆಲ್ಲದ ಪುಡಿ / ಸಕ್ಕರೆ 1/2 ಚಮಚ, ತುರಿದ ಕೊಬ್ಬರಿ 1/4 ಕಪ್, ಉಪ್ಪು ರುಚಿಗೆ ತಕ್ಕಷ್ಟು. 

ವಿಧಾನ: ತೊಂಡೆಕಾಯಿಯನ್ನು ತೆಳ್ಳಗೆ ಉದ್ದುದ್ದ ಹೆಚ್ಚಿಕೊಳ್ಳಿ. ಕೊಬ್ಬರಿಯನ್ನು ಒಮ್ಮೆ ಮಿಕ್ಸಿಗೆ ಹಾಕಿ ತರಿ ತರಿ ಪುಡಿ ಮಾಡಿಟ್ಟುಕೊಳ್ಳಿ. ಒಂದು ದಪ್ಪ ತಳದ ಬಾಣಲೆಗೆ ಎಣ್ಣೆ ಹಾಕಿ ಕಾದ ನಂತರ ಜೀರಿಗೆ, ಸಾಸಿವೆ ಹಾಕಿ. ಅದು ಚಿಟಪಟಾಯಿಸಿದಾಗ ಇಂಗು, ಸಣ್ಣದಾಗಿ ಚೂರು ಮಾಡಿದ ಕರಿಬೇವು ಹಾಕಿ. ಇದಕ್ಕೆ ತೊಂಡೆಕಾಯಿ ಹೋಳುಗಳನ್ನು ಹಾಕಿ ಮುಚ್ಚಳ ಮುಚ್ಚಿ 8-10 ನಿಮಿಷ ಸಣ್ಣ ಉರಿಯಲ್ಲಿ ಬೇಯಿಸಿ. ಆಗಾಗ ತಳ ಹಿಡಿಯದಂತೆ ಕೈ ಆಡಿಸುತ್ತಿರಿ. ಮುಕ್ಕಾಲು ಬೆಂದ ಮೇಲೆ ಇದಕ್ಕೆ ಉಪ್ಪು, ಅರಿಶಿನ, ಅಚ್ಚ ಮೆಣಸಿನ ಪುಡಿ, ಧನಿಯ ಮತ್ತು ಜೀರಿಗೆ ಪುಡಿ, ವಾಟೆ ಪುಡಿ / amchoor powder, ಬೆಲ್ಲದ ಪುಡಿ / ಸಕ್ಕರೆ ಹಾಕಿ ತುಂಬಾ ಸಣ್ಣ ಉರಿಯಲ್ಲಿ ಫ್ರೈ ಮಾಡಿ. ತೊಂಡೆ ಕಾಯಿ ಪೂರ್ತಿ ಫ್ರೈ ಆದಮೇಲೆ ಅದಕ್ಕೆ ಕೊಬ್ಬರಿ ಪುಡಿ ಹಾಕಿ, ಉಪ್ಪು ಸರಿಯಾಗಿದೆಯೇ ಎಂದು ಪರೀಕ್ಷಿಸಿ 1 ನಿಮಿಷ ಚೆನ್ನಾಗಿ ಕಲಸಿ ಉರಿಯನ್ನು ಆರಿಸಿ. ಬಿಸಿ ಬಿಸಿಯಾದ ತೊಂಡೆಕಾಯಿ ಫ್ರೈ ಊಟದ ಜೊತೆ ಸೈಡ್ ಡಿಶ್ ಆಗಿ ಚೆನ್ನಾಗಿರುತ್ತದೆ. ರೋಟಿ / ಚಪಾತಿ ಜೊತೆ ಕೂಡ ಸವಿಯಬಹುದು. 

ಸೂಚನೆ: 1) ಕಡ್ಲೆ ಕಾಯಿ ಎಣ್ಣೆ ಬದಲು ಯಾವುದೇ ಅಡುಗೆ ಎಣ್ಣೆ ಉಪಯೋಗಿಸಬಹುದು. 

