ಸಾ೦ಬಾರ್ ಸೊಪ್ಪಿನ (ದೊಡ್ಡ ಪತ್ರೆ) ಗೊಜ್ಜು & ಚಟ್ನಿ:

ಸಾಮಾಗ್ರಿಗಳು: ಸಾ೦ಬಾರ್ ಸೊಪ್ಪು (ದೊಡ್ಡ ಪತ್ರೆ) – 8-10 , ತೆ೦ಗಿನ ಕಾಯಿ ತುರಿ  ½ ಕಪ್, ಎಳ್ಳು ½ ಚಮಚ , ಕೆ೦ಪು(ಒಣ) ಮೆಣಸು 5-6, ಧನಿಯಾ ¼ ಚಮಚ, ಜೀರಿಗೆ ¼ ಚಮಚ, ಬೆಲ್ಲ - ಚಿಕ್ಕ ನಿ೦ಬೆಹಣ್ಣಿನ ಗಾತ್ರದಷ್ಟು, ಹುಣಸೆ ಹಣ್ಣು ನಿಮ್ಮ ಅಳತೆ , ಉಪ್ಪು ನಿಮ್ಮ ರುಚಿಗೆ ತಕ್ಕಷ್ಟು.

ವಿಧಾನ: ದೊಡ್ಡಪತ್ರೆ ಎಲೆಯನ್ನು ಸ್ವಲ್ಪ ಎಣ್ಣೆಯನ್ನು ಹಾಕಿ ಬಾಡಿಸಿಕೊಳ್ಳಿ. ಒಣ ಮೆಣಸು, ಎಳ್ಳು, ಧನಿಯಾ, ಜೀರಿಗೆ ಹುರಿದುಕೊಡು, ಬಾಡಿಸಿದ ದೊಡ್ಡಪತ್ರೆ ಎಲೆ ಮತ್ತು ತೆ೦ಗಿನ ತುರಿ ಹುಣಸೆ ಹಣ್ಣು ಸೇರಿಸಿ ರುಬ್ಬಿಕೊಳ್ಳಿ. ರುಬ್ಬಿದ ಮಿಶ್ರಣಕ್ಕೆ ಉಪ್ಪು & ಬೆಲ್ಲ ಸೇರಿಸಿ ಸಲ್ಪ ನೀರು (ಮಮೂಲಿ ಗೊಜ್ಜಿನ ಹದ) ಹಾಕಿ 10 ನಿಮಿಷ ಕುದಿಸಿ. ಇದು ಸಿಹಿ ಖಾರ ಎರಡೂ ಸೇರಿ ಅನ್ನದ ಜೊತೆ ತಿನ್ನಲು ಮಜವಾಗಿರುತ್ತದೆ.

ಸಾ೦ಬಾರ್ ಸೊಪ್ಪಿನ ಚಟ್ನಿ:

ಸಾಮಾಗ್ರಿಗಳು: ಬೆಲ್ಲವನ್ನು ಹೊರತು ಪಡಿಸಿ ಮತ್ತೆಲ್ಲ ಸಾಮಾಗ್ರಿಗಳ ಅಗತ್ಯವಿದೆ.

ವಿಧಾನ: ದೊಡ್ಡಪತ್ರೆ ಎಲೆಯನ್ನು ಸ್ವಲ್ಪ ಎಣ್ಣೆಯನ್ನು ಹಾಕಿ ಬಾಡಿಸಿಕೊಳ್ಳಿ. ಒಣ ಮೆಣಸು, ಧನಿಯಾ, ಜೀರಿಗೆ ಎಳ್ಳು ಹುರಿದುಕೊಡು, ಬಾಡಿಸಿದ ದೊಡ್ಡಪತ್ರೆ ಎಲೆ ಮತ್ತು ತೆ೦ಗಿನ ತುರಿ ಸೇರಿಸಿ ರುಬ್ಬಿಕೊಳ್ಳಿ. ಜಾಸ್ತಿ ನೀರು ಸೇರಿಸಬಾರದು. ಗಟ್ಟಿ ಚಟ್ನಿ ಹದಕ್ಕೆ ಇರಬೇಕು.

