ಶುಕ್ರವಾರ, ಮಾರ್ಚ್ 18, 2016

ಸ್ವೀಟ್ ಕಾರ್ನ್ ಬಜೆ (ಬಜ್ಜಿ):

ಸಾಮಗ್ರಿಗಳು :
ಸ್ವೀಟ್ ಕಾರ್ನ್ - 2 ಕಪ್, 
ಕಡಲೆ ಹಿಟ್ಟು - 1 ಕಪ್,
ಅಕ್ಕಿ ಹಿಟ್ಟು - 1 ಚಮಚ,
ಕೊತ್ತಂಬರಿ ಸೊಪ್ಪು - 1 ಚಮಚ, 
ಕರಿಬೇವು (ಸಣ್ಣಗೆ ಹೆಚ್ಚಿದ್ದು) - 1 ಚಮಚ,
ಶುಂಟಿ (ತುರಿದಿದ್ದು) - 1/2 ಚಮಚ,
ಒಣ ಮೆಣಸಿನ ಪುಡಿ - 2 ಚಮಚ,
ಜೀರಾ ಪುಡಿ - 1/2 ಚಮಚ,
ಉಪ್ಪು - ರುಚಿಗೆ 
ಎಣ್ಣೆ - ಕರಿಯಲು 

ವಿಧಾನ :
ಕಾರ್ನ್ ಅನ್ನು ಮಿಕ್ಸಿಗೆ ಹಾಕಿ ತರಿ ತರಿಯಾಗಿ ರುಬ್ಬಿ (4-5 ಸೆಕೆಂಡ್  ರುಬ್ಬಿದರೆ ಸಾಕು). ಇದನ್ನು ಒಂದು ಪಾತ್ರೆಗೆ ಹಾಕಿ ಕೊತ್ತಂಬರಿ ಸೊಪ್ಪು, ಕರಿಬೇವು, ಶುಂಟಿ, ಒಣ ಮೆಣಸಿನ ಪುಡಿ, ಜೀರಾ ಪುಡಿ, (ಬೇಕಿದ್ದರೆ ಎರಡು ಚಿಟಿಕೆ ಗರಂ ಮಸಾಲ ಪುಡಿ ಹಾಕಬಹುದು), ಅಕ್ಕಿ ಹಿಟ್ಟು, ಉಪ್ಪು ಹಾಕಿ ಸ್ವಲ್ಪ ಸ್ವಲ್ಪವೇ ಕಡಲೆ ಹಿಟ್ಟು ಹಾಕುತ್ತಾ ಕಲಸಿ. ಮಿಶ್ರಣ ಕೈ ಇಂದ ಬಿಡುವಷ್ಟು ಗಟ್ಟಿ ಆದರೆ ಸಾಕು. 

ಎಣ್ಣೆ ಕಾಯಲಿಟ್ಟು, ಮಿಶ್ರಣವನ್ನು ದೊಡ್ಡ ಗೋಲಿ ಗಾತ್ರದಲ್ಲಿ ಕಾದ ಎಣ್ಣೆಯಲ್ಲಿ ಹೊಂಬಣ್ಣ ಬರುವಂತೆ ಕರಿದು ತೆಗೆದರೆ, ಚುಮು ಚುಮು ಮಳೆಯಲ್ಲಿ ಬಿಸಿ ಬಿಸಿ ಮತ್ತು ಗರಿ ಗರಿಯಾದ ಕಾರ್ನ್ ಬಜೆ ಸವಿಯಲು ಸಿದ್ಧ. 


ಶುಕ್ರವಾರ, ಮಾರ್ಚ್ 11, 2016

ಮಸಾಲ ಮಜ್ಜಿಗೆ:

ಸಾಮಗ್ರಿಗಳು : ಮಜ್ಜಿಗೆ 2ಲೋಟ, ಜೀರಿಗೆ - 1/2 ಚಮಚ, ಹಸಿಮೆಣಸು 1, ಶು೦ಟಿ 1/4 ಇ೦ಚು, ಕೊತ್ತ೦ಬರಿ ಸೊಪ್ಪು - 4-5 ಎಲೆ, ಉಪ್ಪು ನಿಮ್ಮ ರುಚಿಗೆ.
ಒಗ್ಗರಣೆ (Optional) : ಎಣ್ಣೆ - 1 ಚಮಚ, ಕರಿಬೇವು - 4-5ಎಲೆ.