           2) ಬೇಯಿಸುವಾಗ ನೀರು ಹಾಕುವ ಅವಶ್ಯಕತೆಯಿಲ್ಲ, ಆಗಾಗ ತಳ ಹಿಡಿಯದಂತೆ ನೋಡಿಕೊಳ್ಳಿ ಅಷ್ಟೇ. 

ಅಡುಗೆ ಮನೆಗೊಂದು ಟಿಪ್ಸ್: ಹೆಸರು ಕಾಳನ್ನು ಕುಕ್ಕರ್ ನಲ್ಲಿ ಬೇಯಿಸುವಾಗ 1-2 ಲವಂಗ ಹಾಕಿದರೆ ಕಾಳುಗಳು ಪೂರ್ತಿ ಬೆಂದು ಮುದ್ದೆಯಾಗದೇ ಬಿಡಿ ಬಿಡಿಯಾಗಿರುತ್ತವೆ.

ಕೊತ್ತಂಬರಿ ರೈಸ್

೨ ಕಪ್ ಕೊತ್ತಂಬರಿ ರೈಸ್ ಗೆ ಬೇಕಾಗುವ ಸಾಮಗ್ರಿಗಳು : ಕೊತ್ತಂಬರಿ ಸೊಪ್ಪು - ೧ ಕಪ್, ಗೋಡಂಬಿ - ೧೦ -೧೫, ಹಸಿಮೆಣಸು - ೨-೩ , ಶುಂಠಿ- ೧ ಇಂಚು, ಈರುಳ್ಳಿ - ೧/೨ ಕಪ್,

ಒಗ್ಗರಣೆಗೆ : ಜೀರಿಗೆ , ಸಾಸಿವೆ ಮತ್ತು ಕರಿಬೇವು,

ಮಾಡುವ ವಿಧಾನ : ಮೇಲೆ ಹೇಳಿದ ಪ್ರಮಾಣದಷ್ಟು ಕೊತ್ತಂಬರಿ ಸೊಪ್ಪು, ಹಸಿಮೆಣಸು , ಶುಂಠಿ ಹಾಗೂ ೫-೬ ಗೋಡಂಬಿಗಳನ್ನು ಮಿಕ್ಸಿ ಯಲ್ಲಿ ರುಬ್ಬಿಕೊಳ್ಳಬೇಕು .

ನಂತರ ಒಂದು ಬಾಣಲೆಗೆ ೨ ಟೀ ಚಮಚ ಎಣ್ಣೆ ಹಾಕಿ ಒಗ್ಗರಣೆಗೆ ಜೀರಿಗೆ, ಸಾಸಿವೆ  ಕರಿಬೇವು ಹಾಕಿ.
ಆಮೇಲೆ ೧/೨ ಕಪ್ ಈರುಳ್ಳಿ ಹಾಕಿ ಹೊಂಬಣ್ಣ ಬರುವ ತನಕ ಫ್ರೈ ಮಾಡಿ  ನಂತರ ಉಳಿದ ಗೋಡಂಬಿ ಮತ್ತು ರುಬ್ಬಿದ ಕೊತ್ತಂಬರಿ ಪೇಸ್ಟ್ ಹಾಕಿ ಹಸಿ ವಾಸನೆ ಹೋಗುವ ತನಕ ಫ್ರೈ ಮಾಡಿ. ಅದಕ್ಕೆ ರುಚಿ ಗೆ ತಕ್ಕಷ್ಟು ಉಪ್ಪು ಹಾಗೂ ಸ್ವಲ್ಪ  ನಿಂಬೆ ರಸ ಹಾಕಿ, ಅನ್ನ ಹಾಕಿ ಕಲಸಿರಿ.