ಚಿಕ್ಕ ಮಕ್ಕಳ ಆರೋಗ್ಯಕ್ಕೆ ಸಲಹೆ:ಸಾ೦ಬಾರ್ ಸೊಪ್ಪನ್ನು ಬೆ೦ಕಿಯಲ್ಲಿ ಹಿಡಿದು ಸ್ವಲ್ಪ ಬಾಡಿದ ಮೇಲೆ ಅದರ ರಸ ತೆಗೆದು ಸ್ವಲ್ಪ ಬೆಲ್ಲ ಸೇರಿಸಿ ಚಿಕ್ಕ ಮಕ್ಕಳಿಗೆ ಕುಡಿಸುವುದರಿ೦ದ ನೆಗಡಿ(ಥ೦ಡಿ) ಉಪಶಮನವಾಗುತ್ತದೆ.

ಆರೆಂಜ್ ಪುಲಾವ್

                                                                    
ಬೇಕಾಗುವ ಸಾಮಗ್ರಿಗಳು : ಅಕ್ಕಿ ೧ ಕಪ್ , ಕಿತ್ತಳೆ ಹಣ್ಣು ೩, ಗೋಡಂಬಿ ೧  ಟೀ ಸ್ಪೂನ್, ತೆಂಗಿನ ಕಾಯಿ ಹಾಲು ೧/೨  ಕಪ್ , ಈರುಳ್ಳಿ ೨, ಹಸಿಮೆಣಸು ೪, ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ೧ ಟೀ ಸ್ಪೂನ್, ತುಪ್ಪ ಅಥವಾ ಎಣ್ಣೆ ೩ ಟೀ ಸ್ಪೂನ್, ಕೊತ್ತಂಬರಿ ಸೊಪ್ಪು ೧/೪ ಕಪ್, ಬೀನ್ಸ್ ಮತ್ತು ಕ್ಯಾರೆಟ್ ತಲಾ ೧/೨ ಕಪ್,  ಪುಲಾವ್ ಪೌಡರ್ ಅಥವಾ ಪಾವ್ ಬಾಜಿ ಮಸಾಲ ಪೌಡರ್ ೨ ಟೀ ಸ್ಪೂನ್ .
ಸಲಹೆ : ತೆಂಗಿನ  ತುರಿಯನ್ನು  ರುಬ್ಬಿ ಅದರ ರಸವನ್ನು ಹಿಂಡಿ ತೆಗೆದು ತೆಂಗಿನ ಹಾಲು ಸಿದ್ಧ ಪಡಿಸಿ. ಮತ್ತು ೩ ಕಿತ್ತಳೆ ಹಣ್ಣುಗಳನ್ನು ಬಿಡಿಸಿ  ಬೀಜ ತೆಗೆದು , ತೊಳೆಯನ್ನು ಮಿಕ್ಸಿ ಯಲ್ಲಿ ಹಾಕಿ ರಸ ತೆಗೆದಿಟ್ಟುಕೊಳ್ಳಿ .  ಸ್ವಲ್ಪ ಸಿಹಿ ಇಷ್ಟ ಪಡುವವರು ಕಿತ್ತಳೆ ರಸದ ಜೊತೆ 4 ಚಮಚ ಸಕ್ಕರೆ ಹಾಕಿಕೊಳ್ಳಬಹುದು .

ಮಾಡುವ ವಿಧಾನ :
ಪ್ರೆಶರ್ ಕುಕ್ಕರ್ ನಲ್ಲಿ ಎಣ್ಣೆ  ೩ ಟೀ ಸ್ಪೂನ್ ಎಣ್ಣೆ ಹಾಕಿ , ಕಾದ ನಂತರ ಹಸಿಮೆಣಸು, ಶುಂಠಿ ಬೆಳ್ಳುಳ್ಳಿ ಪೇಸ್ಟ್  ಹಾಕಿ ಫ್ರೈ ಮಾಡಿ, ನಂತರ ಉದ್ದುದ್ದ ಹೆಚ್ಚಿದ ಈರುಳ್ಳಿ ಹಾಕಿ ಫ್ರೈ ಮಾಡಿ, ಈರುಳ್ಳಿ ಫ್ರೈ ಆದೊಡನೆ ಹೆಚ್ಚಿದ ಬೀನ್ಸ್ ಮತ್ತು ಕ್ಯಾರೆಟ್ ಮತ್ತು ಪುಲಾವ್ ಪೌಡರ್ ಅಥವಾ ಪಾವ್ ಬಾಜಿ ಮಸಾಲ ಪೌಡರ್ ಹಾಕಿ ಫ್ರೈ ಮಾಡಿ . ೧/೪ ಕಪ್ ಕಾಯಿ ಹಾಲು ಸೇರಿಸಬೇಕು . ಒಂದು ಕುದಿ ಬಂದ ತಕ್ಷಣ  ಇದಕ್ಕೆ ಅಕ್ಕಿಯನ್ನು ತೊಳೆದು ಹಾಕಿ ೧ ನಿಮಿಷ ಫ್ರೈ ಮಾಡಿ , ೧.೫  ಕಪ್ ಕಿತ್ತಳೆ ರಸವನ್ನು ಹಾಕಿ , ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ನಂತರ ಕುಕ್ಕರ್ ಮುಚ್ಚಿ 3 ವಿಸಲ್ ಕೂಗಿಸಿ. ಉಗಿ ಇಳಿದ ಮೇಲೆ ತೆಗೆದು ತುಪ್ಪದಲ್ಲಿ ಹುರಿದ ಗೋಡಂಬಿ ಮತ್ತು ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪನ್ನು ಹಾಕಿ ಒಮ್ಮೆ ಚೆನ್ನಾಗಿ ಮಿಕ್ಸ್ ಆಗುವಂತೆ ಕಲಸಿ. ಆರೆಂಜ್ ಪುಲಾವ್ ರೆಡಿ ..