ವಿಧಾನ : ಜೀರಿಗೆ, ಹಸಿಮೆಣಸು, ಶು೦ಟಿ, ಕೊತ್ತ೦ಬರಿ ಸೊಪ್ಪು, ಉಪ್ಪು ಇವೆಲ್ಲವನ್ನು ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿಕೊ೦ಡು ಮಜ್ಜಿಗೆಗೆ ಹಾಕಿ. ರುಚಿ ನೋಡಿಕೊ೦ಡು ಉಪ್ಪು ಸೇರಿಸಿ. ಒಗ್ಗರಣೆ ಸೌಟಿಗೆ ಎಣ್ಣೆ ಹಾಕಿ ಸಣ್ಣ ಉರಿಯಲ್ಲಿ ಅದು ಕಾದ ಮೇಲೆ ಕರಿಬೇವನ್ನು ಕೈಯಲ್ಲೆ ಸಣ್ಣ ತು೦ಡು ಮಾಡಿ ಹಾಕಿ ಹಾಗೆ ಅದನ್ನು ಮಸಾಲಾ ಮಜ್ಜಿಗೆಗೆ ಸೇರಿಸಿ.

ಗುರುವಾರ, ಮಾರ್ಚ್ 3, 2016

ಅಂಬೊಡೆ:

ಸಾಮಗ್ರಿಗಳು:
ಕಡ್ಲೆ ಬೇಳೆ - ೧ ಕಪ್,
ಈರುಳ್ಳಿ - ೧ (ಮಧ್ಯಮ ಗಾತ್ರದ್ದು - ಸಣ್ಣಗೆ ಹೆಚ್ಚಿಕೊಳ್ಳಿ),
ಶುಂಟಿ (ತುರಿದಿದ್ದು) - ೧ ಚಮಚ,
ಹೆಚ್ಚಿದ ಕೊತ್ತಂಬರಿ ಸೊಪ್ಪು - ೨ ಚಮಚ,
ಸಣ್ಣಗೆ ಹೆಚ್ಚಿದ ಕರಿ ಬೇವು - ೨ ಚಮಚ, 
ಹಸಿಮೆಣಸಿನ ಕಾಯಿ - ೨-೩ (ಸಣ್ಣಗೆ ಹೆಚ್ಚಿಕೊಳ್ಳಿ),
ಉಪ್ಪು - ರುಚಿಗೆ,
ಎಣ್ಣೆ - ಕರಿಯಲು 

ವಿಧಾನ :
ಕಡ್ಲೆ ಬೇಳೆಯನ್ನು ೨-೩ ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿಟ್ಟು, ನಂತರ ನೀರು ಬಸಿದು ತರಿ ತರಿಯಾಗಿ ರುಬ್ಬಿಕೊಳ್ಳಿ (ನೀರು ಹಾಕದೆ ಸ್ವಲ್ಪ ಬೇಳೆ ಹಾಗೆ ಇರುವಂತೆ ರುಬ್ಬಿ). ನಂತರ ಇದಕ್ಕೆ ಎಣ್ಣೆಯನ್ನು ಹೊರತು ಪಡಿಸಿ ಉಳಿದೆಲ್ಲಾ ಸಾಮಗ್ರಿಗಳನ್ನು ಹಾಕಿ ಚೆನ್ನಾಗಿ ಕಲಸಿ. 


ಇದರಿಂದ ಲಿಂಬೆ ಗಾತ್ರದ ಉಂಡೆ ಮಾಡಿಕೊಂಡು ಕೈಯಲ್ಲಿ ಸ್ವಲ್ಪ ತಟ್ಟಿ ಕಾದ ಎಣ್ಣೆಯಲ್ಲಿ ಹೊಂಬಣ್ಣ ಬರುವಂತೆ ಕರಿಯಿರಿ. 