ಗೋಧಿ ಹಿಟ್ಟಿನ ಶಿರಾ

ಸಾಮಗ್ರಿ: ಗೋದಿ ಹಿಟ್ಟು 1.5 ಕಪ್, ತುಪ್ಪ 3/4 ಕಪ್, ಸಕ್ಕರೆ 2 ಕಪ್ (ಸಿಹಿ ಜಾಸ್ತಿ ಬೇಕಿದ್ದರೆ ಇನ್ನೂ 1/4 ಕಪ್ ಜಾಸ್ತಿ ತೆಗೆದುಕೊಳ್ಳಿ), ಬಿಸಿ ನೀರು 2 ಕಪ್, ಗೋಡಂಬಿ 8 - 10

ವಿಧಾನ: ಬಾಣಲೆಗೆ ತುಪ್ಪ ಹಾಕಿ ಅದು ಕರಗಿದ ಮೇಲೆ ಅದಕ್ಕೆ ಗೋದಿ ಹಿಟ್ಟು ಹಾಕಿ ಸಣ್ಣ ಉರಿಯಲ್ಲಿ ಹುರಿಯಿರಿ. ತುಪ್ಪ ಇರುವುದರಿಂದ ಮುದ್ದೆಯಂತೆ ಆಗುತ್ತದೆ. ಚೆನ್ನಾಗಿ ಕಲಕಿ ಹುರಿಯುತ್ತಿರಿ. ಸುಮಾರು 10 ನಿಮಿಷ ಬೇಕಾಗಬಹುದು. ಗೋದಿ ಹಿಟ್ಟು ಚೆನ್ನಾಗಿ ಹುರಿಯಬೇಕು ಇಲ್ಲವಾದಲ್ಲಿ ಶಿರಾ ಮೇಣದಂತಾಗುತ್ತದೆ / ತಿನ್ನುವಾಗ ಬಾಯಿಗೆ ಅಂಟುತ್ತದೆ. ಈ ಕಡೆ 2 ಕಪ್ ನೀರನ್ನು ಕುದಿಯಲು ಇಟ್ಟುಕೊಳ್ಳಿ. ಹಿಟ್ಟಿನ ಬಣ್ಣ ಸ್ವಲ್ಪ ಕೆಂಪಗಾಗುತ್ತದೆ, ಸೌಟಿಗೆ ಅಂಟದೇ ಬಿಟ್ಟುಕೊಳ್ಳುತ್ತದೆ ಮತ್ತು ತುಪ್ಪ ಮತ್ತು ಹಿಟ್ಟಿನ ಕಮ್ಮನೆ ಸುವಾಸನೆ ಬರಲಾರಂಭಿಸುತ್ತದೆ. ಹೀಗಾದಲ್ಲಿ ಹಿಟ್ಟು ಹುರಿದಿದೆ ಎಂದರ್ಥ. ಒಮ್ಮೆ ಸ್ಟವ್ ಆರಿಸಿ ಕುದಿಯುತ್ತಿರುವ ನೀರನ್ನು ನಿಧಾನವಾಗಿ ಹಾಕಿ. ಮತ್ತೆ ಸ್ಟವ್ ಹಚ್ಚಿ ಚೆನ್ನಾಗಿ ಕಲಕಿ. ಈಗ ಗೋಡಂಬಿ ಚೂರುಗಳನ್ನು ಹಾಕಿ. ಅರ್ಧ ನಿಮಿಷದೊಳಗೆ ಮಿಶ್ರಣ ಗಟ್ಟಿಯಾಗುತ್ತಾ ಬರುತ್ತದೆ. ಗಟ್ಟಿಯಾಗಿ ಮುದ್ದೆಯಂತಾದಾಗ ಇದಕ್ಕೆ ಸಕ್ಕರೆ ಹಾಕಿ ಚೆನ್ನಾಗಿ ಕಲಸಿ. ಬೇಕಿದ್ದರೆ ಏಲಕ್ಕಿ ಪುಡಿ ಹಾಕಿಕೊಳ್ಳಬಹುದು. ನನಗೆ ತುಪ್ಪ, ಹಿಟ್ಟಿನ ಸುವಾಸನೆಯೇ ಇಷ್ಟವಾಗುವುದರಿಂದ ನಾನು ಹಾಕುವುದಿಲ್ಲ. ಹಾಕಿದ ಸಕ್ಕರೆ ಕರಗುತ್ತಾ ಬಂದಂತೆ ಮತ್ತೆ ಸ್ವಲ್ಪ ತೆಳುವಾಗುತ್ತದೆ. ಮತ್ತೆ ಅದು ಗಟ್ಟಿಯಾಗುವವರೆಗೆ ಕಲಸುತ್ತಾ ಇರಿ. ಸಕ್ಕರೆ ಪೂರ್ತಿ ಕರಗಿ ಮಿಶ್ರಣ ಮುದ್ದೆಯಾಗುವ ತನಕ ಕಲಸುತ್ತಿರಿ. ಇಲ್ಲವಾದಲ್ಲಿ ತಳ ಹಿಡಿಯುತ್ತದೆ. ಮಿಶ್ರಣ ಸೌಟಿಗೆ ಅಂಟದೇ ಪೂರ್ತಿಯಾಗಿ ಕೆಳಗೆ ಬೀಳುವಂತಾದರೆ ಶಿರಾ ರೆಡಿ. ಗೋಡಂಬಿಯನ್ನು ಮೊದಲು ಹಾಕುವ ಬದಲು ಶಿರಾ ರೆಡಿ ಆದ ಮೇಲೆ ತುಪ್ಪದಲ್ಲಿ ಹುರಿದು ಕೂಡ ಹಾಕಬಹುದು. 