ಸಾ೦ಬಾರ್ ದೋಸೆ:

 













ಸಾಮಾಗ್ರಿಗಳು: ಅಕ್ಕಿ 2 ಕಪ್, ಉದ್ದಿನ ಬೇಳೆ ½ ಕಪ್, ಕಡಲೆ ಬೇಳೆ 3 ಚಮಚ , ಮೆ೦ತೆ – ½ ಚಮಚ, ಜೀರಿಗೆ 1 ½ ಚಮಚ, ಒಣಮೆಣಸು 5-6, ಧನಿಯ 1 ½ ಚಮಚ, ಈರುಳ್ಳಿ 2 ದೊಡ್ಡದು, ಕೊತ್ತ೦ಬರಿ ಸೊಪ್ಪು ಸ್ವಲ್ಪ, ಹಸಿ ಮೆಣಸು 2-3, ಕರಿಬೇವು

ಮಾಡುವ ವಿಧಾನ:ಅಕ್ಕಿ,ಉದ್ದಿನ ಬೇಳೆ, ಕಡಲೆ ಬೇಳೆ, ಮೆ೦ತೆ ಇವನ್ನು 6-7 ಗ೦ಟೆಗಳ ಕಾಲ ನೀರಿನಲ್ಲಿ ನೆನೆಸಿಡಿ (ಬೆಳಿಗ್ಗೆ ನೆನೆಸಿ ರಾತ್ರಿ ರುಬ್ಬಿ) ರುಬ್ಬುವಾಗ ಇವೆಲ್ಲದರ ಜೊತೆಗೆ ಧನಿಯಾ, ಜೀರಿಗೆ, ಚಿಟಿಕೆ ಅರಿಶಿನ ಹಾಕಿ ನುಣ್ಣಗೆ ರುಬ್ಬಿ ಇಡಿ. ರಾತ್ರಿ ರುಬ್ಬಿ ಇಡುವುದರಿ೦ದ ಬೆಳಿಗ್ಗೆ ಹೊತ್ತಿಗೆ ಹಿಟ್ಟು ಚೆನ್ನಾಗಿ ಹದ ಬ೦ದಿರುತ್ತದೆ. ದೋಸೆ ಹಿಟ್ಟಿಗೆ ಈರುಳ್ಳಿ, ಕೊತ್ತ೦ಬರಿ ಸೊಪ್ಪು ಮತ್ತು ಹಸಿಮೆಣಸನ್ನು ಸಣ್ಣಗೆ ಹೆಚ್ಚಿ ಹಾಕಿ. (ಕರಿಬೇವನ್ನು ಅಕ್ಕಿಯ ಜೊತೆಗೆ ರುಬ್ಬಲು ಹಾಕಬಹುದು ಅಥವಾ ಕೊತ್ತ೦ಬರಿ ಸೊಪ್ಪಿನ ಹಾಗೆ ಸಣ್ಣಗೆ ಹೆಚ್ಚಿ ದೋಸೆ ಹಿಟ್ಟಿಗೆ ಸೇರಿಸ ಬಹುದು) ಉಪ್ಪು ರುಚಿಗೆ ತಕ್ಕಷ್ಟು, ಬೆಲ್ಲ ಚಿಕ್ಕ ಚಮಚದಲ್ಲಿ ಅರ್ಧ ಚಮಚ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಬೇಕು. (ಚಳಿಗಾಲದ ಸಮಯದಲ್ಲಿ ಅಕ್ಕಿಯನ್ನು ಹಿ೦ದಿನ ದಿನ ಮಧ್ಯಾಹ್ನವೇ ರುಬ್ಬಿಕೊ೦ಡರೆ ಮರುದಿನ ಬೆಳಿಗ್ಗೆಯ ಹೊತ್ತಿಗೆ ಹಿಟ್ಟಿನ ಸರಿಯಾಗಿ ಹದ ಬ೦ದಿರುತ್ತದೆ)