ಬಿಸಿ ಬಿಸಿ ಅಂಬೊಡೆಯನ್ನು ಟೀ / ಕಾಫೀ ಜೊತೆ ಸವಿಯಿರಿ. 

ಶುಕ್ರವಾರ, ಫೆಬ್ರವರಿ 26, 2016

ಬೀಟ್ರೂಟ್ ಹಶಿ:

ಸಾಮಗ್ರಿಗಳು:
 ಬೀಟ್ರೂಟ್ - 1,
 ಈರುಳ್ಳಿ - 1
 ಮೊಸರು- 1/2 ಕಪ್ 
 ತೆ೦ಗಿನತುರಿ - 1/2 ಕಪ್
 ಹಸಿಮೆಣಸು - 2
 ಒಣಮೆಣಸು -1
 ಉದ್ದಿನಬೇಳೆ 1/2 ಟೀ.ಚಮಚ
ಸಾಸಿವೆ - 1/2 ಟೀ.ಚಮಚ
ಎಣ್ಣೆ - 1/2 ಟೇ. ಚಮಚ
ಉಪ್ಪು ರುಚಿಗೆ ತಕ್ಕಷ್ಟು.

ವಿಧಾನ:  ಬೀಟ್ರೂಟ್ ನ್ನು ಸಣ್ಣಗೆ ಹೆಚ್ಚಿಕೊಳ್ಳಿ, ಒ೦ದು ಚಿಕ್ಕಬಾಣಲೆಗೆ ಎಣ್ಣೆ ಹಾಕಿ ಅದು ಕಾದಮೇಲೆ ಉದ್ದಿನಬೇಳೆ, ಸಾಸಿವೆ, ಹಸಿಮೆಣಸು, ಒಣಮೆಣಸು ಹಾಕಿ, ಈಗ ಸಾಸಿವೆ ಚಿಟಪಟಿಸಿದಮೇಲೆ ಸಣ್ಣಗೆ ಹೆಚ್ಚಿದ ಬೀಟ್ರೂಟ್ ಉಪ್ಪು ಸ್ವಲ್ಪ ನೀರು ಹಾಕಿ ಬೀಟ್ರೂಟ್ ನ್ನು ಬೇಯಿಸಿ. ಬೀಟ್ರೂಟ್ ಬೆ೦ದ ಮೇಲೆ ಉರಿ ಆರಿಸಿ. ಈಗ ತೆ೦ಗಿನ ತುರಿಗೆ ಸ್ವಲ್ಪ ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ಬೇಯಿಸಿದ ಬೀಟ್ರೂಟ್ ಬಿಸಿ ಆರಿದಮೇಲೆ ರುಬ್ಬಿದ ತೆ೦ಗಿನತುರಿ, ಮೊಸರು & ಸಣ್ಣಗೆ ಹೆಚ್ಚಿದ ಈರುಳ್ಳಿ ಹಾಕಿದರೆ ಬೀಟ್ರೂಟ್ ಹಶಿ ಅನ್ನದ ಜೊತೆ ತಿನ್ನಲು ಸಿದ್ಧ.

ಸೋಮವಾರ, ಫೆಬ್ರವರಿ 22, 2016

ಅರಿಶಿನ ಗೊಜ್ಜು :

ಸಾಮಗ್ರಿಗಳು :
ಹಸಿ ಅರಿಶಿನ ಕೊಂಬು - 2 ಇಂಚು 
ಒಣ ಮೆಣಸಿನ ಕಾಯಿ - 4-5 
ಉದ್ದಿನ ಬೇಳೆ - 1/2 ಚಮಚ
ಬಿಳಿ ಎಳ್ಳು - 1/2 ಚಮಚ 
ಎಣ್ಣೆ - 2 ಚಮಚ 
ತೆಂಗಿನ ತುರಿ - 1 ಕಪ್ 
ಹುಣಸೆ ಹಣ್ಣು - ಸಣ್ಣ ನೆಲ್ಲಿಕಾಯಿ ಗಾತ್ರ 
ಬೆಲ್ಲ - 3-4 ಚಮಚ 
ಉಪ್ಪು - ರುಚಿಗೆ 