ಸೂಚನೆ: 1) ಬಿಸಿ ನೀರು ಹಾಕುವಾಗ ಸ್ಟವ್ ಆರಿಸಿ ದೂರದಿಂದ ಹಾಕಿ. ಕುದಿಯುತ್ತಿರುವ ನೀರಾದ್ದರಿಂದ ಹಿಟ್ಟಿಗೆ ಹಾಕಿದೊಡನೆ ಸ್ವಲ್ಪ ಸಿಡಿಯುವ ಸಂಭವವಿರುತ್ತದೆ. 

       2) ಮೇಲೆ ಹೇಳಿದ ತುಪ್ಪದ ಪ್ರಮಾಣ ಸರಿಯಾಗಿ ಹಿಟ್ಟಿಗೆ ಹೊಂದಿಕೊಳ್ಳುವಷ್ಟು ಮಾತ್ರವಿದೆ. ತುಪ್ಪ ಜಾಸ್ತಿ ಬಯಸುವವರು 1/4 ಕಪ್ ಜಾಸ್ತಿ ಹಾಕಿಕೊಳ್ಳಿ ಇಲ್ಲವಾದಲ್ಲಿ ಮೇಲಿನ ಪ್ರಮಾಣ ಸರಿಯಾಗಿರುತ್ತದೆ.

       3) ಈ ಶಿರಾಕ್ಕೆ ಬಾಳೇ ಹಣ್ಣನ್ನು ಕೂಡ ಹಾಕಬಹುದು. 1-2 ಚೆನ್ನಾಗಿ ಹಣ್ಣಾದ ಬಾಳೆಹಣ್ಣನ್ನು ಸಣ್ಣಗೆ ಹೆಚ್ಚಿಕೊಂಡು ಕುದಿಯುವ ನೀರು ಹಾಕಿದ ಕೂಡಲೇ ಹಾಕಿ ಆಮೇಲೆ ಸಕ್ಕರೆ ಹಾಕಿ. 

ಅಡುಗೆ ಮನೆಗೊಂದು ಟಿಪ್ಸ್ : ಅರಿಶಿನ ಪುಡಿ ಹಾಳಾಗದಂತೆ, ಹುಳು ಬರದಂತೆ ಇರಲು ಅದರಲ್ಲಿ ಸ್ವಲ್ಪ ಕಾಳು ಮೆಣಸು (ಕರಿ ಮೆಣಸು ಅಥವಾ ಬೋಳ ಕಾಳು) ಹಾಕಿಡಿ. ವರ್ಷಗಳವರೆಗೂ ಅರಿಶಿನ ಪುಡಿ ಹಾಳಾಗುವುದಿಲ್ಲ.  