ಕಾವಲಿಗೆ ಎಣ್ಣೆ ಹಚ್ಚಿಕೊ೦ಡು ದೋಸೆ ಮಾಡುವಾಗ ಅದರ ಮೇಲೆ ಸ್ವಲ್ಪ ಎಣ್ಣೆ ಹಾಕಿ.

ಈ ದೋಸೆಯನ್ನು ತುಪ್ಪ ಬೆಲ್ಲ ಅಥವಾ ಚಟ್ನಿ ಜೊತೆ ತಿನ್ನಬಹುದು. ಇದಕ್ಕೆ ಹುರಿಗಡಲೆ ಚಟ್ನಿ / ಶೇ೦ಗಾ ಚಟ್ನಿ

ಚೆನ್ನಾಗಿರುತ್ತದೆ.

 

ಸೌತೆಕಾಯಿ ಬಜೆ / ಪಕೋಡ :

ಸಾಮಗ್ರಿ: ಸೌತೆಕಾಯಿ 1 (ಮೀಡಿಯಂ ಗಾತ್ರದ್ದು), ಉಪ್ಪಿಟ್ಟು ರವೆ 1 - 1.5 ಕಪ್, ಅಕ್ಕಿ ಹಿಟ್ಟು 2 ಚಮಚ, ಸಣ್ಣಗೆ ಹೆಚ್ಚಿದ ಕರಿಬೇವು 1 - 2 ಚಮಚ, ಅಚ್ಚ ಮೆಣಸಿನ ಪುಡಿ 1 - 2 ಚಮಚ (ನಿಮ್ಮ ಖಾರಕ್ಕೆ ತಕ್ಕಂತೆ ಬದಲಾಯಿಸಬಹುದು), ಉಪ್ಪು ರುಚಿಗೆ ತಕ್ಕಷ್ಟು, ಕರಿಯಲು ಎಣ್ಣೆ.