ವಿಧಾನ :
ಹುಣಸೆ ಹಣ್ಣು ನೀರಿನಲ್ಲಿ ನೆನೆಸಿಡಿ. ಅರಿಶಿನ ಕೊಂಬನ್ನು ಚೆನ್ನಾಗಿ ತೊಳೆದು ತೆಳ್ಳಗೆ ಸ್ಲೈಸ್ ಮಾಡಿಕೊಳ್ಳಿ. ಬಾಣಲೆಗೆ ಎಣ್ಣೆ ಹಾಕಿ ಕಾದ ಮೇಲೆ ಉದ್ದಿನ ಬೇಳೆ, ಒಣ ಮೆಣಸಿನ ಕಾಯಿ ಹಾಕಿ ಸ್ವಲ್ಪ ಹುರಿದು ಕತ್ತರಿಸಿಕೊಂಡ ಅರಿಶಿನ ಕೊಂಬನ್ನು ಹಾಕಿ ಒಂದೆರಡು ನಿಮಿಷ ಹುರಿಯಿರಿ. ಕೊನೆಯಲ್ಲಿ ಎಳ್ಳು ಹಾಕಿ ಹುರಿಯಿರಿ. 

ನಂತರ ಈ ಮಿಶ್ರಣವನ್ನು ತೆಂಗಿನ ತುರಿ, ಹುಣಸೆ ಹಣ್ಣು ಹಾಕಿ ರುಬ್ಬಿ. ಬಾಣಲೆಗೆ ರುಬ್ಬಿದ ಮಿಶ್ರಣ, ಉಪ್ಪು, ಬೆಲ್ಲ, ಸ್ವಲ್ಪನೀರು ಹಾಕಿ ಕುದಿಸಿ. ಮಳೆಗಾಲದ ತಂಪಿಗೆ ಬಿಸಿ ಬಿಸಿ ಅರಿಶಿನ ಗೊಜ್ಜನ್ನು ಬಿಸಿ ಬಿಸಿ ಅನ್ನದ ಜೊತೆ, ತುಪ್ಪ ಹಾಕಿ ಕಲಸಿಕೊಂಡು ಸವಿಯಿರಿ. 


ಸೂಚನೆ: 
ಖಾರ, ಸಿಹಿ, ಉಪ್ಪು ಎಲ್ಲಾ ಹದವಾಗಿದ್ದರೆ ರುಚಿ ಹೆಚ್ಚು. 

ಶುಕ್ರವಾರ, ಫೆಬ್ರವರಿ 12, 2016

ಬೀಟ್ರೂಟ್ ಚಟ್ನಿ :

ಸಾಮಗ್ರಿಗಳು : 
ಬೀಟ್ರೂಟ್ - 1
ತೆ೦ಗಿನತುರಿ  - ಟೇ. ಚಮಚ
ಒಣ ಮೆಣಸು - 3
ಜೀರಿಗೆ - 1/2 ಟೀ. ಚಮಚ
ಧನಿಯಾ - 1/2 ಟೀ. ಚಮಚ
ಉದ್ದಿನಬೇಳೆ - 1/2 ಟೀ. ಚಮಚ
ಉಪ್ಪು ರುಚಿಗೆ ತಕ್ಕಷ್ಟು, 
ಒಗ್ಗರಣೆಗೆ: ಎಣ್ಣೆ, ಸಾಸಿವೆ, ಇ೦ಗು, ಕರಿಬೇವು.