ಹಲಸಿನ ಕಾಯಿ ಪಲ್ಯ

ಬೇಕಾಗುವ ಸಾಮಾಗ್ರಿಗಳು: ಎಳೆಯ ಹಲಸಿನಕಾಯಿ ಸಿಪ್ಪೆ ತೆಗೆದು ಸಣ್ಣಗೆ ಹೆಚ್ಚಿದ್ದು :1 ಕಪ್, ಈರುಳ್ಳಿ -1, ಉಪ್ಪು ರುಚಿಗೆ, ಮಸಾಲೆಗೆ:ಧನಿಯ-2 ಚಮಚ, ಜೀರಿಗೆ 1/2 ಚಮಚ, ಸಾಸಿವೆ & ಮೆ೦ತೆ ಒ೦ದು ಚಿಟಿಕೆ , ಒಣ ಮೆಣಸು (ಬ್ಯಾಡಗಿ ಮೆಣಸು)-5-6 (ನಿಮ್ಮ ಖಾರಕ್ಕೆ ಅನುಗುಣವಾಗಿ), ಇ೦ಗು, ಕಾಯಿತುರಿ, ಹುಣಸೆಹಣ್ಣು -ಹುಳಿಗೆ

ಒಗ್ಗರಣೆಗೆ: ಎಣ್ಣೆ, ಸಾಸಿವೆ, ಕರಿಬೇವು.

ಮಾಡುವ ವಿಧಾನ: ಚಿಕ್ಕದಾಗಿ ಹೆಚ್ಚಿದ ಹಲಸಿನ ಕಾಯಿಯನ್ನು ಸ್ವಲ್ಪ ಉಪ್ಪು ಹಾಕಿ ಚೆನ್ನಾಗಿ ಬೇಯಿಸಿ ನೀರು ಬಸಿದುಕೊಳ್ಳಿ, ಮೇಲೆ ಹೇಳಿದ ಮಸಾಲೆಯನ್ನು ನುಣ್ಣಗೆ ರುಬ್ಬಿಕೊಳ್ಳಿ. ಒ೦ದು ಬಾಣಲೆಗೆ ಎಣ್ಣೆ, ಕರಿಬೇವು, ಸಾಸಿವೆ ಹಾಕಿ ಅದು ಚಿಟಪಟಿ ಸಿಡಿದ ನ೦ತರ ಅದಕ್ಕೆ ಹೆಚ್ಚಿದ ಈರುಳ್ಳಿ ಹಾಕಿ 3 ನಿಮಿಷ ಫ್ರೈ ಮಾಡಿ ಅದಕ್ಕೆ ಬೇಯಿಸಿಟ್ಟ ಹಲಸಿನ ಕಾಯಿ ರುಬ್ಬಿದ ಮಸಾಲೆಯನ್ನು ಹಾಕಿ 10-15 ನಿಮಿಷಗಳ ಕಾಲ ಚೆನ್ನಾಗಿ ಫ್ರೈ ಮಾಡಿ.

ಇದು ಅನ್ನ ಮತ್ತು ಚಪಾತಿ ಜೊತೆ ಚೆನ್ನಾಗಿರುತ್ತದೆ.

(ಈ ಸಾ೦ಬಾರದ ಬದಲು, ಹಸಿ ಮೆಣಸು, ಬೆಳ್ಳುಳ್ಳಿ ಹಾಕಿ ಕೂಡ ಮಾಡಬಹುದು)

ಹಲಸಿನ ಕಾಯಿ ಪಲ್ಯ - 2

ಸಾಮಗ್ರಿ: ಎಳೆ ಹಲಸಿನ ಕಾಯಿ 1/2, ತೆಂಗಿನ ತುರಿ 1 ಕಪ್, ಸಣ್ಣಗೆ ಹೆಚ್ಚಿದ ಈರುಳ್ಳಿ 1 ಕಪ್, ಬೆಳ್ಳುಳ್ಳಿ 12 - 15 ಎಸಳು, ಎಣ್ಣೆ 5 - 6 ಚಮಚ, ಹಸಿ ಮೆಣಸಿನ ಕಾಯಿ 5 - 6,  ಸಾಸಿವೆ 1/4 ಚಮಚ, ಕರಿಬೇವು ಸ್ವಲ್ಪ, ಉಪ್ಪು ರುಚಿಗೆ, ವಾಟೆ ಪುಡಿ / ನಿಂಬೆ ರಸ ರುಚಿಗೆ ತಕ್ಕಷ್ಟು, ಅರಿಶಿನ ಪುಡಿ 1/4 ಚಮಚ.  