ವಿಧಾನ: ಸೌತೆಕಾಯಿ ಸಿಪ್ಪೆ ತೆಗೆದು ತುರಿಯಿರಿ (ಬಲಿತು ಹೋದ ಸೌತೆ ಕಾಯಾದರೆ ಬೀಜ ತೆಗೆಯಿರಿ). ನಂತರ ಅದನ್ನು ಒಂದು ಪಾತ್ರೆಗೆ ಹಾಕಿ ಅದಕ್ಕೆ ಉಪ್ಪು, ಮೆಣಸಿನ ಪುಡಿ, ಕರಿಬೇವು ಹಾಕಿ. ನಂತರ ಸ್ವಲ್ಪ ಸ್ವಲ್ಪವೇ ರವೆ ಹಾಕುತ್ತ ಕಲಸುತ್ತಾ ಬನ್ನಿ. ಈ ಮಿಶ್ರಣ ಕೈ ಬಿಟ್ಟು, ಎಣ್ಣೆಯಲ್ಲಿ ಬಿಡುವಷ್ಟು ಗಟ್ಟಿ ಆದರೆ ಸಾಕು, ತುಂಬಾ ಗಟ್ಟಿಯಾಗುವಷ್ಟು ರವೆ ಹಾಕುವುದು ಬೇಡ. ಬಾಣಲೆಗೆ ಎಣ್ಣೆ ಹಾಕಿ ಕಾಯಲು ಬಿಡಿ. ಮಿಶ್ರಣವನ್ನು ಉಪ್ಪು ಖಾರ ಸರಿಯಾಗಿದೆಯೇ ಎಂದು ಪರೀಕ್ಷಿಸಿ ಸರಿ ಪಡಿಸಬಹುದು. ಇನ್ನೇನು ಕರಿಯಲು ಸಿದ್ಧ ಎನ್ನುವಷ್ಟರಲ್ಲಿ 2 ಚಮಚ ಅಕ್ಕಿ ಹಿಟ್ಟು ಹಾಕಿ ಚೆನ್ನಾಗಿ ಕಲಸಿಕೊಳ್ಳಿ. ಸೌತೆಕಾಯಿ ನೀರು ಬಿಟ್ಟು ಕೊಳ್ಳುವುದರಿಂದ ಹಿಟ್ಟು ಸ್ವಲ್ಪ ತೆಳುವಾಗಿದೆ ಎನಿಸಿದರೆ ಮತ್ತೆ ಸ್ವಲ್ಪ ರವೆ ಹಾಕಿ ಕಲಸಿ, ಅಕ್ಕಿ ಹಿಟ್ಟನ್ನು ಹಾಕಬೇಡಿ. (ಅಕ್ಕಿ ಹಿಟ್ಟನ್ನು ಜಾಸ್ತಿ ಹಾಕಿದರೆ ಬಜೆ ಗಟ್ಟಿಯಾಗುತ್ತದೆ). ನಂತರ ಈ ಮಿಶ್ರಣವನ್ನು ಕೈ ಅಲ್ಲಿ ತೆಗೆದುಕೊಂಡು ಗೋಲಿಗಳಂತೆ ಎಣ್ಣೆಯಲ್ಲಿ ಬಿಟ್ಟು ಹೊಂಬಣ್ಣ ಬರುವ ತನಕ ಕರಿಯಿರಿ. ಗರಿಗರಿಯಾದ ಸೌತೆಕಾಯಿ ಬಜೆ ಸವಿಯಲು ಸಿದ್ಧ. ದಿಢೀರ್ ಅತಿಥಿಗಳ ಆಗಮನವಾದಾಗ ದಿಢೀರನೆ ಇದನ್ನು ಮಾಡಬಹುದು. 

ಸೂಚನೆ : 1) ಮಿಶ್ರಣದ ಜೊತೆ ಹೆಚ್ಚಿದ ಈರುಳ್ಳಿ ಕೂಡ ಹಾಕಬಹುದು. ಸೌತೆಕಾಯಿಯ ಪರಿಮಳ ಇಷ್ಟ ಪಡುವವರು ಈರುಳ್ಳಿ ಹಾಕಬೇಡಿ.
2) ಹಳ್ಳಿ ಕಡೆ ಬೆಳೆಯುವ ಮುಳ್ಳು ಸವತೆಯಾದರೆ ಮತ್ತೂ ಗರಿ ಗರಿಯಾಗುತ್ತದೆ. 

ಅಡುಗೆ ಮನೆಗೊಂದು ಸಲಹೆ: ರಸ ತೆಗೆದ ಲಿಂಬು ಹಣ್ಣನ್ನು ಬಿಸಾಕಬೇಡಿ. ಪ್ರತಿದಿನ ಕುಕ್ಕರಿನಲ್ಲಿ ಅನ್ನ / ಬೇಳೆ ಬೇಯಿಸುವಾಗ ತಳಕ್ಕೆ ನೀರಿನ ಜೊತೆ ಈ ಲಿಂಬು ಸಿಪ್ಪೆಯನ್ನು ಹಾಕಿಡಿ, ತಳ ಕಪ್ಪಗಾಗುವುದಿಲ್ಲ....!! 

ಮಿಶ್ರ ತರಕಾರಿ ಸಾಗು

ಇದು ತೀರ ಸರಳವಾದ ವಿಧಾನ. 2-3 ತರಕಾರಿಗಳು ಸ್ವಲ್ಪ ಸ್ವಲ್ಪವೇ ಉಳಿದು ಹೋದರೆ ಈ ಸಾಗು ಮಾಡಿ ಖಾಲಿ ಮಾಡಬಹುದು...!!  ಚಪಾತಿ ತಿನ್ನುವುದರಿಂದ ಕೆಲವರಿಗೆ ಮೈ ಉಷ್ಣವು ಹೆಚ್ಚಿ ಬಾಯಿಯಲ್ಲಿ ಗುಳ್ಳೆಗಳು ಆಗುತ್ತವೆ. ಅಂಥವರು ಈ ರೀತಿ ತರಕಾರಿ ಸಾಗು / ಪಲ್ಯಗಳನ್ನು ಚಪಾತಿಯ ಜೊತೆ ಜಾಸ್ತಿ ಸೇವಿಸಿದಲ್ಲಿ ದೇಹದ ಉಷ್ಣವನ್ನು ಸಮತೋಲನದಲ್ಲಿ ಇಟ್ಟುಕೊಳ್ಳಬಹುದು. 