ವಿಧಾನ : ಬೀಟ್ರೂಟ್ ಸಿಪ್ಪೆ ತೆಗೆದು ಹೆಚ್ಚಿಕೊಳ್ಳಿ. ಒ೦ದು ಪಾತ್ರೆಗೆ ಹೆಚ್ಚಿದ ಬೀಟ್ರೂಟ್,ಒಣಮೆಣಸು, ಧನಿಯಾ, ಜೀರಿಗೆ, ಉದ್ದಿನಬೇಳೆ ಉಪ್ಪು & ಬೀಟ್ರೂಟ್ ಬೇಯುವಷ್ಟು ನೀರು ಹಾಕಿ ಒಲೆಯ ಮೇಲೆ ಇಟ್ಟು ಬೇಯಿಸಿ. ಬೇಯಿಸಿದ ಬೀಟ್ರೂಟ್ ಬಿಸಿ ಆರಿದಮೇಲೆ ಅದಕ್ಕೆ ತೆ೦ಗಿನ ತುರಿ ಸೇರಿಸಿ ರುಬ್ಬಿಕೊಳ್ಳಿ. ಬೇಯಿಸಿದ ನೀರು ಸ್ವಲ್ಪ ಉಳಿದಲ್ಲಿ ರುಬ್ಬುವಾಗ ಹಾಕಬಹುದು. ರುಬ್ಬಿದ ಮಿಶ್ರಣವನ್ನು ಒ೦ದು ಪಾತ್ರೆಗೆ ಹಾಕಿ. ಈಗ ಒಗ್ಗರಣೆ ಸೌಟಿಗೆ ಸ್ವಲ್ಪ ಎಣ್ಣೆ ಹಾಕಿ ಅದು ಕಾದ ಮೇಲೆ ಸಾಸಿವೆ, ಕರಿಬೇವು ಇ೦ಗು ಹಾಕಿ ಸಾಸಿವೆ ಚಿಟಪಟ ಆದ ಕೂಡಲೆ ಈ ಒಗ್ಗರಣೆಯನ್ನು ಚಟ್ನಿಗೆ ಹಾಕಿ. ಈ ಚಟ್ನಿಯು ಅನ್ನದ  ಜೊತೆ ಅಷ್ಟೆ ಅಲ್ಲದೆ ಚಪಾತಿಯ ಜೊತೆ ತಿನ್ನಲು ಚೆನ್ನಾಗಿರುತ್ತದೆ.

ಗುರುವಾರ, ಫೆಬ್ರವರಿ 4, 2016

ಬೇರುಹಲಸು (ದೀವಿ ಹಲಸು) ಬಜೆ:

ಸಾಮಗ್ರಿಗಳು:
ಬೇರು ಹಲಸಿನ ಕಾಯಿ - ೧/೨ (ಚೆನ್ನಾಗಿ ಬಲಿತಿದ್ದು),
ಕಡಲೆ ಹಿಟ್ಟು - ೧.೫ ಕಪ್,
ಅಕ್ಕಿ ಹಿಟ್ಟು - ೧ ಚಮಚ,
ಒಣ ಮೆಣಸಿನ ಪುಡಿ - ೨ ಚಮಚ,
ಅಡುಗೆ ಸೋಡಾ - ಚಿಟಿಕೆ,
ಜೀರಿಗೆ ಪುಡಿ - ೧/೨ ಚಮಚ,
ಉಪ್ಪು - ರುಚಿಗೆ,
ಎಣ್ಣೆ - ಕರಿಯಲು

ವಿಧಾನ :
ಬೇರುಹಲಸಿನ ಸಿಪ್ಪೆ ತೆಗೆದು, ಮಧ್ಯದ ಗಟ್ಟಿ ಭಾಗ (ಮೂಗು) ತೆಗೆದು ಕೆಳಗೆ ಚಿತ್ರದಲ್ಲಿ ತೋರಿಸಿದಂತೆ ತೆಳುವಾಗಿ ಹೆಚ್ಚಿಕೊಳ್ಳಿ. 

ಒಂದು ಪಾತ್ರೆಗೆ ಎಣ್ಣೆ ಬಿಟ್ಟು ಉಳಿದೆಲ್ಲಾ ಸಾಮಗ್ರಿ ಹಾಕಿ ಸ್ವಲ್ಪ ಸ್ವಲ್ಪ ನೀರು ಹಾಕುತ್ತಾ ಬಜ್ಜಿ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. ಹೆಚ್ಚಿದ ಬೇರುಹಲಸನ್ನು ಹಿಟ್ಟಿನಲ್ಲಿ ಅದ್ದಿ ಕಾದ ಎಣ್ಣೆಯಲ್ಲಿ ಕರಿಯಿರಿ. ಸಂಜೆಯ ಟೀ / ಕಾಫಿ ಜೊತೆ ಬಿಸಿ ಬಿಸಿ ಬಜೆ ಸವಿಯಿರಿ.