ವಿಧಾನ : ಹಲಸಿನ ಕಾಯಿಯ ಸಿಪ್ಪೆ ಕೆತ್ತಿ ಉದ್ದಕ್ಕೆ ಸೀಳಿ ಅದರ ಮಧ್ಯದಲ್ಲಿರುವ ಗಟ್ಟಿ ಭಾಗ (ಮೂಗು) ಕೆತ್ತಿ (ಮೇಲಿನ ಚಿತ್ರ ನೋಡಿ) ಒಂದು ಪಾತ್ರೆಗೆ ಹಾಕಿ ಸ್ವಲ್ಪ (1 ಕಪ್ ನಷ್ಟು ಸಾಕು) ನೀರು, 1 ಚಮಚ ಎಣ್ಣೆ ಹಾಕಿ ಕುಕ್ಕರ್ ನಲ್ಲಿಟ್ಟು ಬೇಯಿಸಿಕೊಳ್ಳಿ. (ಎಣ್ಣೆ ಹಾಕಿ ಬೇಯಿಸುವುದರಿಂದ ಪಾತ್ರೆಗೆ ಅದರ ಮೇಣ ಅಂಟುವುದಿಲ್ಲ). ನಂತರ ಬೆಂದ ಹಲಸಿನ ಕಾಯಿ ಹೋಳುಗಳನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಒಂದು ಬಾಣಲೆಗೆ ಎಣ್ಣೆ, ಸಾಸಿವೆ ಹಾಕಿ ಅದು ಸಿಡಿದ ಮೇಲೆ ಜಜ್ಜಿದ ಬೆಳ್ಳುಳ್ಳಿ, ಕರಿಬೇವು ಹಾಕಿ ಸ್ವಲ್ಪ ಹುರಿಯಿರಿ. ನಂತರ ಹೆಚ್ಚಿದ ಈರುಳ್ಳಿ ಹಾಕಿ 1 ನಿಮಿಷ ಹುರಿಯಿರಿ. ಇದಕ್ಕೆ ಅರಿಶಿನ ಪುಡಿ ಹಾಕಿ, ಉಪ್ಪು, ವಾಟೆ ಪುಡಿ / ನಿಂಬೆ ರಸ, ತೆಂಗಿನ ತುರಿ ಹಾಕಿ ಸ್ವಲ್ಪ ಹುರಿಯಿರಿ. (ನಿಂಬೆ ರಸವನ್ನು ಕೊನೆಯಲ್ಲಿ ಹಾಕಿದರೆ ಹಲಸಿನ ಕಾಯಿಗೆ ಸರಿಯಾಗಿ ಹಿಡಿಯುವುದಿಲ್ಲ). ನಂತರ ಇದಕ್ಕೆ ಬೇಯಿಸಿ ಹೆಚ್ಚಿಟ್ಟುಕೊಂಡ ಹಲಸಿನ ಕಾಯಿ ಹಾಕಿ 1/4 ಕಪ್ ನಷ್ಟು ನೀರು ಹಾಕಿ ಚೆನ್ನಾಗಿ ಕಲಸಿ. ಇದಕ್ಕೆ ಒಂದು ಪ್ಲೇಟ್ ಮುಚ್ಚಿ ಸಣ್ಣ ಉರಿಯಲ್ಲಿ ಬೇಯಿಸಿ. ಮಿಶ್ರಣ ಚೆನ್ನಾಗಿ ಮಿಕ್ಸ್ ಆಗುವಂತೆ ಚೆನ್ನಾಗಿ ಕಲಸಿ, ನೀರು ಆರಿದ ನಂತರ ಉರಿ ಆರಿಸಿದರೆ ರುಚಿಯಾದ ಹಲಸಿನ ಕಾಯಿ ಪಲ್ಯ ಸಿಧ್ಧ. ಇದು ಅನ್ನದ ಜೊತೆ ಒಳ್ಳೆಯ ಕಾಂಬಿನೇಶನ್. 