ಸಾಮಗ್ರಿಗಳು : ಸಣ್ಣಗೆ ಹೆಚ್ಚಿದ ಹುರುಳಿ ಕಾಯಿ (Beans) - ಸೀಮೆ ಬದನೆ / ಸೀಮೆ ಸೌತೆಕಾಯಿ (ನಾಲಿಗೆ ಸೌತೆಕಾಯಿ)  - ಆಲೂಗಡ್ಡೆ - ಕ್ಯಾರೆಟ್  - ಎಲ್ಲಾ ಸೇರಿ 2 ಕಪ್,  ಅರಿಶಿನ ಪುಡಿ ಚಿಟಿಕೆ, ತೆಂಗಿನ ತುರಿ 1 ಕಪ್, ಜೀರಿಗೆ 1/4 ಚಮಚ, ಹುರಿಗಡಲೆ (ಪುಟಾಣಿ) 1.5 ಚಮಚ, ಹಸಿಮೆಣಸಿನಕಾಯಿ 2-3, ಹೆಚ್ಚಿದ ಕೊತ್ತಂಬರಿ ಸೊಪ್ಪು  2-3 ಟೇಬಲ್ ಚಮಚ, ಚಕ್ಕೆ 1/4 ಇಂಚು (optional), ನಿಂಬೆ ರಸ 1-2 ಚಮಚ, ಉಪ್ಪು ರುಚಿಗೆ, ಸಕ್ಕರೆ 1/4 ಚಮಚ, ಕರಿಬೇವಿನ ಎಲೆಗಳು 8-10. 

ವಿಧಾನ : ಸಣ್ಣಗೆ ಹೆಚ್ಚಿದ ತರಕಾರಿಗಳನ್ನು ಪಾತ್ರೆಗೆ ಹಾಕಿ, ಒಂದೆರಡು ಕಪ್ ನೀರು ಹಾಕಿ, ಚಿಟಿಕೆ ಅರಿಶಿನ ಹಾಕಿ ಬೇಯಿಸಿ. 75% ಬೆಂದ ಮೇಲೆ ಸ್ವಲ್ಪ ಉಪ್ಪು ಸೇರಿಸಿ ಬೇಯಿಸಿ. ತುಂಬಾ ಮೆತ್ತಗೆ ಬೇಯುವುದು ಬೇಡ. 

            

ಅದು ಬೇಯುವಷ್ಟರಲ್ಲಿ ಮಿಕ್ಸರ್-ಗೆ ತೆಂಗಿನ ತುರಿ, ಜೀರಿಗೆ, ಹುರಿಗಡಲೆ, ಹಸಿಮೆಣಸಿನ ಕಾಯಿ, ಕೊತ್ತಂಬರಿ ಸೊಪ್ಪು, ಬೇಕಿದ್ದಲ್ಲಿ ಸಣ್ಣ ಚಕ್ಕೆಯ ಚೂರು ಹಾಕಿ, ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. 

ತರಕಾರಿ ಬೆಂದ ಮೇಲೆ ಅದಕ್ಕೆ ರುಬ್ಬಿದ ಮಿಶ್ರಣ ಹಾಕಿ, ಉಪ್ಪು, ನಿಂಬೆರಸ, ಸಕ್ಕರೆ (optional), ಕರಿಬೇವು ಹಾಕಿ ನೀರು ಸೇರಿಸಿ ಕುದಿಸಿ (ಬೆಂದ ತರಕಾರಿ ಜೊತೆ ನೀರು ಇರುವುದರಿಂದ ನೋಡಿಕೊಂಡು ನೀರು ಸೇರಿಸಿ). ಪೂರಿ / ಚಪಾತಿ ಜೊತೆ ಸರ್ವ್ ಮಾಡಿ... 

    

ಸೂಚನೆ: ಈ ಸಾಗು ಖಾರ ಜಾಸ್ತಿ ಆದರೆ ಚೆನ್ನಾಗಿರುವುದಿಲ್ಲ.