ಕಿವಿ ಮಾತು : ಬೇಯಿಸಿ ಹೆಚ್ಚಿದ ಮೇಲೆ ಹಲಸಿನಕಾಯಿ ಹೋಳುಗಳು ತುಂಬಾ ಮೆತ್ತಗಿದ್ದರೆ ಒಗ್ಗರಣೆಗೆ ಹಾಕಿ ನೀರು ಹಾಕುವುದು ಬೇಡ. 

ಅಡುಗೆ ಮನೆಗೊಂದು ಟಿಪ್ಸ್ : ಯಾವುದೋ ಒಂದು ಪದಾರ್ಥವನ್ನು ಹಾಕಿಟ್ಟ ಡಬ್ಬವನ್ನು ಎಷ್ಟು ತೊಳೆದರೂ ಆ ಪದಾರ್ಥದ ವಾಸನೆ ಹೋಗುತ್ತಿಲ್ಲವಾದರೆ ಅದರಲ್ಲಿ ಕಿತ್ತಳೆ ಸಿಪ್ಪೆ ಚೂರುಗಳನ್ನು ಹಾಕಿಡಿ. ವಾಸನೆ ಮಾಯವಾಗುತ್ತದೆ. 

ಕನ್ನೆಕುಡಿ (ಸೊರ್ಲೆಕುಡಿ) ಕಟ್ಣೆ:

ಬೇಕಾಗುವ ಸಾಮಾಗ್ರಿಗಳು:

ಕನ್ನೆಕುಡಿ (ಸೊರ್ಲೆಕುಡಿ)- 40-50 ಎಲೆಗಳು

ಮೆಣಸಿನ ಕಾಳು (ಬೋಳ್ಕಾಳು) - 10-12

ಜೀರಿಗೆ - 1/4 ಚಮಚ

ತೆ೦ಗಿನ ತುರಿ - 1 ಬಟ್ಟಲು

ಹಸಿ ಮೆಣಸಿನ ಕಾಯಿ  - 2 (ಸ್ವಲ್ಪ ಖಾರ ಇದ್ದರೆ ಒಳ್ಳೆಯದು)

ಒಗ್ಗರಣೆಗೆ: ಎಣ್ಣೆ, ಬೆಳ್ಳುಳ್ಳಿ 2-3 ಎಸಳು, 1 ಒಣಮೆಣಸು, ಸ್ವಲ್ಪ ಜೀರಿಗೆ ಮತ್ತು ಸಾಸಿವೆ.

ಮಾಡುವ ವಿಧಾನ :

ಮೊದಲು ಕನ್ನೆಕುಡಿ,ಹಸಿ ಮೆಣಸಿನ ಕಾಯಿ,ಮೆಣಸಿನ ಕಾಳು,ಜೀರಿಗೆ ಎಲ್ಲವನ್ನು ಸ್ವಲ್ಪ ಎಣ್ಣೆ ಹಾಕಿ ಹುರಿಯಬೇಕು (ಹಸಿ ವಾಸನೆ ಹೋಗುವಹಾಗೆ)  ಹುರಿದ ಮಿಶ್ರಣಕ್ಕೆ ಕಾಯಿತುರಿ ಹಾಕಿ ರುಬ್ಬಿಕೊಳ್ಳಿ.  ರುಬ್ಬಿದ ಮಿಶ್ರಣಕ್ಕೆ ಉಪ್ಪು, ಹಾಕಿ ಕುದಿಸಿ. ಅದು ಕುದಿಯುತ್ತಿರುವಾಗಲೇ ಸ್ವಲ್ಪ ಎಣ್ಣೆಗೆ ಜೀರಿಗೆ, ಸಾಸಿವೆ, ಜಜ್ಜಿದ ಬೆಳ್ಳುಳ್ಳಿ ಹಾಕಿ ಒಗ್ಗರಣೆ ಕೊಡಿ.

ಇದು ಮಳೆಗಾಲದಲ್ಲಿ ಅನ್ನದ ಜೊತೆ ತಿನ್ನಲು ಬಲು ರುಚಿ.